मुंबई-राष्ट्रीय तपास यंत्रणेने (NIA) मुंबई पोलिसांना एक अलर्ट पाठवला आहे. त्यात एक धोकादायक व्यक्ती मुंबई शहरात पोहोचल्याचा इशारा देण्यात आला आहे. मुंबई पोलिसांच्या सूत्रांच्या माहितीनुसार, NIA ने एक ईमेल पाठवला आहे. त्यात सरफराज मेमन नामक व्यक्तीचा उल्लेख आहे. एजंसीने सरफराज हा देशासाठी अत्यंत धोकादायक व्यक्ती असल्याचे नमूद करत पोलिसांना 24 तास अलर्ट राहण्याचे निर्देश दिलेत.
अलर्ट मेलमध्ये NIA ने म्हटले आहे की, सरफराज मध्य प्रदेशाचा आहे. त्याने चीन व हाँगकाँगमध्ये ट्रेनिंग घेतली आहे. एजन्सीने मुंबई पोलिसांना सरफराजचे आधार कार्ड, ड्रायव्हिंग परवाना व पासपोर्टही मेल केला आहे. त्यानंतर मुंबई पोलिसांनी या प्रकरणी इंदूर पोलिसांशीही संपर्क साधला आहे.
फेब्रुवारी महिन्याच्या प्रारंभीच NIA ला एका अज्ञात व्यक्तीने ईमेल पाठवला होता. त्यात त्याने आपण तालिबानी असल्याचा दावा केला होता. तसेच मुंबईत अतिरेकी हल्ला करण्याची धमकीही दिली होती. NIA ने या प्रकरणी मुंबई पोलिसांना संपूर्ण घटनाक्रम समजावून सांगितला होता. त्यानंतर महाराष्ट्रातील महत्त्वाच्या शहरांत अलर्ट जारी करण्यात आला होता.
