काळेवाडी, दि. 19 एप्रिल – पुण्याहून नवी मुंबई येथे होत असलेल्या नवीन आंतरराष्ट्रीय विमानतळापर्यंत अवघ्या एक तासात पोहोचता येईल, असे नियोजन करण्यात येत आहे, अशी माहिती मावळ लोकसभा मतदारसंघातील शिवसेना- भाजप- राष्ट्रवादी- मनसे- आरपीआय- रासप- मित्रपक्ष महायुतीचे उमेदवार खासदार श्रीरंग बारणे यांनी दिली.

खासदार बारणे यांनी गुरुवारी वाकड व पिंपळे निलख भागातील प्रमुख पदाधिकारी व मान्यवरांच्या गाठीभेटी घेतल्या. थेरगाव येथील स्वीस काऊंटी व काळेवाडी येथील सोनिगरा विहार या दोन मोठ्या सोसायट्यांना भेट देऊन मतदारांशी संवाद साधला.
काळेवाडी येथील सोनिगरा विहार सोसायटीत प्रीतम पांडे यांनी पुण्यासाठी नवीन विमानतळाच्या विषयाबाबत छेडले असता, खासदार बारणे यांनी वरील उत्तर दिले. त्यावेळी सोनिगरा विहार सोसायटी फेडरेशनचे अध्यक्ष चंद्रशेखर देवरे तसेच अन्य पदाधिकारी व सभासद मोठ्या संख्येने उपस्थित होते.

खासदार बारणे म्हणाले की, मावळ लोकसभा मतदारसंघांमध्ये नवी मुंबई, पनवेल येथे नवीन आंतरराष्ट्रीय विमानतळ होत आहे. पुण्यातून या विमानतळापर्यंत अवघ्या एक तासात पोहोचणे शक्य होईल, असे नियोजन करण्यात येत आहे. पुणे- लोणावळा लोहमार्गाचे चौपदरीकरण होत आहे. त्याच्या खर्चास नुकतीच मंजुरी मिळाली आहे. कर्जत- पनवेल लोहमार्गाचे काम सुरू आहे. कर्जत- लोणावळा लोहमार्गासाठी डीपीआर बनविण्याचे काम सध्या सुरू आहे. लोहमार्गाची ही कामे पूर्ण झाल्यानंतर पुणे ते पनवेल सुपरफास्ट एक्सप्रेस सुरू करण्यात येईल. पनवेल ते विमानतळापर्यंत मेट्रो सेवा सुरू होत आहे. त्यामुळे पुण्यातून नवीन विमानतळापर्यंत अवघ्या एक तासात पोहोचणे शक्य होईल.

स्वीस काऊंटी सोसायटीमध्ये अध्यक्ष डॉ. जयंत बाहेती, कमलेश मुथा, अशोक झिलपेलवार, माजी नगरसेवक कैलास बारणे, संतोष माऊली बारणे आदींनी खासदार बारणे यांचे स्वागत केले. गेल्या दहा वर्षात केलेल्या विविध विकास कामांची माहिती यावेळी बारणे यांनी दिली.

वाकड परिसरात भेटीगाठी

खासदार बारणे यांनी सकाळच्या सत्रात वाकड परिसरातील मान्यवरांच्या गाठीभेटी घेतल्या. त्यांच्यासमवेत शिवसेना शहर प्रमुख निलेश तरस तसेच तानाजी बारणे, नितीन कान्हेरे, अथर्व खोल्लम, भरत कस्पटे आदी पदाधिकारी होते. मोहनशेठ विनोदे, भरत आल्हाट, विक्रम विनोदे, गंगाधर विनोदे, राहुल विनोदे, शांताराम विनोदे, कन्हैयालाल भूमकर, नारायणराव भिकू विनोदे, मोहन भूमकर, राजाभाऊ भुजबळ, रामभाऊ वाकडकर, श्याम वाकडकर, अमोल अरुण कस्पटे, सागर कस्पटे, श्री कलाटे, सुरेश एकनाथ कलाटे, किरण कलाटे, सूरज भुजबळ, विजयशेठ बाफना, रणजीत आबा कलाटे, बजरंग कलाटे, बाळासाहेब तथा तुकाराम विनोदे, भारती विनोदे आदींच्या निवासस्थानी खासदार बारणे यांनी भेट देऊन त्यांना सहकार्याचे आवाहन केले. सर्वांनी त्यांचे स्वागत व सत्कार करून त्यांना शुभेच्छा दिल्या.

पिंपळे निलख येथे हरिनाम सप्ताहास भेट

खासदार बारणे यांनी पिंपळे निलख येथे भारतीय खाद्य महामंडळ (एफसीआय) सदस्य अनिल संचेती यांच्या कार्यालयास भेट दिली. त्यावेळी भुलेश्वर नांदगुडे पाटील, काळूराम नांदगुडे पाटील, वसंत लुणावत, संजय पटेल, अनंतराव दौंडकर, वसंतराव आम्रे, अनंत कुंभार नागेश जाधव, सचिन पवार, प्रभाकर नीलकंठी, चेतन जाधव आदी उपस्थित होते.

माजी नगरसेविका आरती चोंधे व संकेत चोंधे, दिलीप बालवडकर, नितीन इंगवले, निखिल दळवी, संजय दळवी, निरंजन दळवी, नितीन दळवी, प्रतीक दळवी, प्रदीप दळवी, माऊली साठे, हरिभाऊ साठे, सचिन साठे, मिलिंद साठे, काळूराम नांदगुडे, अनिल कामठे, विक्रम कामठे, सागर कामठे, पांडुरंग इंगवले, विनायक इंगवले यांच्या निवासस्थानी सदिच्छा भेट दिली. सर्वांनी बारणे यांचे उस्फूर्त स्वागत करून त्यांना निवडणुकीसाठी शुभेच्छा दिल्या. पिंपळे निलख येथे सुरू असलेल्या हरिनाम सप्ताहास देखील खासदार बारणे यांनी भेट देऊन आशीर्वाद घेतले.

पुनावळे, दि. 19 एप्रिल – देहूरोड, किवळे, रावेत, पुनावळे, ताथवडे, वाकड या भागातील वाहतूक कोंडीचा प्रश्न सोडवण्यासाठी देहूरोड-कात्रज बाह्यवळण रस्त्यावर देहूरोड ते बालेवाडी असा तब्बल साडेआठ किलोमीटर लांबीचा उड्डाणपूल उभारण्याचे नियोजन करण्यात आले आहे, अशी माहिती मावळ लोकसभा मतदारसंघातील शिवसेना-भाजप-राष्ट्रवादी-मनसे आरपीआय- रासप मित्रपक्ष महायुतीचे उमेदवार खासदार श्रीरंग बारणे यांनी दिली.

खासदार बारणे यांनी आज (शुक्रवारी) सकाळच्या सत्रात पुनावळे भागातील प्रमुख पदाधिकारी व मान्यवरांच्या भेटीगाठी घेतल्या. माजी नगरसेवक चेतन हुशार भुजबळ यांच्या निवासस्थानी झालेल्या बैठकीत बोलताना बारणे यांनी वरील माहिती दिली. त्यावेळी चिंचवडच्या आमदार अश्विनी जगताप, माजी नगरसेवक शेखर ओव्हाळ‌ तसेच हुशार भुजबळ, हिरामण भुजबळ, संतोष दर्शले, शरद दर्शले, अतुल ढवळे, हेमंत कोयते, राजेश दर्शले, शंकर नाना गायकवाड, अतुल काटे, दीपक मोढवे पाटील, रेश्मा भुजबळ आदी उपस्थित होते.

खासदार बारणे म्हणाले की, किवळे, रावेत, पुनावळे, ताथवडे, वाकड हा परिसर झपाट्याने विकसित होत आहे. या भागातील दररोजच्या वाहतूक कोंडीमुळे परिसरातील रहिवासी हैराण झाले आहेत. हा प्रश्न सोडवण्यासाठी देहूरोड-कात्रज बाह्यवळण रस्त्यावर देहूरोड ते बालेवाडी असा साडेआठ किलोमीटर लांबीचा उड्डाणपूल उभारण्याचा निर्णय केंद्रीय रस्ते विकास मंत्री नितीन गडकरी यांनी घेतला आहे. त्यासाठी 6,600 कोटी रुपये खर्चाला मंजुरी देण्यात आली आहे. भूसंपादनासाठी स्थानिक शेतकऱ्यांचे सहकार्य मिळाल्यानंतर या उड्डाणपुलाचे काम सुरू होऊ शकेल. थेट जाणारी वाहतूक उड्डाण पुलावरून गेल्यामुळे स्थानिक वाहतुकीचा प्रश्न बऱ्यापैकी मार्गी लागेल.

निगडी ते वाकड या नियोजित मेट्रो मार्गावर पुनावळे हे स्टेशन असणार आहे. त्यामुळे या भागातील विकासाला अधिक गती मिळेल, असे बारणे यांनी सांगितले. शहराची 2040 पर्यंतची पिण्याच्या पाण्याची गरज लक्षात घेऊन नियोजन करण्यात आले आहे, अशी माहितीही बारणे यांनी यावेळी दिली. पुनावळे कचरा डेपो रद्द करण्याबाबत आपण सातत्याने पाठपुरावा केला होता, याकडेही बारणे यांनी लक्ष वेधले.

आमदार अश्विनी जगताप यांनी बारणे यांना शुभेच्छा दिल्या. उमेदवाराचे चिन्ह हे श्रीरामाचे धनुष्यबाण आहे. अयोध्येत श्रीराम जन्मभूमी मंदिराच्या उभारणी करून पंतप्रधान नरेंद्र मोदी यांनी सोडलेला हा बाण आहे. त्यामुळे बारणे यांचा विक्रमी विजय निश्चित आहे.

चिंचवड विधानसभा मतदारसंघातील प्रश्न सोडवताना मुख्यमंत्री एकनाथ शिंदे, उपमुख्यमंत्री देवेंद्र फडणवीस व खासदार बारणे यांचे नेहमी सहकार्य मिळते, याचा त्यांनी आवर्जून उल्लेख केला. आत्ता आम्ही बारणे यांचा प्रचार करीत असलो तरी तीन महिन्यांनी विधानसभा निवडणूक आहे. तेव्हा तेही आम्हाला मदत करतील, असे आमदार जगताप म्हणाल्या.

श्री काळभैरवनाथ व श्रीरामाचे दर्शन

पुनावळे येथील ग्रामदैवत श्री काळभैरवनाथ मंदिर तसेच श्रीराम मंदिरात जाऊन खासदार बारणे व आमदार जगताप यांनी दर्शन घेतले. त्यानंतर शेखर ओव्हाळ, संतोष दर्शले, रेखा दर्शले, कुंदा दर्शले, रवींद्र साहेबराव ताजणे, रामदास काटे, आतिश काटे, पांडुरंग काटे, राजाराम काटे, शुभम काटे, सचिन काटे यांच्या निवासस्थानी खासदार बारणे यांनी सदिच्छा भेट दिली.

रावेत येथे माजी नगरसेवक मोरेश्वर भोंडवे यांच्या ‌निवासस्थानी देखील त्यांनी भेट दिली. त्यावेळी माजी नगरसेवक तुकाराम भोंडवे उपस्थित होते. सर्व ठिकाणी औक्षण करून बारणे यांना निवडणुकीसाठी शुभेच्छा देण्यात आल्या.

भाजपा चे प्रदेश उपाध्यक्ष माधव भंडारी यांचा टोला

पुणे अयोध्या येथील मंदिरात बाल रामचंद्राची मूर्ती आहे. याची माहिती न घेताच प्रभू श्री रामचंद्राच्या मंदिरात सीतामाईंची मूर्ती का नाही याची चौकशी नास्तिक म्हणवणार्‍या पवार साहेबांनी करू नये. त्यांनी आपल्या शेताच्या बांधातच बोलावे, देव, धर्म, देऊळ या त्यांच्या प्रांतात नसलेल्या बांधात घुसखोरी करू नये, असा टोला भाजपाचे प्रदेश उपाध्यक्ष श्री . माधव भांडारी यांनी शुक्रवारी लगावला.

ज्येष्ठ नेते शरद पवार यांनी अयोध्येतील मंदिरात सीतेची मूर्ती का नाही, असा सवाल अलिकडेच उपस्थित केला आहे. त्यासंर्दभात भांडारी बोलत होते.

भांडारी म्हणाले की, पवार साहेबांसारख्या ज्येष्ठ नेत्याने असे विधान करण्यापूर्वी प्राथमिक माहिती घेतली असती तरी बरे झाले असते. कुटुंबातील
सुनेला बाहेरची म्हणून आपला स्त्री शक्तीबद्दलचा खरा दृष्टिकोन दाखवणार्‍या साहेबांनी ऊसाचा उतारा, द्राक्षाची छाटणी, डाळींब लागवड यासारख्या त्यांच्या अभ्यासाच्या विषयांवर हवे तितके बोलावे. मात्र देव-धर्म, संस्कृती विषय त्यांच्या “सात बाऱ्या’ वर कधीच दिसला नाही. अभ्यास नसलेल्या अशा विषयांबद्दल बोलून पवार साहेबांसारख्या ज्येष्ठ नेत्याने आपल्या ‘मती’चे दिव्यदर्शन घडवू नये.

पवार साहेबांच्या कृषी क्षेत्रातील ज्ञानाबद्दल सर्वांनाच आदर आहे. त्यांनी आपल्या संबंधित क्षेत्राबाबत मत प्रदर्शन केले तर कोणाचाच आक्षेप असण्याचे कारण नाही. मात्र ते स्वत:ला नास्तिक म्हणवतात. त्यामुळे प्रभू रामचंद्राच्या मंदिरात सीतामाईची मूर्ती का नाही, याची काळजी त्यांनी करू नये, असेही ते म्हणाले.

ते पुढे म्हणाले की, पवार साहेबांना बोलण्यासाठी विषय हवा असला तर बारामती तालुक्यातील जिरायती भागाला का पाणी मिळू शकले नाही, यासारखा चांगला विषय नाही. सध्या ते बारामतीतच अडकून पडल्याने त्यांना आपल्या तालुक्यातील जिरायती भागाला का पाणी मिळू शकले नाही, याबाबतचा शोध निबंध तयार करता येईल.

छत्रपती शिवाजी महाराजांचा सातत्याने अपमान करणारा भाजपा कोणत्या तोंडाने शिवाजी महाराजांच्या नावावर मते मागतो?

खोट्या मोदी गॅरंटीवर जनतेचा विश्वास नाही, १० वर्षे जनतेच्या खिश्यावर दरोडा टाकून अदानीचे घर भरण्याचा उद्योग.

पराभव दिसू लागल्यानेच मोदींकडून राहुल गांधी, काँग्रेस व इंडिया आघाडीला बदनाम करण्याचा प्रयत्न.

मुंबई, दि. १९ एप्रिल
देश स्वतंत्र झाल्यापासून मोदी सरकार येईपर्यंत भारत देश जगाच्या पाठीवर ताठ मानेने व विकासाची विविध क्षेत्रे पादाक्रांत केलेला देश बनला होता. देशात जर नैराश्याचे वातावरण असते तर एवढी प्रगती साधलीच नसती. नरेंद्र मोदी व भाजपा हेच सतत निराशेच्या गर्तेत असल्याने त्यांना सर्वत्र निराशाच दिसते. १० वर्ष सत्ता असताना विकास कामे न केल्याने काँग्रेसला शिव्या देणे, प्रभूरामाच्या व धर्माच्या नावावर मते मागण्याचा केविलवाणा प्रयत्न मोदी करत आहेत, असे प्रत्युत्तर महाराष्ट्र काँग्रेस कमिटीचे अध्यक्ष नाना पटोले यांनी दिले आहे.

पंतप्रधान नरेंद्र मोदी यांनी वर्धा जिल्ह्यातील प्रचार सभेत केलेल्या आरोपांचा नाना पटोले यांनी खरपूस समाचार घेतला. ते पुढे म्हणाले की, काँग्रेस सरकारच्या काळात विकास कामे झाली नाहीत हा पंतप्रधान मोदींचा आरोप धादांत खोटा व केवळ राजकीय आहे. खरे पाहता काँग्रेस सरकारनेच ६० वर्ष विविध क्षेत्रात दैदिप्यमान विकास काम केली. काँग्रेस पक्षाच्या सरकारांनीच सार्वजनिक क्षेत्रातील संस्था उभारल्या. नरेंद्र मोदी यांनी १० वर्षात ज्या सरकारी संस्था विकून देश चालवला त्या काँग्रेस सरकारने स्थापन केल्या होत्या याचा मोदींना विसर पडलेला दिसतो. देशात सर्व काही २०१४ नंतरच झाले हे मोदींचे विधान गोड गैरसमज असलेल्या अंधभक्तासारखेच आहे. मोदी यांनी या सभेत राहुल गांधी, काँग्रेस पक्ष व इंडिया आघाडीवर बिनबुडाचे आरोप केले. महाराष्ट्राचे आराध्य दैवत छत्रपती शिवाजी महाराज, महात्मा फुले, शाहू महाराज, डॉ. बाबासाहेब आंबेडकर यांचा सातत्याने अपमान करणाऱ्या भारतीय जनता पक्षाला शिवाजी महारांजाचे नाव घेण्याचा अधिकार नाही. शिवाजी महाराजांचे नाव फक्त मते मागण्यासाठी केला जात आहे. अरबी समुद्रात भव्य शिवस्मारक बनवण्याच्या जलपुजनाचा कार्यक्रम डिसेंबर २०१६ मध्ये नरेंद्र मोदी यांच्या हस्ते झाला पण आजपर्यंत या शिवस्मारकाची एक विटही रचलेली नाही. निवडणुका आल्या की भाजपाला छत्रपती शिवाजी महाराज यांची आठवण येते.

नरेंद्र मोदी यांनी १० वर्षाच्या काळात जनतेच्या खिश्यावर दरोडा टाकून अदानीचे घर भरण्याचे काम केले आहे. मोदींनी फसवल्याची भावना जनतेत आहे. त्यामुळे पंतप्रधान नरेंद्र मोदी यांनी मोदी गॅरंटीवर कितीही भर दिला तरी जनता त्यावर विश्वास ठेवत नाही. मोदींची गॅरंटी खोटी असल्याचा अनुभव १० वर्षात देशातील जनतेला आलेला आहे, आता जनता खोट्या मोदी गॅरंटीवर विश्वास ठेवत नाही, असेही नाना पटोले म्हणाले.

खासदार भावना गवळी, हेमंत पाटील यांच्या उपस्थितीत वाशीम येथे आयोजित शिवसैनिकांच्या संवाद मेळाव्याला शिवसेना नेत्या डॉ. नीलम गोऱ्हे यांनी केले मार्गदर्शन

यवतमाळ दि.१९: यवतमाळ – वाशीम लोकसभा क्षेत्रामध्ये कृषी, सहकार, सिंचन, रेल्वे, रस्ते, आरोग्य यांच्यासंदर्भातील विकासात्मक कामे मोदी सरकारने पूर्ण केलेली आहेत. महिलांच्या सक्षमीकरणासाठी निर्णय घेऊन त्याची अंमलबजावणी देखील मोदी सरकारने आणि राज्यातील महायुती सरकारने केलेली आहे. पूर्वीपासूनच मतदारसंघातील जनतेने कायमच भाजपा, शिवसेनेला मोठी साथ दिली आहे. आगामी काळातील मतदारसंघाच्या विकासासाठी लोकसभेत महायुतीच्या उमेदवार राजश्री हेमंत पाटील यांना जनता भरघोस मतांनी विजयी करेल असा विश्वास शिवसेना नेत्या डॉ. नीलम गोऱ्हे यांनी व्यक्त केला.

शिवसेना मित्रपक्ष महायुतीच्या यवतमाळ – वाशिम लोकसभा मतदारसंघाच्या अधिकृत उमेदवार सौ. राजश्री हेमंत पाटील (महल्ले) यांच्या प्रचारार्थ वाशीम येथे आयोजित शिवसैनिकांचा संवाद मेळाव्यास शिवसेना नेत्या डॉ. नीलम गोऱ्हे उपस्थित होत्या. याप्रसंगी, खासदार हेमंत पाटील, खासदार भावना गवळी, शिवसेना प्रवक्ता व पश्चिम विदर्भ संपर्क प्रमुख प्रा. शिल्पा बोडखे, जिल्हा प्रमुख विजय खाजोडे, जिल्हा प्रमुख महादेव ठाकरे, महिला आघाडी संघटक वैशाली येळणे, तालुका प्रमुख माणेरा दीपक दरसडे, तालुका प्रमुख मनीष गवले, उपजिल्हा प्रमुख बाळासाहेब ठाकरे, संपर्क प्रमुख वाशिम विधानसभा हुकूम तुटके, तालुका प्रमुख वाशिम प्रकाश महल्ले, शहर प्रमुख वाशिम शाम दुरतकर यांच्यासह इतर पदाधिकारी, शिवसैनिक उपस्थित होते.

यावेळी डॉ. गोऱ्हे यांनी, राजश्री पाटील या अभ्यासू आणि उच्चशिक्षित उमेदवार असल्याने विकासाच्या नवनव्या योजना आणून त्या मतदारसंघाचा सर्वागीण विकास साधू शकतात असे सांगितले. लोकसभा निवडणुकीत आदरणीय पंतप्रधान नरेंद्र मोदी साहेब, मुख्यमंत्री एकनाथ शिंदे साहेब, उपमुख्यमंत्री देवेंद्र फडणवीस साहेब, उपमुख्यमंत्री अजित पवार साहेब यांच्या नेतृत्वाखाली महायुतीचे सर्वाधिक खासदार निश्चितपणे निवडून येतील अशी खात्री डॉ. गोऱ्हे यांनी व्यक्त केली.

मांजरी – शिरुर लोकसभा मतदारसंघात प्रचार शिगेला पोहोचला आहे. माजी खासदार शिवाजीराव आढळराव पाटील यांनी ही माझी शेवटची निवडणूक असल्याचे सांगत मतदारांना भावनिक साद घालण्याचा प्रयत्न केला. त्यावर खासदार डॉ अमोल कोल्हे यांनी सर्वसामान्य जनतेच्या जनजीवनातील सवाल उपस्थित केला आहे. ते म्हणाले की, कोणाची शेवटची निवडणूक आहे म्हणून महागाई आटोक्यात येणार आहे का? मांजरी येथील जेतवन बुद्ध विहार ट्रस्टला खासदार डॉ. अमोल कोल्हे यांनी भेट दिली यावेळी डॉ. कोल्हे यांचा यथोचित सन्मान करण्यात आला.

यावेळी बोलताना डॉ. कोल्हे म्हणाले की, आपल्या खांद्यावर मोठी जबाबदारी आहे. डॉ. बाबासाहेब आंबेडकर यांनी आपल्याला संविधान दिलं, परवा कोणीतरी म्हणलं की पाहिजे तेवढा निधी देतो, पण कचाकच बटन दाबा. पण ही लोकशाही मूल्यांची अवहेलना होत आहे. हा निधी आपल्याच पैशातून दिला जातो. असं म्हणत अजित पवार यांच्या विधानावर डॉ. अमोल कोल्हे यांनी टीकास्त्र सोडले आहे.

दरम्यान आढळराव पाटील यांनी देखील आपल्या खेडच्या प्रचार दौऱ्यात उमेदवारी अर्ज भरण्याआधीच पराभव मान्य करत त्यांनी शेवटची निवडणूक म्हणून जाहीर केलं आहे. उमेदवारी अर्ज भरण्या आधीच त्यांनी सांगून टाकलं की, त्यांची ही शेवटची निवडणूक. समोर पराभव दिसत असल्याने सहानुभूती मिळवण्यासाठी हा केविलवाणा प्रयत्न केला जात असल्याचे डॉ. कोल्हे यांनी बोलताना सांगितले. त्याचबरोबर १५ वर्षाच्या संसदीय कामगिरीच्या जोरावर निवडणूकला सामोरे जायला हवं होतं. परंतु तसं काहीच पाहायला मिळत नाही. केवळ वयक्तिक टीका आणि सहानुभूती या जोरावर निवडणूक लढवण्याचा प्रयत्न केला जातोय. याशिवाय मतदारसंघात १५ वर्षांत काहीही काम केलं नाही, कोणताही मोठा प्रकल्प आणता आला नाही. त्यामुळे माजी खासदार सपशेल फेल ठरलेले असताना असा केविलवाणा प्रयत्न करत आहेत.

सर्वसामान्य मतदार सुज्ञ झाला आहे, जर कोणी म्हणलं की ही माझी शेवटीची निवडणूक आहे, याचा अर्थ पुन्हा २०२९ ला मत मागायला येणार नसाल तर मतदारांशी बांधीलकी कशी ठेवणार ? असा प्रतिस्पर्धी उमेदवार असलेले आढळराव पाटील यांना डॉ. अमोल कोल्हे सवाल केला. ही कोणाची व्यक्तिगत निवडणूक नाही. ही कोणाची पहिली निवडणूक की, कोणाची दुसरी निवडणूक याचा मतदारांना काहीही घेणं देणं नाही. ही देशाची निवडणूक आहे, पुढील पाच वर्षे हा देश कोणाच्या हातात द्यायचा ही त्याची निवडणूक आहे.

दैनिक भास्कर या फार मोठ्या वृत्तपत्रातच्या सर्वेत ३९ जागा महाविकास आघाडीला दाखवल्या आहेत. महागाई वाढली आहे, कोणाला नोकऱ्या नाही सरकारने दिलेल्या आश्वासनाची पूर्तता केली नाही. कोणाची शेवटची निवडणूक आहे म्हणून महागाई आटोक्यात येणार आहे का.? त्यामुळे आपल्याला देशात इंडिया आघाडीचे सरकार देशात निवडून देण्याची गरज असल्याच्या भावना डॉ. अमोल कोल्हे यांनी मांजरी येथे बोलताना व्यक्त केल्या.

यावेळी त्यांच्यासोबत माजी आमदार महादेव अण्णा बाबर, प्रशांत जगताप, प्रवीण तुपे, विक्रम शेवाळे, राहुल घुले, निलेश मगर, सागर बताले, मोनिष गायकवाड, सुनील गोरे, निलमताई गायकवाड, रोहिदास लांडगे, श्री कांबळे, सोपान लगड, मेहुल कापसे यांसह अनेक पदाधिकारी, कार्यकर्ते उपस्थित होते.