शिंदे गटाचे नेते रामदास कदम यांनी नुकताच भाजपवर केसाने गळा कापण्याचा आरोप केला होता. त्यांच्या टीकेला प्रत्युत्तर देताना उपमुख्यमंत्री देवेंद्र फडणवीस यांनी भाजपने शिवसेनेचा नेहमीच सन्मान केल्याचा दावा केला होता. तसेच आम्ही 105 जण असलो तरी आम्ही एकनाथ शिंदे यांना मुख्यमंत्री केल्याची आठवणही त्यांनी रामदास कदम यांना करवून दिली होती. त्यांच्या या टीकेचा शिंदे गटाचे प्रवक्ते संजय शिरसाट यांनी शुक्रवारी समाचार घेतला. भाजपने पाठिंबा दिल्यामुळे एकनाथ शिंदे मुख्यमंत्री झाल्याच्या देवेंद्र फडणवीस यांच्या टीकेला शिंदे गटाने चोख प्रत्युत्तर दिले आहे. आम्ही 105 आमदार असूनही एकनाथ शिंदे यांना मुख्यमंत्री केल्याच्या भाजपच्या दाव्यात तथ्य आहे. पण एकनाथ शिंदे यांनी उठाव केलाच नसता तर भाजपच्या 105 जणांना आजही विरोधात बसावे लागले असते हे ही तेवढेच खरे आहे. त्यामुळे कुणीही कुणाचेही श्रेय लाटण्याचे प्रयत्न करू नये, असे शिंदे गटाने उपमुख्यमंत्री देवेंद्र फडणवीस यांना ठणकावून सांगितले आहे.

काय म्हणाले होते रामदास कदम?

महायुतीतील जागावाटपाच्या मुद्यावरून शिंदे गटाचे नेते रामदास कदम यांनी भाजपवर निशाणा साधला होता. महाराष्ट्र भाजपतील काही जण अत्यंत घृणास्पद काम करत आहेत. त्यामुळे पंतप्रधान नरेंद्र मोदी व केंद्रीय गृहमंत्री अमित शहा यांनी या नेत्यांचे कान उपटले पाहिजेत. प्रत्येकाला स्वतःचा पक्ष वाढवायचा असतो. पण जे लोक तुमच्यावर विश्वास ठेवून आले, त्यांचा केसाने गळा कापू नका. असे केल्यास भाजपविषयी जनतेत वेगळा संदेश जाईल, असे रामदास कदम म्हणाले होते.

सार्वजनिक बांधकाम मंत्री रवींद्र चव्हाणांकडून आपल्या मुलाला मुद्दाम जाणीवपूर्वकपणे त्रास दिला जातोय असा आरोप रामदास कदमांनी केला रवींद्र चव्हाण हे फडणवीसांचे निकटवर्तीय मानले जातात. चव्हाणांच्या विषयावरुनच बोलताना रामदास कदमांनी भाजपा नेत्यांना थेट, ‘भाजपाने केसाने गळा कापू नये,’ असा इशारा दिला होता व . ‘माझं नाव रामदास कदम आहे, हे लक्षात ठेवा,’ असं सूचक विधान करत त्यांनी भाजपा नेत्यांना वरिष्ठांनी समज द्यावी असं म्हटलं होते.

काय म्हणाले होते देवेंद्र फडणवीस?

रामदास कदम यांच्या या विधानावर उपमुख्यमंत्री देवेंद्र फडणवीस यांनी एकनाथ शिंदे यांना भाजपने मुख्यमंत्री केल्याची आठवण करवून दिली होती. ते म्हणाले होते की, रामदास कदम यांना मी गत अनेक वर्षांपासून ओळखतो. त्यांना अशा प्रकारची विधाने करण्याची सवय आहे. ते टोकाचेही बोलतात. बऱ्याचदा रागानेही बोलतात. पण भाजपाने शिवसेनेचा नेहमीच सन्मान केला आहे. आम्ही 105 जण आहोत. त्यानंतरही आम्ही आमच्यासोबत आलेल्या एकनाथ शिंदे यांना मुख्यमंत्री केले. कारण, आम्हाला खरी शिवसेना सोबत आल्याचे समाधान आहे. मुख्यमंत्री एकनाथ शिंदे यांना आमचं पूर्ण समर्थन आहे.

मुंबई- लोणावळा येथून शरद पवारांनी थेट अजित पवारांच्या राष्ट्रवादीचे आमदार सुनील शेळकेंना इशारा दिला. माझ्या कार्यक्रमाला जाऊ नये म्हणून, कार्यकर्ते आणि पदाधिकाऱ्यांना स्थानिक आमदाराने दमदाटी केली. यापुढे दमदाटी केली तर शरद पवार म्हणतात मला अशा कडक शब्दात ठणकावत सोडणार नाही, असे शरद पवार म्हणले. आपण कोणालाही धमकी किंवा दमदाटी केलेली नाही. एक व्यक्ती तरी पुरावा म्हणून समोर आणा. नाही तर शरद पवार खोटे बोलले असं महाराष्ट्रात सांगणार असा पलटवार शेळकेंनी केला… यानंतर शरद पवारांची ती धमकी नसून तो एक इशारा होता, असे शिवसेना नेते आणि खासदार संजय राऊत यांनी म्हटले आहे.आणि पक्ष सोडून गेलेले गद्दार जर निष्ठावंताना धमक्या देत असतील तर कोणत्या भाषेत उत्तर द्यावे ? असाही सवाल केला आहे.

दरम्यान संजय राऊत पुढे बोलताना म्हणाले की, ज्या पक्षाच्या चिन्हावर तुम्ही निवडून आलात, ज्या पक्षामुळे हे महाशय (अजित पवार) निवडून आले, ते जर शरद पवार यांच्यासोबत निष्ठेने राहिलेल्या कार्यकर्त्यांना धमक्या देत असतील तर त्यांना कोणत्या भाषेत उत्तर दिले पाहिजे ? असा सवालही राऊत यांनी विचारला.

संजय राऊत पुढे बोलताना म्हणाले की, वंचित बहुजन आघाडी महाविकास आघाडीचा घटक असून आम्ही एकत्र बसून चर्चा करतो आणि निर्णय घेतो. दोन दिवसांपूर्वी स्वत: बाळासाहेब आंबेडकर बैठकीस उपस्थित होते. एखाद दुसऱ्या जागेवरून काही चर्चा होतात, पण आम्ही बैठकीतील काही गोष्टी बाहेर न बोलण्याची पथ्य पाळतो. तसेच महाविकास आघाडीत जिथे ज्यांच्याकडे जो ताकदीचा उमेदवार असेल, जो जिंकू शकेल तशी जागावाटप होईल. आमच्यात कोणतेही मतभेत नाहीत. एखादे अमित शहा दिल्लीतून येऊन आमच्यासमोर बसत नाहीत आणि तुकडे फेकत नाहीत. आम्ही एकत्र बसतो आणि सन्मानाने जागा वाटप करतो. आमचे जागावाटप दिल्लीत होत नाही आणि होणारही नाही, असा टोला राऊत यांनी लगावला आहे.

मुंबई-विधानसभा अध्यक्ष राहुल नार्वेकरांचा निकाल कोर्टाशी विसंगत आहे. त्यांच्याकडून घटनेची पायमल्ली झाली असून आमदार अपात्रताप्रकरणी त्यांनी लवादाकडून चोरमंडळाच्या बाजूने निकाल दिल्याची टीका ठाकरे गटाचे खासदार संजय राऊत यांनी केली आहे.

दरम्यान विधिमंडळातल्या बहुमतावर कोणताही पक्ष आणि पक्ष संघटन कोणाचे आहे ते ठरत नाही. पक्षातील संघटनेत बहुमत कोणाचे आहे, यावर पक्ष कोणाचा आहे हे ठरते. पण लवादांनी आपल्या मर्यादा ओलांडून हा निर्णय दिला. कारण त्यांच्यावर दबाब होता, असे म्हणत संजय राऊतांनी विधानसभा अध्यक्षांवर निशाणा साधला आहे.

संजय राऊत म्हणाले की, विधानसभा अध्यक्षांनी अपात्र आमदांना पात्र ठरवले. घटनेच्या दहाव्या शेड्यूलनुसार जो पक्षांतर बंदीचा कायदा आहे. त्यानुसार, पक्षांतर केलेल्या शिंदे गटातील आमदारांना अपात्र ठरवणे हे अपर्हाय होते. पण त्या घटनेची पायमल्ली करून राहुल नार्वेकर यांनी त्यांना पात्र ठरवले. इतकेच नव्हे तर विधिमंडळीतील पक्षाच्या बहुमतावर शिवसेनाही त्यांचीच असा निर्णय देऊन स्वत:चे हसू करून घेतले.

संजय राऊत म्हणाले की, आता जे लवाद म्हणून बसलेत त्यांनी स्वत:च 10 पक्षांतरे केली आहेत, ते कधी शिवसेनेत होते, कधी राष्ट्रवादीमध्ये होते, ते कधी अन्य पक्षात होते आणि त्यानंतर ते भाजप पक्षात जाऊन विधानसभेचे अध्यक्ष झाले. या सगळ्याची सर्वोच्च न्यायालयाने काल दखल घेतल्याचे त्यांच्या निकालपत्रावरून दिसते आहे. सर्वोच्च न्यायालयाने या देशाला आशेची किरणे दाखवली आहेत. त्याच आशेच्या किरणांच्या संदर्भात आम्ही आशावादी आहोत.

संजय राऊत म्हणाले की, ​​​​​​चोरमंडळाचे वकील रोज नवीन मुद्दे आणत असून भंपक, खोटेपणा या मुद्द्यात असतो. काल त्यांनी बनवाट कागदपत्रांचा मुद्दा मांडला. शिवसेना ही बनवाट आहे का? बाळासाहेब, त्यांनी स्थापन केलेली शिवसेना बनावट आहे का? असा सवाल करत राऊत म्हणाले की, यांना बाळासाहेबांचे अस्तित्वच मान्य नाही. हाच त्यांचा बनावटपणा असून आम्ही न्यायालयात आणि जनतेच्या न्यायालयात लढू आणि विजयी होऊ.तर बावनकुळे विधानसभेला स्वत: तिकीट मिळवू शकले नव्हते, म्हणत त्यांच्यावरही निशाणा साधला आहे.

धाराशिव – पाच वर्ष जनतेला लुटायचे , अन, निवडणुकीच्या काळात गॅसच्या किमती कमी करायच्या हे नाटक आपल्याला समजलेलं आहे असा हल्लाबोल ठाकरे गटाचे प्रमुख उद्धव ठाकरे यांनी देशाचे पंतप्रधान नरेंद्र मोदी यांच्यावर केला आहे. उद्धव ठाकरे हे सध्या धाराशिव दौऱ्यावर आहेत. यावेळी त्यांच्या सभा होत असून यामधून ते पंतप्रधान मोदींसह भाजपवर निशाणा साधत असल्याचे पाहायला मिळत आहे.

उद्धव ठाकरे म्हणाले की, ”आज पुन्हा एकदा घोषणांचा पाऊस पाडला जातोय. आपलं घटनाबाह्य सरकार आहे, शेवटं अर्थसंकल्प साधर करणारे भाजप सरकार सुद्धा आहे. शिवाय मोदी सरकाने जो अर्थसंकल्प सादर केला तो, शेवटचा अर्थसंकल्प आहे. कारण पुढील सरकार हे मोदींचे नसेल. आज पेपरमध्ये वाचलं की काही गोष्टींच्या किमती त्यांनी कमी केल्या आहेत, पण हे निवडणुकीच्या काळात होणारच. पण मतदानावेळी आपण बटण दाबलं की, दुसऱ्या दिवशी सगळ्याच्या किमती पुन्हा वाढलेल्या असतील. त्यामुळे पाच वर्ष जनतेला गॅसवर ठेवून निवडणुकीच्या काळात गॅसच्या किमती कमी करायच्या हे नाटक आपल्याला समजलेलं आहे. त्यामुळे केवळ उत्साहात काम करणं चालणार नाही”, असे उद्धव ठाकरे म्हणाले.

तसेच ते म्हणाले, ”भाजपचा पराभव करण्यासाठी आपण एक आघाडी तयार केली आणि त्या आघाडीला इंडिया असे नाव दिलं. आपण इंडिया असे नाव देताच भाजपला घाम फुटला. कारण इंडियात इंडिया विरोधातच लढणार कसं असा प्रश्न त्यांना पडला. त्यानंतर पंतप्रधान नरेंद्र मोदी यांनी ‘इंडिया म्हणजे इंडियन मुजायद्दीन’, अशा शब्दांत खालच्या स्तरावर जात टीका केली. त्यावर आम्ही पंतप्रधानांना उत्तर दिलं होत की, पंतप्रधान मोदी तुम्ही जेव्हा परदेशात जाता तेव्हा आपली ओळखं प्राइम मिनिस्टर ऑफ इंडिया अशी करून देतात मगते तर आमच्या इनिड्या आघाडीला इंडिया म्हणजे इंडियन मुजायद्दीन म्हणत असतील तर त्यांची पण ओळख प्राइम मिनिस्टर ऑफ इंडियन मुजायद्दीन अशी होते. आमच्या या प्रश्नावर त्यानंतर पंतप्रधानांनी बोलण्याचं बंद केले”, असे उद्धव ठाकरे म्हणाले.

यावेळी बोलतांना उद्धव ठाकरे यांनी कार्यकर्त्यांना आवाहन केले आहे. याशिवाय “आपण महाविकास आघाडीचे कार्यक्रर्ते आहात. पण कार्यकर्ते म्हणून तुम्हाला जे काम करायचं ते म्हणजे 2014 साली मोदींनी चाय पे चर्चाच्या माध्यमातून विदर्भाला अनेक आश्वासनं दिली होती. ती आश्वासनं अद्याप पूर्ण झालेली नसून त्यावर मागील १० वर्षांत कोणी लक्षही दिलेलं नाही. त्यामुळे 2014पासून मोदींनी मारलेल्या थापांमधून तुम्हाला काय मिळालं हे जनतेला विचारा. सरकारी योजना हातात घ्या आणि या योजनांमधून तुम्हाला काय मिळालं हे विचारा? हीच मला तुमच्याकडून अपेक्षा आहे”, असेही उद्धव ठाकरे म्हणाले.

नागपूर -नागपूरमधून नितीन गडकरी मोठ्या मताधिक्याने विजयी होतील. त्यांना एकूण मतदानाच्या 65 टक्के मतं मिळतील. ज्यांना नितीन गडकरी यांच्याविरोधात लढायचे आहे, त्यांनी लढण्याची हौस पूर्ण करावी, असे म्हणत भाजप प्रदेशाध्यक्ष चंद्रशेखर बावनकुळे यांनी नागपुरातून नितीन गडकरीच उमेदवार असणार हे स्पष्ट केले आहे.दरम्यान भाजप प्रदेशाध्यक्ष चंद्रशेखर बावनकुळे पुढे बोलताना म्हणाले की, नाना पटोले यांनीच नितीन गडकरी यांच्याविरोधात लढावे, ते एकदा लढलेच आहेत, असे म्हणत गडकरींनी नाना पटोलेंचा पराभव केल्याची आठवण त्यांनी करुन दिली आहे.

चंद्रशेखर बावनकुळे यांनी गुरुवारी नागपूर विमानतळावर प्रसारमाध्यमांशी संवाद साधला. यावेळी त्यांनी म्हटले की, महायुतीच्या लोकसभा जागावाटपाबाबत अंतिम निर्णय अद्याप होऊ शकलेला नाही. जागावाटपाची प्राथमिक चर्चा उत्तम आणि समाधानकारक झाली आहे. आता 11 ते 12 तारखेपर्यंत महायुतीचे जागावाटप जाहीर होईल.

काँग्रेसमधून भाजपात गेलेल्या कृपाशंकर सिंह या भ्रष्ट माणसाचे नाव पहिल्या यादीत होते. पण नितीन गडकरी यांचे नाव नाही. नितीन गडकरीजी भाजपाचा राजीनामा द्या. महाविकास आघाडीमध्ये या. आम्ही महाविकास आघाडीतून तुम्हाला निवडून आणतो, अशी खुली ऑफर शिवसेना उद्धव बाळासाहेब ठाकरे गटाचे प्रमुख उद्धव ठाकरे यांनी दिली.

काँग्रेस प्रदेशाध्यक्ष नाना पटोले यांनी नागपूर लोकसभेच्या रिंगणात तगडा उमेदवार उतरवण्याची भाषा केली आहे. काँग्रेसकडे नागपूरसाठी तगडा आणि जिंकणारा उमेदवार आहे. अजून आम्ही आमचे पत्ते उघड केलेले नाहीत, असे नाना पटोले यांनी म्हटले. जागा वाटपाबद्दल लवकरच निर्णय होईल. अजून महायुतीचे जागावाटप झालेले नाही. मात्र, महायुतीच्या आधी आमचे (मविआ) जागावाटप जाहीर होईल, असे नाना पटोले यांनी सांगितले.