पुणे-उडत्या हवाई बसेस ची कल्पना प्रत्यक्षात उतरवू पाहणारे केंद्रीय मंत्री गडकरी यांनी २४ तास पाणी पुरवठ्याच्या नावाने गेली ७ वर्षे पुणेकरांना लुटणाऱ्या महापालीकेला उडत्या हवाई बसेस साठी डीपीआर करण्याचे आदेश दिल्याचे सर्वांना ठाऊक आहे . आता याच गडकरींना .. महाराष्ट्र राज्यभर नवीन ड्रायव्हिंग लायसन्सचा पुरवठा ठप्प झाल्याचे कळवून तातडीने व्यवस्था करण्यासाठी सुमारे १ लाख्पत्रे पाठविण्याचा संकल्प विठ्ठल मेहता यांनी केला आहे.

मेहता हे महाराष्ट्र राज्य मोटार ड्रायव्हिंग स्कूल मालकसंघटनेचे उपाध्यक्ष आणि मेहता मोटार ड्रायव्हिंग स्कूलचे संचालक आहेत. ‘माय मराठी’ ला त्यांनी सांगितले कि,’स्मार्ट कार्ड छपाई होत नसल्यामुळे गेली 2 महिने महाराष्ट्र राज्यात मोटार ड्रायव्हिंग लायसन्सचा तीव्र तुटवडा जाणवत असून अशा प्रकारच्या तक्रारी राज्यातील मोटार ड्रायव्हिंग स्कूल,संचालक व नागरिक महाराष्ट्र राज्य मोटार ड्रायव्हिंग स्कूल मालक संघटनेकडे आल्या आहेत.वाहन चाचणी परीक्षा दिल्यानंतर 3 आठवड्याचा आत लायसेन्स पोस्टाने घरी येणे अपेक्षित असते पण तसे होत नसल्यामुळे ज्यांनी मोटार ड्रायव्हिंग स्कूल मार्फत अथवा स्वतः प्रादेशिक परिवहन कार्यालयात जाऊन वाहन चाचणी परीक्षा दिली ते 2 महिन्यांहून अधिक काळ लोटला तरी लायसेन्स येणे सोडा , पण प्रणाली छपाई झाली नसल्याचेही दाखवत नसल्याचे पाहून नागरिक त्रस्त झाले आहेत.पोलिसही अत्यंत विश्वासार्ह असलेली ई प्रिंट मान्य करीत नाहीत.पुण्याच्या प्रादेशिक परिवहन कार्यालयात दरमहा वाहन चाचणी परीक्षा उत्तीर्ण,नूतनीकरण,दुय्यम प्रत,नाव ,पत्ता बदल ई.कारणास्तव दरमहा 30000 च्या जवळ पास स्मार्ट कार्डची गरज भासते.
महाराष्टातील मोटार ड्रायव्हिंग स्कूल संचालक,विविध संघटना,नागरिक,लोकप्रतिनिधी ई. आप आपल्या विभागातील प्रादेशिक/उप प्रादेशिक परिवहन कार्यालयात या बाबत जोरदार पाठपुरावा करूनही अद्याप स्मार्ट कार्ड लायसेन्स पुरवठा सुरळीत होऊ शकलेला नाही.
त्यामुळे आता मोटार ड्रायव्हिंग स्कूल संचालक,वंचित लायसेन्स धारक ,सेवा भावी / वाहतूक विषयक संस्था, ई मार्फत केंद्रीय परिवहन मंत्री .नितीन गडकरी,राज्याचे परीवहन मंत्री.शंभूराज देसाई,परिवहन आयुक्त यांना 1 लाख पत्रे पाठवून तत्काळ लायसेन्स पुरवठा सुरळीत व्हावा ,व 8 दिवसाच्या आत लायसेन्स पोस्टाने घरी येण्याबाबत मागणी करण्यात येणार असल्याचे,असे उपाध्यक्ष विठ्ठल मेहता यांनी कळविले आहे.याकरिता ज्यांची स्मार्ट कार्ड अद्याप आलेले नाहीत त्यांनी प्रतिसाद देण्यासाठी पुढे यावे असेही ते म्हणाले.

पुणे जिल्हा पुरुष व महिला संघ ‘टीम चॅम्पियनशिप’चे मानकरी

पुण्यात म्हाळुंगे-बालेवाडी येथे शिवचित्रपती क्रीडा नगरीत दि.२१ मे पासून तीन दिवस सुरु असलेल्या ७१व्या राजपथ महाराष्ट्र राज्य अॅथलेटिक्स चॅम्पियन स्पर्धेच्या सांगता समारंभात सर्वोत्तम अॅथलेटिक्सचा मान पुरुष गटात नाशिकचा सर्वेश कुशरे आणि पुण्याची अवंतिका नराळे यांनी संपादन केला. तसेच टीम चॅम्पियनशिप चा मान पुणे जिल्हा पुरुष व महिला संघाला मिळाला. या स्पर्धेत एकूण ३३ जिल्ह्यातील ७१५ खेळाडूंचा समावेश होता. त्यामध्ये तेजस शिरसे, सर्वेश कुशरे, निधी सिंग, पूर्वा सावंत, शर्वरी परुळेकर, अवंतिका नराळे अशा आंतरराष्ट्रीय कीर्तीच्या खेळाडूंचा सहभाग हेदेखील आकर्षण होते. महाराष्ट्र अॅथलेटिक्स असोसिएशनचे उपाध्यक्ष संजय पाटील यांच्या हस्ते बक्षीस वितरण करण्यात आले. यावेळी महाराष्ट्र अॅथलेटिक्स असोसिएशनचे जनरल सेक्रेटरी सतीश उचिल उपस्थित होते.

पुण्यात झालेल्या ७१व्या राजपथ महाराष्ट्र राज्य वरिष्ठ गट अॅथलेटिक्स चॅम्पियनशिप स्पर्धेत प्रावीण्य मिळवणाऱ्या खेळाडूंची महाराष्ट्र टीममध्ये निवड लवकरच जाहीर होईल. ही महाराष्ट्र टीम ओरीसाची राजधानी भुवनेश्वर येथे दि. १५ ते १८ जून २०२३ या दरम्यान संपन्न होणाऱ्या राष्ट्रीय आंतरराज्य वरिष्ठ गट अॅथलेटिक्स चॅम्पियनशिप स्पर्धेत भाग घेतील अशी माहिती महाराष्ट्र अॅथलेटिक्स असोसिएशनचे जनरल सेक्रेटरी सतीश उचिल यांनी दिली.

आज संपलेल्या या स्पर्धांमधील महत्वाच्या स्पर्धांचे निकाल पुढीलप्रमाणे.

·        पुरुषांच्या २०० मीटर स्पर्धेत मुंबई उपनगरच्या जय शहा याने २१.७४ वेळ नोंदवून प्रथम क्रमांक मिळविला. मुंबई शहरच्या अक्षय शेट्टी याने २१.८४ आणि मुंबई शहरचा रिदय जना याने २२.१२ वेळ नोंदवून अनुक्रमे दुसरा व तिसरा क्रमांक मिळविला.

·        पुरुषांच्या ४०० मीटर स्पर्धेत साताराच्या शुभम देशमुख याने ४७.६४ वेळ नोंदवून प्रथम क्रमांक मिळविला. पुणेच्या श्यामराव दौंडकरने ४८.९८ आणि पुणेच्या शुभम पाटणकर याने ४९.२१ वेळ नोंदवून अनुक्रमे दुसरा व तिसरा क्रमांक मिळविला.

·        पुरुषांच्या ८०० मीटर स्पर्धेत अकोल्याचा चैतन्य होल्गरे याने १:५४:३७ वेळ नोंदवून प्रथम क्रमांक मिळविला. कोल्हापूरच्या सत्यजित पुजारी याने १:५४:५४ आणि धुळेच्या प्रथमेश देओरे यांने १:५४:५७ वेळ नोंदवून अनुक्रमे दुसरा व तिसरा क्रमांक मिळविला.

·        पुरुषांच्या १५०० मीटर स्पर्धेत कोल्हापूरच्या ओमकार कुंभार याने ३:४८:८२ वेळ नोंदवून प्रथम क्रमांक मिळविला. रत्नागिरीच्या संदीप जोयाशी याने ३:५४:०५ आणि मुंबई उपनगरच्या कार्तिक कारकेराने ३:५४:१६ वेळ नोंदवून अनुक्रमे दुसरा व तिसरा क्रमांक मिळविला.

·        पुरुषांच्या १०००० मीटर स्पर्धेत सोलापूरच्या अरुण राठोडने ३१:०९:७६ वेळ नोंदवून पहिला क्रमांक मिळविला. कोल्हापूरच्या उत्तम पाटीलने ३१:१८:५६ आणि परभणीच्या विष्णू लव्हाळे याने ३१:३०:६९ वेळ नोंदवून अनुक्रमे दुसरा व तिसरा क्रमांक मिळविला.

·        पुरुषांच्या ११० मीटर अडथळ्यांच्या शर्यतीत औरंगाबादच्या तेजस शिरसे याने १३.९७ वेळ नोंदवून प्रथम क्रमांक मिळविला. कोल्हापूरच्या विकास खोडकेने १४.७३ आणि मुंबई शहरच्या साहिल गेदामने १५.२२ वेळ नोंदवून अनुक्रमे दुसरा व तिसरा क्रमांक मिळविला.

·        पुरुषांच्या ४०० मीटर अडथळ्यांच्या शर्यतीत अकोलाच्या निर्मल यादवने ५२.१७ वेळ नोंदवून प्रथम क्रमांक मिळविला. कोल्हापूरच्या रोहन कांबळे याने ५२.४२ आणि पुणेच्या सिद्धेश चौधरीने ५२.५२ वेळ नोंदवून अनुक्रमे दुसरा व तिसरा क्रमांक मिळविला.

·        पुरुषांच्या 4X १०० मीटर रिले स्पर्धेत बॉम्बे सिटी-बी टीमने ४३.०७ वेळ नोंदवून प्रथम क्रमांक मिळविला. ठाणे- एल ने ४३.५५ आणि धुळे-सी टीमने ४३.८९ वेळ नोंदवून अनुक्रमे दुसरा व तिसरा क्रमांक मिळविला.

·        पुरुषांच्या 4X ४०० मीटर रिले स्पर्धेत पूना-जी टीमच्या पी.कदम, प्रफुल्ल लाटे, एस. पाटणकर, एस. दौंडकर यांनी ३:२०:२३ वेळ नोंदवून प्रथम क्रमांक मिळविला. पालघर- एफ च्या अनुज यादव, आशिषकुमार सिंग, प्रीत दास, पी. यादव यांनी ३:२२:३० आणि परभणी- पी च्या व्ही.शिंदे, व्ही.केंद्रे, एच. भालेकर, एस.शिंदे यांनी ३:२३:१८ वेळ नोंदवून अनुक्रमे दुसरा व तिसरा क्रमांक मिळविला.

·        पुरुषांच्या ३००० मीटर स्टीपल चेस स्पर्धेत नाशिकच्या शुभम भंडारे याने ८:४९:४५ वेळ नोंदवून प्रथम कमांक मिळविला. कोल्हापूरच्या सिद्धांत पुजारीने ९:०३:७२ आणि नागपूरच्या राजन यादव याने ९:०५:६८ वेळ नोंदवून अनुक्रमे दुसरा व तिसरा क्रमांक मिळविला.

·        पुरुषांच्या थाळीफेक स्पर्धेत नाशिकच्या सतीश देशमुखने ४७.९५ मीटर नोंदवून प्रथम क्रमांक मिळविला. पुणेच्या पृथ्वीराज नलावडे याने ४७.९० मीटर आणि अहमदनगरच्या श्रीनिवास कारळेने ४४.८२ मीटर नोंदवून अनुक्रमे दुसरा व तिसरा क्रमांक मिळविला.

·        पुरुषांच्या उंच उडी स्पर्धेत नाशिकच्या सर्वेश कुशरे याने २.२० मीटर नोंदवून प्रथम क्रमांक मिळविला. सांगलीच्या ऋषिकेश काटेने २.०० मीटर आणि पुणेच्या धैर्यशील गायकवाडने २.०० मीटर नोंदवली.    

·        महिलांच्या २०० मीटर स्पर्धेत सातारच्या सुदेष्णा शिवणकर हिने २५.१३ वेळ नोंदवून प्रथम क्रमांक पटकाविला. पुण्याच्या ख़ुशी उमेशने २५.३० आणि मुंबई शहरच्या सरोज शेट्टी हिने २५.६८ वेळ नोंदवून अनुक्रमे दुसरा व तिसरा क्रमांक मिळविला.

·        महिलांच्या ४०० मीटर स्पर्धेत पालघरच्या शिवानी गायकवाड हिने ५४.९८ वेळ नोंदवून प्रथम क्रमांक मिळविला. ठाणेच्या निधी सिंगने ५६.०९ आणि पुणेच्या देवश्री लव्हे हिने ५८.५७ वेळ नोंदवून अनुक्रमे दुसरा व तिसरा क्रमांक मिळविला.

·        महिलांच्या ८०० मीटर स्पर्धेत नाशिकच्या यमुना लडकत हिने २:०७:३२ वेळ नोंदवून प्रथम क्रमांक मिळविला. नाशिकच्या ताई बाम्हणे हिने २:१०:६९ आणि पुणेच्या अर्चना आढाव हिने २:१३:१६ वेळ नोंदवून अनुक्रमे दुसरा व तिसरा क्रमांक मिळविला.

·        महिलांच्या १०००० मीटर स्पर्धेत नाशिकच्या पूनम सोनूने हिने ३४:०५:४८ वेळ नोंदवून प्रथम क्रमांक मिळविला. नागपूरच्या प्राजक्ता गोडबोले हिने ३४:३१:०७ आणि साताराच्या रेश्मा केवटे हिने ३४:४०:०१ वेळ नोंदवून अनुक्रमे दुसरा व तिसरा क्रमांक मिळविला.

·        महिलांच्या १०० मीटर अडथळ्यांच्या शर्यतीत ठाणेच्या क्रिस्टल वडाकेल हिने १६.७६ वेळ नोंदवून प्रथम क्रमांक मिळवला. पुणेच्या स्नेहा गर्जे हिने १७.३७ आणि पुणेच्या दीपाली बांदल हिने १८.११ वेळ नोंदवून अनुक्रमे दुसरा व तिसरा क्रमांक मिळविला.  

·        महिलांच्या ४०० मीटर अडथळ्यांच्या शर्यतीत ठाण्याच्या निधी सिंगने १:०२:३० वेळ नोंदवून प्रथम क्रमांक मिळविला. नाशिकच्या श्रावणी सांगळे हिने १:०४:३२ आणि कोल्हापूरच्या श्वेता चिकोडीने १:०५:१२ वेळ नोंदवून अनुक्रमे दुसरा व तिसरा क्रमांक मिळविला.

·        महिलांच्या तिहेरी उडी स्पर्धेत मुंबई उपनगरच्या शर्वरी परुळेकर हिने १२.७९ मीटर नोंदवून प्रथम क्रमांक मिळविला. मुंबई उपनगरच्या पूर्व सावंतने १२.७४ मीटर आणि रायगडच्या त्रिवेणी तावडे हिने अनुक्रमे दुसरा व तिसरा क्रमांक मिळविला.

·        महिलांच्या ३००० मीटर स्टीपल चेस स्पर्धेत साताऱ्याच्या सानिका नलावडे हिने ११:४९:६१ वेळ नोंदवून प्रथम क्रमांक मिळविला. साताऱ्याच्या वैष्णवी सावंत हिने ११.४९.६२ आणि उस्मानाबादच्या योगिनी साळुंके हिने १२:१२:८४ वेळ नोंदवून अनुक्रमे दुसरा व तिसरा क्रमांक मिळविला.

पुणे-कोथरुड मतदारसंघातील बाणेर-बालेवाडी-पाषाण भागातील नागरिकांच्या सेवेसाठी नामदार चंद्रकांतदादा पाटील यांचे बाणेरमध्ये नवे जनसंपर्क कार्यालय सुरू झाले असून, रविवार दि. २१ मे रोजी स्थानिक ज्येष्ठ नागरिकांच्या हस्ते याचे उद्घाटन करण्यात आले. नागरिकांच्या समस्या सोडविण्यासाठी हे कार्यालय सदैव कार्यरत असेल, अशी ग्वाही नामदार चंद्रकांतदादा पाटील यांनी यावेळी दिली.

या कार्यक्रमाला स्थानिक माजी नगरसेवक अमोल बालवडकर, दिलीप वेडे पाटील, नगरसेविका ज्योती कळमकर, स्वप्नाली सायकर, भाजपा नेते गणेश कळमकर, प्रल्हाद सायकर, लहू बालवडकर, भाजपा कोथरुड मंडल अध्यक्ष पुनीत जोशी, राहूल कोकाटे, रोहन कोकाटे, स्थानिक भाजपा कार्यकर्त्या उमाताई गाडगीळ, अस्मिता करंदीकर, सचिन पाषाणकर, ॲड. मिताली सावळेकर यांच्या सह भाजपाचे सर्व पदाधिकारी आणि नागरिक उपस्थित होते.

यावेळी उद्घाटनानंतर नामदार पाटील यांनी स्थानिक नागरिकांशी संवाद साधला. हे कार्यालय आपल्या सेवेसाठी सदैव कार्यरत असेल, अशी ग्वाही यावेळी दिली. त्यावर उपस्थित सर्व नागरिकांनी नामदार पाटील यांचे अभिनंदन करुन, त्यांच्या कार्य कुशलतेबाबत समाधान व्यक्त केले.

थेट भेट द्वारे पाषाणमधील नागरिकांशी संवाद

पुणे-पाषाण मध्ये कमी दाबाने पाणीपुरवठा होत असून, त्यातील अडथळे लवकरच दूर करुन पाषाणमधील नागरिकांना बाणेर-बालेवाडीप्रमाणे सुरळीत पाणीपुरवठा होईल, अशी ग्वाही पालकमंत्री चंद्रकांतदादा पाटील यांनी दिली. थेट भेट उपक्रमाच्या माध्यमातून पालकमंत्री चंद्रकांतदादा पाटील यांनी रविवारी पाषाणमधील नागरिकांशी संवाद साधला. यावेळी ते बोलत होते.

यावेळी भाजपा कोथरुड मंडल अध्यक्ष पुनीत जोशी, भाजपा नेते गणेश कळमकर, प्रल्हाद सायकर, राहूल कोकाटे, सनी निम्हण, रोहन कोकाटे, औंध क्षेत्रीय कार्यालयाचे सहाय्यक आयुक्त संदीप कलाटे यांच्या सह इतर अनेक मान्यवर आणि स्थानिक नागरिक उपस्थित होते.

यावेळी कमी दाबाने होणारा पाणीपुरवठा, वाहतूक कोंडी, कचऱ्याची समस्या, पोलीस गस्त वाढविणे, योग अभ्यास केंद्र उपलब्ध करून देणे आदी समस्या स्थानिक नागरिकांनी चंद्रकांतदादा पाटील यांच्या समोर मांडल्या. त्यावर संबंधित अधिकाऱ्यांना सर्व समस्या तातडीने दूर करण्याच्या सूचना दिल्या. तसेच कमी दाबाने होणाऱ्या पाणीपुरवठ्याच्या प्रश्नावर अधिक्षक अभियंता अनिरुद्ध पावसकर यांच्याशी फोनवर संपर्क साधून, पाणीपुरवठा सुरळीत करण्याची सूचना नामदार पाटील यांनी केली‌‌.

त्यासोबतच चुकीच्या पद्धतीने वाहन चालवून वाहतूक कोंडी करणाऱ्यांवर कारवाई करण्याचे निर्देश नामदार पाटील यांनी पोलीस अधिकाऱ्यांना दिले. तसेच योग अभ्यासासाठी आयुक्तांसोबत चर्चा करुन केंद्र सुरू करण्याचे निर्णय घेण्याची ग्वाही यावेळी नामदार पाटील यांनी यावेळी दिली.

पाटील यांनी लोकसहभागातून स्वच्छच्या माध्यमातून कचरा संकलन सुरू केल्याबाबत सर्व नागरिकांनी समाधान व्यक्त केले. मात्र, महामार्गालगत काहीजण राडारोडा टाकून वाहतुकीस अडथळा निर्माण करत असल्याचे, नामदार पाटील यांच्या निदर्शनास आणून दिले. त्यावरही लवकरच तोडगा काढण्याची ग्वाही त्यांनी यावेळी दिली.

श्रीमंत दगडूशेठ हलवाई सार्वजनिक गणपती ट्रस्ट व सुवर्णयुग तरुण मंडळातर्फे आयोजन

पुणे : गणरायाचा पाताळातील गणेश जन्म साजरा करताना दगडूशेठ गणपती मंदिरात फुलांच्या शेषनागाच्या कलाकृतीमध्ये गणरायाचे विलोभनीय रुप विराजमान झाले. फुलांच्या शेषनागांच्या प्रतिकृतींची मंदिरावर केलेली आकर्षक आरास पाहण्याकरिता भाविकांनी मोठी गर्दी केली.

श्रीमंत दगडूशेठ हलवाई सार्वजनिक गणपती ट्रस्ट व सुवर्णयुग तरुण मंडळातर्फे गाभा-यासह प्रवेशद्वारावर शेषनागाच्या विविधरंगी भव्य फुलांच्या भव्य प्रतिकृती साकारुन सजावट करण्यात आली. याच दिवशी श्री गणेशाचा पाताळातील गणेश जयंती म्हणजेच शेषात्मज गणेश अवतार झाला होता.

गणेश जयंतीनिमित्त मंदिरात ब्रह्मवृंदांच्या उपस्थितीत पहाटे ३ वाजता ब्रह्मणस्पती सुक्त अभिषेक पार पडला. त्यानंतर पहाटे ४ वाजता गायक ऋषिकेश रानडे व सहकारी यांनी स्वराभिषेकातून गणरायाचरणी स्वरसेवा अर्पण केली. तसेच मंदिरात गणेश याग, सहस्त्रावर्तने असे धार्मिक विधी देखील पार पडले.

भगवान ब्रह्मदेव सृष्टी रचनेच्या कार्यात असताना आपल्याच सृष्टीवर मोहित झाले. त्या मोहित अवस्थेत त्यांच्या नासिकेमधून एक बालक जन्माला आले. त्याच्याकडे पाहिल्यानंतर भगवान ब्रह्मदेव अधिकच मायायुक्त झाले. परिणामी आपल्या नव्या अपत्याला त्यांनी मायाकर असे नाव दिले. अनेकानेक वरदान देऊन त्याला परिपुष्ट केले. पुढे विप्रचित्ती नामक राक्षसाने या मायाकराला राक्षसांचा राजा केले. मायाकराने आपल्या अतुलनीय वरदानांच्या भरवशावर सगळी पृथ्वी आणि स्वर्ग लोक जिंकले. त्यानंतर त्याने पाताळावर आक्रमण केले.
त्याच्या वरदानासमोर निष्प्रभ झालेल्या भगवान शेषांनी शेवटी भगवान गणेशांचे स्मरण केले.

श्रीशेष ध्यान करत असतांना त्यांच्या ध्यानातूनच भगवान श्री गणेश श्रीशेषात्मज रूपात ज्येष्ठ शुद्ध चतुर्थीला मध्यान्य समयी प्रकट झाले. याच अवतारात पुढे गजासुर नामक राक्षसाला मारण्यासाठी भगवान श्री गणेशांनी ब्रह्मदेव, विष्णू, शंकर, देवी, सूर्य या पंचेश्वरांच्या शक्तिने युक्त असलेले मूषक हे वाहन त्यांना करायला सांगितले. या मूषकावर बसून श्री गणेशांनी गजासुर वध केल्यामुळे याच श्रीशेषात्मज अवताराला श्रीमूषकग असे पण नाव प्राप्त झाले. गाणपत्य संप्रदायात भाद्रपद आणि माघ मासाप्रमाणेच ज्येष्ठ चतुर्थीचाही श्रीशेषात्मज जन्मोत्सव महत्वपूर्ण मानलेला आहे. त्यामुळे ही सजावट मंदिरामध्ये करण्यात आली होती.

पुणे-केंद्र सरकारच्या यंत्रणांचा वापर करून सूडबुद्धीने विरोधकांवर कारवाई करण्याचे सत्र सध्या देशभरात सुरू आहे. काही दिवसांपूर्वी राष्ट्रवादी काँग्रेस पक्षाचे प्रदेशाध्यक्ष जयंत पाटील यांना समन्स जारी केल्यानंतर का स्वतः जयंत पाटील ईडीच्या कार्यालयात गेले आहेत. यावेळी जयंत पाटील यांच्या समर्थनार्थ पुणे शहरातील समस्त पदाधिकाऱ्यांनी बालगंधर्व रंगमंदिर चौकात निदर्शने केली व स्वतःच्या राजकीय फायद्यासाठी इडी सारख्या तपास यंत्रणांचा गैरवापर करणाऱ्या भारतीय जनता पार्टीचा निषेध केला.आंदोलन प्रसंगी राष्ट्रवादीचे शहराध्यक्ष प्रशांत जगताप अंकुश काकडे,हर्षवर्धन दीपक मानकर,प्रदीप गायकवाड़,किशोर कांबळे,सदानंद शेट्टी, राकेश कामठे, अजिंक्य पालकर, मनोज पाचपुते,नितीन जाधव, महेश हांडे आदींसह मोठ्या संख्येने पदाधिकारी उपस्थित होते.
“सरकार हमसे डरती है, ईडी को आगे करती है”,”ईडी म्हणजे भाजपचा घरगडी”, “वातावरण फिरलय , सरकार घाबरलय” , “नागपूरचा पोपट काय बोलतोय,फौजदाराचा हवलदार झालो म्हणतोय” अश्या घोषणांनी परिसर दणाणून सोडला होता.

यावेळी बोलताना शहराध्यक्ष प्रशांत जगताप म्हणाले की,”गेल्या तीन दशकांपासून राजकारण आणि समाजकारणात सक्रिय असलेले राष्ट्रवादी काँग्रेस पार्टीचे प्रदेशाध्यक्ष जयंत पाटील यांच्यावर देखील इडीची कारवाई करत त्यांचा आवाज दाबण्याचा तसेच त्यांना आणि राष्ट्रवादी काँग्रेस पक्षाला बदनाम करण्याचा प्रकार केंद्रातील व राज्यातील सत्ताधारी भारतीय जनता पार्टी करू पाहत आहे.राष्ट्रवादी काँग्रेस पार्टी अश्या दबावाला बळी पडणार नाही,तुम्ही जितका त्रास द्याल तितक्या जास्त ताकदीने आम्ही येत्या निवडणुकांमध्ये भाजपला त्यांची जागा दाखवून देऊ, असा इशारा देखील त्यांनी दिला.तसेच पुणे जिल्याचे जिल्हाधिकारी राजेंद्र देशमुख याना निवेदन देन्यात आले.

पुणे :डाॅक्टरांसाठी विविध प्रकारचे उपक्रम सातत्याने आयोजित करणाऱ्या जनरल प्रॅक्टीशनर्स असोसिएशनच्या (जीपीए) वतीने वीमेन्स काॅन्फरन्स आयोजित करण्यात करण्यात आली होती. या कार्यक्रमात ‘ लेडी जीपी ऑफ द इयर’ पुरस्काराने डाॅ. स्मिता घुले यांचा गौरव करण्यात आला. सर्वोत्तम वैद्यकीय सेवेच्या माध्यमातून समाजसेवा केल्याबद्दल डॉ. घुले यांना हा पुरस्कार प्रदान करण्यात आला.
जीपीएच्या वतीने आयोजित या पुरस्कार वितरण सोहळ्याला गेस्ट ऑफ ऑनर म्हणून पुणे महानगपालिकेच्या आरोग्य अधिकारी डाॅ. मनीषा नाईक, तर प्रमुख पाहुण्या म्हणून कांचन पाटील-वडगावकर उपस्थित होत्या. यावेळी जीपीएचे अध्यक्ष डाॅ. श्रीराम जोशी, सचिव डाॅ. भाग्यश्री मुणोत-मेहता, खजिनदार डाॅ. सुनील भुजबळ, माजी अध्यक्ष डाॅ. हरिभाऊ सोनवणे, प्रियदर्शिनी विंगच्या चेअरमन डाॅ. आरती शहाडे व इतर महिला डाॅक्टर उपस्थित होत्या.
डाॅ. श्रीराम जोशी यांनी जीपीएच्या विभिन्न कार्याची माहिती यावेळी दिली. महिला डाॅक्टर आपल्या घराच्या सर्व जबाबदाऱ्या सांभाळून वैद्यकीय सेवा करीत असतात. तसेच सामाजिक कार्यातदेखील असतात. अशा वेळी महिला डाॅक्टरांच्या कार्याचा गौरव करण्यासाठी हा उपक्रम आयोजित करण्यात येत असल्याचे त्यांनी आपल्या भाषणात सांगितले.
पुरस्कार स्वीकारल्यानंतर डाॅ. स्मिता घुले यांनी जीपीएच्या प्रति आपली कृतज्ञता व्यक्त केली व त्यांनी आपले अनुभव सर्वांसमोर मांडले. जीपीए डाॅक्टरासाठी विविध उपक्रम सातत्याने राबवत असल्याबद्दल त्यांनी सर्वांचे आभार मानले. प्रमुख अतिथी असलेल्या डाॅ. मनीषा नाईक यांनी एक अधिकारी म्हणून आपण सातत्याने डाॅक्टरांना सहकार्य करीत राहू, असे आश्वासन दिले. या पुरस्कार सोहळ्यापूर्वी विविध तज्ञ डाॅक्टरांचे मार्गदर्शन सत्र आयोजित करण्यात आले होते. यामध्ये उपस्थितांनी विचारलेल्या प्रश्नांना तज्ञ डाॅक्टरांनी उत्तरे दिली. कार्यक्रमाचे सूत्रसंचालन डाॅ. भाग्यश्री मुणोत-मेहता यांनी केले. तर आभार डॉ. राजेश दोषी यांनी मानले.