रात्री फडणवीसांचे पत्र -सकाळी राज्यपालांचे मविआ सरकारला आदेश- उद्याच बहुमत चाचणी घ्या
मुंबई-शिवसेनेतून वेगळा पडलेला एकनाथ शिंदे यांचा गट सर्व आमदारांसह आज गुवाहाटीतून महाराष्ट्रात न येता गोव्यात जाणार आहे. गोवा येथील ताज कन्व्हेन्शन हॉटेलमध्ये आमदारांसाठी 71 खोल्या बुक करण्यात आल्या आहेत. दुसरीकडे, महाराष्ट्रात राज्यपालांनी उद्या म्हणजेच 30 जून रोजी बहुमत चाचणी घेण्याचे आदेश दिले आहेत. यामुळे आमदार गुवाहाटीतून मुंबईत न येता गोव्याला जात आहेत. 30 जून रोजी सकाळी 11 वाजताच फ्लोअर टेस्टसाठी अधिवेशन बोलावलेलं आहे. यामुळे ऐनवेळी अडचण नको म्हणून शिंदे गटाने गोवा राज्यात आज उतरण्याचं ठरवलेलं दिसते आहे. गोव्यातील ताज कन्व्हेशन हॉटेलमध्ये त्यांच्यासाठी 71 खोल्या बुक करण्यात आल्या असून येथूनच हे आमदार बहुमत चाचणीसाठी मुंबईत दाखल होणार असल्याची माहिती सूत्रांनी दिली आहे.
बंडखोर गटाचे नेते एकनाथ शिंदे बुधवारी सकाळी गुवाहाटीमध्ये माध्यमांना म्हणाले की, आम्ही 40+10 आमदार आहोत. आम्ही उद्या बहुमत चाचणीसाठी मुंबईला जाणार आहोत. 2/3 पेक्षा जास्त बहुमत आमच्याकडे आहे. त्यामुळे बहुमत चाचणीत काय, होईल हे सर्वश्रुत आहे.
बहुमत चाचणीविरोधात शिवसेना सुप्रीम कोर्टात
दरम्यान, शिवसेनेचे मुख्य प्रतोद सुनील प्रभु यांनी राज्यपालांनी बहुमत चाचणीसाठी बोलावलेल्या अधिवेशनाविरोधात सर्वोच्च न्यायालयात याचिका दाखल केली आहे. या याचिकेवर आज संध्याकाळी 5 वाजता सुनावणी होणार आहे. यामुळे यानंतरच बहुमत चाचणी होईल की नाही, हे स्पष्ट होईल.
मंगळवारी देवेंद्र फडणवीस यांनी दिल्लीत भाजप अध्यक्ष जेपी नड्डा आणि गृहमंत्री अमित शहा यांची भेट घेतली. येथून ते सायंकाळी मुंबईत पोहोचले आणि आमदारांसह राज्यपालांची भेट घेण्यासाठी गेले. राज्यपाल भगतसिंह कोश्यारी यांची भेट घेतल्यानंतर फडणवीस राजभवनाबाहेर म्हणाले- उद्धव सरकार अल्पमतात आहे, बहुमत सिद्ध करावे.
शिंदे यांच्यामागील महासत्ता समोर आली – काँग्रेस
फडणवीस राजभवनात पोहोचताच राज्यात काँग्रेस आक्रमक झाली. पक्षनेते सचिन सावंत म्हणाले- एकनाथ शिंदे यांच्यामागील महासत्ता समोर आली आहे. प्रत्यक्षात 24 जून रोजी गुवाहाटीतील एका हॉटेलमध्ये शिंदे यांनी बंडखोर आमदारांना सांगितले की, आमच्याकडे महासत्ता आहे, उद्धव सरकार पडेल.
