भांडण लावून दिल्लीत बसून मजा बघतात
बारामती-आज येथे राष्ट्रवादीच्या शरद पवार गटाच्या खासदार सुप्रिया सुळे म्हणाल्या ,”’एकीकडे संसदरत्न देतात आणि दुसरीकडे मला निलंबित करतात. मला फाशी दिली तरी चालेल पण मी कांद्याला भाव मागत राहणार. आपल्यात भांडण लावून ते दिल्लीत बसून मजा बघतात. दिल्लीवाल्यांना नडतो कोण तर मी आणि अमोल कोल्हे. फार भानगड नाही करायची, आपण आपली तुतारी वाजवायची. सेवा, सन्मान, स्वाभिमान या ३ गोष्टी धरून मी राजकारण करते”, असे सुप्रिया सुळे म्हणाल्या.सुप्रिया सुळे यांनी आज बारामतीमध्ये प्रचाराचा नारळ फोडला. त्यांनी कन्हेरीच्या मारुती मंदिरात दर्शन घेऊन प्रचाराला सुरुवात केली. यानंतर झालेल्या सभेत सुप्रिया सुळे बोलत होत्या.
यावेळी बोलतांना त्यांनी सांगितले कि, मी नात्याचा आणि पदाचा सन्मान केला. मी बाहेरचे बघणार आणि ते सर्व इकडे लक्ष देणार हे ठरले होते, अशा शब्दांत सुप्रिया सुळे यांनी शुक्रवारी पुन्हा एकदा उपमुख्यमंत्री अजित पवार यांच्या बंडखोरीवर खंत व्यक्त केली.
त्या म्हणाल्या, ”सध्या मला काही जण म्हणाले की मी बारामतीमध्ये कमी येते. पण त्यामागेही कारण होते. असं ठरलं होतं की मी दिल्लीत असणार आणि बाकीची कामं इथले लोकं करणार. मी नात्याचा सन्मान केला, पदाचा सन्मान केला, पण आता हरी मुखे म्हणा हरी मुखे म्हणा. झालं गेलं गंगेला वाहिलं. पण आता बदल करावा लागेल. आपली वैचारिक लढाई आहे वैयक्तिक नाही”, अशा भावना सुप्रिया सुळे यांनी व्यक्त केल्या.
पुढे त्या म्हणाल्या, ”माझं काम आणि मेरिट बघून मला संधी द्या. बारामतीची निवडणूक अमेरिकापर्यंत पोहचली आहे. न्यूयॉर्क टाईमचे पत्रकार 2 दिवसांपासून बारामतीमध्ये आले आहेत. या देशाचा लोकसभेचा इलेक्शन कव्हर करायला ते आलेत आणि दोन दिवस एकाच मतदार संघात ते फिरत आहेत. तो म्हणजे बारामती लोकसभा मतदारसंघ. म्हणजे आता शरद पवारांची शरद पवारांची ताकद केवळ बारामती जिल्हा, राज्य किंवा देशापुरती मर्यादित राहिली नसून ती पार अमेरिकेपर्यंत पोचली आहे”, असे शरद पवार म्हणाले.
याशिवाय सुप्रिया सुळे यांनी विरोधकांना जोरदार प्रत्युत्तर दिले आहे. ”मी दहा वर्षांत काय केले अशी टीका माझ्यावर केली जाते. त्या सर्वांना मी पुस्तक पाठवणार आहे. यामध्ये माझ्या पाच वर्षांच्या कामांचा आराखडा आहे. सर्व विरोधकांना विनंती आहे की वेळ काढून त्यांनी हे पुस्तक वाचावे”, असा टोला सुप्रिया सुळेंनी लगावला.
