रमामाई आंबेडकरांच्या पुतळ्यासाठी महापौरांना इशारा ( व्हिडीओ रिपोर्ट )

पुणे- संभाजी बागेतील गडकरींच्या पुतळ्याचे आव्हान समोर असताना , नाशिक मधील वक्तव्य माध्यमांमध्ये गाजलेलं असताना आता पुण्याच्या महापौर मुक्ता टिळक यांना महामाता रमामाई भीमराव आंबेडकर यांच्या पुतळ्यासाठी इशारा देण्यात आला आहे . कॉंग्रेसचे पालिकेतील गटनेते अरविंद शिंदे तसेच नगरसेविका लता राजगुरू आणि रमामाई आंबेडकर स्मारक समितीचे मुख्य समन्वयक विठ्ठल गायकवाड यांनी हा इशारा दिला आहे . अर्थात महापालिका प्रशासनाने मात्र या इशाऱ्यानंतर महापौरांना अडचणीत येवू न देण्याची खबरदारी घेत रमामाई पुतळ्याच्या प्रस्थापनेसाठी तयारीचा सूर दाखविला आहे .
अरविंद शिंदे, लताताई राजगुरू आणि विठ्ठल गायकवाड यांनी आज महापौर मुक्ता टिळक , उपमहापौर नवनाथ कांबळे , आणि सभागृह नेते श्रीनाथ भिमाले यांची भेट घेवून हा खणखणीत इशारा दिला . कोणत्याही परिस्थितीत रमामाई यांचा  पुतळा २७ मी या रमामाईंच्या ८२ व्या पुण्यतिथी दिनीच प्रस्थापित व्हायला हवा अशी भूमिका घेत , ‘तुम्ही ते काम करा अन्यथा आम्ही ते काम करू’ असा इशारा दिला आहे .
वाडिया कॉलेज जवळील रमामाई आंबेडकर उद्यानानजिक हा पूर्णाकृती पुतळा बसविण्यासाठी चौथरा फेब्रुवारीतच बांधून पूर्ण झाला आहे आणि, रमामाईंचा पूर्णाकृती पुतळा ३ फेब्रुवारी २०१५ रोजीच स्मारक समितीने तत्कालीन महापौर दत्ता धनकवडे यांच्या स्वाधीन केला आहे . ..पहा हा छोटासा व्हिडीओ रिपोर्ट…