परिमंडळ १ पोलीस उपायुक्त डॉ.प्रियांका नारनवरे यांची उपस्थिती
पुणे : गणेशोत्सवासह विविध कार्यक्रमात शांताबाई या गाण्यावर लाखो नागरिक थिरकतात. मात्र, हे गाणे साकारलेल्या संजय लोंढे यांच्यासह त्यांच्या कुटुंबावर आज काम नसल्याने उपासमारीची वेळ आली आहे. शासनाने देखील या लोककलाकाराकडे पाठ फिरविली आहे. आपले कुटुंब चालविण्याची भ्रांत असतानाच लोंढे यांच्या मदतीला पुण्यातील गणेशोत्सव मंडळ व ढोल-ताशा पथकाचे कार्यकर्ते धावून गेले. त्यावेळी लोंढे कुटुंबियांच्या डोळ्याच्या कडा पाणावल्या. 
शुक्रवार पेठेतील सेवा मित्र मंडळ कृत विघ्नहर्ता वाद्य पथकाने नाना पेठेतील राजेवाडी परिसरात राहणा-या शांताबाई फेम संजय लोंढे यांच्या कुटुंबाला धान्य व जीवनावश्यक वस्तूंची मदत दिली. यावेळी परिमंडळ १ पोलीस उपायुक्त डॉ.प्रियांका नारनवरे, निवृत्त विशेष पोलीस महानिरीक्षक चंद्रशेखर दैठणकर, मंडळाचे शिरीष मोहिते, अध्यक्ष सागर कुलकर्णी, विराज मोहिते, प्रज्वल निगडे, माऊली विधाते, सिद्धार्थ पडवळ, सुजित पवार, विद्या मोहिते, शुभंकर काकडे, प्रथमेश विलासागर, मयंक ठक्कर, वैष्णवी चव्हाण, तेजश्री सुमंत, कनिष्का गायकवाड, साहिल खंडागळे, अंकुश गुप्ता, विघ्नेश दळवी, अथर्व लोंढे, गौरव दिवेकर आदी उपस्थित होते. यावेळी ढोल-ताशा वादन करुन घरासमोर रंगावली काढत आकाशकंदील व दिवे देखील कार्यकर्त्यांनी लावले. 
डॉ.प्रियंका नारनवरे म्हणाल्या, लोककलाकार आणि खेळाडू यांचे देशासाठी मोठे योगदान असते. त्यांच्यामध्ये खूप कलात्मकता असते. त्यांना ही परमेश्वराची मिळालेली देणगीच म्हणावी लागेल. आज दुर्देवाने अनेक कलाकार उपेक्षित आहेत. त्यांचे कार्य व आजची परिस्थिती ही लोकांपर्यंत पोहोचायला हवी, असेही त्यांनी सांगितले. गणेश मंडळे व ढोल-ताशा पथकातर्फे असे लोकाभिमुख कार्य व्हायला हवे, असे चंद्रशेखर दैठणकर यांनी सांगितले. 
संजय लोंढे म्हणाले, अनेक महिन्यांपासून रेकॉर्डिंग किंवा स्टेश शो चे काम आलेले नाही. त्यामुळे माझ्यासारख्या अनेक कलाकारांवर व कुटुंबांवर उपासमारीची वेळ आली आहे. कलाकार काम करण्यास तयार असले तरी देखील काम मिळत नाही. त्यामुळे जगावे कसे आणि कुटुंबाला कसे जगवावे, असा प्रश्न आम्हाला पडला आहे. शासनाने देखील आमच्याकडे त्वरीत लक्ष द्यावे, अशी मागणी त्यांनी केली.

पुणे : चालू आर्थिक वर्षातील जिल्हा नियोजन समितीच्या (डीपीसी) कामांतील फेरबदल अंतिम टप्प्यात आले आहेत. पुढील आठवड्यात राज्याचे उच्च व तंत्रशिक्षण मंत्री आणि जिल्ह्याचे पालकमंत्री चंद्रकांत पाटील यांच्याकडून कामे अंतिम करून ती जाहीर केली जाणार आहेत. कामे अंतिम करताना भाजप आणि बाळासाहेबांची शिवसेना यांनी आपापसात विकासकामांसाठी निधी वाटपाचे सूत्र निश्चित केले आहे. त्यानुसार भाजपचे प्रभुत्त्व असलेल्या परिसरात ६० टक्के आणि बाळासाहेबांची शिवसेनेचे वर्चस्व असलेल्या भागात ४० टक्के विकासनिधी देण्याचे ठरविण्यात आले आहे.

नुकत्याच झालेल्या डीपीडीसी बैठकीनंतर यापूर्वीच्या मंजूर केलेल्या १०५८ कोटी रुपयांच्या आराखड्यातील कामांची फेरतपासणी करण्याचे स्पष्ट करून पालकमंत्री पाटील यांनी कामांत फेरबदल करण्याचे सूतोवाच केले होते. त्यानुसार कामे अंतिम करण्यासाठी जिल्हाधिकारी कार्यालयातील जिल्हा नियोजन अधिकाऱ्यांच्या कार्यालयात लगबग सुरू आहे. कामांत फेरबदल करताना भाजप आणि बाळासाहेबांची शिवसेना यांना अनुक्रमे ६० टक्के आणि ४० टक्के असे सूत्र निश्चित करण्यात आले आहे. जिल्ह्यातील भाजप आणि बाळासाहेबांची शिवसेना यांच्या पदाधिकाऱ्यांनी सुचवलेल्या कामांचा समावेश करण्यात आला आहे. पुढील आठवड्यात पालकमंत्री पाटील कामे अंतिम करून ती जाहीर केली जाणार आहेत.

दरम्यान, जिल्ह्याचा चालू आर्थिक वर्षाचा तब्बल १०५८ कोटींचा आराखडा आहे. त्यापैकी केवळ २० टक्के निधी आतापर्यंत खर्च झाला आहे. उर्वरित निधी खर्च करण्यासाठी तातडीने कामे मंजूर करणे आवश्यक आहे. स्थानिक स्वराज्य संस्थांच्या निवडणुका जाहीर झाल्यास आचारसंहितेमुळे डीपीसीमधील कामे थांबण्याची शक्यता असल्याने ही कामे तातडीने अंतिम करणे आवश्यक आहे. त्यामुळे अंतिम केलेली कामे जाहीर करून तातडीने कामांना सुरुवात करण्यात येणार आहे.

पुणे : मनासारखी माणसे न मिळणे, पैसा कमी असणे अशी अनेक अप्रसन्नतेची कारणे आहेत. आज श्रद्धधेचे विवरण आणि भक्तीचे निरुपण बदलले आहे. पैसा हे साध्य नाही, तर साधन आहे. पैसा माणसाला स्थिर नाही, तर अस्थिर करतो. आपल्या शिक्षणात माती व आत्मा याचे नाते शिकविले जात नाही. त्यामुळे आधुनिकीकरण म्हणजे पाश्चिमात्यीकरण नाही, हे भारतीयांना कळत नाही, असे मत डॉ.संजय उपाध्ये यांनी व्यक्त केले. 
आनंदवन बहुउद्देशीय संस्था आणि एनजीओ आघाडी यांच्या संयुक्त विद्यमाने दिवाळी निमित्त डॉ. संजय उपाध्ये यांचे ‘मन करा रे प्रसन्न’ या कार्यक्रमाचे आयोजन घोले रस्त्यावरील जवाहरलाल नेहरू सांस्कृतिक भवन येथे करण्यात आले होते. यावेळी रा. स्व. संघ पुणे महानगराचे कार्यवाह महेश करपे, आनंदवन बहुउद्देशीय संस्थेचे अध्यक्ष डॉ. अजय दुधाणे, दत्तात्रय सोनार ,विवेक राजगुरू, अनिरुद्ध हळंदे , जयंत हिरे, संतोष पटवर्धन, प्रमोद शेळके, विशाल शिंदे आदी उपस्थित होते. 
डॉ.संजय उपाध्ये म्हणाले, युरोपियन अभ्यासक व इतर देशांमधील विद्वानांना तत्वज्ञ समजले जाते. मात्र, भारतातील संतांना तत्वज्ञ समजले जात आही. संत ज्ञानेश्वर महाराज, तुकाराम महाराजांनी जे सांगितले, तेच आज पाश्चात्यांकडून सांगितले जाते आणि त्याचेच आपल्याला अप्रूप वाटते, हे दुर्देव आहे. 
ते पुढे म्हणाले, मन याविषयावर अनेक पुस्तके व कविता आपल्या मराठी साहित्यात आहेत. केवळ मनोरंजन ही पाश्चात्यांची संस्कृती असून मनोरंजनासोबत ज्ञान व प्रबोधन ही आपली संकल्पना आहे, असे सांगत आयुष्य कसे जगावे, मन कसे प्रसन्न ठेवावे, हे देखील त्यांनी उपस्थितांना सांगितले. संजय हिरवे यांनी सूत्रसंचालन केले.

पुणे : स्वातंत्र्याच्या अमृत महोत्सवानिमित्त मनोविकास प्रकाशनातर्फे प्रकाशित होऊ घातलेल्या महाग्रंथातून भारताचे अंतरंग उलगणार आहेत. ‘असा बदलला भारत : पारतंत्र्यातून महासत्तेकडे’ हा दोन खंडाचा, बाराशे पानांचा महाग्रंथ जानेवारी २०२३ मध्ये वाचकांच्या भेटीला येणार आहे, अशी माहिती प्रकाशक अरविंद पाटकर, महाग्रंथाचे संपादक दत्ता देसाई व मनोविकास प्रकाशनचे संपादक विलास पाटील यांनी पत्रकार परिषदेत दिली. अरविंद पाटकर, आशिष पाटकर व दत्ता देसाई यांच्या एकत्रित प्रयत्नातून हा महाग्रंथ साकारत आहे.
दत्ता देसाई म्हणाले, “भारताला स्वातंत्र्य मिळाले तेव्हाचा आणि आत्ताचा भारत घडत गेला आहे. घडण्याची ही प्रक्रिया आजही सुरूच आहे. प्रत्येकाला आस्था आणि कुतूहल वाटावे, असा हा प्रवास आहे. या प्रवासातील चढउतार, यासह भारताचा सर्वसमावेशक, सर्वांगीण इतिहास, लेखाजोखा सर्वसामान्यांपर्यंत पोहोचवणारा हा ग्रंथ असणार आहे. दोन खंडातील या ग्रंथात आठ विभाग असून, त्यात साठ नामवंत लेखकांनी लिहिले आहे. आधुनिक राष्ट्राची जडणघडण : वाटा आणि वळणे, राजकीय इतिहास : प्रवाह आणि वाटचाल, साहित्य कला : भारतीय दर्शन, लोकशाही : राज्यघटना आणि संरक्षण, धर्म आणि संस्कृती, विज्ञान -शिक्षण-आरोग्य-क्रीडा माध्यमे, उद्योग विकास अर्थकारण पर्यावरण, जात-स्त्री-कामगार-परिजन (आदिवासी /भटके विमुक्त) असे आठ विभाग आहेत.”
“हा शतक-दीड शतकाचा संग्राम नेमका काय होता? त्याचे नायक कोण? विविध प्रवाह, प्रक्रिया व त्यामागील शक्ती, जनतेच्या भूमिका काय होत्या? स्वतंत्र भारत ‘रेडिमेड’ मिळाला की आजही घडतो आहे? गेल्या ७५ वर्षांत स्वातंत्र्याची कमाई काय? आजचा ताणतणाव, वसाहतीकडून महासत्तेकडे जातोय का? पुढील २५ वर्षांत भारत कसा बदलेल? अशा अनेक प्रश्नांची उकल या ग्रंथातून होणार आहे. ज्येष्ठ विचारवंत, अभ्यासक, समीक्षक, लेखक, राजकीय विश्लेषक, अभ्यासू पत्रकार यांनी चिंतनशील लेख लिहिले आहेत,” असे दत्ता देसाई यांनी नमूद केले.
अरविंद पाटकर म्हणाले, “महाग्रंथाची निर्मिती, वाचन संस्कृती लोकांपर्यत पोहोचावी याकरीता एक चळवळ म्हणून याकडे पाहत आहोत. संयोगिता ढमढेरे व विलास पाटील यांचे सहकार्य लाभले आहे. प्रत्येक जिज्ञासू नागरिकाने, अस्वस्थ देशप्रेमाने, स्वातंत्र्य व लोकशाही प्रेमीने, अध्यापक-अभ्यासकाने, विद्यार्थी-तरुणांनी, कार्यकर्ता-पत्रकाराने हा ग्रंथ वाचावा, असा असणार आहे.

या लेखकांनी दिले आहे योगदान

या ग्रंथात जुन्या व नव्या पिढीतील अभ्यासू लेखकांनी लेखन केले आहे. डॉ. गणेश देवी, सुहास पळशीकर, प्रताप आसबे, रावसाहेब कसबे, शांता गोखले, गजानन खातू, तारा भवाळकर, डॉ. अनंत फडके, किशोर बेडकिहाळ, अजित अभ्यंकर, दत्तप्रसाद दाभोळकर, प्रदीप पुरंदरे, अनंत बागाईतकर, गोपाळ गुरु, विजय खरे, इरफान इंजिनिअर, प्राची देशपांडे, श्रध्दा कुंभोजकर, अशोक राणे, नीला भागवत, नुपूर देसाई, श्रीरंजन आवटे, अभिषेक भोसले, रणधीर शिंदे यांच्यासह इतर मान्यवर

महाग्रंथाच्या नोंदणीसाठी

या महाग्रंथाची प्रत १२ नोव्हेंबर २०२२ पासून महाराष्ट्रातील सर्व पुस्तक विक्री केंद्रात आगाऊ स्वरूपात नोंदवता येईल. मनोविकास प्रकाशन, फ्लॅट न. ३, ए/४ शक्ती टॉवर्स, ६७२ नारायण पेठ, पुणे-३० किंवा मनोविकास बुक सेंटर, आकाशवाणी, आमदार निवास आवार, चर्चगेट, मुंबई या पत्त्यावर, तसेच ०२०-२९८०६६६५, ८८८८५५०८३७ किंवा ९५९४७३८११० या दूरध्वनीवर आपली प्रत नोंदवता येईल, असे पाटकर यांनी सांगितले.

“मराठी प्रकाशन व्यवसाय हा पुस्तकाच्या विक्रीवर उभा आहे. त्याला शासनाचे सहकार्य असावे. सध्याच्या डिजिटल प्रवाहाचा वाचन संस्कृतीवर फारसा परिणाम झालेला नाही. वाचकांपर्यंत पुस्तके पोहोचवण्यात आम्ही कमी पडतो. ललित साहित्याच्या दुकानाची वानवा आहे. त्यामुळे मराठी प्रकाशन व्यवसाय आक्रसत चालला आहे. महाराष्ट्रातील छत्तीस जिल्ह्यापैकी २० जिल्ह्यात एकही ललित साहित्याचे दुकान नाही, ही शोकांतिका आहे. जिल्हाधिकारी, मुख्याधिकारी आणि एसटी स्टॅन्ड येथे अल्प भाडे तत्वावर दुकान उभारण्यासाठी शासनाने सहकार्य करावे.”-

अरविंद पाटकर, प्रकाशक, मनोविकास प्रकाशन

पुणे : देशातील सर्कस उद्योगाला उर्जीत अवस्था यावी यासाठी झटणारे आणि पुण्यातील जगप्रसिद्ध रॅम्बो सर्कसचे संस्थापक पी. टी. दिलीप (वय-74) यांचे काल अल्प आजाराने निधन झाले. त्यांच्या पाश्‍चात पत्नी, विवाहित मुलगा, सुन, विवाहित मुलगी, एक मुलगा व नातवंडे असा परिवार आहे.उद्या शनिवारी हडपसर येथील सेपल्कर  दफनभूमीत अंत्यसंस्कार करण्यात येणार आहे, अशी माहिती पी. टी. दिलीप यांचे सुपुत्र सुजीत दिलीप यांनी दिली.पी. टी. दिलीप हे मुळचे केरळ येथील आहे. त्यांचे महाराष्ट्रातील रत्नागिरी येथील लोके हायस्कूलमध्ये झाले. मोबाईल अ‍ॅम्युझमेंटमध्ये ते मॅनेजन म्हणून  त्यांनी काम केले. नव्वदच्या दशकात त्यांनी तीन लहान सर्कस एकत्र केल्या. त्यानंतर ते पुण्यात स्थायिक झाले. 26 जानेवारीच्या मूहुर्तावर त्यांनी रॅम्बो सर्कस उभी केली. या रॅम्बो सर्कसनी संपूर्ण आशियाचा दौरा केला. सर्कसच्या माध्यमातून पुण्याचे नाव जगप्रसिद्ध केल्याबद्दल पुणे महानगरपालिकेतर्फे 1992 मध्ये पी. टी. दिलीप यांचा विशेष गौरव करण्यात आला होता. गेल्या अनेक वर्षांपासून सर्कसमध्ये प्राण्यांच्या खेळांवर बंदी घालण्यात आली. त्यामुळे उताराला लागलेल्या सर्कसला उर्जीत अवस्था यावी म्हणून त्यांनी विशेष प्रयत्न करीत केले.सर्कसला मध्यवर्ती ठिकाणी कमी दरात मैदान मिळावे, यासाठी प्रत्येक शहरामध्ये त्यांनी खुप प्रयत्न केले. तसेच राज्य सरकारनेदेखील सर्कसस उद्योगाला आर्थिक पाठबळ द्यावे, यासाठी त्यांनी पाठपुरावा केला. गेली दोन वर्षे कोरोनाच्या संकटात सर्कसला राज्य सरकारकडून मदत मिळावी, म्हणून त्यांनी विशेष प्रयत्न करुन मदत मिळवून दिली. त्यांच्या कारर्किदीत त्यांना अनेक पुरस्काराने सन्मानित करण्यात आले होते. सर्कस मित्रमंडळ पुणेचे अध्यक्ष प्रविण वाळिंबे, उपाध्यक्ष बाळासाहेब शिंदे, सरचिटणीस प्रवणि तरवडे, नंदकुमार बानगुडे आणि आनंद धोत्रे यांनी श्रद्धांजली अर्पण केली. भारतीय सर्कसचा आधारस्तंभ हरपला, अशा भावना व्यक्‍त केल्या.

पुणे : आजच्या युवकांना सैन्याचे धडे द्यायला हवे. आपल्याला मागील ७५ वर्षांमध्ये अहिंसेचे डोस पाजले गेले. ज्याच्याकडे शक्ती आहे, त्याला शांततेबद्दल बोलण्याचा अधिकार आहे. भारताला बलवान करायचे असेल, तर आपली सेना अधिकाधिक बलवान व्हायला हवी, असे मत ज्येष्ठ रंगकर्मी रवींद्र खरे यांनी व्यक्त केले. 
विधायक पुणे, सैनिक मित्र परिवार व सहयोगी संस्थांतर्फे देशासाठी प्राणांची आहुती देणाºया शहीद व बेपत्ता सैनिकांच्या वीरपत्नींसमवेत सदाशिव पेठेतील नारद मंदिर येथे भाऊबीज साजरी करण्यात आली. यावेळी भारतीय वायुदलातील निवृत्त ग्रुप कॅप्टन सुहास फाटक, लोकमान्य मल्टीपर्पज सोसायटीचे समन्वयक भालचंद्र कुंटे, अर्जुन पुरस्कार विजेत्या शकुंतला खटावकर, नारद मंदिराच्या विश्वस्त जयश्री देशपांडे, आनंद सराफ आदी उपस्थित होते.  
तिरंगी उपरणे, मिठाई, दिवाळीच्या भेटवस्तू देऊन वीरपत्नींचा सन्मान करण्यात आला. सन १९६२, १९६५, १९७१ आणि कारगिल च्या युद्धात बेपत्ता व शहीद झालेल्या सैनिकांच्या वीरपत्नी या कार्यक्रमाला उपस्थित होत्या. पुण्यातील गणेशोत्सव मंडळे आणि स्वयंसेवी संस्थांचा सहभाग होता. किरण पाटोळे, गिरीश पोटफोडे, अमोल काळे, शिरीष राणे, शाहीर हेमंत मावळे, कल्याणी सराफ, मंदार रांजेकर यांनी कार्यक्रमाच्या आयोजनात सहभाग घेतला.
रवींद्र खरे म्हणाले, अनेक सैनिकांनी देशासाठी आपले प्राण अर्पण केले आहेत. त्यांच्या प्राणात ख-या अर्थाने भारत सामावला आहे. जगातील अनेक देश आपल्या पुढे आहेत. आपण मागे आहोत, याचे कारण आपल्या सैन्यातील काम आपल्याला माहित नाही. त्यामुळे सैन्यदलातील कार्य सामान्यांपर्यंत पोहोचायला हवे. 
भालचंद्र कुंंटे म्हणाले, सैनिकांचे कार्य तर अतुलनीय आहेच, मात्र त्यांच्या वीरपत्नी या त्यागमूर्ती आहेत. त्या सैनिकांच्या पाठिमागे संपूर्ण कुटुंब सांभाळत आहेत. त्यामुळे त्यांच्याकडून समाजाला खरी स्फूर्ती मिळेल. 
आनंद सराफ म्हणाले, देशाच्या रक्षण करणा-या सैनिकांच्या वीरपत्नी त्यांच्या मागे प्रपंचाची दुसरी लढाई लढत आहेत. त्यामुळे सैनिक मित्र परिवारसह इतर अनेक संस्थांच्या माध्यमातून आम्ही २००० सालापासून त्यांच्या सोबत आहोत, असेही त्यांनी सांगितले. सुहास फाटक, शकुंतला खटावकर व वीरपत्नी, वीरकन्यांनी मनोगत व्यक्त केले. गिरीष पोटफोडे यांनी सूत्रसंचालन केले. नितीन पंडित यांनी आभार मानले.

मीठगंज पोलीस चौकी शेजारील स्मारक ; कायमस्वरूपी लाईटची व्यवस्था सुरु 
पुणे : ऐन दिवाळीत मीठगंज पोलीस चौकी शेजारील अंधारात असलेल्या  क्रांतिसूर्य महात्मा फुले स्मारकासमोर पतित पावन संघटनेतर्फे दीपोत्सव साजरा आला. ज्या महात्मा फुले यांनी  संपूर्ण आयुष्य समाजातील अंधार घालविण्यासाठी महिलांच्या आयुष्यात शिक्षणाचा दिवा लावला. त्या अधांरात असलेल्या महात्मा फुले यांच्या स्मारक परिसरातील दिवे पुणे मनपा ला सांगून पुन्हा लावून घेत दिपोत्सव साजरा केला. 
त्यावेळी रा.स्व.संघाचे महात्मा फुले नगर कार्यवाह मंगेश शिंदे, पतित पावन संघटनेचे प्रांत उपाध्यक्ष राजाभाऊ पाटील, जिल्हाध्यक्ष दिनेश भिलारे, संतोष अण्णा शेंडगे, ललित खंडाळे, गुरु कोळी,योगेश वाडेकर, राजाभाऊ रजपूत, सूरज पोटे यांच्यासह सामाजिक कार्यकर्ते उमेश नाईक, अविनाश नाईक, केशव पाटिल व अभिजीत मारणे उपस्थित होते 
मंगेश जवाहिरे यांनी स्मारकाभोवती नयनरम्य रंगावली काढली. कार्यक्रमाचे आयोजन योगेश पाटील, ऋतिक कांबळे, ओंकेश काची, संदेश वाघमारे, साहिल कांबळे, सोनू ताड़े आणि स्वप्नील नाईक यांनी केले. दरवर्षी पुणे मनपा कडून महात्मा फुले स्मारकाच्या सुशोभिकरणासाठी निविदा प्रक्रिया काढण्यात येते, तरीही मात्र ऐंन दिवाळीत महात्मा फुले यांच स्मारक अंधारात होते, हे दुर्देव असल्याचे स्वप्नील नाईक यांनी सांगितले. 

पुणे -स्थानिक स्वराज्य संस्थांच्या हद्दीत कुणालाही कोणतेही काम करताना  परवानगी घेणे घटनेनुसार बंधनकारक आहे. त्यामुळे प्राधिकरणांची निर्मिती करताना  स्थानिक स्वराज्य संस्थांचे अधिकार अबाधित ठेवावेत तसेच  महामेट्रोला दिलेला  प्राधिकरणाचा दर्जा तात्पुरता ठेवावा  अशी मागणी काँग्रेसचे माजी गटनेते आबा बागुल यांनी मुख्यमंत्र्यांकडे  केली आहे. 
यासंदर्भात मुख्यमंत्र्यांसह उपमुख्यमंत्री, पुणे जिल्ह्याचे पालकमंत्री यांना पाठवलेल्या  निवेदनात माजी उपमहापौर आबा बागुल यांनी म्हटले आहे की, पुणे शहरात मेट्रो प्रकल्प राबविणाऱ्या महाराष्ट्र मेट्रो रेल काॅर्पोरेशनला (महामेट्रो) राज्य सरकारने विशेष नियोजन प्राधिकरणाचा दर्जा दिला आहे. मात्र  मेट्रोसाठी महा – मेट्रोकडे हस्तांतरित केलेल्या शासकीय आणि खासगी जागांवर बांधकाम आराखडे मंजूर करणे, बांधकाम विकसन शुल्क आकारण्याचे अधिकार  महामेट्रोला बहाल करणे म्हणजे एकप्रकारे स्थानिक स्वराज्य संस्थांच्या  अधिकारांवर गदा आणण्यासारखे आहे. वास्तविक सध्या मेट्रोचे काम वेगात सुरु आहे. मेट्रोला प्राधिकरणाचा दर्जा देण्यास विरोध नाही ;पण पुणे महानगरपालिकेच्या परवागीशिवाय बांधकाम आराखडे मंजूर करणे म्हणजे स्थानिक स्वराज्य संस्थांचे अधिकार संपुष्टात आले  आहेत. एकप्रकारे घटनेची पायमल्ली होण्यासारखा हा प्रकार असून लोकशाहीच्या अस्तित्वावरच प्रश्नचिन्ह निर्माण झाला आहे. याकडेही आबा  बागुल यांनी लक्ष वेधले आहे. स्थानिक स्वराज्य संस्थांच्या स्थापनेमागील उद्देशानुसार कोणत्याही कामाला परवानगी ही त्या त्या स्थानिक स्वराज्य संस्थांमार्फत घेणे बंधनकारक आहे. मात्र सध्यस्थितीत अनेक प्राधिकरणांची निर्मिती केली जात आहे ;पण ते करताना स्थानिक स्वराज्य संस्थांचे अधिकार कमी केले जात आहेत.यातून घटनेची पायमल्ली होत आहे. सध्या पुणे महामेट्रोकडून मेट्रोचे काम सुरु आहे. मात्र कोणते काम सुरु आहे याविषयी जर स्थानिक स्वराज्य संस्थेला माहितीच नसेल तर भविष्यात मोठ्या दुर्घटनेची जबाबदारी कुणाची ? या प्रश्नाचा विचार होणे अत्यंत गरजेचे आहे. मेट्रोचे काम पूर्ण करून महामेट्रो उद्या जाईल पण भविष्यातील दुर्घटनेची अथवा अन्य आपत्कालीन स्थितीची जबाबदारी कोण घेणार ? यासह अनेक प्रश्न निर्माण होणार आहेत. स्थानिक स्वराज्य संस्थांचे अधिकार कमी करत असताना घटनेची  पायमल्ली होणार नाही याची दक्षता घेणे आवश्यक आहे. आज आपण प्राधिकरणांची निर्मिती करत असताना स्थानिक स्वराज्य  संस्थांचे अधिकार कमी केले आहेत. एसआरए असो अथवा पीएमपीएल, पीएमआरडीए, स्मार्ट सिटी यांच्यासाठी स्वतंत्र प्राधिकरण तयार केले पण आज एसआरएमधील इमारती उभारल्यानंतर त्यांचे देखभाल खर्च असो किंवा अन्य अनेक प्रश्नांची सोडवणूक कोण करणार ? सार्वजनिक वाहतूक सेवेसाठी सक्षम असलेल्या पीएमटी- पीसीएमटीचे एकत्रीकरण करून पीएमपीएमएल असे प्राधिकरण केले मात्र आज कोट्यवधीं रुपये तोट्यात असलेल्या पीएमपीएमएलला पुणे महागरपालिकाच अर्थसहाय्य करत आहे.अशीच अवस्था स्मार्ट सिटीची झाली आहे. पुणे महानगरपालिकेने उभारलेले काम स्मार्ट सिटी तोडत आहे आणि नव्याने उभारणी करत आहे. त्यामुळे वेगाने विकसित होणाऱ्या शहरासाठी प्राधिकरणांची निर्मिती करावी पण ती तात्पुरती असावी.  त्यासाठी स्थानिक स्वराज्य संस्थांच्या अधिकारांवर गदा कदापि नको.    पुणे महानगरपालिका ही  १९५० साली स्थापन झालेली  स्थानिक स्वराज्य संस्था ही  स्वायत्त संस्था आहे. त्यामुळे   महामेट्रोला प्राधिकरणाचा दर्जा हा तात्पुरता देण्यात यावा.असेही माजी उपमहापौर  आबा बागुल यांनी नमूद केले आहे.