पुणे : प्रतिनिधी
शहरातील चार हजार कुटुंबातील एक नाते कोरोनाच्या आपत्तीने हिरावून नेले. घट्ट नात्यांमधील एक जरी नाते दूरावले तरी सणाचा आनंद घेता येत नाही. कुटुंबावर कोसळलेल्या संकटाने प्रत्येकाचेच मन खिन्न आहे. मात्र अशा कुटूंबियांमध्येही दिवाळीचे पर्व आणि परंपरा अबाधित राहून अंधाराकडून प्रकाशाकडे जाण्याचा संदेश देणारी दिवाळी साजरी करताना महापौर मुरलीधर मोहोळ यांच्या वतीने फराळ किटची अनोखी भेट घरपोच देण्यात आली. शिवाय यात भावनिक पत्र लिहून महापौर मोहोळ यांनी त्या कुटुंबियांना आधार देण्याचाही प्रयत्न केलाय.
कोरोनाच्या संकटात शहरातील जवळपास चार हजार कोरोनाबाधित रुग्णांचा मृत्यू झाला. रूढ चालीरीतीनुसार घरातील व्यक्तीचे निधन झाल्यास साधारण वर्षभर सणांचा आनंद घेता येत नाही. मात्र दिवाळीसारखा आनंद पर्व देणारा सण नकारात्मकता मागे टाकून नव्या दिशांच्या वाटेने जाणारा ठरावा, यासाठी महापौर मोहोळ यांनी केलेल्या प्रयत्नांबद्दल ‘ते’ कुटुंबीयही सकारात्मक भावना व्यक्त करत आहेत.
या अनोख्या उपक्रमाबद्दल महापौर मोहोळ म्हणाले, ‘दिपावलीचा पुरेपूर आनंद घेता येईल, असे हे वर्ष नाही. हे वर्ष यातना देणारे ठरले. कोरोनाच्या साथीत पुण्यात चार हजाराहून अधिक जणांचा दुर्दैवी मृत्यू झाला. पुण्याचा प्रथम नागरीक या नात्याने मीही या खिन्नतेचा अनुभव घेतो आहे’
‘दिपावलीचे प्रकाशवर्ष हे नवी आशा जागवणारे असते. दिपावलीमुळे उजळलेल्या दिशांमध्ये नवी वाट शोधूया, अशी या मागची भावना होती. दिपावलीचा हा उत्सव आपल्या परंपरेचा भाग आहे. ही परंपरा त्या कुटूंबियांनाही जपता यावी आणि दुःख मागे सारून त्यांना नव्याने आयुष्याची घडी बसवायला आपलाही आधार मिळावा, शिवाय ही घडी बसवतांना तुम्ही एकटे नाहीत, ही भावनाही त्या कुटूंबियांच्या मनात निर्माण करण्याचा प्रयत्न आहे’, असेही महापौर मोहोळ म्हणाले.
