पुणे- कसबा पोट निवडणुकीच्या दरम्यान झालेल्या काही प्रसंग घटनांच्या वरून दोन्ही उमेदवार म्हणजे धंगेकर आणि रासने यांच्यासह राष्ट्रवादी च्या रुपाली पाटलांवरही गुन्हा दाखल झाला आहे ,गुन्हा घडत असताना अगदी वर पासून खालपर्यंत चे निवडणूक अधिकारी कोणते कर्तव्य बजावत होते ? कोणास साथ देत होते याची कोणतीही चौकशी अगर काहीही करण्याचा इरादा मात्र दिसून आलेला नाही . या तिघांवर गुन्हे दाखल करून प्रशासन मात्र अगदी स्वच्छ, सभ्य ,कायद्याचे पालन करणारे असल्याचा तोरा आता मिरविणार आहे. आणि या तिघांवरही दाखल झालेल्या गुन्ह्यांचे पुढे काय होणार आहे ? या प्रश्नाचे उत्तर हि जनतेला ठाऊकच असावे.

कसबा आणि चिंचवड विधानसभा पोट निवडणुकांसाठी काल मतदान पार पडलं. मतदानाचा दिवस भाजप आणि महाविकास आघाडीच्या आरोप-प्रत्यारोपांनी गाजला. तर आज मतदानाच्या दुसऱ्या दिवशीही राजकीय घडामोडींना वेग आला आहे.भाजपचे कसब्याचे उमेदवार हेमंत रासने यांनी मतदानाला जाताना गळ्यात भाजपचं उपरणं घातलं होतं. कमळाचं चिन्ह असलेलं हे उपरणं घालूनच त्यांनी मतदान केंद्रात प्रवेश केला आणि मतदान करून बाहेर पडले. या प्रकरणी रासने यांच्याविरोधात विश्रामबाग पोलीस ठाण्यात अखेर गुन्हा दाखल करण्यात आला आहे.तर काँग्रेस उमेदवार रवींद्र धंगेकर यांनी भाजपवर मतदारांना पैसे वाटप केल्याचा आरोप करत उपोषण केलं होतं. भाजपने मतदारांना पैसे वाटल्याचा आरोप रवींद्र धंगेकर यांनी केला होता. पत्नीसह त्यांनी कसबा गणपतीसमोर उपोषण सुरु केलं होतं. हा आचारसंहितेचा भंग असल्याच्या कारणामुळे त्यांच्याविरोधातही गुन्हा दाखल झाला आहे. तर रुपाली पाटील यांनी गोपनियतेचा भंग केल्याचा आरोप करण्यात आला आहे.

पुणे, दि. २७ फेब्रुवारी २०२२:एकामागे एक तांत्रिक बिघाड होत गेल्याने तसेच महापारेषण कंपनीच्या अतिउच्चदाब लोणीकंद उपकेंद्रातील आकस्मिक दुरुस्ती कामामुळे वाघोलीमधील सुमारे ९५०० वीजग्राहकांचा वीजपुरवठा रात्रभर खंडित होता. महावितरणच्या अभियंता व कर्मचाऱ्यांनी रात्रभर केलेल्या अथक दुरुस्ती कामानंतर सोमवारी (दि. २७) सकाळी साडेआठ वाजता वीजपुरवठा सुरळीत करण्यात आला.

याबाबत माहिती अशी की, वाघोली परिसराला पूर्वरंग २२/२२ केव्ही उपकेंद्राद्वारे वीजपुरवठा करण्यात येतो. या उपकेंद्राला महापारेषणच्या लोणीकंद अतिउच्चदाब उपकेंद्रामधून महावितरणच्या पूर्वरंग २२ केव्ही वाहिनीद्वारे वीजपुरवठा केला जातो. मात्र रविवारी (दि. २६) सकाळी ११ वाजताच्या सुमारास पूर्वरंग वीजवाहिनीमध्ये बिघाड झाल्यामुळे पूर्वरंग उपकेंद्राला करोल-२ या वीजवाहिनीद्वारे पर्यायी स्वरुपात ताबडतोब वीजपुरवठा सुरू करण्यात आला. मात्र दुपारनंतर महापारेषणच्या लोणीकंद अतिउच्चदाब उपकेंद्रामध्ये तातडीचे आकस्मिक दुरूस्तीचे काम उद्भवले. ते करणे अत्यंत गरजेचे असल्याने सायंकाळी ६ ते ८ वाजेपर्यंत या अतिउच्चदाब उपकेंद्रातून निघणाऱ्या महावितरणच्या वाघेश्वर, संघार व करोला-२ या तिनही २२ केव्ही वाहिन्यांचा वीजपुरवठा बंद ठेवण्यात आला. दुरुस्तीचे काम पूर्ण झाल्यानंतर महावितरणच्या तीनही वाहिन्यांचा वीजपुरवठा सुरु करण्यात आला. मात्र अर्ध्या तासात वाघेश्वर व करोला-२ या वाहिन्यांमध्ये बिघाड होऊन वीजपुरवठा पुन्हा खंडित झाला.

दरम्यान महापारेषणच्या आकस्मिक दुरुस्ती कामामुळे सायंकाळी ६ ते ८ वाजेपर्यंत वाघोली परिसरातील कमीत कमी ग्राहकांचा वीजपुरवठा बंद ठेवण्यासाठी महावितरणकडून पर्यायी वीजपुरवठ्यासाठी तांत्रिक उपाययोजना करण्यात आली. यामध्ये वाघोली २२ केव्ही वाहिनीवर आकस्मिक दुरुस्ती कामामुळे बंद असलेल्या वीजवाहिन्यांचा भार टाकण्यात आला. मात्र वाढत्या उन्हामुळे विजेची मागणी देखील वाढली आहे. परिणामी नाईलाजास्तव वाघोली परिसरातील आव्हाळवाडी रोड, साईसत्यम पार्क, रेणुका पार्क, दाभाडे वस्ती, बायफ रस्ता, डोमखेल वस्ती या परिसरातील सुमारे ९ हजार ५०० ग्राहकांचा वीजपुरवठा महापारेषणच्या आकस्मिक दुरुस्ती कामामुळे सायंकाळी ६ ते ८ वाजेपर्यंत बंद ठेवण्यात आला. त्यानंतर महावितरणच्या वाघेश्वर व करोला-२ या वाहिन्यांमध्ये बिघाड झाल्यामुळे तसेच विजेचे भारव्यवस्थापन शक्य नसल्यामुळे या परिसरात रात्री ८.३० वाजेपासून वीजपुरवठा पुन्हा बंद झाला. महावितरणचे अभियंता व कर्मचाऱ्यांनी रात्रभर वाघेश्वर व करोला-२ या दोन्ही भूमिगत वीजवाहिन्यांच्या दुरुस्तीसाठी अथक प्रयत्न केले. जेसीबी व ब्रेकरने खोदकाम करण्यात आले. यामध्ये वाघेश्वर २२ केव्ही वाहिनीच्या दुरुस्तीचे काम पूर्ण झाल्यानंतर सकाळी ८.३० वाजता सर्वच ९ हजार ५०० ग्राहकांचा वीजपुरवठा पूर्ववत करण्यात आला.

पुणे-
रविवार, दिनांक 26 फेब्रुवारी: पुणे शहर कसबा मतदारसंघाच्या पोटनिवडणुकीत भारतीय जनता पक्षाचे उमेदवार हेमंत रासने यांनी मतदान करताना आचारसंहितेचा भंग केला आहे ते स्वतः नूतन मराठी विद्यालय प्रशाला बुध क्रमांक 75 या मतदान केंद्रावर मतदान करायला गेले असताना त्यांनी त्यांचे चिन्ह असलेले कमळाची पट्टी गळ्यात घालून मतदान केले. निवडणूक प्रचार संपल्यानंतर त्यांनी ही कमळाची पट्टी घालून प्रचार केल्याचे यावरून निदर्शनास येत आहे ही बाब गंभीर असून त्यावर निवडणुकीत आचारसंहितेचा भंग केल्याप्रकरणी गुन्हा दाखल करण्यात यावा अशी शिवसेना पुणे शहर उद्धव ठाकरे गटाच्या वतीने निवडणूक निर्णय अधिकारी यांना लेखी निवेदन देऊन तक्रारी अर्ज करण्यात आलेला आहे.
यावेळी शिवसेना पुणे शहर प्रमुख संजय मोरे संघटक संतोष गोपाळ,  किशोर रजपूत, प्रसिद्धी प्रमुख अनंत घरत, विभाग प्रमुख प्रसाद काकडे, सुरज लोखंडे, महेश पोकळे राजेश मोरे, दिलीप पोमान, नितीन वाघ, प्रणव वाडकर ,  व इतर शिवसैनिक पदाधिकारी उपस्थित होते.

पुणे : कसबा पेठ पोटनिवडणुकीत पैशांचे पाकीट न घेतल्याच्या कारणावरुन भाजपचे माजी नगरसेवक व त्यांच्या साथीदारांनी एका कुटुंबाला बेदम मारहाण केली.यावरुन गंजपेठेत शनिवारी रात्री जोरदार राडा झाला. मध्यरात्रीपर्यंत दोन्ही गटातील लोक गंजपेठ पोलीस चौकीसमोर ठाण मांडून बसले होते. पोलिसांनी दोन्ही गटातील २५ ते ३० जणांवर गुन्हा दाखल केला.

याबाबत निता किशन शिंदे (वय ४२, रा. गंज पेठ) यांनी फिर्याद दिली आहे. त्यानुसार पोलिसांनी विष्णु हरीहर, निर्मल हरीहर, हीरा हरीहर व इतर १५ ते १६ जणांवर गुन्हा दाखल केला आहे. याबाबत पोलिसांनी दिलेल्या माहितीनुसार, फिर्यादी या घरी असताना विष्णु हरीहर तसेच इतर १५ ते १६ जणा आले. फिर्यादी यांनी पैशांचे पाकीट न घेतल्याच्या कारणावरुन त्यांचा भाऊ कुणाल यास धक्काबुक्की केली. तुला लय माज आलाय का, तुझ्या घरी खायला नाही, असे म्हणून जातीवाचक शिवीगाळ केली. तसेच त्याच्याबरोबर आलेल्या लोकांनी कुणाल याला लाकडी फळीने मारले व सावधान मित्र मंडळाच्या मागे मोकळ्या पटांगणात फिर्यादीच्या मावशीच्या हातावर, पोटावर ठोसा मारला. फिर्यादी सोडविण्यास गेल्यावर त्यांनाही मारहाण केली. ही घटनेची माहिती मिळताच महाविकास आघाडीचे कार्यकर्ते गंजपेठ पोलीस चौकीसमोर जमले. त्यांनी ॲट्रासिटीखाली गुन्हा दाखल करण्याची मागणी केली होती. त्यानंतर पहाटे साडेतीन वाजता गुन्हा दाखल करण्यात आला.

याविरोधात हिरालाल नारायण हरीहर (वय ६७, रा. गंज पेठ) यांनी फिर्याद दिली आहे. त्यानुसार पोलिसांनी विशाल कांबळे, निहाल कांबळे, गोविंद लोंढे, आकाश भोसले, सनी नाईक व इतर १० ते १५ जणांवर गुन्हा दाखल केला आहे. फिर्यादी हे रात्री साडे अकरा वाजता सावधान मित्र मंडळाजवळ मारुतीचे दर्शन घेऊन घरी जात असताना विशाल कांबळे याने इकडे कशाला आलास, असे म्हणून जातीवाचक शिवीगाळ केली. फिर्यादी हे त्यांना समजावून सांगत असताना इतरांनी धक्काबुक्की केली. व ओढत पटांगणात नेऊन हाताने लाकडी फळीने मारण्यात सुरुवात केली. डोक्यात मारहाण करुन प्लास्टीकचे खुर्चीने मारहाण केली. फिर्यादी यांनी मदतीसाठी आरडाओरड केला असता याला सोडायचे नाही, असे बोलून धमकी दिली.

या घटनेची माहिती मिळताच सहायक पोलीस आयुक्त रमाकांत माने, वरिष्ठ पोलीस निरीक्षक संगिता यादव, पोलीस निरीक्षक राजेश तटकरे, उपनिरीक्षक राहुल जोग यांनी भेट दिली. या संपूर्ण प्रकाराने पहाटेपर्यंत गंजपेठ परिसरात गोंधळाचे वातावरण होते. पोलिसांनी जादा कुमक मागवून बंदोबस्त वाढला आहे.

पुणे-हाणामाऱ्या , रात्रींचा दिवस अन दिवसांची रात्र , पैशांच्या बड्याबड्या बाता , मंत्र्यांची ,माजी मंत्र्यांची , बड्याबड्या नेत्यांची फौज अन त्यात भरीस भर प्रशासनाची हुशारी या सर्वांच्या लढायांनी ४५ टक्के मतदानापर्यंत कसब्यात तर चिंचवड मध्ये ४१ टक्के मतदानापर्यंत मजल मारली . साडेतीन वाजेपर्यंत अवघे ३० टक्के मतदान झाल्यावर साडेचार वाजता खासदार बापटांना मतदानासाठी आणले गेले आणि साडेपाच वाजेपर्यंत ४५.२५ टक्के मतदान झाल्याचे सांगण्यात आले . २ मार्च रोजी मतमोजणी होणार आहे. कसब्यातील मतमोजणी कोरेगाव मार्क येथील वखार महामंडळाच्या गोदामात होणार आहे. चिंचवडमधील मतमोजणी कामगार भवन, थेरगाव इथे होणार आहे. दोन्ही मतदारसंघांत महाविकास आघाडी व महायुतीने निवडणूक प्रतिष्ठेची केल्यामुळे निकालाबाबत पुणे जिल्ह्यालाच नाही, तर राज्यालाही उत्सुकता आहे.

महापालिका भुखंड सरकारी शाळेस वापरा, खाजगी शाळेस देण्यास आप चा विरोध

पुणे- बाणेर येथील सुमारे साडेचार एकराचा भूखंड आणि हडपसर येथील सुमारे साडेतीन एकरांचा भूखंड महापालिका प्रशासक कोणाच्या घशात घालू पाहत आहेत , हाच प्रयत्न भाजपा आणि राष्ट्रवादीच्या काही लोकप्रतिनिधींनी लोकनियुक्त शासन महापालिकेवर असताना केला होता मात्र त्यास विरोध करण्यात आल्याने तो बारगळला होता आता तोच प्रस्ताव महापालिका प्रशासक राबवीत असल्याचा आरोप आम आदमी पार्टी चे जिल्हा अध्यक्ष मुकुंद किर्दत यांनी केला आहे.

ते म्हणाले,’ पुण्यातील बाणेर येथील 4.5 एकर आणि हडपसर येथील 3.35 एकर जागेवर पिपिपी तत्त्वावर खाजगीकरणातून शाळा बांधून तीस वर्षासाठी चालवण्यास देण्याचे नियोजन प्रशासन करीत असल्याचे कळते. ऑगस्ट 2021 मध्ये याच पद्धतीने महानगरपालिकेचे ताब्यातील जवळपास 185 जागा , ॲमेनिटी स्पेस, दीर्घकालीन कराराने देण्याचे भाजपने योजले होते. त्यास प्रथम राष्ट्रवादी काँग्रेसने सुद्धा सहमती दर्शवली होती. परंतु आम आदमी पार्टीच्या विरोधामुळे हा प्रस्ताव बारगळला. आता मागील दरवाजाने तीच योजना पुन्हा आणण्याचे प्रशासनाचे धोरण दिसत आहे लोकनियुक्त प्रतिनिधी नसताना सध्या प्रशासनाकडून अशी दीर्घकालीन परिणाम करणारी धोरणे राबवणे हे अयोग्य आहे. राज्यसरकार नियुक्त प्रशासक हे कामकाज चालवीत आहेत, त्यामुळे भाजप आणि शिंदे गट – शिवसेना युतीचे राज्य सरकार हे धोरण प्रशासनामार्फत रेटण्याचा प्रयत्न करत आहे असे दिसते आहे. पुणे शहरामध्ये सर्वसामान्यांसाठी आठवी पुढे शिक्षणाची सोय वर्ष नाही. तसेच बऱ्याच शाळांमध्ये खेळण्यासाठी चे ग्राउंड उपलब्ध नाही. पुणे शहरात तर स्वच्छतागृहे आणि पार्किंग यासाठी पुरेशा जागा नाहीत असे असताना उपलब्ध जागा खाजगीकरणसाठी देण्यास आम आदमी पार्टीचा विरोध आहे.
पुण्यातील मध्यमवर्गीय पालकांना इंग्रजी माध्यमाच्या सरकारी शाळा हवे आहेत. त्यातच आठवी पुढच्या शिक्षणाच्या शाळा उपलब्ध नाही, त्यामुळे मुलींचे शिक्षण अर्धवट राहते असा अनुभव आहे. यात भर म्हणून येणाऱ्या काळात नवीन राष्ट्रीय शिक्षण धोरणानुसार नर्सरी पासूनच ते दहावीपर्यंत मोफत शिक्षण देण्याचे धोरण अवलंबले जाणार आहे. त्यामुळे आंगणवाडी, नर्सरी केजी साठी पण जागा लागतील. या जागा उपलब्ध करून देणे सुविधा उपलब्ध करणे ही शासनाची जबाबदारी असणार आहे. त्यामुळे अशा पद्धतीच्या पीपीपी तत्त्वावरील खाजगी शाळांच्या बांधणीस आम आदमी पार्टीचा विरोध आहे. मध्यंतरी देवेंद्र फडणवीस आणि चंद्रकांत पाटील यांनी यापुढे शाळांना अनुदान देणार नाही असे सांगितले होते. एकुणात गरीब, मध्यमवर्गीय जनतेस शिक्षण हक्क नाकारण्याचे धोरण भाजप सरकार राबवणार आहे असे दिसते आहे. यामुळेच या भागात नवीन अनुदानित शाळा उभी करणार नाही असे शिक्षण मंडळाने म्हंटले असावे. शिक्षण हक्क कायद्यानुसार नजिक शाळा उपलब्ध करून देणे ही स्थानिक प्रशासनाचे कर्तव्य आहे. शिक्षण हक्क आणि दीर्घकालीन जनहितासाठी आम आदमी पार्टी अश्या जमिनी खाजगी संस्थांना देण्यास सर्व पातळीवर विरोध करेल याची दखल राज्य सरकार व पुणे मनपा प्रशासनाने घ्यावी.