माजी पोलीस अधिकारी सुरेश खोपडे लिखित ‘ तिसरी क्रांती ‘ या पुस्तकाचे प्रकाशन 
पुणे. २२ मार्च २०२४ : “भारतीय राज्यघटनेवर आज हल्ले चालू झाले आहेत. सध्या देशाची राज्यघटना कुरतडून कोण्या एका समाजाचे श्रेष्ठत्व निर्माण करण्याचे काम एका शक्तीने चालू ठेवलेले आहे. या शक्तीला रोखण्यासाठी समाजव्यवस्था बदलण्यासाठी सर्व राजकीय आणि सध्याची प्रशासकीय प्रारुपे (मॉडेल्स) कालबाह्य ठरू लागली आहेत. त्यामुळे देशातील समाजव्यवस्था बदलण्यासाठी आता तिसरी क्रांती होणे गरजेचे आहे.” असे मत ‘तिसरी क्रांती’ या पुस्तकाचे लेखक आणि भारतीय पोलिस सेवेतील सेवानिवृत्त पोलिस अधिकारी सुरेश खोपडे यांनी ‘ तिसरी क्रांती ‘ या पुस्तकाच्या प्रकाशनावेळी एस. एम. जोशी सभागृह येथे बोलताना व्यक्त केले.
ज्येष्ठ विचारवंत दत्ता देसाई यांच्या हस्ते सुरेश खोपडेलिखित ‘तिसरी क्रांती- चेहरे नको, व्यवस्था बदलुया’ या पुस्तकाचे प्रकाशन झाले. या समारंभात लेखक या नात्याने खोपडे बोलत होते. अखिल भारतीय मराठी साहित्य संमेलनाचे माजी अध्यक्ष डॉ. श्रीपाल सबनीस हे या समारंभाच्या अध्यक्षस्थानी होते. या वेळी संग्राम खोपडे व विक्रम  शिंदे हे उपस्थित होते.
देशाला स्वातंत्र्य मिळाले, ही पहिली क्रांती, जगातील सर्वात मोठी व उत्कृष्ट अशी  राज्यघटना अस्तित्वात आली ही दुसरी क्रांती आहे. या दोन्ही क्रांतीमुळे सामान्यांच्या जगण्यामध्ये काहीशी भौतिक प्रगती झाली, परंतु धर्म, पंथ, जाती या नावाखाली माणसा- माणसांत भेद निर्माण केला जात आहे. त्यातून व्यक्तीस्वातंत्र्य धोक्यात आल्याचे मत खोपडे यांनी या वेळी व्यक्त केले. देशातील लोकशाही सध्या पोकळ झाली आहे. यासाठी येथील समाजव्यवस्थाच कारणीभूत असून, सध्याच्या काळात आमदार आणि खासदार यांनाही हवे तेव्हा विकत घेता येऊ लागले आहे. ही सध्याची आपल्या लोकशाहीची अवस्था आहे. असे मत ज्येष्ठ विचारवंत दत्ता देसाई यांनी यावेळी बोलताना व्यक्त केले. या कार्यक्रमाचे सूत्रसंचालन शरयू परळकर यांनी केले. आभार विक्रम शिंदे यांनी व्यक्त केले. 

“पोलीस दलात कार्यरत असताना मोहल्ला कमिट्या स्थापन करून त्याद्वारे समाजव्यवस्था बदलण्यासाठी सुरेश खोपडे यांनी प्रयत्न केला. हा प्रयोग पुढे जगातील अन्य देशांनी स्वीकारला. आपल्या देशाला याचे महत्त्व कळू शकले नाही. खोपडे हे पोलिस दलातून निवृत्त झाले असले तरी अद्यापही ते सामाजिक भान राखून आहेत. ‘तिसरी क्रांती’ या पुस्तकाच्या माध्यमातून त्यांनी नवसमाज निर्मितीचा प्रयोग मांडला आहे.” डॉ. श्रीपाल सबनीस, ज्येष्ठ साहित्यिक

पुणे दि.२२: पुण्यातून महायुतीकडून माजी महापौर मुरलीधर मोहोळ यांना उमेदवारी देण्यात आली आहे. त्यापार्श्वभूमीवर मुरलीधर मोहोळ यांनी शिवसेना नेत्या तथा उपसभापती डॉ. नीलम गोऱ्हे यांची त्यांच्या सिल्व्हर रॉक्स या निवासस्थानी सदिच्छा भेट घेऊन सत्कार स्विकारला . यावेळी डॉ. गोऱ्हे यांनी त्यांना महावस्त्र , पुष्पगुच्छ आणि श्री महालक्ष्मी देवीची प्रतिमा भेट देत निवडणुकीत भरघोस मतांनी विजयासाठी शुभेच्छा दिल्या.

याप्रसंगी, ऊद्योजक रेखा चोरगे, माजी नगरसेविका सोनाली लांडगे, रंजना कुलकर्णी, पुणें शहर महिला सहसंपर्क प्रमुख सुदर्शना त्रिगुणाईत, शिवसेना ऊपशहर प्रमुख श्रुती नाझीरकर, श्रद्धा शिंदे, सुप्रिया पाटेकर, मंगल सोनटक्के, युवराज शिंगाडे, राजू विटकर, सुधीर जोशी शिवसेना कार्यालय सचिव , संतोष लांडगे, शिवसेना ऊपशहरप्रमुख संजय डोंगरे, धैर्यशील कदम, संकेत मोरे, संजय तुरेकर, आदी शिवसैनिक उपस्थित होते.

याभेटीवेळी उपस्थित शिवसैनिकांनी सकारात्मक प्रतिसाद देत मोहोळ यांचा विजय मताधिक्यांचा विक्रम निश्चितपणे गाठेल अशी भावना व्यक्त केली.

पुणे, दि. २२: पुणे शहरातील पार्किंगच्या जागेचा वापर मालवाहतूक करणारी वाहने लोडिंग, अनलोडिंग करतेवेळी करत असल्याने इतर वाहनांना पार्किंगसाठी जागा उपलब्ध होत नाही. त्यामुळे यापूर्वी जारी केलेले सर्व आदेश रद्द करून प्रायोगिक तत्वावर तात्पुरत्या स्वरूपात वाहतूक व्यवस्थेत बदल करण्याचे आदेश जारी करण्यात आले आहेत.

पुणे शहरात २३ मार्च पासून सकाळी ९ ते १२ आणि दुपारी ४ ते रात्री ९ पर्यंत लक्ष्मी रोड वरील संत कबीर चौक ते टिळक चौक, शिवाजी रस्त्यावरील स. गो. बर्वे चौक ते जेधे चौक, बाजीराव रस्त्यावरील पूरम चौक ते गाडगीळ पुतळा चौक, केळकर रस्त्यावरील टिळक चौक ते अप्पा बळवंत चौक, कुमठेकर रस्त्यावरील टिळक चौक ते शनिपार चौक, टिळक रस्त्यावरील टिळक चौक ते जेधे चौक, जंगली महाराज रस्त्यावरील स.गो. बर्वे चौक ते खंडोजीबाबा चौक, फर्ग्युसन कॉलेज रस्त्यावरील खंडोजीबाबा चौक ते वीर चाफेकर चौक, कर्वे रस्त्यावरील खंडोजीबाबा चौक ते पौड फाटा, महात्मा गांधी रस्त्यावरील पंडोल अपार्टमेंट चौक ते डॉ. बाबासाहेब आंबेडकर पुतळा चौक व नॉर्थ मेन रस्ता, कोरेगाव पार्क मधील कोरेगाव पार्क जंक्शन ते ताडीगुत्ता चौक वर माल वाहतूक करणाऱ्या वाहनांस प्रवेश बंद करण्यात आला आहे. हा बदल अत्यावश्यक सेवेतील वाहनांना असणार नाही, असेही कळविले आहे.

विश्रामबाग वाहतूक विभागांतर्गत नो पार्किंगचे तात्पुरते आदेश जारी
विश्रामबाग वाहतूक विभागांतर्गत टिळक स्मारक मंदिर गेटच्या भिंतीलगत २० मीटर व नारळीकर इन्स्‍िटट्यूतकडून टिळक स्मारक मंदिरकडे येताना (कुमार स्टेशन व झेरॉक्स दुकान) रस्त्याच्या उजव्या बाजूस ५० मीटर तात्पुरत्या स्वरूपात नो पार्किंगचे आदेश जारी करण्यात येत आहेत.

वाहतूक व्यवस्थेतील बदलाबाबत या तात्पुरत्या आदेशाच्या अनुषंगाने नागरिकांच्या काही सूचना व हरकती असल्यास पोलीस उपआयुक्त, वाहतूक नियंत्रण शाखा, येरवडा पोस्ट ऑफिस, बंगला क्रमांक ६, जेल रोड, पुणे यांच्या कार्यालयात ४ एप्रिलपर्यंत लेखी स्वरूपात कळविण्यात याव्यात.

नागरिकांच्या सूचना व हरकतीवर विचार करून व अत्यावश्यक सेवेतील वाहने खेरीज करून वाहतूक बदलाबाबत अंतिम आदेश निर्गमित करण्यात येतील, असे पोलीस उपआयुक्त रोहिदास पवार यांनी कळविले आहे.

पुणे, दि. २२ : भारत निवडणूक आयोगाने लोकसभा सार्वत्रिक निवडणूक २०२४ ची आचार संहिता १६ मार्च ते ६ जून या कालावधीत घोषित केली आहे. या आचार संहिता कालावधीत पुणे विभागातील पुणे, सातारा, सोलापूर, सांगली व कोल्हापूर या जिल्ह्यात लोकसभा सार्वत्रिक निवडणूक होणार असल्याने माहे एप्रिल व माहे मे च्या पुणे विभागीय लोकशाही दिनाचे आयोजन केले जाणार नाही, अशी माहिती विभागीय आयुक्त कार्यालयातील उपायुक्त (सामान्य प्रशासन) वर्षा लड्डा यांनी दिली आहे.

भारती विद्यापीठ न्यू लॉ कॉलेजमध्ये आयोजन 

पुणे :भारती विद्यापीठाच्या न्यू लॉ कॉलेज द्वारे आयोजित मानवी हक्क या विषयावरील ‘न्या.पी.एन.भगवती आंतरराष्ट्रीय मूट कोर्ट कॉम्पिटिशन’ चे उदघाटन दि.२१ मार्च रोजी   झाले.श्रीलंकेच्या सर्वोच्च न्यायालयाचे न्या.एस.थुराईराज,अलाहाबाद उच्च न्यायालयाच्या लखनौ खंडपीठाचे न्या.ए.आर.मसूदी,भारती विद्यापीठाचे कुलगुरू डॉ.विवेक सावजी,कुलसचिव जी.जयकुमार,भारती विद्यापीठ विधी शाखेच्या अधिष्ठाता आणि न्यू लॉ कॉलेजच्या प्रभारी प्राचार्य डॉ.उज्वला बेंडाळे हे मान्यवर उदघाटन समारंभासाठी उपस्थित होते.प्राचार्य डॉ.उज्वला बेंडाळे,प्रा.शिवांगी सिन्हा यांच्या मार्गदर्शनाखाली ही स्पर्धा आयोजित करण्यात आली आहे.

या स्पर्धेत ५० स्पर्धक संघानी सहभाग घेतला आहे. दि.२३ मार्च रोजी समारोप होईल.समारोप कार्यक्रमास भारताच्या सर्वोच्च न्यायालयाचे न्या.अभय ओक,नेपाळच्या सर्वोच्च न्यायालयाचे न्या.अनिलकुमार सिन्हा,मालदीवच्या सर्वोच्च न्यायालयाचे न्या.हूनसु अल सुऊद,अलाहाबाद  न्यायालयाचे न्या.अरुम कुमार सिंग देशवाल,केरळ उच्च न्यायालयाचे न्या.सोफी थॉमस,गुजरात उच्च न्यायालयाचे न्या.अनिरुद्ध पी.मायी उपस्थित राहणार आहेत.
‘न्या.पी.एन.भगवती आंतरराष्ट्रीय मूट कोर्ट कॉम्पिटिशन’  चे हे बारावे वर्ष असून भारताच्या सर्वोच्च न्यायालयाचे न्या.पी.एन.भगवती यांच्या योगदानाच्या स्मरणार्थ २०११ साली सुरु करण्यात आली.राष्ट्रीय,आंतरराष्ट्रीय स्तरावर ही स्पर्धा नावाजली आहे.मानवी हक्कांच्या संदर्भातील राष्ट्रीय,आंतरराष्ट्रीय कायद्यांबद्दल या स्पर्धेतून जागृती घडवून आणली जाते.भारती विद्यापीठाचे संस्थापक कै.डॉ.पतंगराव कदम,कुलपती डॉ.शिवाजीराव कदम,कार्यवाह डॉ.विश्वजित कदम,कार्यकारी संचालक डॉ.अस्मिता कदम-जगताप,कुलगुरू डॉ.विवेक सावजी यांचे मार्गदर्शन या स्पर्धेला लाभले. 
‘ मानवी हक्कांच्या विस्तारात आणि संरक्षणात  न्यायालयानी  महत्वाची भूमिका बजावली असून भारताची त्यासंबंधी भूमिका अनेक आंतरराष्ट्रीय व्यासपीठांवर महत्वपूर्ण ठरली आहे.अभिव्यक्ती स्वातंत्र्याचा मूलभूत अधिकार हे  मानवी हक्कांच्या जपणुकीचे महत्वपूर्ण उदाहरण असून सर्वोच्च न्यायालयाने त्यासंबंधी वेळोवेळी सकारात्मक आणि संरक्षक भूमिका घेतली आहे.तंत्रज्ञानाच्या वाढत्या प्रगतीने काही वेळा मानवी हक्कांवर गदा येत असल्याचे चित्र दिसत असून आर्टिफिशियल इंटेलिजन्स,फेशल रेकग्निशन,बायोमेट्रिक माहितीचे अनधिकृत हस्तांतरण ,सोशल मीडिया माध्यमातून होणारे शोषण यामुळे अनेक प्रश्न निर्माण झाले आहेत. देखरेख ठेवणे, खासगी अधिकारांवर गदा आणणे, भेदभाव करणे दिसून येत आहे.त्याबाबत सर्वोच्च न्यायालय लक्ष ठेवून आहे. आणि मानवी अधिकारांचे उल्लंघन होणार नाही यासाठी दक्ष आहे’,असा सूर उदघाटन कार्यक्रमातील मान्यवरांच्या भाषणात उमटला. 

पुणे- महिलांमधील गायन, नृत्य, संगीत, चित्रकला, कथाकथन, क्रीडा आदी कलागुणांना हक्काचे व्यासपीठ मिळवून देणाऱ्या निवेदिता प्रतिष्ठानचे यंदाचे रौप्यमहोत्सवी २५वे वर्ष असून, त्यांच्यातर्फे आयोजित होणाऱ्या ‘ललना कला महोत्सवा’चे यंदाचे ११वे वर्ष आहे. त्यानिमित्त यंदा जागतिक महिला दिनाचे औचित्य साधत बुधवार, दि. २७ ते रविवार, दि. ३१ मार्च २०२४ असे पाच दिवस गायन, नृत्य, पेण्टिंग, कथाकथन आणि पुरस्कार यांचे आयोजन करण्यात आले आहे. या महोत्सवाचे उद्घाटन गुरुवार, दि. २८ मार्च रोजी सायंकाळी ५.०० वाजता खा. डॉ. मेधा कुलकर्णी यांच्या हस्ते पद्मावती येथील लोकशाहीर अण्णाभाऊ साठे सांस्कृतिक भवन येथे संपन्न होईल. याप्रसंगी उद्योजिका डॉ. स्वयंप्रभादेवी मोहिते-पाटील (अकलूज) आणि आंतरराष्ट्रीय कीर्तीचे नर्तक पं. डॉ. नंदकिशोर कपोते प्रमुख पाहुणे म्हणून उपस्थित राहतील. याप्रसंगी ‘तपस एल्डर केअर संस्थे’च्या संचालिका प्राजक्त वडावकर, ‘जस्ट फॉर हार्ट’ संस्थेच्या संचालिका डॉ. मनीषा देवकर आणि रेडिओ सिटीच्या आरजे तेजू यांची विशेष उपस्थिती असेल. निवेदिता प्रतिष्ठानतर्फे याचे आयोजन करण्यात आले आहे, असे प्रतिष्ठानच्या अध्यक्ष अनुराधा भारती यांनी सांगितले.
याप्रसंगी ‘ललना कलारत्न’ पुरस्कार सोहळा संपन्न होणार असून, त्यामध्ये ‘स्टार प्रवाह’फेम बालगायिका श्रुती भांडे (वय ९, अकोला), भरतनाट्यम् नृत्यांगना मिताली नाईक (गोवा), कथ्थक नृत्यांगना डॉ. नीलिमा हिरवे (पुणे), ‘इन लाइन फ्री स्टाइल स्केटिंग’मध्ये आशियाई चॅम्पियशिप पटकाविणाऱ्या श्रेयसी जोशी (वय १५, पुणे) व स्वराली जोशी (वय १७, पुणे) आणि प्रख्यात चित्रकार रुही अन्वर कुरेशी यांचा समारंभपूर्वक गौरव करण्यात येणार आहे.
या उद्घाटन सोहळ्यातच विविध सांस्कृतिक कार्यक्रम होणार असून, त्यामध्ये नृत्य, काव्य व चित्रकला या माध्यमातून सादर होणारा ‘पंचतत्त्व आणि स्त्री’, नाट्यछटा व कथा या माध्यमातून भारतातील शूर व धाडसी महिलांवर आधारित ‘ऐतिहासिक वीरांगना’ कार्यक्रम, भरतनाट्यम् नृत्याद्वारे ‘महिषासुरमर्दिनी व भैरवी शतकम्’ कार्यक्रम, कथ्थक नृत्याद्वारे ‘नवदुर्गा’ कार्यक्रम आणि ज्येष्ठ अभिनेत्री वहिदा रहमान यांना ‘दादासाहेब फाळके पुरस्कार’ मिळाल्यानिमित्त त्यांच्यावर चित्रित गाण्यांवर आधारित ‘रंगीला रे’ हा गाणी व नृत्याचा कार्यक्रम सादर होईल.
उद्घाटनदिवसाच्या आधी बुधवार, दि. २७ मार्च रोजी सायंकाळी ५.०० वाजता लोकशाहीर अण्णाभाऊ साठे सांस्कृतिक भवनात ‘स्त्री’चे भावविश्व उलगडून दाखविणारा मराठी गीतांचा ‘स्वप्नात रंगले मी’ हा कार्यक्रम सादर होईल.
शुक्रवार, दि. २९ मार्च रोजी दुपारी ४.०० वाजता बालगंधर्व कलादालन येथे देशातील महिला चित्रकारांच्या चित्रांच्या प्रदर्शनाचे उद्घाटन प्रसिद्ध चित्रकार रवि देव, डॉ. प्रसाद वाळिंबे व डॉ. आरती शिराली यांच्या हस्ते होईल. ३१ मार्चपर्यंत हे प्रदर्शन दिवसभर सर्वांसाठी खुले असेल. त्यात प्रात्यशिकेदेखील सादर होतील.
शनिवार, दि. ३० मार्च रोजी सकाळी १० ते १२.३० या वेळेत शिवाजी मराठा सोसायटीच्या जिजामाता हायस्कूल हॉलमध्ये ‘कथासखी’ ग्रुपतर्फे ‘कथाविष्कार’ हा कथाकथनाचा कार्यक्रम सादर होईल. शिवाजी मराठा सोसायटीच्या मानद सचिव प्रमिलाताई गायकवाड याप्रसंगी प्रमुख पाहुणे म्हणून उपस्थित राहतील.
हे सर्व कार्यक्रम विनामूल्य असून, पुणेकरांनी या सर्व कार्यक्रमांना यावे, असे आवाहन संयोजिक अॅड. अनुराधा भारती यांनी केले आहे.

पुणे, दि. २२: बेकायदेशीर कृत्ये अधिनियमानुसार ‘स्टुडंटस् इस्लामिक मुव्हमेंट ऑफ इंडिया’ (सिमी) या संघटनेवर बंदी घालण्यात आली आहे. याविषयीची २९ जानेवारी २०२४ रोजीची अधिसूचना केंद्र सरकारकडून प्रसिद्ध करण्यात आली असून पुढील ५ वर्षांसाठी ही बंदी असणार आहे. याविषयी राज्य शासनाने सर्व जिल्हाधिकाऱ्यांना पत्र पाठविले आहे. या कायद्याच्या तरतुदीनुसार आवश्यक ती कार्यवाही तातडीने करण्यात यावी. तसेच संबंधितांवर न्यायाधिकरणाची नोटीस बजावण्याबाबतची कार्यवाही करावी. तसेच कार्यवाहीबाबत शपथपत्रे दाखल करून ती राज्य शासनाकडे जमा करण्याचे आदेश शासनाने जिल्हाधिकाऱ्यांना दिले आहेत.

विद्यार्थी साहाय्यक समितीच्या वतीने देणगीचे आवाहन; ३३६ गरजू व होतकरू मुलींच्या निवासाची सोय होणार
पुणे : ग्रामीण भागातून पुण्यात उच्च शिक्षणासाठी येणाऱ्या  गरजू व होतकरू मुलींसाठी विद्यार्थी साहाय्यक समितीच्या वतीने पुण्यात उभारण्यात येत असलेल्या वसतिगृहासाठी आर्थिक हातभार लावण्याची संधी दानशूर/संवेदनशील पुणेकरांना आहे. ३३६ मुलींच्या निवासाची सोय होणाऱ्या या वसतिगृहाच्या निर्माणासाठी पुणेकरांनी यथायोग्य अर्थसहाय्य करावे, असे आवाहन समितीच्या वतीने करण्यात आले आहे.

गेल्या ६९ वर्षांत समितीने ग्रामीण भागातील हजारो मुलामुलींना उत्तम पद्धतीने घडविण्याचे काम केले आहे. गरीब मुलींच्या उच्च शिक्षणामुळे ग्रामीण भागातील गरिबी निर्मूलन, त्यांचे सक्षमीकरण आणि त्यायोगे समाजाचा सर्वांगीण विकास साधण्याचा हा प्रयत्न आहे. आज समितीमध्ये ३२५ मुली व ४५० मुले असे एकूण ७७५ विद्यार्थी राहात असून, पुण्याच्या विविध महाविद्यालयात शिकत आहेत. मराठवाडा, विदर्भ यासह महाराष्ट्रातील अतिदुर्गम भागातील हे विद्यार्थी आहेत. समिती म्हणजे केवळ लॉजिंग बोर्डिंग नाही तर युवा सक्षमीकरणाची चळवळ आहे येथे माफक दरात निवास, भोजन व्यवस्थेबरोबर व्यक्तिमत्त्व विकास या संकल्पनेला सर्वाधिक महत्त्व आहे. समितीत जात, धर्म, पंथ या संकल्पनेला थारा नाही. स्वच्छता, समता आणि श्रमप्रतिष्ठा या त्रिसूत्रीवर येथे काम चालते. सर्वांगीण विकासातून युवा सक्षमीकरण हे समितीचे ब्रीद आहे. देणगीदार जरी शहरी भागातले असले तरी प्रवेश फक्त ग्रामीण भागातील गरजू आणि होतकरू विद्यार्थ्यांनाच दिला जातो.

अलीकडच्या काळात ग्रामीण भागातून येणाऱ्या मुलींचे प्रमाण वाढले आहे हा मोठा सामाजिक बदल आहे त्यांना सुरक्षित आसरा देण्याच्या उद्देशाने समितीने ३३६ मुलींचे वसतिगृह उभारण्याचा प्रकल्प हाती घेतला आहे. यामध्ये ११२ खोल्या आहेत. एका खोलीचा खर्च दहा लाख रुपये आहे. एवढी दहा लाखांची देणगी व्यक्तिगत/ कौटुंबिक/ समूहातर्फे मिळाल्यास खोलीला देणगीदारांच्या इच्छेनुसार नाव देण्याची योजना समिती राबवत आहे. या नव्या प्रकल्पासाठी दानशूरांनी सढळ हाताने मदत करण्याचे आवाहन संस्थेच्या वतीने करण्यात आले आहे. संपर्क – info@samiti.org, मोबाईल – ९४०४८५५५३०.