तरुणीने प्रियकरासोबत मिळून भावी पतीला 400 फूट खोल दरीत ढकलले; नोव्हेंबरमध्ये होते लग्न
पुणे- ट्रेकर आणि व्यावसायिक केतन विशाल अग्रवाल मृत्यू प्रकरणात पोलिसांनी मंगळवारी त्याची होणारी पत्नी सिया गोयल (२०) आणि तिचा प्रियकर चेतन चौधरी (२२) यांना अटक केली. दोघांवर नियोजित कट रचून केतनची हत्या केल्याचा आरोप आहे.
केतन अग्रवाल १८ जून रोजी आपल्या होणाऱ्या पत्नीसोबत ट्रेकिंगला गेले होते. नंतर त्यांचा मृतदेह दरीतून सापडला होता. पोलिसांनुसार, सिया आणि तिच्या प्रियकराने पुण्यातील लोहगड किल्ल्यावरून केतनला सुमारे ४०० फूट खोल दरीत ढकलले होते. नंतर याला अपघात भासवण्याचा प्रयत्न केला.
२६ वर्षीय केतन पुणे जिल्ह्यातील गहुंजे येथील रहिवासी होते आणि कुटुंबाच्या रिअल इस्टेट कंपनीत संचालक होते. तर सिया पुण्यातील एका मसाला व्यापाऱ्याची मुलगी आहे. या दोघांचे या वर्षी राजस्थानमधील उदयपूर येथील एका पॅलेसमध्ये लग्न होणार होते.
दरम्यान, राजा रघुवंशी यांच्या हत्येचा आरोप त्यांची पत्नी सोनम रघुवंशीवर आहे. सोनमने देखील आपल्या प्रियकरासोबत मिळून पती राजा रघुवंशीला शिलाँगमध्ये एका दरील ढकलून हत्या केली होती. यानंतर पोलिसांनी तिला अटक करून तुरुंगात पाठवले होते. सध्या सोनम जामीनावर बाहेर आहे.
पत्नीचा प्री-बर्थडे साजरा करण्यासाठी केतन गेला होता
पुणे ग्रामीणचे पोलिस अधीक्षक संदीपसिंह गिल यांनी दिलेल्या माहितीनुसार, केतन १८ जून रोजी सकाळी आपल्या मंगेतरसोबत तिचा प्री-बर्थडे साजरा करण्यासाठी लोहगड किल्ल्यावर गेले होते. सकाळी सुमारे १०.३० वाजण्याच्या सुमारास ते दरीत कोसळले.
घटनेची माहिती मिळताच स्थानिक नागरिक, पोलिस आणि बचाव पथकाने शोधमोहीम राबवून त्याच दिवशी केतन यांचा मृतदेह बाहेर काढला. सुरुवातीला पोलिसांनी दिलेल्या माहितीनुसार, लोहगड किल्ल्यावर जोरदार वाऱ्यामुळे फोटो काढताना केतन यांचा तोल जाऊन ते दरीत पडल्याचे सांगण्यात आले होते.
दरम्यान, मंगेतर सियानेही पोलिसांना दिलेल्या जबाबात केतन यांचा पाय घसरल्याने ते दरीत कोसळल्याचे म्हटले होते. तिच्या या जबाबाच्या आधारे पोलिसांनी सुरुवातीला आकस्मिक मृत्यूची (ADR) नोंद केली होती.
मात्र, मृत्यूभोवतीच्या परिस्थिती संशयास्पद वाटू लागल्याने पोलिसांनी तपासाची दिशा बदलली आणि प्रकरणाचा अधिक सखोल तपास सुरू केला.
शाही लग्नासाठी उदयपूरमध्ये पॅलेस, 2 चार्टर्ड विमाने बुक केली होती
मात्र, मृत्युच्या परिस्थिती संशयास्पद वाटत होत्या. तपासात असे समोर आले की, केतन आणि सियाचे लग्न याच वर्षी नोव्हेंबरमध्ये शाही पद्धतीने होणार होते. दोन्ही कुटुंबांकडून लग्नाची तयारीही सुरू झाली होती.
दोघांच्या लग्नासाठी राजस्थानमधील उदयपूर येथे एक पॅलेस बुक करण्यात आला होता. पाहुण्यांसाठी दोन चार्टर्ड खाजगी विमानांची व्यवस्थाही करण्यात आली होती. मीडिया रिपोर्ट्सनुसार, लग्नावर सुमारे १७ कोटी रुपये खर्च होण्याचा अंदाज होता.
सियाला लग्न करायचे नव्हते, प्रियकरासोबत आखली योजना
पोलिसांच्या माहितीनुसार, तपासात असे समोर आले की, सिया गोयलचे पुण्यातील कोंढवा येथील रहिवासी चेतन चौधरीसोबत प्रेमसंबंध होते. सियाला केतनशी लग्न करायचे नव्हते आणि तिला वाटत होते की केतन तिच्या आणि चेतनच्या नात्यात अडथळा बनला आहे.
पोलिसांच्या माहितीनुसार, दोघांनी मिळून केतनच्या हत्येचा कट रचला. योजनेनुसार, सिया केतनला फिरण्याच्या बहाण्याने लोहगड किल्ल्यावर घेऊन गेली. नंतर चेतनलाही तिथे बोलावण्यात आले. यानंतर दोघांनी केतनला किल्ल्यावरून खाली ढकलून दिले.
चेतनच्या चौकशीनंतर सियाला अटक
संशयाच्या आधारावर स्थानिक गुन्हे शाखेने चेतनला ताब्यात घेतले. चेतनच्या चौकशीनंतर सिया गोयललाही अटक करण्यात आली. पोलिसांनी सांगितले की, केतनचे वडील विशाल अग्रवाल यांच्या तक्रारीवरून मंगळवारी हत्या आणि गुन्हेगारी कट रचल्याचा गुन्हा दाखल करण्यात आला.
स्थानिक गुन्हे शाखेने तातडीने कारवाई करत आरोपी चेतन बाबूलाल चौधरी (रा. पार्श्वनगर, कोंढवा बु.) आणि सिया प्रवीण गोयल (रा. लिलाकुंज, न्यू एरा सोसायटी, गंगाधाम समोर, बिबवेवाडी) या दोघांना ताब्यात घेऊन अटक केली आहे.
ही कारवाई पोलिस अधीक्षक संदीप सिंह गिल्ल, अप्पर पोलिस अधीक्षक शुभम कुमार, आणि उपविभागीय पोलिस अधिकारी गजानन टोणपे यांच्या मार्गदर्शनाखाली स्थानिक गुन्हे शाखेचे पोलिस निरीक्षक प्रमोद क्षीरसागर, लोणावळा ग्रामीणचे पोलिस निरीक्षक दिनेश तायडे, सहाय्यक पोलिस निरीक्षक अभिजित सावंत, मनोज पवार आणि पोलिस पथकाने यशस्वीरीत्या पार पाडली
पोलिस आता घटनेची संपूर्ण साखळी जोडण्यात, न्यायवैद्यक पुरावे गोळा करण्यात आणि कटात आणखी कोणी सामील होते का? याचा शोध घेत आहेत.
