पुणे: पुणे लोकसभा मतदारसंघाचे महायुतीचे उमेदवार मुरलीधर मोहोळ यांच्या विरुद्ध काँग्रेसतर्फे आचारसंहिता भंगाची तक्रार दाखल करण्यात आली आहे. मुरलीधर मोहोळ यांनी वर्तमानपत्राच्या माध्यमातून “राम मंदिर झाले आता राष्ट्रमंदिरासाठी संकल्प करूयात” या मथळ्याखाली जाहिरात करून पंतप्रधान नरेंद्र मोदी हे अयोध्येतील राममूर्तीच्या पाया पडत आहेत असे छायाचित्र असलेली पत्रके वाटली.

याप्रकरणी माजी आमदार मोहन जोशी व काँग्रेसचे सोशल मीडिया राज्य समन्वयक चैतन्य पुरंदरे यांनी सांगितले की, ” राम मंदिराला निवडणुक प्रचाराचा मुद्दा बनवून याद्वारे धार्मिक प्रलोभन दाखवून मोहोळ यांनी मतदारांवर प्रभाव टाकण्याचा प्रयत्न केला आहे.”

आदर्श आचारसंहितेचा भंग केल्याप्रकरणी पुरंदरे यांनी मोहोळ यांच्या विरुद्ध तक्रार दाखल केली होती. त्यावर निवडणूक आयोगाच्या भरारी पथकाने पुरंदरे यांची भेट घेऊन योग्य ती कारवाई करण्याचे आश्वासन दिले.

पिंपरी, 18 एप्रिल – पिंपरी कॅम्पमधील व्यापाऱ्यांची शिखर संघटना असलेल्या पिंपरी मर्चंट फेडरेशनने मावळ लोकसभा मतदारसंघातील शिवसेना- भाजप- राष्ट्रवादी- मनसे- आरपीआय- रासप मित्रपक्ष महायुतीचे उमेदवार खासदार श्रीरंग बारणे यांना काल (बुधवारी) रात्री एका बैठकीत जाहीर पाठिंबा दिला. व्यापारी वर्गाच्या अडीअडचणींना धावून येणाऱ्या बारणे यांना विक्रमी मताधिक्य मिळेल, असा विश्वास यावेळी व्यक्त करण्यात आला.

पिंपरी कॅम्प येथील उबाडो पंचायत ट्रस्टच्या बी. टी. अडवाणी सभागृहात झालेल्या या बैठकीस खासदार बारणे, पिंपरी मर्चंट फेडरेशनचे अध्यक्ष श्रीचंद आसवानी, उबाडो पंचायत ट्रस्टचे अध्यक्ष ‌ओमप्रकाश तथा बाबू आडवाणी तसेच हरेश बोधानी, अनिल आसवानी, श्याम मेघरानी, इंदरशेठ बजाज, सुशील बजाज यांच्यासह व्यापारी बांधव मोठ्या संख्येने उपस्थित होते.

श्रीचंद आसवानी म्हणाले की, खासदार बारणे हे पिंपरी कॅम्प मधील व्यापाऱ्यांच्या पाठीशी सदैव उभे असतात. सुख-दुःखात ते साथ देतात. कोविड काळात त्यांनी व्यापाऱ्यांना खूप मदत केली. पिंपरी कॅम्पातील माथाडी कामगारांचा प्रश्न त्यांनी सोडवला.‌ व्यापाऱ्यांच्या अडीअडचणींत ते सदैव पाठीशी असतात.‌ त्यामुळे या निवडणुकीतही बारणे यांनाच पाठिंबा देण्याचा निर्णय व्यापारी बांधवांनी घेतला आहे.

पिंपरी कॅम्पला गावठाणाचा दर्जा देण्याबाबत मुख्यमंत्री एकनाथ शिंदे यांच्याशी चर्चा झाली असून निवडणूक झाल्यानंतर त्याबाबत लवकरच निर्णय घेतला जाईल, असे खासदार बारणे यांनी सांगितले. सिंधी बांधवांना निर्वासित सनद देण्याचा विषय लवकरच मार्गी लागेल, असेही त्यांनी स्पष्ट केले.

पिंपरी कॅम्पातील व्यापारी प्रामाणिकपणे व कष्टाने काम करतात. त्यांच्यावर अन्याय होत असेल तर एका फोनवर मी काम करतो. माझा कोणालाही त्रास नसतो, असे बारणे म्हणाले. चुकीचे काम आपण कधी केले नाही आणि चुकीच्या कामाला कधी पाठीशी घातले नाही, याकडेही त्यांनी लक्ष वेधले. पंतप्रधान नरेंद्र मोदी यांचे सक्षम नेतृत्व आणि आपण केलेले काम, सातत्याने ठेवलेला संपर्क या आधारे आपण मते मागत आहोत, असे बारणे म्हणाले.

पिंपरी कॅम्प मधील विविध व्यापारी संघटनांच्या वतीने बारणे यांचे स्वागत व सत्कार करण्यात आला. सुशील बजाज यांनी सूत्रसंचालन केले.

भाजपा मनसे पदाधिकाऱ्यांची प्रचार नियोजन बैठक संपन्न

पुणे-राजब ठाकरे यांच्या आदेशानुसार मनसे चे सर्व पदाधिकारी व कार्यकर्ते महायुतीचे लोकसभेचे उमेदवार मुरलीधर मोहोळ यांच्या प्रचारासाठी जीवाचे रान करतील व त्यांचे मताधिक्य वाढवे यासाठी सर्वतोपरी प्रयत्न करतील अशी ग्वाही मनसे चे नेते आणि पुणे लोकसभा प्रभारी राजेंद्र वागस्कर व मनसे शहराध्यक्ष साईनाथ बाबर यांनी दिली.
प्रचाराचे नियोजन करण्यासाठी भाजपा आणि मनसे च्या प्रमुखांच्या बैठकीचे आयोजन करण्यात आले होते यावेळी ते बोलत होते. यावेळी भाजपा चे शहराध्यक्ष धीरज घाटे, प्रदेश उपाध्यक्ष व लोकसभा संयोजक राजेश पांडे,लोकसभा प्रभारी श्रीनाथ भीमाले,महायुतीचे समन्वयक व प्रदेश प्रवक्ता संदीप खर्डेकर,पुणे शहर सरचिटणीस राजेंद्र शिळमकर, रवींद्र साळेगावकर, युवा मोर्चा प्रदेश सरचिटणीस सुशील मेंगडे उपस्थित होते तर मनसे च्या वतीने नेते राजेंद्र वागस्कर, शहर अध्यक्ष साईनाथ बाबर प्रदेश सरचिटणीस बाळा शेडगे,प्रदेश सरचिटणीस गणेश सातपुते, प्रदेश सरचिटणीस रणजित शिरोळे , योगेश खैरे प्रवक्ते मनसे इ पदाधिकारी उपस्थित होते.
मनसे ने महायुतीला आणि पंतप्रधान नरेंद्र मोदींना पाठिंबा दिल्याने निश्चितच आमची ताकद वाढली असून मुरलीधर मोहोळ हे मताधिक्याचा विक्रम करतील असा विश्वास वाटतो असे भाजपा शहराध्यक्ष धीरज घाटे म्हणाले. मनसे चे कार्यकर्ते दैनंदिन प्रचारात तर सहभागी होतीलच पण स्वतंत्रपणे शहर पातळीवर आणि विधानसभा निहाय मेळावे आयोजित करण्यात येतील असेही या बैठकीत ठरविण्यात आले.
मनसे च्या सर्व पदाधिकारी व कार्यकर्त्यांशी योग्य समन्वय राखला जाईल व प्रचाराच्या नियोजनात मनसे चा सहभाग असेल असे महायुती चे समन्वयक संदीप खर्डेकर यांनी स्पष्ट केले.

पुणे, दि. १८: जिल्ह्यातील ३५- बारामती लोकसभा मतदार संघाच्या निवडणुकीसाठी भारत निवडणूक आयोगाकडून निवडणूक निरीक्षक आणि निवडणूक खर्च निरीक्षकाची नियुक्ती करण्यात आली असल्याची माहिती बारामती लोकसभा मतदारसंघाच्या निवडणूक निर्णय अधिकारी कविता द्विवेदी यांनी दिली आहे.

निवडणूक निरीक्षक म्हणून श्रीमती आनंधी पालानीस्वामी यांची नियुक्ती करण्यात आली असून त्यांचा निवासाचा पत्ता व्हीव्हीआयपी विश्रामगृह येथील कक्ष क्रमांक ए-१०१ असा असून त्यांचा संपर्क क्रमांक ८९९९१५७६०९ असा आहे. तसेच निवडणूक निरीक्षक यांचे संपर्क अधिकारी दिगंबर हौसारे असून त्यांचा संपर्क क्रमांक ९३७०९०८२६२ असा आहे.

निवडणूक खर्च निरीक्षक म्हणून विजय कुमार यांची नियुक्ती करण्यात आली असून त्यांचा निवासाचा पत्ता व्हीव्हीआयपी विश्रामगृह येथील कक्ष क्रमांक ए-२०५ असा आहे. त्यांचा संपर्क क्रमांक ९५२९१४८६१९ असा आहे. तसेच निवडणूक खर्च निरीक्षक यांचे संपर्क अधिकारी गणेश सस्ते असून त्यांचा संपर्क क्रमांक ९८९०९४९५८७ असा आहे.

निवडणूक निरीक्षक बारामती लोकसभा मतदारसंघ यांना व्हीव्हीआयपी विश्रामगृह, पुणे येथे भेटण्याची वेळ दुपारी ३.३० वाजेपासून ते सायं. ५.३० वाजेपर्यंत आहे याची नागरिकांनी नोंद घ्यावी, असेही बारामती लोकसभा मतदारसंघाच्या कार्यालयातून कळविण्यात आले आहे.
0000

डॉ. रघुनाथ माशेलकर यांचे प्रतिपादन; ‘२०४७ च्या भारतासाठी धोरणात्मक, वैज्ञानिक कृती’वर व्याख्यानजयंत सहस्रबुद्धे यांच्या जयंतीनिमित्त ‘जयंतस्मृति’मध्ये व्याख्यान व सुरेश नाईक लिखित पुस्तकाचे प्रकाशन 
पुणे : “भ्रष्टाचारमुक्त भारत हाच खऱ्या अर्थाने २०४७ मधील विकसित भारत असेल. तेव्हा ‘भारत’ आणि ‘इंडिया’, असा फरक नसेल. भारताने आधी भ्रष्टाचारमुक्त व्हावे, तरच विकसित भारत अर्थपूर्ण ठरेल”, असे प्रतिपादन ज्येष्ठ शास्त्रज्ञ पद्मविभूषण डॉ. रघुनाथ माशेलकर यांनी केले. सुशासन, लोकशाही मूल्यांची जपणूक, सुरक्षेची ग्वाही असेल, तेव्हाच भारत ‘लॅंड ऑफ आयडियाज’ पुरता मर्यादित न राहता ‘लॅंड ऑफ  अपॉर्च्युनिटीज’ बनेल, असेही डॉ. माशेलकर यांनी नमूद केले.
विज्ञान भारतीचे माजी राष्ट्रीय संघटन सचिव स्वर्गीय जयंत सहस्रबुद्धे यांच्या जन्मदिनानिमित्त ‘जयंतस्मृति’ व्याख्यान व पुस्तक प्रकाशनाचे आयोजन करण्यात आले होते. महाराष्ट्र एज्युकेशन सोसायटी, विवेक प्रकाशन आणि विज्ञान भारती पश्चिम महाराष्ट्र प्रांत यांच्या संयुक्त विद्यमाने मयूर कॉलनीतील एमईएस सभागृहात आयोजित कार्यक्रमात डॉ. रघुनाथ माशेलकर यांचे ‘२०४७ च्या भारतासाठी धोरणात्मक आणि वैज्ञानिक कृती’ यावर विशेष व्याख्यान झाले. तसेच यावेळी पश्चिम महाराष्ट्र विज्ञान भारतीचे माजी अध्यक्ष आणि इस्रोचे माजी समूह संचालक डॉ. सुरेश नाईक लिखित विवेक प्रकाशन प्रकाशित ‘इस्रोची विस्मयजनक अवकाशयात्रा’ या वैज्ञानिक पुस्तकाचे प्रकाशनही झाले.
ज्येष्ठ संगणकतज्ज्ञ डॉ. विजय भटकर यांची विशेष उपस्थिती कार्यक्रमाला होती. तसेच एमईएस नियामक मंडळ उपाध्यक्ष आनंदी पाटील, विज्ञान भारती पश्चिम महाराष्ट्रचे अध्यक्ष डॉ. योगेश शौचे, राष्ट्रीय स्वयंसेवक संघाचे महानगर संघचालक रवींद्र वंजारवाडकर, विवेक प्रकाशनाचे सहकार्यकारी संपादक दीपक जेवणे उपस्थित होते. कार्यक्रमाच्या अध्यक्षस्थानी एअरमार्शल भूषण गोखले (निवृत्त) होते. यावेळी इंटर्नशिप पोस्टरचे विमोचनही झाले. पोस्टरविषयी डॉ. नंदिनी कोठारकर यांनी माहिती दिली. तसेच मान्यवरांच्या हस्ते विद्यार्थी विज्ञान मंथन परीक्षेमध्ये पुणे जिल्ह्यातील विजेत्या विद्यार्थ्यांचा कौतुक सोहळा झाला.

डॉ. माशेलकर यांनी विज्ञान आणि तंत्रज्ञान क्षेत्रातील अनेकानेक उदाहरणे देत विकसित भारताची प्रतिमा श्रोत्यांसमोर उभी केली. ते म्हणाले, ‘तंत्रज्ञानाच्या योग्य वापरातून आपण उत्पन्नाच्या पातळीवरील असमानता दूर करू शकतो. आपल्या युवा पिढीने समाजातील तळागाळाच्या हिताचे तंत्रज्ञान विकसित करण्यासाठी पुढाकार घेतला पाहिजे. आपण धर्म, जात, भाषा, वंशाच्या नावावर विभाजित होत असल्याचे चित्र आहे. पण आपण प्रत्येकाने जातीमुक्त भारताचे स्वप्न पाहिले पाहिजे. स्वातंत्र्याच्या शताब्दीवर्षांतला भारत हा सुसंस्कृत, सुशिक्षित, सुरक्षित, समृद्ध आणि स्वानंदी असावा, असे मला वाटते’.

डॉ. भटकर यांनी जयंतराव सहस्रबुद्धे यांच्या आठवणींना उजाळा दिला. ‘जयंतराव सर्वसामान्यांच्या सेवेसाठी समर्पित होते. त्यांची विज्ञानाकडे पाहण्याची दृष्टी निराळी होती. त्यांचे समाजासाठीचे योगदान अविस्मरणीय होते, त्यांनी दिलेली दृष्टी आणि दिशा पकडून आपण काम केले पाहिजे’, असे भटकर म्हणाले.
भूषण गोखले यांनी अध्यक्षीय समारोपात जयंतरावांचे स्मरण केले. डॉ. मानसी माळगावकर यांनी ऋणनिर्देश केला. डॉ. सुनील कुलकर्णी यांनी सूत्रसंचालन केले. डॉ. कीर्ती बडवे यांनी परिचय करून दिला. डॉ. योगेश शौचे यांच्या हस्ते उपस्थितांचा सत्कार करण्यात आला. डॉ. कौस्तुभ साखऱे यांनी जयंतराव सहस्रबुद्धे यांच्याविषयी मनोगत व्यक्त केले.

संशोधनासाठी मोठी गुंतवणूक गरजेची
विकासाच्या प्रक्रियेत देशातील विविध क्षेत्रातील संशोधनाचा महत्त्वाचा वाटा असतो. मात्र, आपल्याकडे अत्यल्प निधी संशोधनासाठी दिला जातो. आपल्या जीडीपीच्या दोन टक्के निधी आपण संशोधनासाठी दिला पाहिजे. त्यामुळे संशोधनातील गुंतवणूक वाढली पाहिजे आणि त्यासाठी सरकारप्रमाणेच उद्योगपतींनी योगदान दिले पाहिजे. विकसित होण्यासाठी संशोधन आणि वैज्ञानिक दृष्टिकोन आवश्यक आहे, असे डॉ. माशेलकर म्हणाले.

वीजपुरवठ्यातील व्यत्यय टाळण्यासाठी तांत्रिक कामे सुरू

पुणे, दि. १८ एप्रिल २०२४: यंदाच्या उन्हाळ्यातील उष्णतेची प्रचंड लाट सध्या सुरू असल्याने विजेच्या मागणीमध्ये मोठी वाढ झाली आहे. सोबतच वादळी पाऊस व गारपिटीचा तडाखा बसत आहे. या परिस्थितीत वीजपुरवठा सुरळीत ठेवण्यासाठी गुरूवारी (दि. १८) महावितरण व महापारेषणच्या पुणे परिमंडलातील वरिष्ठ अधिकाऱ्यांची समन्वय बैठक झाली. तीत प्रामुख्याने लोणीकंद ४०० केव्ही, एनसीएल २२० केव्ही अतिउच्चदाब उपकेंद्रावरील वीजभार विभाजित करून तो अन्यत्र वळवणे तसेच पारेषणच्या काही उपकेंद्रातून २२ केव्हीच्या नवीन वितरण वीजवाहिन्यांसाठी उपाययोजना आदी तांत्रिक कामांचे निर्णय घेण्यात आले व त्यासंदर्भात युद्धपातळीवर कामेही सुरू करण्यात आली.

रास्तापेठ येथील ‘प्रकाशदूत’ सभागृहात झालेल्या या बैठकीमध्ये मुख्य अभियंता श्री. राजेंद्र पवार (महावितरण) व श्री. अनिल कोलप (महापारेषण) यांची प्रमुख उपस्थिती होती. यावेळी पुणे परिमंडलातील सर्वच १२ विभागनिहाय पारेषण व वितरण यंत्रणेचा आढावा घेण्यात आला व त्यानुसार तांत्रिक उपाययोजनांचे निर्णय घेत भारव्यवस्थापनेतून वीजपुरवठा सुरळीत ठेवण्यासाठी विभागपातळीवर २४x७ समन्वय ठेवण्याचे निर्देश कार्यकारी अभियंत्यांना देण्यात आले.

पुणे परिमंडलामध्ये सुमारे ३१०० मेगावॅट विजेची मागणी आहे. परंतु गेल्या दोन-तीन दिवसांपासून उष्णतेची प्रचंड लाट आली आहे. पर्यायाने विजेच्या मागणीत मोठी वाढ झाली आहे. त्यामुळे महापारेषणच्या काही अतिउच्चदाबाचे उपकेंद्र व वीजवाहिन्यांवर ताण येत आहे. पारेषण यंत्रणेतील संभाव्य धोके व बिघाड टाळण्यासाठी स्वयंचलित भारव्यवस्थापन यंत्रणा म्हणजेच ‘एलटीएस’ (Load Trimming Scheme) यंत्रणा कार्यान्वित होत असल्यामुळे नाईलाजाने काही ठिकाणी वीजपुरवठा बंद ठेवावा लागत आहे. यासोबतच अवकाळी वादळी पाऊस व गारपिट यामुळेही पारेषण व वितरण यंत्रणेवर परिणाम होत आहे.

या पार्श्वभूमिवर पुणे परिमंडलातील वीजपुरवठा सुरळीत ठेवण्यासाठी महापारेषणच्या लोणीकंद ४०० केव्ही उपकेंद्रातील काठापूर व आळेफाटा २२ केव्ही वीजवाहिन्यांचा भार हा बाभळेश्वर ४०० केव्ही उपकेंद्रावर देण्याचा निर्णय झाला. शुक्रवारी (दि. १९) रात्री उशिरा हे काम पूर्ण होईल. या उपायामुळे लोणीकंदवरील वीजभार कमी झाल्यामुळे मंचर विभागातील प्रामुख्याने शेतीपंपांसह इतर सर्व ग्राहकांना सुरळीत वीज उपलब्ध होईल. तसेच चाकण व तळेगाव अतिउच्चदाब वीजवाहिन्यांना फायदा होणार आहे. तसेच गणेशखिंड येथील एनसीएल १३२ केव्ही उपकेंद्रातील काही वीजभार फ्लॅगशिप २२० केव्ही उपकेंद्राकडे वळविण्यात येत आहे. यासोबतच राजगुरुनगर विभागातील तळेगाव, कामशेत, पवना येथील वीजवाहिन्यांना खोपोलीवरून वीजपुरवठा करण्यात येणार आहे.

या बैठकीमध्ये महापारेषणच्या विविध उपकेंद्रांमध्ये महावितरणच्या नवीन २२ केव्ही वीजवाहिन्या कार्यान्वित करण्यासाठी तांत्रिक उपाययोजना करणे आणि पर्यायाने अस्तित्वात असलेल्या वीजवाहिन्यांवरील भार कमी करणे याबाबतचे नियोजन प्रस्तावित करण्यात आले. त्यासाठी युद्धपातळीवर कामे सुरू करण्याचे निर्देश मुख्य अभियंता श्री. राजेंद्र पवार व श्री. अनिल कोलप यांनी दिले. यावेळी महापारेषण व महावितरणचे अधीक्षक अभियंता श्री. अरविंद बुलबुले, युवराज जरग, विठ्ठल भूजबळ, जयंत कुलकर्णी, अमित कुलकर्णी तसेच कार्यकारी अभियंत्यांची उपस्थिती होती.

तब्बल २५ हून अधिक कलाकारांचे सलग ९ तास सादरीकरण
पुणे : गीतरामायणाचा सांगितिक आणि सांस्कृतिक वारसा जपण्याचा प्रयत्न आजही अनेकजण करत आहेत. त्यामुळे हटके म्युझिक ग्रुपच्या वतीने देखील पुण्यात एक अनोखा प्रयोग होत आहे. एकाच व्यासपीठावर एकाच दिवशी गीत रामायणातील ५६ गीतांचे तब्बल २५ हून अधिक कलाकार सलग ९ तास सादरीकरण करणार आहेत. सदाशिव पेठेतील रेणुका स्वरूप शाळेमागील म. ए. सो भावे प्राथमिक शाळेच्या सभागृहात शनिवार, दिनांक २० एप्रिल रोजी सकाळी ९ ते सायंकाळी ६ या वेळेत ‘ संपूर्ण दिवस गीतरामायणाचा’ हा कार्यक्रम होणार असून सर्वांसाठी विनामूल्य खुला आहे, अशी माहिती हटके म्युझिक ग्रुपचे संस्थापक शिरीष कुलकर्णी यांनी पत्रकार परिषदेत दिली.

पत्रकार परिषदेला माधव धायगुडे, सुमेधा कुलकर्णी आदी उपस्थित होते.

शिरीष कुलकर्णी म्हणाले, आधुनिक वाल्मिकी ग. दि. माडगूळकर आणि गानश्रेष्ठ बाबूजी उर्फ सुधीर फडके यांची अजरामर कलाकृती म्हणजे गीतरामायण. त्यामुळे गीत रामायणाचा वसा जपण्यासाठी हा अनोखा कार्यक्रम करण्यात येत आहे. सुरुवातीपासूनच हटके ग्रुपला प्रत्येक वेळी काहीतरी वेगळे व नावीन्यपूर्ण करण्याची इच्छा होती. त्यानुसार या कार्यक्रमाचे नियोजन करण्यात आले आहे.

माधव धायगुडे म्हणाले, कार्यक्रम चार सत्रांमध्ये होणार असून सकाळी ९ वाजता उद्घाटन होणार आहे. यावेळी गदिमा यांच्या सुकन्या कल्पलता अंतरकर आणि सुपुत्र आनंद माडगुळकर हे प्रमुख पाहुणे म्हणून उपस्थित राहणार आहेत. शाळेच्या आवारात विविध प्रकारची पुस्तके व इतर वस्तूंचे स्टॉल देखील रसिकांसाठी उपलब्ध असणार आहेत.

गीत रामायणातील निवडक गाण्यांचे कार्यक्रम अनेक ठिकाणी होतात. मात्र एक सलग ५६ गीते सादर करण्याचे शिवधनुष्य हटके ग्रुपने पेलले आहे. याकरिता मागील सहा महिन्यांपासून तयारी सुरू आहे. सादरीकरण करणारे कलाकार हे हौशी कलाकार असून विविध क्षेत्रात नोकरी व्यवसायात कार्यरत आहेत. गदिमा आणि बाबूजींनी दिलेला सांगीतिक वारसा जपण्याकरिता तसेच हा अनमोल ठेवा रसिकांसमोर आणण्याकरिता कलाकारांचा हा प्रयत्न आहे. हा कार्यक्रम विनामूल्य खुला असून पुणेकरांनी या कार्यक्रमात मोठया संख्येने सहभागी व्हावे, असे आवाहन हटके म्युझिक ग्रुप च्या वतीने करण्यात आले आहे.