पुणे, दि. ०८ मार्च २०२४: एरवी ग्राहकसेवा, सुरळीत वीजपुरवठा, थकीत वीजबिल वसूली व कार्यालयीन कामात व्यस्त असणाऱ्या महावितरणच्या पुणे परिमंडलातील अधिकारी व कर्मचाऱ्यांनी गुरूवारी (दि. ७) कौटुंबिक धमाल केली. लहान मुले, महिला व पुरुषांच्या गटातील विविध खेळ, महिलांसाठी खास होम मिनिस्टर स्पर्धा आदींमुळे कामाचा ताण विसरून अधिकारी व कर्मचारी यांच्यात आपुलकीची चर्चा, हास्यविनोदाने कौटुंबिक स्नेहमेळावा उत्साहात साजरा झाला.

गणेशखिंड येथील महावितरणच्या विश्रामगृह परिसरात गुरुवारी सायंकाळी ५.३० वाजता कौटुंबिक स्नेहमेळाव्याचे व जागतिक महिला दिनाचे आयोजन करण्यात आले होते. पुणे प्रादेशिक संचालक श्री. अंकुश नाळे, मुख्य अभियंता श्री. राजेंद्र पवार (पुणे), श्री. सुनील पावडे (बारामती), श्री. अनिल कोलप (महापारेषण) व महाऊर्जाचे अतिरिक्त महासंचालक श्री. पंकज तगलपल्लेवार यांची प्रमुख उपस्थिती होती. या कार्यक्रमात पुणे परिमंडलातील अभियंते, अधिकारी व कर्मचाऱ्यांच्या कुटुंबियांसह सुमारे १६०० आबालवृद्ध सहभागी झाले होते.

       स्नेहमेळाव्यातील जत्रासदृश उत्साही वातावरणात पुरुष व महिलांच्या गटात संगीत खुर्चीचा खेळ रंगला. टॅट्यू, मेंदी, महिला दिन व सुरक्षा दूताचे सेल्फी पॉईंट व इतर खेळांचा आनंद लुटला. सोबत विविध खाद्यपदार्थांची रेलचेल होती. महावितरणचे श्री. दिलीप गायकवाड यांच्या सुरेल विविध गाण्यांनी रंग भरला. तसेच सुमारे ९० महिलांच्या सहभागामुळे तब्बल दोन तास चाललेल्या होम मिनिस्टर स्पर्धेत भोसरी विभागाच्या सहायक अभियंता ज्योत्स्ना बोरकर यांनी विजेत्या म्हणून मानाची पैठणी जिंकली. तर विनिता दाणे यांनी द्वितीय व विजय गोसावी यांनी तृतीय क्रमांक पटकावला. या कार्यक्रमाचे श्री. कपिल पाटील यांनी सूत्रसंचालन केले.

पुणे-बारामती परिमंडल संघाने सलग दुसऱ्या वर्षी राज्यस्तरीय क्रीडा स्पर्धेचे अजिंक्यपद मिळवले. त्यानिमित्त खेळाडू व संघ व्यवस्थापकांचा या मेळाव्यात पाहुण्यांच्या हस्ते गौरव करण्यात आला. तसेच जागतिक महिला दिनानिमित्त प्रादेशिक संचालक श्री. अंकुश नाळे, मुख्य अभियंता श्री. राजेंद्र पवार व श्री. सुनील पावडे यांनी मनोगत व्यक्त करीत महिलाशक्तीचा गौरव केला. कार्यक्रमाचे सूत्रसंचालन उपकार्यकारी अभियंता डॉ. संतोष पाटणी यांनी केले व आभार मानले.

या स्नेहमेळाव्यात अधीक्षक अभियंता सर्वश्री अरविंद बुलबुले, युवराज जरग, प्रकाश राऊत, सौ. पुनम रोकडे, महाव्यवस्थापक (वित्त) सौ. माधुरी राऊत, उपमहाव्यवस्थापक (मासं) श्री. सुशील पावसकर, सहायक महाव्यवस्थापक ज्ञानदा निलेकर, उपमुख्य औद्योगिक संबंध अधिकारी श्री. शिरीष काटकर (पुणे), श्री. श्रीकृष्ण वायदंडे (बारामती) यांच्यासह अभियंता, अधिकारी, कर्मचारी कुटुंबियांसह सहभागी झाले होते.

पुणे, दि. ८ : भिमाशंकर येथे येणाऱ्या भाविक व पर्यटकांना निसर्गाची माहिती देणाऱ्या महादेव वन निसर्ग परिचय केंद्राचे वन मंत्री सुधीर मुनगंटीवार यांनी दूरदृश्य प्रणालीद्वारे उद्धाटन केले. हे केंद्र भाविक व पर्यटकांसाठी खुले करण्यात आले आहे.

कार्यक्रमाला मुख्य वनसंरक्षक (प्रा.) एन.आर.प्रविण, उपवनसंरक्षक वन्यजीव तुषार चव्हाण, निवृत्त मुख्य वनसंरक्षक रविंद्र वानखेडे, सहाय्यक वनसंरक्षक किशोर येळे, वनपरिक्षेत्र अधिकारी वसंत चव्हाण, भाऊसाहेब जवरे, भिमाशंकर देवस्थान संस्थान ट्रस्टचे अध्यक्ष सुरेश कौदरे यांच्यासह भिमाशंकर अभयारण्य कर्मचारी उपस्थित होते.

या महादेव वन निसर्ग परिचय केंद्रात निसर्ग प्रेमींना पश्चिम घाटातील जैवविधता, औषधी वनस्पती तसेच वन्यप्राण्यांची माहिती देण्यात आली असून विविध प्रकारचे माहिती देणारे फलक लावण्यात आले आहेत. महादेव वनातील इंडिया मॅपमध्ये भारतातील बारा ज्योर्तिलिंग दर्शक नकाशा याचीही माहिती दर्शविण्यात आली आहे.

महिला दिनानिमित्त मासिक पाळीचे आरोग्य आणि मानसिक आरोग्य यांच्यातील सहसंबंधावर माइंडफुल मेन्स्ट्रुएशनच्या सर्वेक्षणाचे निष्कर्षही प्रसिद्ध करण्यात आले.

पुणे, महाराष्ट्र, 8 मार्च 2024 : एमपॉवर आणि उजास हे आदित्य बिर्ला एज्युकेशन ट्रस्टने चालवलेले उपक्रम आहेत. आंतरराष्ट्रीय महिला दिनाचे महत्त्व ओळखून उजासच्या संस्थापक अद्वैतेशा बिर्ला आणि एमपॉवरच्या संस्थापक अध्यक्षा श्रीमती नीरजा बिर्ला यांनी महिला दिनानिमित्त मानसिक आरोग्यासोबतच मासिक पाळी आरोग्य आणि स्वच्छता व्यवस्थापनावर लक्ष केंद्रित करण्याबद्दल महिलांच्या आरोग्यासाठी सक्रिय प्रयत्न सुरू केले. हरिभाऊ वाघमोडे पाटील प्रतिष्ठानच्या सहकार्याने, स्थानिक एनजीओ, एमपॉवर आणि उजास यांनी बुधवारपेठ, पुण्यातील सेक्स वर्कर समुदायाच्या उद्देशाने एक कार्यक्रम सुरू केला. जवळपास 400 सेक्स वर्कर्सना मोफत सॅनिटरी पॅड वाटप करण्यात आले आणि त्यांनी मासिक पाळी आरोग्य, स्वच्छता व्यवस्थापन आणि मानसिक आरोग्य जागरूकता यावरील माहितीपूर्ण सत्रांमध्ये भाग घेतला. वितरीत केलेल्या प्रत्येक पॅकेजमध्ये एक QR कोड देखील होता. त्याद्वारे प्राप्तकर्त्यांना एक संक्षिप्त मानसिक आरोग्य स्व-मूल्यांकन करण्याची संधी मिळाली. त्यातून त्यांना त्यांची मानसिक आरोग्य स्थिती अधिक चांगल्या प्रकारे समजून घेण्यास आणि आवश्यक असल्यास समर्थन मिळविण्यासाठी एक मार्ग मिळाला. याव्यतिरिक्त, एक समर्पित मानसिक आरोग्य हेल्पलाइन, Mpower Let’s Talk 1on1 एक 24X7 बहुभाषिक टोल फ्री मानसिक आरोग्य हेल्पलाइन (1800 120 820050), प्रदान केली गेली, जी आवश्यकतेनुसार प्रादेशिक भाषांमध्ये सहकार्य करते.

या उपक्रमाच्या यशाबद्दल बोलताना हरिभाऊ वाघमोडे पाटील प्रतिष्ठानच्या डॉ.सारिका लष्करे  म्हणाल्या, “सेक्स वर्कर्सचे मानसिक आरोग्य आणि मासिक पाळीच्या आरोग्यासाठी एकत्रितपणे या कार्यक्रमाचे आयोजन करण्याची ही पहिलीच वेळ आहे. हे लोक अशा परिस्थितीत राहतात जे त्यांच्या मासिक पाळीच्या आरोग्यासाठी आणि स्वच्छतेसाठी तसेच मानसिक आरोग्यासाठी वारंवार संसर्गाने ग्रस्त असतात आणि त्यांच्या मासिक पाळीचे स्वच्छतेने कसे व्यवस्थापन करावे याबद्दल जागरूकता आणि मानसिक आरोग्यासाठी समर्थन मिळवण्यासाठी त्यांना नक्कीच मदत होईल. यासारख्या उपक्रमांद्वारे, आम्ही त्यांना बोलते केले. त्यांचे मानसिक आरोग्य इतरांसाठीही कसे महत्त्वाचे आहे, हे प्रत्येकाला कळविणे हा याचा उद्देश आहे.

कार्यशाळेत बोलताना वैशाली देवकर (गोपनीयता राखण्यासाठी नाव बदलले), म्हणाल्या की, “कोणीही आमच्या आरोग्याची खरोखर काळजी घेत नाही, आदित्य बिर्ला एज्युकेशन ट्रस्टने आम्हाला शिक्षित करण्यासाठी केलेले प्रयत्न पाहून आनंद झाला. मासिक पाळी स्वच्छता व्यवस्थापन आणि मानसिक आरोग्याच्या अनेक व्यावहारिक टिप्स दिल्या गेल्या आणि त्याबद्दल आम्ही टीमचे आभार मानतो.”

जागरूकता वाढवण्यासाठी एमपॉवर आणि उजासने संपूर्ण भारतातील महिलांना लक्ष्य करून एक व्यापक सर्वेक्षण देखील जारी केले. “माइंडफुल मेन्स्ट्रुएशन: मासिक पाळी आरोग्य आणि मानसिक आरोग्य यांच्यातील दुव्यावर एक सर्वेक्षण” असे याचे शीर्षक आहे, ज्याचा उद्देश मासिक पाळी दरम्यान मानसिक आरोग्य आव्हानांचा प्रसार आणि प्रभाव जाणून घेणे आहे.

भारतभरातील 2,400 हून अधिक महिलांकडून प्रतिसाद मिळालेल्या सर्वेक्षणाच्या निष्कर्षांनी महत्त्वपूर्ण माहिती यात आहे. 60% प्रतिसादकर्त्यांनी त्यांच्या मासिक पाळीच्या आधी किंवा दरम्यान वाढलेला ताण, चिंता आणि मूड बदलल्याचे स्पष्ट केले. याव्यतिरिक्त, 55% सहभागींनी कबूल केले की मासिक पाळीच्या दरम्यान दैनंदिन कामांवर लक्ष केंद्रित करण्यात किंवा कामं पूर्ण करण्यात संघर्ष करावा लागला. हे निष्कर्ष मानसिक आरोग्य आणि मासिक पाळीच्या आरोग्यामधील दुव्याबद्दल जागरुकतेची गंभीर गरज अधोरेखित करतात. मानसिक आरोग्याबद्दल खुल्या चर्चेला प्रोत्साहन देतात. महिलांनी हे ओळखले पाहिजे की आवश्यक असल्यास मदत उपलब्ध आहे आणि मासिक पाळीच्या दरम्यान भावनिक आव्हाने हाताळण्याच्या दिशेने पाठिंबा मिळवणे हे एक महत्त्वाचे पाऊल आहे.

सेक्स वर्कर्सच्या मानसिक तंदुरुस्तीसाठी दिलेल्या हायलाइटचे कौतुक करताना आदित्य बिर्ला एज्युकेशन ट्रस्टच्या रणनीती आणि प्रकल्प विभागाचे महाव्यवस्थापक डॉ मुकेश मोहोडे म्हणाले की, “आमच्या प्रयत्नांचा उद्देश मासिक पाळीचे आणि मानसिक आरोग्याच्या अनेकदा दुर्लक्षित असलेल्या परंतु गंभीर पैलूंवर प्रकाश टाकणे आहे. या क्षेत्रांमध्ये जागरूकता आणि समज वाढवून, आम्ही महिलांना त्यांच्या सर्वांगीण कल्याणाला प्राधान्य देण्यासाठी सक्षम करतो. मासिक पाळीचे आरोग्य आणि स्वच्छता संबोधित करणे, मानसिक आरोग्याबरोबरच, केवळ आरोग्याची बाब नाही; ती प्रतिष्ठेची आणि सशक्तीकरणाची बाब आहे. आमच्या प्रयत्नांद्वारे, आम्ही त्यांना बोलते करण्यासाठी, मुक्त संवादाला चालना देण्यासाठी आणि प्रत्येक स्त्रीला तिच्या आरोग्याच्या प्रवासाचे व्यवस्थापन करण्यासाठी समर्थन आणि सशक्त वाटेल याची खात्री करण्याचा प्रयत्न करतो.”

एमपॉवर क्लिनिकल सायकोलॉजिस्ट अजीता मुळ्ये आणि उजासच्या सल्लागार स्त्रीरोगतज्ञ डॉ. तेजल कंवर यांचा समावेश असलेले ज्ञानवर्धक InstaLive सत्र आयोजित करण्यासाठी एमपॉवर व उजास  एकत्र आले. मानसिक आरोग्यावर मासिक पाळीचा परिणाम अधोरेखित करून, दोन्ही तज्ञांनी मानसिक आरोग्य, नियमित व्यायाम, निरोगी आहार आणि पुरेशी झोप यासारख्या आत्म-विश्रांती तंत्रांचा अवलंब करण्याच्या महत्त्वावर जोर दिला. या सहयोगी प्रयत्नाचे उद्दिष्ट सर्वांगीण समर्थन आणि उपचार पर्याय प्रदान करणे, सुधारित एकूण कल्याणासाठी मार्ग मोकळा करणे हा आहे.

पुणे, दि. ८: महाराष्ट्र राज्य खादी व ग्रामोद्योग मंडळ व जिल्हा ग्रामोद्योग सहकारी फेडरेशन यांच्या संयुक्त विद्यमाने महात्मा फुले सांस्कृतिक सभागृह, वानवडी येथे १० मार्च रोजी सकाळी ११ वाजता पंतप्रधान विश्वकर्मा कौशल्य सन्मान योजनेची कार्यशाळा व जनजागृती मेळाव्याचे आयोजन करण्यात आल्याची माहिती जिल्हा ग्रामोद्योग कार्यालयाने दिली आहे.

केंद्र शासनाने हस्त कौशल्य, अवजारे व साधनांचा उपयोग करुन उत्पादन व सेवा देणाऱ्या बलुतेदार, हस्तकला कारांगीराना ओळख प्राप्त करुन देण्यासाठी आणि त्यांना सर्वांगीण आधार देऊन त्यांचा विकास करण्यासाठी सूक्ष्म लघू व मध्यम उद्योग मंत्रालय भारत सरकार यांच्या माध्यमातुन प्रधानमंत्री विश्वकमां कौशल्य सन्मान योजना सुरू करण्यात आली आहे.

या योजनेला मोठ्या प्रमाणात प्रतिसाद मिळत असून राज्यातील अनेक कारागिरांनी आपली नाव नोंदणी केलेली आहे. त्या प्रमाणात पुणे जिल्ह्याची नोंदणी अत्यल्प असून नोंदणी वाढवण्यासाठी या मेळाव्याचे आयोजन करण्यात आलेले आहे. या मेळाव्यात महाराष्ट्र राज्य खादी व ग्रामोद्योग मंडळाच्या मुख्य कार्यकारी अधिकारी श्रीमती आर. विमला मार्गदर्शन करणार आहेत.

मेळाव्यास जिल्ह्यातील जास्तीत जास्त कारागिरांनी उपस्थीत राहून नाव नोंदणी करावी. आपला लाभ निश्चित करावा, असे आवाहन पुणे जिल्हा ग्रामोद्योग सहकारी फेडरेशनचे अध्यक्ष शिवाजीराव आदमाने यांनी केले आहे.

पुणे दि.९- ईव्हीएम यंत्र ठेवण्यात आलेल्या कोरेगाव पार्क येथील फुड कॉर्पोरेशन ऑफ इंडियाच्या गोदामाच्या फायर अलार्ममध्ये झालेला तांत्रिक बिघाड भारत निवडणूक आयोगाच्या अनुमतीने आणि राजकीय पक्ष प्रतिनिधींच्या उपस्थितीत दुरूस्त करण्यात आला असून सर्व ईव्हीएम यंत्र सुस्थितीत असल्याचे स्पष्टीकरण जिल्हा निवडणूक प्रशासनातर्फे करण्यात आले आहे.

फुड कॉर्पोरेशन ऑफ इंडियाच्या गोदामात लोकसभा निवडणूकीसाठी वापरण्यासाठी प्रथमस्तरीय तपासणी झालेले ईव्हीएम यंत्र ठेवण्यात आले आहेत. गुरुवारी रात्री ७ वाजेच्या सुमारास या गोदामातील फायर अलार्ममध्ये बिघाड होऊन सायरन अचानक वाजण्यास सुरूवात झाली. सुरक्षा रक्षकांनी तात्काळ याची माहिती प्रशासनाला दिली आणि अग्निशमन सिलेंडर्स तिथे असले तरी खबरदारीचा उपाय म्हणून अग्निशमन वाहनही मागविण्यात आले. गोदामाचे सीसीटीव्ही फुटेज तपासण्यात आले. तपासणी नंतर तंत्रज्ञांनी फायर अलार्ममधील तांत्रिक बिघाडामुळे हा प्रकार घडल्याचे स्पष्ट केले. या प्रकाराची माहिती तात्काळ निवडणूक आयोगाला पाठविण्यात आली व बिघाड दुरुस्त करण्यासाठी परवानगी घेण्यात आली.

निवडणूक आयोगाच्या परवानगीनंतर सकाळी १०.३० वाजता राजकीय पक्षाच्या प्रतिनिधींना बोलावून त्यांच्या समक्ष गोदाम उघडण्यात आले. यावेळी भारतीय जनता पार्टी, राष्ट्रवादी काँग्रेस, आम आदमी पार्टी आणि महाराष्ट्र नवनिर्माण सेनेचे प्रतिनिधी उपस्थित होते.

गोदमच्या आतील सर्व यंत्र सुस्थितीत असल्याची खात्री करून बिघाड दुरुस्त करण्यात आला. राजकीय पक्ष प्रतिनिधींनादेखील याबाबत माहिती देण्यात आली. संपूर्ण प्रक्रीयेचे व्हिडीओ चित्रीकरणदेखील करण्यात आले असून याचा अहवाल निवडणूक आयोगाला पाठविण्यात आला आहे. पुणे महानगरपालिकेच्या मुख्य अग्निशमन अधिकाऱ्यांकडून तांत्रिक बाबी संदर्भात अहवाल मागविण्यात आला असून तो प्राप्त होताच अशा प्रकारची पुनरावृत्ती होऊ नये यादृष्टीने आवश्यक खबरदारीच्या अतिरिक्त उपाययोजना करण्यात येतील असे जिल्हा निवडणूक प्रशासनाने स्पष्ट केले आहे.

डॉ.सुहास दिवसे, जिल्हाधिकारी- गोदामात अग्निशमन यंत्रणा आहे आणि कडक सुरक्षा व्यवस्थादेखील आहे. तांत्रिक बिघाडामुळे झालेल्या या प्रकाराची माहिती प्रशासनाने निवडणूक आयोगाला दिली असून राजकीय पक्षाच्या प्रतिनिधींसमक्ष आवश्यक दुरूस्ती करण्यात आली आहे. सर्व ईव्हीएम यंत्र सुस्थितीत आहे. ईव्हीएम सुरक्षेबाबत प्रशासनातर्फे विशेष खबरदारी घेण्यात येत आहे.

पुणे-

कोथरूड मतदारसंघातील विकासकामांसाठी निधी कमी पडू देणार नाही. दर्जेदार कामांसाठी नागरिकांनी ही सहकार्य करावे, असे आवाहन नामदार चंद्रकांतदादा पाटील यांनी आज केले‌. कोथरुड मतदारसंघातील एकूण ३५ कोटीच्या विविध विकासकामांचे भूमिपूजन नामदार पाटील यांच्या प्रमुख उपस्थितीत आणि महिलांच्या हस्ते झाले, यावेळी ते बोलत होते.

यावेळी शहर सरचिटणीस पुनीत जोशी, उत्तरचे अध्यक्ष सचिन पाषाणकर, दक्षिणचे अध्यक्ष डॉ संदीप बुटाला, नगरसेवक दीपक पोटे, सुशील मेंगडे, राजाभाऊ बराटे, किरण दगडे पाटील, अमोल बालडकर, दिलीप वेडे पाटील, अल्पना वरपे, छाया मारणे, डॉ . श्रद्धा प्रभूणे-पाठक, नगरसेविका मंजुश्री खर्डेकर, ज्योती कळमकर, हर्षाली माथवड, वृषाली चौधरी, भाजपा नेते गणेश कळमकर, अभिजीत राऊत, गिरीश भेलके, गिरीश खत्री, लहु बालवडकर, प्रकाशतात्या बालवडकर, दिनेश माथवड, अजय मारणे, दीपक पवार, राहुल कोकाटे, विवेक मेथा, बापूसाहेब मेंगडे, आशुतोष वैशंपायन, कैलास मोहोळ, उत्तम जाधव, सचिन दळवी, ज्ञानेश्वर तापकीर, उमाताई गाडगीळ, अनिता तलाठी, अस्मिता करंदीकर, वंदना सिंग, कल्याणी टोकेकर, रिनाताई देशपांडे, रिनाताई रायकर, सुनिता रेडवाल, सुजाता धनकुडे, स्वाती मोहोळ, विठ्ठल आण्णा बराटे, आबासाहेब सुतार, शिवम सुतार, लक्ष्मण मेघावत, रणजीत हरपुडे, प्रदीप जोरी, प्रमोद कांबळे, नवनाथ ववले, प्रवीण अम्ले, सुभाष भोळ, राजेंद्र पाषाणकर यांच्या सह इतर मान्यवर उपस्थित होते.

नामदार चंद्रकांतदादा पाटील म्हणाले की, पुण्याच्या सर्वांगीण विकासासाठी राज्य सरकार नेहमीच प्रयत्नशील आहे. राज्याच्या अर्थसंकल्पाच्या माध्यमातून शहरातील नाल्यांवर संरक्षक भिंत बांधण्यासाठी २०० कोटी रुपये उपलब्ध करून दिले आहेत. तसेच,  शहरातील इतर विकासकामांसाठी १०० कोटी रूपये मिळाले आहेत. तसेच, मुख्यमंत्री एकनाथ शिंदे यांनी नगरविकास विभागाच्या माध्यमातून ही १६ कोटी रुपये मंजूर केले आहेत. त्यामुळे विकासकामांसाठी निधीची कमतरता भासू देणार नाही. नागरिकांनी ही विकासकामे सुरु असताना सहकार्याची भूमिका घेतल्यास दर्जेदार कामे होतील, असे आवाहन केले.

दरम्यान, आज भूमिपूजन झालेल्या कामांमध्ये प्रामुख्याने राम नदी शुद्धीकरणासाठी इकोफिल्टर बसवणे, बाणेरमधील तुकाई मंदिरासाठी पायऱ्या बांधणे, रामनदीला संरक्षक भिंत उभारणे, रामनदीत सोडण्यात येणाऱ्या मलनिस्सारण वाहिन्या बंद करुन नवीन वाहिन्या टाकणे, महापालिकेच्या शाळांमधील विविध विकासकामे करणे, ज्युपिटर हॉस्पिटललगत नाल्यांवर संरक्षक भिंत बांधणे, ज्येष्ठ नागरिकांसाठी विरंगुळा केंद्र व नाना-नानी पार्क विकसित करणे, योगा सेंटर, ग्रीन गार्बेज आणि घंटागाडी उपलब्ध करून देणे, महापुरुषांच्या स्मारकाचे सुशोभीकरण करणे यांसह अनेक विकासकामांचा समावेश आहे.

पुणे- फॉर्च्युन डेव्हलपर्सने मांजरी एका व्यक्तीची 3 कोटी 25 लाख 6 हजार 58 रुपयांची फसवणूक केल्या प्रकरणी पोलिसात गुन्हा दाखल झाला आहे. पोलिसांनी दिलेल्या माहिती नुसार,याप्रकरणी हनुमंत माधव दरेकर (वय-55, रा. निसर्ग सृष्टी, मांजरी बु) यांनी हडपसर पोलिस ठाण्यात फिर्याद दिली आहे. त्यानुसार नितीन शंकर धिमधिमे (वय-43), मकरंद सुधीर पांडे (वय 55, दोघेही रा. आकुर्डी) यांच्यासह इतर अनोळखी व्यक्तींवर फसवणुकीचा गुन्हा दाखल करण्यात आला आहे. ही घटना 2013 ते जून 2020 दरम्यानच्या काळात घडली आहे अशी माहिती पोलिसांनी शुक्रवारी दिली आहे.

आरोपी नितीन धिमधिमे आणि मकरंद पांडे हे दोघे व्यावसायिक असून ते फॉर्च्युन डेव्हलपर्स या फर्मचे संचालक आहेत. फॉर्च्युन डेव्हलपर्सच्या माध्यमातून पुणे आणि पिंपरी चिंचवड भागात गृहनिर्माण प्रकल्प राबविण्यात येत आहे. तक्रारदार हनुमंत दरेकर हे खासगी कंपनीतून निवृत्त झाले आहे. फिर्यादी दरेकर आणि आरोपी ओळखीचे आहेत. आरोपी धिमधिमे आणि पांडे यांनी फिर्यादी दरेकर यांना फ्लॅट व दुकाने विकत घेण्यासाठी सांगून पैसे गुंतवणूक करायला सांगितले. पैसे घेऊन फ्लॅट व दुकानाचा ताबा न देता फिर्यादी दरेकर यांची 3 कोटी 25 लाख 6 हजार 58 रुपयांची फसवणूक केल्याचे फिर्यादेत नमूद केले आहे. याप्रकरणाचा पुढील तपास सहाय्यक पोलीस निरीक्षक उमेश रोकडे करत आहेत.