पुणे, : एकल महिलांना नियमित मार्गदर्शन देण्यात यावे. त्यांच्या बाबत सुरु असलेल्या अमानवी प्रथा मंगळसूत्र काढणे , टिकली न लावणे यासारख्या प्रथा बंद झाल्या पाहिजेत. एकल महिलांना विकासात समान संधीसाठी सर्वांनी दृष्टिकोन सुधारावा, असे आवाहन पुण्याच्या महापौर मंजुषा नागपुरे यांनी यावेळी बोलताना केले.

पुणे महानगरपालिका समाज विकास विभाग कोथरूड बावधन क्षेत्रीय कार्यालय अंतर्गत दि.23/06/2026 रोजी दत्त मंदिर, शास्त्रीनगर, कोथरूड येथे एकल महिला दिन सन्मान महिलांचा कार्यक्रम आयोजित करण्यात आला. त्यावेळी त्या बोलत होत्या.

महिला बाल कल्याण समिती अध्यक्षा अल्पना वरपे यांनी ‘एकल महिलांना समाजामध्ये मानाचे स्थान दिले गेले पाहिजे, तसेच मुख्य प्रवाहात अन्यासाठी आपण सगळ्यांनीच प्रयत्नशील राहिले पाहिजे’ या विषयी मार्गदर्शन केले.

एकता ग्राम विकास संस्थेचे नंदकिशोर लोंढे यांनी राज्य स्तरावर काम सुरु असलेल्या एकल महिला विकास समिती विषयी महिलांना माहिती दिली.

यावेळी बोलताना समाज विकास विभागाच्या उपायुक्त आशा राऊत यांनी एकल महिलांच्या विकासासाठी महापालिका कायम दक्ष राहणार असल्याचे सांगितले तसेच महिला सन्मान कार्यक्रम संपूर्ण पुणे शहरात 15 क्षेत्रीय कार्यालयांमध्ये घेण्यात आल्याचे माहिती दिली.

सदर कार्यक्रमासाठी पुणे शहराचे महापौर मंजुषा नागपुरे, अल्पना वरपे अध्यक्षा, महिला बाल कल्याण समिती, वासंती जाधव, प्रभाग समिती अध्यक्ष कोथरूड क्षेत्रीय कार्यालय, रूपाली पवार नगरसेविका,समाज विकास विभागाच्या उपायुक्त आशा राऊत, मुख्य समाज विकास अधिकारी रामदास चव्हाण तसेच समुपदेशिका, अनुराधा जगताप सर्व समूह संघटिका मनिषा वाघ, शीतल ठोसर, स्वाती ढगे, विजया हिंगणे निजाम शेख, सेवा केंद्र मुख्य समन्वयक विजय पाटोळे, संगीता निकम तसेच कोथरूड भागातील सर्व महिला व एकल महिला साधारण 200 ते 350 महिला सदर कार्यक्रमासाठी उपस्थित होत्या.

यावेळी श्रीमती भाग्यश्री साळुंखे ॲड.प्रीती परांजपे यांनी एकल महिलांची सामाजिक स्थिती व कायदे व हक्क या विषयावर महिलांसाठी मार्गदर्शन केले.

यावेळी महिलांना शासन योजना, आयुष्मान भारत योजना, आभा कार्ड लाइट हाऊस व योजक संस्था मार्फत विविध कोर्स, विषयक माहिती देण्यात आली.

तसेच उपस्थित एकल महिलांचा सत्कार करून रामदास चव्हाण यांनी आभार मानले व सूत्रसंचालन अनुराधा जगताप यांनी केले.

उपस्थिताना अल्पोपहार देऊन एकल महिला सन्मान दिन साजरा करण्यात आला.

पुणे दि. २४ :भारत सरकारच्या सहकार मंत्रालयाच्या स्थापनेला पाच वर्षे पूर्ण झाल्याच्या निमित्ताने दि. २९ जून ते ६ जुलै २०२६ या कालावधीत सहकारी सप्ताह साजरा करण्यात येणार आहे. यावेळी महाराष्ट्र राज्य सहकारी संघ मर्या., पुणे आणि सहकार खाते, महाराष्ट्र शासन यांच्या संयुक्त विद्यमाने विविध जनजागृती कार्यक्रमांचे आयोजन करण्यात आले आहे.

सहकारातून समृद्धी, सहकारी चळवळीचे राष्ट्रविकासातील योगदान तसेच सहकार मंत्रालयाच्या विविध उपक्रमांची माहिती नागरिकांपर्यंत पोहोचविणे हा या सप्ताहाचा उद्देश आहे.

हा सप्ताह २९ जून रोजी सहकारी सप्ताह शुभारंभ व प्रतिज्ञा दिन, ३० जून रोजी प्राथमिक विविध कार्यकारी सेवा सहकारी संस्था परिवर्तन दिन, १ जुलै रोजी शेतकरी गौरव दिन, २ जुलै रोजी कृत्रिम बुद्धिमत्ता व तंत्रज्ञान दिन, ३ जुलै रोजी महाविद्यालयीन विद्यार्थ्यांसाठी सहकार चर्चासत्र, ४ जुलै रोजी हरित सहकार दिन, ५ जुलै रोजी नवीन पिढी सहकारी दिन तसेच ६ जुलै रोजी राष्ट्रीय सहकार उत्सव दिन उपक्रमांनी साजरा करण्यात येणार आहे.

सप्ताहादरम्यान डिजिटलायझेशन, शेतकरी मेळावे, धान्य साठवण योजना, एआय तंत्रज्ञान, वृक्षलागवड मोहीम आणि युवकांचा सहकार क्षेत्रातील सहभाग वाढविण्यासाठी विशेष कार्यक्रम आयोजित करण्यात येणार असल्याची माहिती राजेंद्रकुमार दराडे, अपर निबंधक, सहकारी संस्था तथा मुख्य कार्यकारी अधिकारी, पुणे यांनी दिली.

पुणे, दि. २४ : भारत निवडणूक आयोगाच्या निर्देशाप्रमाणे मतदार याद्यांचा विशेष सखोल पुनरीक्षण कार्यक्रमास जिल्ह्यात राबविण्यास सुरुवात झाली आहे. याकरिता सुमारे ८ हजार ४१७ बीएलओ आणि विविध राजकीय पक्षांचे ४ हजार ५५७ मतदान केंद्रस्तरीय प्रतिनिधी (बीएलए)या प्रक्रियेत सहभागी होणार आहेत. तथापि अद्यापही विधानसभा मतदारसंघामध्ये काही राजकीय पक्षांनी मतदान केंद्रस्तरीय प्रतिनिधींची नेमणूक केलेली नाही, तरी एसआयआर प्रकियेची संपूर्ण माहिती होण्याच्यादृष्टीने राजकीय पक्षांनी मतदान केंद्रस्तरीय प्रतिनिधींची लवकरात लवकर नेमणूक करावी, असे आवाहन उपजिल्हा निवडणूक अधिकारी मीनल कळसकर यांनी केले.

मतदार याद्यांच्या विशेष सखोल पुनरीक्षण (एसआयआर) कार्यक्रमाच्या अनुषंगाने जिल्हाधिकारी कार्यालय येथे आयोजित राजकीय पक्षांसोबतच्या बैठकीत त्या बोलत होत्या. यावेळी तहसीलदार शीतल मुळे-भामरे, स्वप्नील खोल्लम यांच्यासह राष्ट्रीय कॉग्रेस पक्ष, भारतीय जनता पार्टी, राष्ट्रवादी कॉग्रेस पार्टी (शरदचंद्र पवार), राष्ट्रवादी कॉग्रेस पार्टी (अजित पवार), महाराष्ट्र नवनिर्माण सेना, नॅशनल पिपल्स पार्टीचे पदाधिकारी उपस्थित होते.

श्रीमती कळसकर म्हणाल्या, जिल्हाधिकारी जितेंद्र डुडी यांच्या सूचनेप्रमाणे एसआयआर कार्यक्रमाच्या अनुषंगाने केलेल्या कार्यवाहीबाबत माहिती देण्यासाठी प्रत्येक बुधवारी राजकीय पक्षांसोबत जिल्हाधिकारी कार्यालयात बैठकीचे आयोजन करण्यात आले आहे. या कार्यक्रमांतर्गत २९ जूनपर्यंत मतदान केंद्रस्तरीय अधिकाऱ्यांना (बीएलओ) प्रशिक्षण व गणना अर्ज छपाई करण्याचे नियोजन करण्यात आले असून त्यानुसार कार्यवाही सुरु आहे. राजकीय पक्षांनाही या प्रकियेबाबत सुरुवातीपासूनच विस्तृत माहिती देण्याकरिता लवकरच जिल्ह्यात प्रशिक्षण सत्राचे आयोजन केले जाणार आहे. या प्रशिक्षण सत्राच्या माध्यमातून विविध राजकीय पक्षांच्या मतदान केंद्रस्तरीय प्रतिनिधींना एसआयआर प्रकिेयेबाबत माहिती देण्यात येणार आहे. त्यामुळे राजकीय पक्षांनी लवकरात लवकर बीएलएची नेमणूक करावी जेणेकरुन बीएलओ आणि बीएलए संयुक्तरित्या बैठक घेवून ही संपूर्ण प्रक्रिया समजून घेणार आहे.

एसआयआरच्या अनुषंगाने सुनावणी घेण्याकरिता जिल्ह्यात 21 मतदार नोंदणी अधिकारी आणि 544 सहायक मतदार नोंदणी अधिकाऱ्यांची नेमणूक करण्यात आली आहे. राजकीय पक्षांनी ‘ईसीआय नेट’ (ECINET) ॲप्लिकेशन डाऊनलोड करुन घ्यावे. विविध माध्यमांद्वारे एसआयआरबाबत जनजागृती करण्यात येईल, निवडणूक आयोगाने ही प्रक्रिया पूर्णपणे निष्पक्ष आणि पारदर्शक पद्धतीने राबविली जाईल तसेच कोणत्याही पात्र मतदाराचे नाव वगळले जाणार नाही, अशी ग्वाही श्रीमती कळसकर यांनी यावेळी दिली.

यावेळी राजकीय पक्षांच्या प्रतिनिधींनी विधानसभा मतदारसंघ निहाय अनमॅपिग मतदार यादीची मागणी केली असता ती लवकरच उपलब्ध करुन देण्यात येईल, असे श्रीमती कळसकर यांनी सांगितले.

पुणे, दि. २४ जून २०२६ : संरक्षण मंत्रालयाच्या संरक्षण उत्पादन विभाग, भारत सरकार यांच्या वतीने “संरक्षण उत्पादनातील आत्मनिर्भरतेवरील राष्ट्रीय स्तरावरील विभागीय शिखर परिषद” या एकदिवसीय कार्यशाळेचे आयोजन २५ जून २०२६ रोजी सकाळी ११ वाजता कौन्सिल हॉल, विभागीय आयुक्त कार्यालय, विधान भवन, पुणे येथे करण्यात आले आहे.

सदर कार्यशाळेचे अध्यक्षस्थान संरक्षण उत्पादन विभागाचे सचिव भूषविणार असून, केंद्र सरकार, राज्य सरकार आणि खासगी उद्योग यांच्यात समन्वय साधून देशातील संरक्षण उत्पादन क्षमता अधिक बळकट करणे हा या उपक्रमाचा मुख्य उद्देश आहे. कार्यशाळेत घटक-स्तरीय उत्पादन , नवसंशोधन आणि स्वदेशीकरण यांना चालना देणाऱ्या धोरणांवर चर्चा होणार आहे. तसेच संरक्षण क्षेत्रातील आत्मनिर्भरतेचा राष्ट्रीय दृष्टिकोन, केंद्र व राज्य शासनातील समन्वय, प्रादेशिक पायाभूत सुविधांचा विस्तार आणि उद्योग क्षेत्रातील संधी यावरही विचारमंथन करण्यात येणार आहे.

पुणे विभागातील संरक्षण क्षेत्राशी संबंधित उद्योग, घटक उत्पादक आणि भागधारकांना या परिषदेत सहभागी होण्याचे आवाहन पुणे विभागाचे उद्योग सहसंचालक संदीप रोकडे यांनी केले आहे.

पुणे: पिंपरी – चिंचवड पोलीस आयुक्तालयाच्या कार्यक्षेत्रात शांतता व सुव्यवस्था राखणेकामी पोलीस सह आयुक्त, सारंग आवाड यांनी प्राप्त अधिकाराचा वापर करुन व महाराष्ट्र पोलीस अधिनियम सन 1951 चे कलम 37 (1) व (3) अन्वये प्राप्त झालेल्या अधिकारांचा वापर करुन पिंपरी – चिंचवड पोलीस आयुक्तालयाच्या कार्यक्षेत्रात 24 जून 2026 रोजी 00.01 पासून ते 7 जुलै 2026 रोजी 24 वाजेपर्यंत खाली नमूद केलेली कृत्य करण्यास या आदेशान्वये मनाई करीत आहे.

कोणताही दाहक पदार्थ अथवा स्फोटक पदार्थ द्रव्य बरोबर नेणे. दगड अथवा शस्त्रे किवा अस्खे सोडावयाची अस्त्रे किंवा फेकावयाची हत्यारे अगर साधने बरोबर नेणे. शस्त्रे, सोटे, भाले, तलवारी, दंड, काठ्या, बंदुका व शारिरीक इजा करण्यासाठी वापरात येईल अशी कोणतीही वस्तू बरोबर नेणे. कोणत्याही इसमाचे चित्राचे प्रतिकात्मक प्रेताचे किंवा पुढा-यांचे चित्राचे प्रतिमेचे प्रदर्शन व दहन करणे. मोठ्याने अर्वाच्य घोषणा देणे, वाद्य वाजविणे. ज्यामुळे सभ्यता अगर नितिमत्ता यास धोका पोहचेल किवा राज्याची सुरक्षितता धोक्यात येईल किंवा राज्य उलथवून देण्यास प्रवृत्त करेल अशी आवेशपूर्ण भाषणे करणे किवा अविर्भाव करणे कोणतेही जिन्नस तयार करुन त्याचा जनतेत प्रसार करणे. ज्या योगे वरील परिसरात कायदा व सुव्यवस्था धोक्यात येईल अशा पध्दतीने कलम 37(1) व (3) विरुध्द वर्तन करणे. कलम 37 चे पोटकलम (3) अन्वये पाच पेक्षा जास्त लोकांचा जमाव करणे, तसेच पोलीस आयुक्त, पिंपरी चिंचवड यांचे पुर्व परवानगी शिवाय सभा घेणे किंवा मिरवणुका काढणेस बंदी घालण्यात येत आहे.

वरील संपूर्ण आदेश हा शासनाच्या सेवेतील व्यक्तींना व ज्यांना आपल्या वरीष्ठांच्या आदेशानुसार कर्तव्यपुर्तीसाठी हत्यार वाळगणे आवश्यक आहे व त्याबबात परवानगी आहे त्यांना लागू होणार नाही.

या आदेशाचे उल्लंघन केल्यास संबंधित व्यक्ती महाराष्ट्र पोलीस अधिनियम सन 1951 चे कलम 135 प्रमाणे शिक्षेस पात्र होईल.

-आमदार सिद्धार्थ शिरोळे यांची मागणी

पुणे : विविध सामाजिक संस्थांची मागणी लक्षात घेऊन पुणे शहरात अन्न औषध प्रशासनाचे (एफडीए) स्वतंत्र कार्यालय लवकरात लवकर सुरू करावे, अशी मागणी आमदार सिद्धार्थ शिरोळे यांनी आज (बुधवारी) विधानसभेत लक्षवेधी सूचनेद्वारे केली.

आयटी आणि शैक्षणिक केंद्र असलेल्या पुणे शहरात अन्न औषधं प्रशासनाचे स्वतंत्र हक्काचे कार्यालय नसणे ही अत्यंत गंभीर बाब आहे. रिक्त पदे तातडीने भरून पुण्यात कार्यालय सुरू करावे, अशी ३० हून अधिक सामाजिक संस्थांची मागणी आहे. त्यामुळे पुणे शहरात अन्न औषधं प्रशासनाचे स्वतंत्र हक्काचे कार्यालय लवकरात लवकर सुरू करावे, अशी मागणी आमदार सिद्धार्थ शिरोळे यांनी केली.

आमदार सिद्धार्थ शिरोळे यांची
कारवाईची मागणी

पुणे : खाजगी ट्रॅव्हल्स ऑपरेटर्सच्या दलालांची शिवाजीनगर एसटी स्टँड परिसरात प्रचंड दहशत आहे. त्याचा त्रास प्रवासी आणि परिवहन खात्याला होत असल्याने एजंट विरोधात कठोर कारवाई करावी, अशी मागणी आमदार सिद्धार्थ शिरोळे यांनी विधानसभेत प्रश्नोत्तराच्या तासात आज (मंगळवारी) केली.

भाजप आमदार सिद्धार्थ अनिल शिरोळे यांनी परिवहन विभागाशी संबंधित एका महत्त्वपूर्ण आणि गंभीर विषयावर सरकारचे लक्ष वेधले.
​आमदार शिरोळे यांनी पुण्यातील शिवाजीनगर एसटी स्टँडच्या सद्यस्थितीचा उल्लेख करत खासगी ट्रॅव्हल्स ऑपरेटर्सच्या दलालांचा (एजंट्स) मुद्दा सभागृहात उपस्थित केला.

या बेकायदेशीर दलालांची एसटी स्टँड परिसरात प्रचंड दहशत निर्माण झाली असून, याचा त्रास केवळ प्रवाशांनाच नव्हे तर ‘राज्य परिवहन खात्याच्या अधिकाऱ्यांनाही सहन करावा लागत आहे, असे आमदार शिरोळे यांनी सांगितले. दलालांच्या वाढत्या प्रभावामुळे हा प्रश्न अधिक गंभीर बनत चालल्याची चिंता त्यांनी व्यक्त केली. ​

परिवहन विभागाच्या ‘भरारी पथक’ अधिक सक्षम करून दलालांवर विशेष आणि कठोर कारवाई करण्यात येईल का?, स्थानिक पोलीस कर्मचाऱ्यांसोबत नियमितपणे समन्वय साधून संयुक्त कारवाई केली जाईल का? असे प्रश्न आमदार शिरोळे यांनी उपस्थित केले.

आमदार शिरोळे यांच्या प्रश्नाला उत्तर देताना परिवहन मंत्री प्रताप सरनाईक यांनी स्पष्टपणे सांगितले की, अशा प्रकारच्या दलालांविषयी कोणतीही माहिती किंवा तक्रार आल्यास भरारी पथकाला त्वरित निर्देश देऊन कठोर कारवाई केली जाईल. तसेच, बेकायदेशीर दलाल आढळल्यास त्यांना तातडीने पोलिसांच्या ताब्यात देऊन कायदेशीर कारवाई केली जाईल, असे आश्वासन मंत्री महोदयांनी सभागृहाला दिले.

योजना़च्या अटी शिथील कराव्यात
-आमदार सिद्धार्थ शिरोळे यांची मागणी

पुणे : श्रावणबाळ, संजय गांधी योजनांच्या अटी शिथील कराव्यात आणि त्या योजनांची वार्षिक उत्पन्न मर्यादा ५० हजार करावी, अशा मागण्या आमदार सिद्धार्थ शिरोळे यांनी आज (बुधवारी) औचित्याच्या मुद्द्याद्वारे विधानसभेत मांडल्या.

श्रावणबाळ योजनेअंतर्गत ज्येष्ठ नागरिकांसाठी जन्म दाखला किंवा शाळा सोडल्याचा दाखला अनिवार्य करण्यात आला आहे. परंतु ग्रामीण व दुर्गम भागातील अनेक ज्येष्ठ नागरिक अशिक्षित आहेत, तसेच त्यांचा जन्म घरी झालेला असल्याने त्यांच्याकडे जन्माची कोणतीही नोंद नाही. अनेकांनी शालेय शिक्षणच घेतले नसल्याने शाळा सोडल्याचा दाखला मिळणे अशक्य आहे. त्यामुळे ही अट शिथिल करून पूर्वीप्रमाणेच शासकीय रुग्णालयाचा वयाचा दाखला किंवा इतर वैध पुरावे ग्राह्य धरण्यात यावेत, असे आमदार शिरोळे यांनी सांगितले

संजय गांधी निराधार योजना, श्रावणबाळ सेवा योजना या संदर्भात दि.२ मार्च २०२६ रोजी शासनाने जीआर काढला आहे. त्यातील काही अटींमुळे हजारो वृद्ध, निराधार, गरीब लाभार्थी योजनांच्या लाभापासून वंचित रहातील, अशी भीती आमदार शिरोळे यांनी व्यक्त केली.

दोन्ही योजनांसाठी वार्षिक उत्पन्नाची मर्यादा केवळ रु. २१,०००/- निश्चित करण्यात आली आहे. वाढत्या महागाईच्या काळात ही मर्यादा अत्यंत जुनी आणि अव्यवहार्य ठरत आहे. यामुळे हजारो गरजू कुटुंब या योजनेतून बाद होत आहेत. ही वार्षिक उत्पन्न मर्यादा वाढवून ती किमान रु. ५०,०००/- पर्यंत करण्यात यावी, अशी मागणी आमदार सिद्धार्थ शिरोळे यांनी केली

पुण्यात रात्रभर ‘टिप टिप बरसा’ ; धरणांतील पाणीसाठा वाढीची आशा

“गेल्या वर्षी 10.44 TMC, यंदा केवळ 3.82 TMC साठा”

पुणे : दिवसभर ढगाळ वातावरणानंतर मंगळवारी सायंकाळी सुरू झालेल्या पावसाने रात्री उशिरापर्यंत शहराच्या विविध भागांत रिमझिम हजेरी लावली. काही ठिकाणी रस्त्यांवर पाणी साचल्याने वाहतुकीवर परिणाम झाला. मात्र उष्णता आणि दमट हवामानाने त्रस्त झालेल्या पुणेकरांना या पावसामुळे मोठा दिलासा मिळाला.

सकाळपासूनच शहरावर ढगांचे आच्छादन होते. दुपारच्या सुमारास हलक्या सरी कोसळल्या, तर सायंकाळनंतर पावसाने जोर धरला. मध्यवर्ती भागासह अनेक परिसरांत रात्री उशिरापर्यंत रिमझिम सुरू होती. त्यामुळे वातावरणात गारवा निर्माण झाला.

भारतीय हवामान विभागाने पुणे शहर व जिल्ह्यासाठी पुढील चार दिवस मेघगर्जना, विजांचा कडकडाट आणि पावसाची शक्यता लक्षात घेऊन ‘यलो अलर्ट’ जारी केला आहे. मंगळवारी शहराचे कमाल तापमान ३१ अंश सेल्सिअस तर किमान तापमान २४.५ अंश सेल्सिअस नोंदविण्यात आले.

धरण क्षेत्रात चांगल्या पावसाची नोंद

खडकवासला पाटबंधारे विभागाच्या माहितीनुसार बुधवारी सकाळी सहा वाजेपर्यंत खडकवासला येथे २४ मिमी, पानशेत येथे ५४ मिमी, वरसगाव येथे ५५ मिमी तर टेमघर येथे ३४ मिमी पावसाची नोंद झाली.

मात्र, अद्याप खडकवासला धरण साखळीत नवीन पाण्याची लक्षणीय आवक झालेली नसून चारही धरणांमध्ये मिळून एकूण आवक शून्य एमसीएफटी नोंदविण्यात आली आहे.

केवळ १३.१० टक्के पाणीसाठा

खडकवासला धरण साखळीतील चारही धरणांमध्ये मिळून आज अखेर ३.८२ टीएमसी (१३.१० टक्के) पाणीसाठा उपलब्ध आहे.

धरणनिहाय साठा पुढीलप्रमाणे :

• खडकवासला : ०.४४ टीएमसी (२२.४६ टक्के)
• पानशेत : १.८८ टीएमसी (१७.६३ टक्के)
• वरसगाव : १.५० टीएमसी (११.६७ टक्के)
• टेमघर : ०.०० टीएमसी (० टक्के)

गेल्या वर्षी याच दिवशी धरण साखळीत ११.२७ टीएमसी (३८.६७ टक्के) पाणीसाठा उपलब्ध होता. त्या तुलनेत यंदा पाणीसाठा लक्षणीयरीत्या कमी आहे.

पाण्याचा काटकसरीने वापर आवश्यक

राज्य सरकारच्या धोरणानुसार उपलब्ध पाणीसाठ्याचे नियोजनबद्ध व्यवस्थापन करावे लागणार आहे. त्यामुळे नागरिकांनी पाण्याचा काटकसरीने वापर करणे आवश्यक असल्याचे पाटबंधारे विभागाने स्पष्ट केले आहे.धरण क्षेत्रात सुरू झालेला पाऊस कायम राहिल्यास आगामी काळात धरणांतील पाणीसाठ्यात समाधानकारक वाढ होण्याची अपेक्षा व्यक्त केली जात आहे. त्यामुळे पुणेकरांचे लक्ष आता धरण क्षेत्रातील पावसाकडे लागले आहे.

पुणे, दि. २३ जून : मराठी रंगभूमी, साहित्य, चित्रपट आणि सांस्कृतिक क्षेत्रात दीर्घकाळ उल्लेखनीय योगदान देणारे ज्येष्ठ नाटककार, अभिनेते, दिग्दर्शक, निवेदक आणि साहित्यिक चंद्रकांत काळे यांना पुणे महानगरपालिकेचा बालगंधर्व पुरस्कार २०२६ जाहीर करण्यात आला असल्याची माहिती महापौर मंजुषा नागपुरे यांनी दिली.

चंद्रकांत काळे हे मराठी रंगभूमीवरील बहुआयामी व्यक्तिमत्त्व म्हणून ओळखले जातात. अभिनय, दिग्दर्शन, निवेदन आणि साहित्य या सर्व क्षेत्रांत त्यांनी भरीव कार्य केले आहे. अमृतगाथा, प्रियरंग, रंगवेध, श्रीमंतांची बखर यांसारख्या साहित्यकृतींसह सिंहासन, एक होता विदूषक, गंध, मुक्ता आदी चित्रपटांमध्येही त्यांनी मोलाचे योगदान दिले आहे.

पुणे महानगरपालिकेच्या बालगंधर्व पुरस्कार निवड समितीने त्यांच्या दीर्घकालीन आणि बहुआयामी योगदानाची दखल घेत हा मानाचा पुरस्कार जाहीर केला आहे.
इतर पुरस्कार विजेते
यंदाच्या बालगंधर्व पुरस्कार सोहळ्यात विविध क्षेत्रांतील मान्यवर कलाकार आणि कार्यकर्त्यांचाही सन्मान करण्यात येणार आहे.

विशेष पुरस्कार :
संगीत क्षेत्रातील ज्येष्ठ कलावंत – दीप्ती भोगले
बुकिंग क्षेत्रातील पुरस्कार – संदीप चव्हाण
दिग्दर्शन क्षेत्रासाठी – विनोद रत्ना
संगीत क्षेत्रातील उदयोन्मुख कलाकार – अनुष्का आपटे
पुरषोत्तम करंडक विजेता २०२५ – ओमकार कापसे

मागील दोन वर्षांचे प्रलंबित पुरस्कारही प्रदान करणार

कोरोना काळानंतर विविध कारणांमुळे २०२० आणि २०२१ या वर्षांतील पुरस्कार वितरण समारंभ होऊ शकला नव्हता. त्यामुळे यंदाच्या सोहळ्यात २०२० व २०२१ मधील पुरस्कार विजेत्यांचाही सन्मान करण्यात येणार आहे.

बालगंधर्व पुरस्कार सन २०२०
ज्येष्ठ कलावंत अभिनेत्री – निर्मलाताई गोगटे (मुख्य पुरस्कार)
लेखन व दिग्दर्शन – किरण यज्ञोपवीत
नाट्य व्यवस्थापन – प्रवीण बर्वे
बॅकस्टेज आर्टिस्ट – संदीप देशमुख
संगीत रंगभूमीतील योगदान – रविंद्र कुलकर्णी
नव्या पिढीला रंगभूमीची आवड निर्माण करण्यासाठी विशेष योगदान – अनुराधा राजहंस

बालगंधर्व पुरस्कार सन २०२१
शास्त्रीय संगीत गायन क्षेत्र – डॉ. रेवा नातू (मुख्य पुरस्कार )
व्हायोलित त्यानंतर क्षेत्रातील शिक्षिका व कलाकार – रमा चोभे
नाट्य व्यवस्थापन – समीर हंपी
बहू आयामी नाट्यकर्मी – प्रसाद वनारसे
बॅकस्टेज आर्टिस्ट – गणेश माळवदकर
बॉक्स थिएटर निर्मिती – प्रवीण वैद्य

पुरस्कार वितरण समारंभ
ज्येष्ठ कलाकार सुरेश साखळकर यांच्या हस्ते गुरुवार, दि. २६ जून २०२६ रोजी दुपारी ४. ०० वाजता बालगंधर्व यांच्या जयंतीनिमित्त बालगंधर्व रंगमंदिर, पुणे येथे पुरस्कार वितरण सोहळा आयोजित करण्यात आला आहे.

पुरस्कार स्वरूप

मानपत्र, स्मृतिचिन्ह, गुलाबाच्या फुलांचा हार आणि फुलांचे रोप असे पुरस्काराचे स्वरूप आहे.

या कार्यक्रमास कला, साहित्य, नाट्य व सांस्कृतिक क्षेत्रातील मान्यवर तसेच रसिक नागरिकांनी मोठ्या संख्येने उपस्थित राहावे, असे आवाहन पुणे महानगरपालिकेतर्फे महापौर मंजुषा नागपुरे यांनी केले आहे.

माजी आमदार उल्हासदादा पवार, माजी उपमहापौर डॉ. सतीश देसाई, ज्येष्ठ अभिनेत्री शुभांगी दामले, ज्येष्ठ कलाकार अनुराधा राजहंस यांचा पुरस्कार निवड समितीमध्ये समावेश होता.

:

🔴 १४ जूनचा प्रयत्न फसला… १८ जूनला झाला घात?
⚠️ तपासात नवा धक्कादायक दावा समोर
🕵️ श्रीमंताघरच्या प्रेमकहाणीचे उलगडताहेत धागेदोरे?

पुणे-लोहगड किल्ल्यावर २६ वर्षीय केतनला दरीत ढकलून त्याची हत्या केल्याप्रकरणी एक अत्यंत खळबळजनक आणि अंगावर काटा आणणारा खुलासा झाला आहे. केतनची हत्या १८ जून रोजी झाली असली, तरी त्यापूर्वी १४ जून रोजी देखील त्याची भावी पत्नी सिया गोयल हिने त्याला लोहगडवरूनच दरीत ढकलून देण्याचा प्रयत्न केला होता. मात्र, सुदैवाने एका झुडपामुळे केतन बचावला, तेव्हा सियाने ‘साप-साप’ असे ओरडत नाटक करत, केतनला मिठी मारून वेळ मारून नेली होती. हा धक्कादायक खुलासा खुद्द केतनच्या वडिलांनी केला असून, या कटात सियाचे कुटुंबीय देखील सामील असल्याचा संशय त्यांनी व्यक्त केला आहे.

केतनच्या वडिलांनी दिलेल्या माहितीनुसार, ६ जून रोजीची बालीची ट्रिप रद्द झाल्यानंतर सियाने केतनसोबत खूप भांडणे केली आणि लोहगडला जाण्याचा हट्ट धरला. त्यानुसार १४ जून रोजी केतन आणि सिया दोघेच लोहगडवर गेले होते. तिथे गेल्यावर संधी साधून सियाने पहिल्यांदा केतनला किल्ल्यावरून खाली धक्का दिला. मात्र सुदैवाने केतनच्या हाती एक झुडूप लागल्याने तो बचावला. केतन वाचल्याचे पाहताच सियाने तत्काळ ‘साप आला… साप आला’ असे ओरडत नाटक सुरू केले आणि केतनला मिठी मारली. सापाला घाबरून सियाने चुकून धक्का दिला असावा, यावर केतनने भाबडेपणाने विश्वास ठेवला. मात्र, सियाचा तो त्याला संपवण्याचा पहिला प्रयत्न होता, हे आता उघड झाले आहे.

हत्येच्या या कटाची सुरुवात जून महिन्याच्या सुरुवातीलाच झाली होती. केतनच्या वडिलांनी सांगितले की, ६ जून रोजी केतन आणि सिया प्री-वेडिंग शूटसाठी इंडोनेशियातील बाली येथे जाणार होते. विमानतळावर जाण्यासाठी निघालेल्या गाडीत केतन, सिया, केतनची बहीण आणि सियाचा भाऊ साहिल असे चौघे होते. प्रवासाला निघताना सर्वांचे पासपोर्ट, चलन आणि क्रेडिट कार्ड एकाच पाऊचमध्ये ठेवण्यात आले होते. वाटेत एका फूडमॉलवर थांबले असता, सिया ‘मोबाईल गाडीत राहिला’ असा बहाणा करून एकटीच गाडीजवळ गेली आणि परत आली. त्यानंतर विमानतळावर पोहोचल्यावर केवळ केतनचाच पासपोर्ट गायब असल्याचे निदर्शनास आले. तो खूप शोधूनही न सापडल्याने सर्वांना माघारी फिरावे लागले. सियानेच मुद्दाम तो पासपोर्ट गायब केला होता, हे आता स्पष्ट होत आहे.
१८ जून: ‘प्री-बर्थडे’च्या बहाण्याने नेऊन संपवले

केतनच्या वडिलांनी सांगितले की, १४ जूनचा प्रयत्न फसल्यानंतर, सियाने १९ जून रोजी असलेल्या तिच्या वाढदिवसाचे निमित्त साधले. ‘माझा प्री-बर्थडे साजरा करूयात’ असा हट्ट धरून तिने १८ जून रोजी केतनला पुन्हा लोहगडवर नेले. सकाळी ८.२० वाजता ते घरातून निघाले. यावेळी सियाचा प्रियकर चेतन बाबुलाल चौधरी हा त्यांच्या पाठीमागे २०-२५ फुटांवरून फिरत होता. किल्ल्यावर वर पोहोचल्यानंतर सिया आणि चेतनने संगनमत करून केतनला दरीत ढकलून दिले. पावणे अकरा वाजता सियाच्या आईने केतन दरीत पडल्याची माहिती त्याच्या कुटुंबीयांना दिली.

केतनच्या वडिलांनी सांगितले की, आम्ही लोहगडवर पोहोचलो तेव्हा स्थानिक आणि पोलिसांनी मृतदेह शोधून काढला होता. मात्र, ज्या मुलीचा भावी नवरा डोळ्यांसमोर दरीत पडून वारला आहे, तिच्या चेहऱ्यावर दुःखाचा किंवा धक्क्याचा कोणताही भाव नव्हता. सियाच्या या निर्विकार प्रतिक्रियेमुळेच केतनच्या कुटुंबाला पहिल्यांदा संशय आला. त्यानंतर ग्रामीण पोलिसांच्या तपासात सिया आणि चेतन चौधरी यांचे नोव्हेंबरपासून अफेअर असल्याचे आणि ते दोघे ‘हनिमून’लाही जाऊन आल्याचे उघडकीस आले.

केतनचे वडील म्हणाले, केतन आणि सियाचा विवाह दोन्ही कुटुंबांच्या संमतीने (अरेंज मॅरेज) ठरला होता. दोन्ही कुटुंबांची गेल्या ३५-४० वर्षांपासून ओळख होती. मात्र, सियाच्या अफेअर आणि भानगडींबद्दल तिच्या संपूर्ण कुटुंबाला माहिती होती, तरीही त्यांनी जाणीवपूर्वक आमची फसवणूक केली, असा आरोप केतनच्या वडिलांनी केला आहे. “एका २० वर्षांच्या मुलीला कुणाचा तरी जीव घेण्याचे संस्कार कसे मिळू शकतात? यात तिचे आई-वडील, भाऊ किंवा इतर नातेवाईक सामील असू शकतात,” असा संशय व्यक्त करत पोलिसांनी या प्रकरणाचा सखोल तपास करून आरोपपत्र दाखल करावे, अशी मागणी या दुर्दैवी पित्याने केली आहे.