पुणे-पुण्यात खंडणीसाठी एका व्यावसायिकाच्या कार्यालयासमोर गोळीबार झाल्याची धक्कादायक घटना समोर आली आहे. हडपसर-सासवड रस्त्यावरील फुरसुंगी भागात सोमवारी रात्री हा प्रकार घडला. प्राथमिक तपासात यामागे लॉरेन्स बिष्णोई टोळीचा हात असल्याची माहिती मिळाली असून, फुरसुंगी पोलिस ठाण्यात गुन्हा दाखल करण्यात आला आहे.
या प्रकरणी एका व्यावसायिकाने फुरसुंगी पोलिस ठाण्यात फिर्याद दिली आहे. तक्रारदार व्यावसायिकाचे फुरसुंगी भागात पाईप आणि पोलाद विक्रीचे गोदाम व कार्यालय आहे. २२ जून रोजी दुपारी साडेचारच्या सुमारास व्यावसायिकाच्या मोबाईलवर अर्जुन बिष्णोई नावाच्या व्यक्तीने संपर्क साधला. त्याने स्वतःला लॉरेन्स बिष्णोई टोळीचा सदस्य असल्याचे सांगून व्यावसायिकाकडे खंडणीची मागणी केली.
या धमकीनंतर घाबरलेल्या व्यावसायिकाने सायंकाळी सातच्या सुमारास वानवडी पोलिस ठाण्यात धाव घेतली. त्यांचे कार्यालय फुरसुंगी भागात असल्याने, पुढील कार्यवाहीसाठी हे प्रकरण फुरसुंगी पोलीस ठाण्याकडे वर्ग करण्यात आले. रात्री सव्वाआठच्या सुमारास, गुन्हा दाखल करण्याची प्रक्रिया सुरू असतानाच, दुचाकीवरून आलेल्या दोन अज्ञात व्यक्तींनी व्यावसायिकाच्या फुरसुंगीतील कार्यालयाच्या दरवाजावर पिस्तुलातून चार गोळ्या झाडल्या.
घटनेची माहिती मिळताच पोलिसांनी तात्काळ घटनास्थळी धाव घेतली आणि तपास सुरू केला. गोळीबार करणारे आरोपी दुचाकीवरून फुरसुंगीतून सासवड रस्त्याने पसार झाले. पोलिसांनी व्यावसायिकाच्या कार्यालयाच्या परिसरातील सीसीटीव्ही फुटेज तपासले असून, आरोपींचा शोध घेण्यासाठी गुन्हे शाखेची पथके तयार करण्यात आली आहेत. या प्रकरणाचा सखोल तपास सुरू असल्याचे गुन्हे शाखेच्या अधिकाऱ्यांनी सांगितले.
यापूर्वी पिंपरी-चिंचवडमधील रावेत भागातही एका फर्निचर व्यावसायिकाच्या दालनासमोर गोळीबार झाल्याची घटना घडली होती. पंधरा दिवसांपूर्वी घडलेल्या या घटनेत लॉरेन्स बिष्णोई टोळीतील सदस्यांनी खंडणीसाठी फर्निचर व्यावसायिकाला धमकावले होते. पिंपरी-चिंचवड पोलिसांनी तपास करून त्या प्रकरणात आरोपींना अटक केली होती.
तपासादरम्यान शुभम लोणकर या नावाकडे विशेष लक्ष वेधले जात आहे. बाबा सिद्दीकी हत्याकांड आणि सलमान खान धमकी प्रकरणात त्याचे नाव समोर आले होते. यापूर्वी अकोला पोलिसांनी त्याच्याकडून पाच पिस्तुले जप्त केली होती. प्राथमिक माहितीनुसार तो राजस्थानमध्ये सैन्य भरतीसाठी गेला असताना बिश्नोई टोळीच्या संपर्कात आला होता.
