नागपूर –
महाराष्ट्र-कर्नाटक सीमावादावर सर्वोच्च न्यायालय निकाल देत नाही, तोपर्यंत हा सीमाभाग केंद्रशासित प्रदेश जाहीर करावा, असा ठराव विधानपरिषदेने मंजूर करावा, अशी मागणी ठाकरे गटाचे प्रमुख उद्धव ठाकरे यांनी केली.
विधानसभा व विधानपरिषदेत एकमताने सीमावादाबाबत असा ठराव मंजूर करून तो केंद्र सरकारला राज्य सरकारने पाठवावा, असेही उद्धव ठाकरे म्हणाले.
ग्रामपंचायती बरखास्त करणार का?
विधानपरिषदेत आज उद्धव ठाकरे यांनी सीमावादावर आपली भूमिका मांडली. यावेळी सीमाभागातील ज्या ग्रामपंचायतींनी कर्नाटकात जाण्याचा इशारा दिला आहे, अशा ग्रामपंचायतींना राज्य सरकार बरखास्त करणार का?, असा सवालही उद्धव ठाकरेंनी केला.
मुख्यमंत्री एकनाथ शिंदेंवर टीका
सीमावादावरून उद्धव ठाकरेंनी मुख्यमंत्री एकनाथ शिंदे यांच्यावरही टीका केली. उद्धव ठाकरे म्हणाले, आज मुख्यमंत्री एकनाथ शिंदे दिल्लीत आहे. अधिवेशन सोडून त्यांना दिल्लीत जाण्याची गरज काय? दिल्लीत गेले असले तरी सीमाप्रश्नी महाराष्ट्राला या भेटीचा काही फायदा होईल काय? मुख्यमंत्री एकनाथ शिंदे म्हणतात की, सीमाप्रश्नी आम्ही लाठ्या खाल्ल्या आहेत. तुम्ही आम्हाला सांगणारे कोण? मात्र, सीमावादावरुन मराठी माणसाने आजही लाठ्याच खायच्या काय?, असा सवाल उद्धव ठाकरेंनी केला.
कर्नाटकविरोधात साधा ‘ब्र’ बोलत नाही
तसेच, तेव्हा लाठ्या खाल्ल्या म्हणून आज मुख्यमंत्री एकनाथ शिंदे गप्प आहेत का? एकीकडे कर्नाटकचे मुख्यमंत्री बसवराज बोम्मई सातत्याने महाराष्ट्रविरोधी भूमिका मांडत असताना मुख्यमंत्री एकनाथ शिंदेंच्या तोंडून कर्नाटकविरोधात साधा ब्रदेखील निघत नाही, अशी टीका उद्धव ठाकरेंनी केली.
आपल्याकडे मराठी पाट्यांना विरोध
उद्धव ठाकरे म्हणाले, बेळगाव, कारवार, निपाणी हा खरे तर कर्नाटकव्यापत महाराष्ट्र आहे. हा कर्नाटकव्याप्त महाराष्ट्र खऱ्या अर्थाने महाराष्ट्रात आणण्यासाठी आपण सर्वांनी एकजूट दाखवणे गरजेचे आहे. सीमावादावर कर्नाटकात विरोधक आणि सत्ताधाऱ्यांची एकजूट आहे. हे खरे तर आपण शिकण्यासारखे आहे. मात्र, महाराष्ट्रात उलटे चित्र आहे. आपण राज्यात दुकानांवर मराठी पाट्या बंधनकार केल्या की, त्याला आपल्याच लोकांकडून उच्च न्यायालयात आव्हान दिले जाते. या विरोधीभासाला काय म्हणायचे?
ठाकरेंकडून सभागृहात पेन ड्राईव्ह
यावेळी उद्धव ठाकरेंनी सभागृहात एक पेन ड्राईव्ह सादर केला. त्यात महाराष्ट्र-कर्नाटक सीमावादावरील ‘केस फॉर जस्टीस’ हा चित्रपट होता. हा चित्रपट सर्वांनी पाहावा. या चित्रपटात कर्नाटकातील मराठी भाषिकांवर कसे अत्याचार केले जातात, हे दाखवले असल्याचे उद्धव ठाकरे यांनी सांगितले.
