पुणे : अमेरिकेतील सुनील आणि साधना शेणॉय दाम्पत्याकडून विद्यार्थी साहाय्यक समितीच्या ‘एफसीआरए’ (विदेशी योगदान नियमन कायदा) खात्यात एक लाख १५ हजार डॉलर म्हणजेच ९५ लाख २५ हजार रुपयांची देणगी जमा केली. गेल्या वर्षी त्यांनी ६२०० डॉलर पाठवले होते. एक फेसबुक पोस्ट वाचनात आली अन या दाम्पत्याने चौकशी करत माहिती घेत, समितीत येऊन देणगी द्यायला सुरुवात केली.

शेणॉय कुटुंबीय समितीचे विश्वस्त डॉ. मकरंद फडके यांचे फेसबुक फ्रेंड आहेत. डॉ. फडके यांच्या फेसबुक पोस्टवरून त्यांना समितीच्या कार्याविषयीची माहिती मिळाली. त्या पोस्टला प्रतिसाद म्हणून त्यांनी प्रथम ६२०० डॉलर पाठवले होते. गेल्या जानेवारीमध्ये शेणॉय कुटुंबीयांनी पुण्यातील मुलींच्या नवीन वसतिगृह बांधकामाला भेट दिली. त्यावेळी त्यांना समिती कार्याची विस्तृत माहिती मिळाली. समितीचे सेवाभावी काम पाहून ते प्रभावित झाले व आणखी एक लाख डॉलर देण्याचा मानस व्यक्त केला. प्रत्यक्षात काल १ लाख १५ हजार डॉलर पाठवले.

“सोशल मीडियाच्या माध्यमातून समितीला एवढी मोठी मदत (अंदाजे १ कोटी रु) मिळाली, याचे समाधान आहे. जेव्हा आपले काम प्रामाणिक, पारदर्शी आणि समाजाभिमुख असते; तेव्हा समाजाचा त्यावर विश्वास दृढ होतो आणि सढळ हाताने देणगी येते. ही त्याची पावतीच आहे. साधना व सुनील शेणॉय आणि डॉ. मकरंद फडके यांच्याप्रती समिती परिवार ऋणी आहे,” असे विश्वस्त तुकाराम गायकवाड यांनी नमूद केले.

पुणे: लोकसभा सार्वत्रिक निवडणुकीच्या कामकाजात टाळाटाळ केल्याप्रकरणी खडकवासला विधानसभा मतदारसंघात मतदान केंद्रस्तरीय अधिकारी म्हणून नियुक्त सहा कर्मचाऱ्यांवर निलंबनाची कारवाई प्रस्तावित करण्याचे निर्देश देण्यात आले आहेत, अशी माहिती खडकवासला विधानसभा मतदारसंघाचे सहायक निवडणूक निर्णय अधिकारी संजय आसवले यांनी दिली आहे.

पुणे महानगरपालिकेच्या कै. ह. तू. थोरवे प्राथमिक विद्यालय शाळा क्र. १६२ बी व विद्या निकेतन १९ चंद्रभागनगर कात्रज या शाळेतील शिक्षकांना निवडणूक कामकाजाकरीता मतदान केंद्रस्तरीय अधिकारी म्हणून आदेश बजावण्यात आले होते. या कर्मचाऱ्यांनी वारंवार संधी देऊनही त्यांना नियुक्त केलेल्या भागाचे मतदान केंद्रस्तरीय अधिकारी म्हणून आपले निवडणूक कर्तव्य पार पाडण्यात अक्षम्य दुर्लक्ष, कुचराई, दिरंगाई केल्याच्या कारणास्तव त्यांच्याविरुद्ध लोकप्रतिनिधीत्व अधिनियम १९५० कलम ३२ अन्वये निलंबनाची कारवाई प्रस्तावित करावी असे निर्देश पुणे महानगरपालिकेच्या शिक्षणाधिकाऱ्यांना देण्यात आले आहेत. यापुढेही निवडणूक कामकाजात टाळाटाळ करणाऱ्या कर्मचाऱ्यांवर निलंबनाची कारवाई करण्यासह कडक कारवाई करण्यात येईल, असेही श्री. आसवले यांनी स्पष्ट केले आहे.

वासुदेव कामत: ‘एमआयटी एडीटीत’र्फे ‘विश्वारंभ कला पुरस्कारा’चे वितरण 
पुणेः  चित्रकार कलेच्या माध्यमातूनच आपले विचार मांडण्याचा प्रयत्न करत असतो. कलाकार कलाकृती साकारत असतो तोपर्यंतच ती त्याच्या मालकीची असते. एकदा का त्याने तिच्यावर सही केली ती सार्वजनिक होते. इतिहासात कायमच योगदानाची नोंद राहते व्यवहाराची नाही. कारण, कलाकृती ही कलाकारापेक्षा जास्त आयुष्य घेऊन जन्मते, त्यामुळे कलाकाराने केवळ व्यवहारावर भर न देता योगदानावर भर द्यावा व अखेरीस शांती व तृप्ती रसाचा आनंद घ्यावा, असे प्रतिपादन प्रसिद्ध चित्रकार वासुदेव कामत यांनी केले.
ते एमआयटी आर्ट, डिजाईन व टेक्नाॅलाॅजी विद्यापीठ, पुणेच्या ललित कला, परफॉर्मिंग आर्ट्स, मीडिया, डिझाइन आणि आर्किटेक्चरचा सर्वांत मोठा महोत्सव असणाऱ्या “कारी-२०२४” निमित्ताने राजा रविवर्मा आर्ट गॅलरी येथे आयोजित ‘विश्वारंभ कला पुरस्कार’ स्विकारल्यानंतर बोलत होते. याप्रसंगी, प्रसिद्ध दिग्दर्शक जब्बार पटेल, माईर्स एमआयटी शिक्षण समुहाच्या कार्यकारी संचालक सौ.ज्योती ढाकणे, एमआयटी एडीटी विद्यापीठाचे प्र.कुलगुरू डाॅ.अनंत चक्रदेव, डाॅ.मिलिंद ढोबळे, डाॅ.आनंद बेल्हे, डाॅ.अश्विनी पेठे आदी उपस्थित होते.    कामत यांनी आपल्या अमोघ वाणीतून रसिकांना मंत्रमुग्ध केले. यावेळी ते पुढे म्हणाले, आपल्या क्षेत्रामध्ये प्रत्येक जण मी अप्लाईड आणि फाईन आर्टिस्ट आहे, असे सांगतो. परंतू माझ्या मते आपले कलाकार असणे आणि त्यापेक्षाही आपल्यातील कला’कारी’ अधिक महत्त्वाची असते. कला ही मनुष्याच्या अंतापर्यंत साथ देते, आणि ज्याला कलेची आवड आहे, त्यालाच मनुष्य म्हटले जाऊ शकते. प्रा.डाॅ.चक्रदेव यावेळी म्हणाले, ‘कारि’ म्हणजे, काहीतरी नाविण्यपूर्ण घडविणे. ज्यामध्ये कविता, कलाकृती, चित्र, फोटो, तंत्रज्ञान, चित्रपट अशा प्रत्येक गोष्टीचा अंतर्भाव होऊ शकतो. एमआयटी एडीटी विद्यापीठाचा कॅम्पस मुळात अनेक कलाकृतींचा संगम असून जेथून अनेक कलाकार घडत आहेत. 
विश्वशांती प्रार्थनेने सुरू झालेल्या या कार्यक्रमाची सांगता राष्ट्रगीताने झाली, ज्याचे सुत्रसंचालन स्नेहा वाघटकर यांनी केले. 

बंद आखोंसे देखे गये सपनों को जो साकार करें वो कलाकार होता है!, अगदी तशाच प्रकारे ‘विश्वारंभ’, या नावातच काहीतरी नाविन्यपूर्ण तयार करण्याची संकल्पना जडलेली आहे. अर्थातच या नावामागे आणि या पुरस्कारामागे आमचे मार्गदर्शक प्रा.डाॅ.विश्वनाथ दा.कराड यांची प्रेरणा आहे. प्रा.डाॅ.कराड हेही एक सुंदर कलाकार आहेत. जगातील सर्वांत मोठा विश्वशांती घुमट आणि विश्वराजबागेची बांधनी या त्यांच्याच दृष्टीतून साकारल्या गेलेल्या अप्रतिम कलाकृती आहेत. त्यामुळे आज श्री.वासुदेव कामत यांना ‘कारि’ प्रसंगी ‘विश्वारंभ कला पुरस्कार’ प्रदान करताना अतिशय आनंद होत आहे.- सौ.ज्योती ढाकणे – कराड कार्यकारी संचालक, माईर्स एमआयटी शिक्षण समुह

कलाकृती भविष्याशी संवाद साधतात – पटेलआपल्या अध्यक्षीय भाषणात प्रसिद्ध दिग्दर्शक जब्बार पटेल यांंनी अनेक गोष्टींवर प्रकाश टाकला. ते म्हणाले, जेव्हा मी कुठल्याही कलाकाराला विचारतो तेव्हा तो काहीतरी नवीन साकारतोय असे म्हणतो. परंतू जगात नवीन असे काहीच नाही. कारण एक कलाकार सर्वच गोष्टी आपल्या भवतालच्या गोष्टींना पाहून साकारत असतो. त्यात तो जी काही कलाकारी साकारतो ती इतिहासाचा अविभाज्य भाग होऊन जाते. त्यामुळे, कलाकारांच्या कलाकृती भविष्यातील पिढीशी संवाद साधण्याचे काम करता. त्यामुळे, कलाकाराचा हात नाजूक असला तरी त्याची कलाकृती मात्र कणखर हवी, असेही पटेल यांनी म्हटले. 

श्री जंगली महाराज देवस्थान ट्रस्ट आयोजित श्री जंगली महाराज १३४ वा पुण्यतिथी उत्सव

पुणे :  आज धर्मावर बोलणारे खूप लोक आहेत, परंतु धर्मावर केवळ बोलून भागणार नाही तर धर्मामध्ये सांगितलेल्या तत्त्वानुसार आपले आचरणही ठेवले पाहिजे. केवळ धर्मावर बोलणाऱ्यांच्या मागे न जाता धर्मानुसार स्वतःचे आचरण असणाऱ्या व्यक्तींच्या मागे जर समाज उभा राहिला तर समाजाची खऱ्या अर्थाने प्रगती होते, असे मत  गुरुनाथ बाबा औसेकर महाराज यांनी व्यक्त केले. 

श्री जंगली महाराज देवस्थान ट्रस्ट, पुणेच्या वतीने आयोजित सद्गुरु श्री जंगली महाराज यांच्या १३४ व्या पुण्यतिथी उत्सवात गुरुनाथ बाबा औसेकर महाराज यांचे ‘धर्मोपदेशक जगद्गुरु संत तुकाराम महाराज’ या विषयावर व्याख्यान आयोजित करण्यात आले होते. 

गुरुबाबा औसेकर महाराज म्हणाले,धर्मावर आधारित जर समाजाचा पाया असेल तर निश्चितच असा समाज जगाला दिशा दाखवू शकतो आणि हेच संत तुकाराम महाराज यांनी आम्ही वैकुंठवासी आलो याची कारणासी असे म्हणत सोळाव्या शतकामध्ये काम केले. त्यांच्या विचारांचे  आपण जर आचरण केले तर केवळ आपलीच  नव्हे तर समाजाची प्रगती होऊ शकेल.  
दुष्काळामुळे होरपळलेल्या तसेच सामाजिक परिस्थितीने रंजलेल्या आणि धार्मिक गोंधळामुळे गांजलेल्या समाजाला जगद्गुरु संत तुकाराम महाराज यांनी सोळाव्या शतकामध्ये जागे करण्याचे काम केले. समृद्ध आणि सुदृढ समाज निर्माण करण्यामध्ये संत तुकाराम महाराजांचे कार्य मोठे आहे

पुणे- काँग्रेसचे माजी आमदार मोहन जोशी यांनी मुरलीधर मोहोळ यांनी आचारसंहिता भंग केल्याबद्दलची तक्रार निवडणूक आयोगाकें केली. रामनवमी च्या दिवशी आपल्या वतीने पुणेकरांना शुभेच्छा देताना मोहोळ यांनी वृत्तपत्रांतून पाठविलेल्या पत्रकात राम मूर्तीला वंदन करणारे नरेंद्र मोदी आणि खाली मोहोळ यांचा फोटो कमळ चिन्ह आणि ते भाजपचे उमेदवार असल्याचे त्यावर स्पष्ट लिहिलेले होते . यावर आक्षेप घेऊन रामाच्या नावाचा उपयोग निवडणूक प्रचारात करता येणार नाही यावरून हल्लकल्लोळ मजला होता त्यावरून मोहन जोशी यांनी आयोगाकडे तक्रार केली. याप्रकरणी माजी आमदार मोहन जोशी व काँग्रेसचे सोशल मीडिया राज्य समन्वयक चैतन्य पुरंदरे यांनी सांगितले की, ” राम मंदिराला निवडणुक प्रचाराचा मुद्दा बनवून याद्वारे धार्मिक प्रलोभन दाखवून मोहोळ यांनी मतदारांवर प्रभाव टाकण्याचा प्रयत्न केला आहे.” त्यावर आज मोहोळ यांनी आपली प्रति प्रतिक्रिया व्यक्त केली आहे.

काँग्रेसच्या तक्रारीवर मुरलीधर मोहोळ –

• काँग्रेसचा प्रभू श्रीराम द्वेष पुन्हा अधोरेखित झाला
• काँग्रेसचं खरं रुप या तक्रारीमुळे पुणेकरांसमोर आलं
• काँग्रेसने कायम प्रभू श्रीरामाला विरोध केलाय
• अशा हजार तक्रारी करा