पुणे :वाडा संस्कृतीतील पारंपारिक वातावरण, जुने खेळ, अस्सल मराठी पाटावरील भोजन अशा वातावरणात चिमुकल्यांना त्यांच्या आठवणीतील आजोळ, महिलांना मनातलं माहेर, आणि स्वप्नातलं घर शनिवारी सापडलं !
निमित्त होते पुण्याच्या जुन्या वाडा संस्कृतीचे प्रतीक असलेल्या ‘ढेपेवाडा ‘ आयोजित ‘चिंटू ‘ आणि वाडा संस्कृतीतील खेळ ! ‘ या उपक्रमाचे आणि एक दिवसीय सहलीचे !
‘चिंटू ‘ चे निर्माते चित्रकार चारुहास पंडित यांनी या सहलीतील सहभागी मुलामुलींना ,पालकांना ‘चिंटू ” ची रेखाटने करून दाखवली .बालगोपाळांनी चिंटूचे चित्र रंगविण्याचा आनंद लुटला. कार्टून, अॅनिमेशन या प्रकाराची माहितीही चारुहास पंडित यांनी दिली.
‘ढेपेवाडा ‘ चे संचालक नितीन ढेपे आणि ऋचा ढेपे या पुण्याच्या वाडा संस्कृतीतील पारंपरिक खेळ शिकवले. त्यात लगोरी, सागरगोटे, भोवरा, सूर पारंब्या, सारीपाट, खांब खांब खांबोळी, गोटया, आंधळी कोशींबीर, भातुकली, आटया पाटया अशा अनेक पारंपारिक खेळांचा समावेश होता.
,वाडासंस्कृतीतील रहाणीमानाची , जीवनशैलीची ओळख करून देण्यात आली . मुदपाकखाना, उखळ, जातं, तुळशी वृंदावन, विहीर, घंगाळ,चौरंग, झोपाळा या विस्मृतीत चाललेल्या चीजा बघून बालगोपाळ हरखून गेले.
शनीवारी सकाळी ९ ते सायं ४ वाजेपर्यंत या सहलीत
७ ते १४ वर्षे वयोगटातील मुलामुलींना एक वेगळा अनुभव पालकांसह घेता आला.
बालगोपाळांनी ढेपेवाडा महाद्वार, दिंडी दरवाजा, देवळी, देवघर, दिवाणखाना, मुद पाकखाना, न्हाणीघर , शयनघर, पलंग अशा जुन्या वास्तू वैशिष्टयांसह पाहिला.
‘ढेपेवाडा ‘ हा मुळशीच्या गिरीवन पर्यटनप्रकल्पात असलेला पुणेरी वाडा असून वाड्याची सर्व वास्तू वैशिष्टये येथे पाहावयास मिळतात जुनी संस्कृती जपण्यासाठी खास ‘ढेपेवाडा ‘ बांधून वाड्यातील संस्कृतीचे यथार्थ दर्शन व तशाच राहणीमानाचा , जीवनशैलीचा आनंद देणारे पुण्यातील हे एकमेव पर्यटन स्थळ आहे ,अशी माहिती नितीन ढेपे यांनी दिली.
या उपक्रमातून नव्या पिढीला एकत्रित कुटुंब पध्दतीची माहिती देण्यात आली आणि महत्व सांगण्यात आले.
