सिंधू सेवा दलातर्फे भगवान साई झुलेलाल यांचा १०७४ वा जन्मोत्सव व सिंधी नववर्षाचा आनंदोत्सव

पुणे : ‘आयो लाल झुलेलाल’च्या जयघोषात भगवान साई झुलेलाल यांची भक्तीभावाने केलेली आरती… झुलेलाल यांच्या मनमोहक प्रतिमेचे पूजन… सिंधी गीतांची बहारदार मैफल… कलात्मक नृत्याविष्कार… चाट-सामोसा-गोड भाताचा प्रसाद… रुचकर लंगर… डोक्यावर लाल टोपी आणि साई झुलेलाल यांचे अखंड भजन अशा भावभक्तीमय वातावरणात सिंधी संस्कृतीचे दर्शन घडले. या वार्षिक महोत्सवात सहभागी प्रत्येक सिंधी बंधू-भगिनींच्या चेहऱ्यावर आनंद दिसत होता.
सिंधी समाजाचे नवीन वर्ष व भगवान साई झुलेलाल यांच्या १०७४ व्या जन्मोत्सवानिमित्त सिंधू सेवा दलातर्फे ‘चेटीचंड’ महोत्सव आयोजिला होता. येरवड्यातील डेक्कन कॉलेजच्या बँक्वेट हॉल व मैदानावर झालेल्या या महोत्सवात सहभागी प्रत्येक सिंधी बंधू-भगिनींच्या चेहऱ्यावर आनंद दिसत होता. भगवान साई झुलेलाल यांच्या प्रतिमेचे पूजन करून सामाजिक आणि सांस्कृतिक महोत्सवाची सुरुवात झाली. संगीत, गायन, भजन आणि महाप्रसादातील विविध पदार्थ यामुळे चेटीचंड महोत्सव वैशिष्ट्यपूर्ण ठरला.
मुंबईतील प्रसिद्ध गायक शुभम नाथानी, नागपूरची प्रतिभावान गायिका दृष्टी कुकरेजा, राजस्थानचे उत्कृष्ठ गायक मास्टर हर्षल यांचा लाईव्ह कॉन्सर्ट आणि जयपूर येथील विनोदवीर भाग्यश्री दर्यानीच्या सादरीकरणाने उपस्थितांची मने जिंकली. सिंधी समाजात कपिल शर्मा अशी ओळख असलेल्या मोहित शेवानीने कार्यक्रमाचे संचालन केले. जनरेशन नेक्स्ट डान्स अकँडमीच्या मुलांनी मनमोहक नृत्याविष्कार सादर केले. प्रीतिभोजनाने (महाप्रसाद) महोत्सवाची सांगता झाली. पुणे, पिंपरी-चिंचवड व परिसरातील चार-साडेचार हजार सिंधी बांधव या महोत्सवात सहभागी झाले.
आसवानी प्रोमोटर्स अँड बिल्डर्सचे संस्थापक संचालक श्रीचंद आसवानी यांच्या प्रमुख उपस्थितीत बीजे मेडिकल महाविद्यालयातील निवृत्त सहयोगी प्राध्यापक डॉ. लछमनदास फेरवानी यांच्यासह सिंधी समाजातील मान्यवर व्यक्तींचा सन्मान करण्यात आला. तसेच मुकुल माधव फाउंडेशन व एएनपी केअर फाउंडेशनच्या सामाजिक कार्याचा गौरव करण्यात आला. सिंधू सेवा दलाचे अध्यक्ष अशोक वासवानी, संस्थापक सदस्य ईश्वर कृपलानी, माजी अध्यक्ष मनोहर फेरवानी, सुरेश जेठवानी, पीटर दलवानी, दीपक वाधवानी, विजय दासवानी, उपाध्यक्ष पुरुषोत्तम पर्यानी, सचिव सचिन तलरेजा, खजिनदार राजेंद्र फेरवानी, सहखजिनदार निलेश फेरवानी, जनसंपर्क अधिकारी देवेंद्र चावला, सिमरन जेठवानी, विनोद रोहानी आदी उपस्थित होते.

अशोक वासवानी म्हणाले, “सिंधी संस्कृती विषयी लोकांमध्ये जागरूकता निर्माण करण्यासह सिंधी परंपरा अधिकाधिक लोकांपर्यंत पोहचविण्यासाठी सिंधू सेवा दल गेली ३७ वर्ष कार्यरत आहे. चेटीचंड महोत्सवानिमित्त सर्व समाज एकत्र येतो. भगवान साई झुलेलाल यांचा उत्सव साजरा करतो. हा आनंदाचा क्षण अनुभवण्यासाठी आम्हीही दरवर्षी यामध्ये सहभागी होतो.”
या मैदानावर पहिल्यांदाच होत असलेल्या चेटीचंड महोत्सवाला उत्स्फूर्त प्रतिसाद मिळाल्याचे सुरेश जेठवानी यांनी प्रास्ताविकात नमूद केले. सचिन तलरेजा यांनी आभार मानले.

 श्री बन्सीलाल रामनाथ अग्रवाल धार्मिक व सांस्कृतिक ट्रस्ट, श्री महालक्ष्मी मंदिर सारसबाग यांच्या वतीने आयोजन
पुणे : ‘स्वये श्रीराम प्रभू ऐकती’, ‘शरयू तिरावरी’, ‘दशरथा घे हे पायसदान’, ‘राम जन्मला गं सखे’, ‘जोड झणी कार्मुका’, चला राघवा चला, आज मी शापमुक्त जाहले अशा एकाहून एक सरस गीत रामायणातील रचना सादर करीत ग. दी. माडगूळकर रचित आणि स्व.सुधीर फडके यांनी संगीतबद्ध केलेली अजरामर कलाकृती ‘गीतरामायण’ प्रेक्षकांच्या सहभागाने सादर झाले. 
श्री बन्सीलाल रामनाथ अग्रवाल धार्मिक व सांस्कृतिक ट्रस्ट, श्री महालक्ष्मी मंदिर सारसबाग यांच्या वतीने चैत्र नवरात्र महोत्सवांतर्गत  गुढीपाडवा ते श्रीराम नवमी असे सलग ९ दिवस गीतरामायणाचे आयोजन करण्यात आले आहे. सारसबागेसमोरील श्री महालक्ष्मी मंदिरात स्वरसंवादिनी प्रस्तुत  हे गीतरामायण सुरु आहे.  प्रणव कुलकर्णी आणि सहकारी गीतरामायणाचे सादरीकरण करत आहेत.  यावेळी ट्रस्टचे प्रमुख संस्थापक विश्वस्त राजकुमार अग्रवाल, प्रमुख विश्वस्त अमिता अग्रवाल, विश्वस्त हेमंत अर्नाळकर, नारायण काबरा यांसह विश्वस्त उपस्थित होते.
प्रणव कुलकर्णी, अपर्णा कुलकर्णी, मंदार लिमये यांच्यासह ज्येष्ठ गायक प्रमोद रानडे, जयश्री कुलकर्णी, अभिजित पंचभाई हे गीतांचे सादरीकरण करत आहेत.  मकरंद पंडित (हार्मोनियम), श्रीधर मोडक, तुषार दिक्षित (सिंथेसायझर), निलेश कुलकर्णी (तबला), सागर चव्हाण (तालवाद्ये) असा उत्तम वाद्यवृंद कार्यक्रमास साथसंगत करीत आहे. संपूर्ण गीतरामायणाचे  निवेदन अक्षय वाटवे करत आहेत.

अमिता अग्रवाल म्हणाल्या, दिनांक १६ एप्रिल पर्यंत दररोज सायंकाळी ७.३० ते ९ यावेळेत गीतरामायणाचे सादरीकरण सारसबागेसमोरील महालक्ष्मी मंदिरात होत आहे. तसेच श्रीरामनवमी निमित्त बुधवार, दि. १७ एप्रिल रोजी सकाळी ९ ते दुपारी १२ विविध कार्यक्रम होणार आहेत. विशेष अर्चना, अभिषेक, राजभोग, श्रीरामजन्म सोहळा दुपारी १२ वाजता मंदिरात होईल. 

पुणे दि.११: महात्मा जोतिराव फुले यांच्या जयंतीनिमित्त विधानपरिषद उपसभापती डॉ. नीलम गोऱ्हे यांनी सिल्व्हर रॉक्स या निवासस्थानी महात्मा फुले यांच्या प्रतिमेला पुष्पहार अर्पण करून अभिवादन केले. याप्रसंगी स्त्री आधार केंद्राच्या विश्वस्त डॉ. जेहलम जोशी यांसह कार्यालयातील कर्मचारी उपस्थित होते.

महात्मा जोतीराव फुले यांच्या जयंती निमित्ताने महिला शिक्षणाबरोबरच समाजात सुधारणा व्हाव्यात, तसेच सत्यशोधक विचार व शेतकरी, मजूर, गोरगरीब लोक यांना समानतेच आणि सन्मानाचे जीवन जगता यावं म्हणून त्यांनी जे प्रयत्न केले त्याच्यासाठी पुढच्याही काळामध्ये कामाची खूप गरज आहे. महात्मा जोतीराव फुले यांच्या विचारांमधून दुज्या भावाच्या विरोधामध्ये स्त्रियांचे अधिकार म्हणजेच मानव अधिकार आणि मानव अधिकार म्हणजे स्त्रियांचे अधिकार ही मुहूर्त मेढ किंवा हा जो विचार अलीकडच्या काळात जागतिक स्तरावरती सर्व देशांनी स्वीकारलेला आहे, त्याचं बीज जे आहे ते भारतामध्ये महात्मा जोतीराव फुले यांनी रोवलेले आहे. मानवतावादी विचाराचं रूप महाराष्ट्र, भारताबरोबर संपूर्ण जगामध्ये पोहोचवण्याचा काम ज्या विचारवंतांनी केलं त्याच्यामध्ये महात्मा जोतीराव फुले आणि सावित्रीबाई फुले यांचा अभूतपूर्व असं योगदान आहे.

महात्मा फुलेंनी भिडे वाड्यामध्ये जी शाळा सुरू केली होती त्याच देखील जतन करण्याचा निर्णय सरकार मधल्या सर्व सन्माननीय प्रतिनिधींनी घेतलेला आहे. मुलींच्या शिक्षणाला चालना द्यावी यासाठी प्रयत्न केले जात आहेत आणि विशेषतः उच्च आणि तंत्रशिक्षण ज्या मुली घेत आहेत त्यापैकी आठ लाखाच्या आत ज्यांचे उत्पन्न आहे त्यांच्यासाठी पूर्णपणे फी माफी करण्यात आलेली आहे. या पार्श्वभूमीवरती अजून असंच कार्य समृद्ध होण्यासाठी काम व्हावं, बालविवाह सारखे प्रश्न कायमचे संपावेत यासाठी म्हणून मी महात्मा ज्योतिराव फुले यांना शतशः अभिवादन करते, असे उपसभापती डॉ. नीलम गोऱ्हे यांनी आपल्या संदेशात म्हटले आहे.

पुणे- मौजमजेसाठी चोरी करणा-या एका अल्पवयीन मुलाच्या ताब्यातुन पुणे पोलिसांनी तब्बल १० मोटारसायकल, ०१ कॅप्टन कंपनीचा ट्रॅक्टर असा एकुन ५,१५,०००/- रु किं. चा मुद्देमाल जप्त केला आहे. या संदर्भात पोलिसांनी सांगितले कि,’
दिनांक १०/०४/२०२४ रोजी वारजे माळवाडी पोलीस स्टेशन पुणे शहर चे हद्दीमध्ये वरिष्ठांचे आदेशाने पोलीस स्टेशनचे तपास पथकातील पोलीस अंमलदार हे गुन्हे प्रतिबंध करण्याच्या अनुषंगाने पेट्रोलिंग करत असताना त्यांना पेट्रोलिंग दरम्यान कॅनाल रोड, खानमज्जीद जवळ एका लाल रंगाच्या मोटारसायकल हिचे सह एक संशयीत मुलगा थांबलेला मिळुन आल्याने त्यास त्याचे नाव, पत्ता व गाडीच्या कागद पत्रां बाबत विचारणा केली असता त्याने उडवा-उडवीची उत्तरे दिल्याने त्याचेवर संशय आला. त्यामुळे त्यास अधिक चौकशीकामी वारजे पोलीस स्टेशन येथे घेवुन आले असता सदर बाबत वरिष्ठांना माहिती देवुन तपास पथकाचे अधिकारी यांनी त्याचे कडे अधिक विचारपुस केली असता नमुद संशयीत मुलगा हा विधीसंघर्षीत बालक असल्याचे निष्पन्न झाले. तसेच त्याचे ताब्यातील मिळुन आलेली दुचाकी ही वारजे माळवाडी पोलीस ठाणे गुरनं ८६/२०२४ भादंवि कलम ३७९ मधील वारजे जकात नाका पुणे भागातून त्याने चोरी केलेली असल्याचे निष्पन्न झाल्याने त्याचेकडे त्याचे पालकांचे समक्ष अधिक विचारपुस केली असता त्याने यापुर्वी आजुबाजुच्या परीसरातुन अजुन काही गाड्या चोरी केल्याचे सांगितले. तसेच सदरच्या गाड्या चोरी का केल्या त्याबाबत त्याचेकडे विचारपुस केली असता त्याने सदरच्या गाड्या ह्या फक्त मौजमजेसाठी चोरी केली असल्याचे सांगितले. त्यानंतर त्याचे ताब्यातुन वेगवेगळ्या ठिकाणी लावलेले एकुन १० मोटार सायकल व ०१ कॅप्टन कंपनीचा ट्रॅक्टर जप्त करण्यात येवुन त्यांचे कडून वारजे माळवाडी, हिंजवडी, सिंहगड रोड, भारती विद्यापीठ, अलंकार, पर्वती या पोलीस स्टेशन कडील एकुन ११ वाहन चोरीचे गुन्हे उघडकीस आलेले आहेत. दाखल गुन्ह्याचा अधिक तपास रामेश्वर पार्वे, पोलीस उपनिरीक्षक वारजे माळवाडी पोलीस स्टेशन पुणे शहर हे करत आहेत.
सदरची कामगिरी ही पोलीस उप आयुक्त परिमंडळ ०३ संभाजी कदम,सहा पोलीस आयुक्त कोथरुड विभाग भिमराव टेळे वारजे माळवाडी पोलीस स्टेशनचे वरिष्ठ पोलीस निरीक्षक मनोज शेडगे, पोलीस निरीक्षक (गुन्हे) निळकंठ जगताप यांचे मार्गदर्शनाखाली तपास पथकाचे अधिकारी सहा. पोलीस निरीक्षक रणजीत मोहिते, पोलीस उप निरीक्षक रामेश्वर पार्वे, पोलीस अंमलदार प्रदिप शेलार, भुजंग इंगळे, मनोज पवार, विजय भुरुक, बंटी मोरे, श्रीकांत भांगरे, विक्रम खिलारी, संभाजी दराडे, अजय कामठे, सत्यजित लोंढे यांनी केली आहे.

पुणे- स्त्री शिक्षणाची मुहुर्तमेढ रोवणाऱ्या महात्मा जोतिबा फुले यांची जयंती पर्वती येथील अखिल भारतीय मराठा शिक्षण परिषदेत साजरी करण्यात आली. या कार्यक्रमाची सुरवात  अखिल भारतीय मराठा शिक्षण परिषदेच्या सरचिटणीस मा.सौ. प्रमिला गायकवाड, खजिनदार विजयसिंह जेधे यांचे हस्ते प्रतिमा पूजनाने झाली. या प्रसंगी सत्यशोधक समाजाचे संस्थापक व महाराष्ट्रात स्त्री शिक्षणाची मुहूर्तमेढ रोवणारे थोर विचारवंत व समाजसुधारक महात्मा ज्योतिराव फुले यांनी बहुजन समाजाचे अज्ञान, दारिद्र्य आणि जातिभेद पाहून सामाजिक परिस्थिती सुधारण्याचा निश्चय केला. पुण्यामध्ये मुलींची पहिली शाळा सुरु करून महाराष्ट्रातील स्त्री शिक्षणाची  मुहूर्तमेढ रोवली. ‘शेतकऱ्याचा असूड’ या पुस्तकातून महाराष्ट्रातील शेतकऱ्यांची विदारक दुर्दशा आणि दारिद्र्याची वास्तवता विशद केली. ‘नीती हाच मानवी जीवनाचा आधार आहे’ हा विचार मांडणारे तत्त्वचिंतक व्यक्तिमत्त्व होते. आपण सर्वांनी महात्मा फुलेंच्या कार्याचा व विचारांचा  आदर्श घेण्याची गरजही कार्यक्रमासाठी  मा.सौ. प्रमिला गायकवाड यांनी या वेळी  व्यक्त केली. या कार्यक्रमासाठी  मा.सौ. प्रमिला गायकवाड, विजयसिंह जेधे,प्राचार्य डॉ.शुभदा घोलप,डॉ.विलास पाटील,प्रा.सागर गावंडे,डॉ.रविराज सोरटे,श्री.नितीन मुकणे,सर्व शिक्षक व शिक्षकेत्तर कर्मचारी उपस्थित होते.

  श्री जंगली महाराज देवस्थान ट्रस्ट आयोजित श्री जंगली महाराज १३४ वा पुण्यतिथी उत्सव ;
पुणे :  ‘कानन कुंडल बहुजन पालक श्री ओंकार’ अशा यमन रागातील खयाल, ‘सखी आज तेरी पिया विन याद आये’ असे विरह गीत, ‘जब से पिया परदेस गमन किया’ अशा प्रकारचे भावपूर्ण गीत यांसह विठ्ठल भक्तीमध्ये तल्लीन करणारे अभंग अशा शास्त्रीय आणि उपशास्त्रीय प्रकारच्या सादरीकरणाने सद्गुरु श्री जंगली महाराज पुण्यतिथी उत्सवात विदुषी सानिया पाटणकर यांची संगीतमय मैफल रंगली. 
श्री जंगली महाराज देवस्थान ट्रस्ट, पुणेच्या वतीने आयोजित सद्गुरु श्री जंगली महाराज यांच्या १३४ व्या पुण्यतिथी उत्सवात  सानिया पाटणकर यांच्या शास्त्रीय आणि उपशास्त्रीय संगीतमय मैफिलीचे आयोजन करण्यात आले होते. 
‘मेरे जोगी’ या बंदिशीने तसेच ‘सखी पिया की याद आये’ या सरगमने सानिया पाटणकर यांनी संगीत मैफिलीची सुरुवात केली. विविध प्रकारच्या ताना, ठुमरी आणि रागाने सजलेल्या त्यांच्या सादरीकरणाला रसिकांनी टाळ्यांच्या स्वरूपात दाद दिली. ‘सखी आज तेरी पिया विन याद आये’, ‘जब से पिया परदेस गमन किया’ यांसह यमन रागातील विविध प्रकारच्या गाण्यांनी त्यांनी रसिकांना मंत्रमुग्ध केले. 
त्यानंतर त्यांनी ‘रूप पाहता लोचनी सुख झाले हो साजणी’, ‘विठ्ठल बरवा तोहा माधव बरवा’ अशा विठ्ठलाच्या रूपाचे वर्णन करणाऱ्या गीतांनी संगीत मैफल सजवली. उत्तर भारतामध्ये सादर करण्यात येणाऱ्या होळी हा संगीत प्रकार  त्यांनी ‘सकल ब्रिज धूम मचाये रे’  हे राधा कृष्णाचे प्रेम संगीत सादर करून रसिकांची दाद मिळवली. माधव लिमये ( हार्मोनियम), कार्तिक स्वामी ( तबला) तसेच अपूर्वा देशपांडे, अद्वया आपटे, नितीन महाबळेश्वरकर आणि मुकुंद जोशी यांनी गायनामध्ये साथ संगत केली.

पुणे दि.११ एप्रिल : सरहद पुणे आणि भारतीय लष्कर यांच्या संयुक्त विद्यमाने व अर्हम संस्था पुणेच्या सहकार्याने ” सरहद शौर्यथॉन – २०२४” या आंतरराष्ट्रीय कारगिल मॅरेथॉन स्पर्धेचे आयोजन रविवार ३० जून २०२४ रोजी लडाख येथे झोजिला वॉर मेमोरियल ते कारगिल वॉर मेमोरियल, द्रास या दरम्यान करण्यात येणार आहे. हि मॅरेथॉन झोजिला युध्द विजय अमृत महोत्सव आणि कारगिल युध्द विजय रौप्य महोत्सवी वर्षानिमित्त आयोजीत करण्यात आली असून या मॅरेथॉनमध्ये भारतासह जगातील विविध देशातील अंदाजे २००० धावपटू भाग घेणार आहेत.

सन २०१७ पासून गेली सहा वर्षे, दरवर्षी सरहदच्या वतीने कारगिल आंतरराष्ट्रीय मॅरेथॉनचे आयोजन यशस्वीपणे कारगिल (लडाख) येथे केले आहे. त्यामुळे भारतीय लष्कराने सरहद संस्थेला दि. ३० जून २०२४ रोजी होणाऱ्या या ऐतिहासिक मॅरेथॉन स्पर्धेचे आयोजन करण्यास आमंत्रित केले आहे. या स्पर्धेत पुरुष आणि महिलांसाठी ४४ किमी झोजिला वॉर व्हीक्टरी मॅरेथॉन, २५ किमी कारगिल व्हीक्टरी रन, १० किमी आणि ७.५ किमी टायगर हिल व्हिक्टरी रन या अंतराच्या स्पर्धा तसेच पुरुष, महिला आणि शालेय व महाविद्यालय विद्यार्थ्यांसाठी ४ किमी अंतराची फिटनेस रन चे आयोजन करण्यात आले आहे.

या स्पर्धेतील विजेत्यांना रू.४ लाखांची रोख पारितोषिके संयोजन समिती तर्फे देण्यात येणार आहेत. वरील स्पर्धांमध्ये भाग घेणाऱ्या प्रत्येक स्पर्धकाला स्पर्धक (बीब) क्रमांक टी शर्ट, मेडल, सहभाग सर्टिफिकेट, स्नॅक्स इ. देण्यात येणार आहे. ही स्पर्धा वर्ल्ड अॅथलेटिक्स आणि अॅथलेटिक्स फेडरेशन ऑफ इंडिया, नवी दिल्ली यांच्या नियमानुसार होतील.

हिमालयातील पर्वत रांगांमधून जाणाऱ्या आणि अतिशय आव्हानात्मक असणाऱ्या या स्पर्धा मार्गावर नियमानुसार, तांत्रिक अधिकारी, रिफ्रेशमेंट बूथ, पिण्याच्या पाण्याचे बूथ,

वैद्यकीय व्यवस्था, अद्ययावत रुग्णवाहिका, मार्गदर्शक किमी. अंतराचे बोर्डस, मोटार सायकल पायलट्स, संपूर्ण स्पर्धा मार्गावर लडाख ट्रॅफिक पोलिसांचे नियंत्रण आणि बंदोबस्त तसेच भारतीय लष्कराचे बिनतारी संदेश नियंत्रण व्यवस्था करण्यात येणार आहे.

त्या दृष्टीने पूर्व तयारी साठी भारतीय लष्कराचे लडाख मधील वरिष्ठ अधिकारी आणि सरहद, पुणे यांची संयुक्त संयोजन समिती फेब्रुवारी २०२४ मध्ये स्थापन करण्यात आली असून या समितीत सरहद संस्थेचे संजय नहार, अर्हम संस्थेचे डॉ. शैलेश पगारीया तसेच स्पर्धा संचालक सुमंत वाईकर तर तांत्रिक संचालक वसंत गोखले हे आहेत. तसेच १३ वी बटालियन जम्मू काश्मिर रायफल्स चे कर्नल अभिषेक सिंग चरक (कमांडींग ऑफिसर) व ले. कर्नल संदिप सिंग दुल्लत आणि युवराज शहा, पुणे आणि अनुज नहार, ट्रस्टी सरहद, पुणे हे समिती सदस्य आहेत. या समितीच्या ऑनलाईन झूम बैठका मागील दोन महिन्यां पासून चालू असून शौर्यथॉन ची तयारी अंतिम टप्प्यात आली आहे.

दिनांक १५ मार्च २०२४ रोजी मुंबई येथे स्पर्धेच्या लोगोचे आणि(www.sarhadkargilmarathon.com) या संकेत स्थळाचे अनावरण मुख्यमंत्री श्री. शिंदे यांच्या हस्ते करण्यात आले. यास्पर्धेचे मुख्य मार्गदर्शक मेजर जनरल सचिन मलिक (लडाख लष्कर मुख्यालय) हे आहेत. या मॅरेथॉन मध्ये महाराष्ट्रातील धावपटूंनी मोठ्या संख्येने सहभागी व्हावे असे आवाहन संयोजकांनी केले आहे.

दिनांक ३० जून २०२४ रोजी हिमालयातील लडाख या केंद्रशासित प्रदेशात कारगील मध्ये होणाऱ्या सरहद आणि भारतीय लष्कराच्या या ऐतहासिक मॅरेथॉन स्पर्धेसाठी प्रमुख पाहुणे म्हणून एका राज्याचे राज्यपाल आणि वरिष्ठ लष्करी अधिकारी उपस्थित राहणार आहेत. सुरक्षिततेच्या कारणास्तव त्यांची नावे नंतर जाहीर करण्यात येतील.