पुणे-कोरोनाच्या संकटात दवाखाने पूर्ण वेळ अथवा अर्धा वेळ बंद ठेवणाऱ्या डॉक्टरांवर कायदेशीर कारवाई करावी, अशी मागणी महापालिका स्थायी समिती अध्यक्ष हेमंत रासने यांनी विभागीय आयुक्त डॉ. दीपक म्हैसेकर यांच्याकडे निवेदनाद्वारे केली आहे.
पुणे शहराच्या विविध भागांमध्ये काही छोट्या दवाखान्यांमध्ये बाह्यरुग्ण विभाग आणि डिस्पेंन्सरी निर्धारित वेळेत कार्यरत नसतात, अशा तक्रारी नागरिकांकडून करण्यात आल्या आहेत. वैद्यकीय सेवा ही आपत्ती व्यवस्थापन आणि साथ, रोग कायद्यांतर्गत अत्यावश्यक सेवा आहे. ती बंद असणे गंभीर बाब आहे.
त्यामुळे जे वैद्यकीय व्यावसायिक आपले दवाखाने पूर्ण अथवा अर्ध वेळ बंद ठेवतील त्यांच्यावर कारवाई व्हावी. तसेच संबंधितांना योग्य ते आदेश द्यावेत, असे रासने यांनी निवेदनात म्हटले आहे.
मिळकतकरावरील सवलतीच्या मुदतीत जूनपर्यंत वाढ-
कोरोनाच्या संसर्गाचा प्रादुर्भाव रोखण्यासाठी सुरु असलेला लॉकडाऊन आणि अन्य बाबी लक्षात घेऊन वार्षिक मिळकतकरावर मिळणाऱ्या सवलतीची मुदत जून अखेरपर्यंत वाढविण्यात आली आहे, अशी माहिती पुणे महापालिका स्थायी समिती अध्यक्ष हेमंत रासने यांनी दिली.
दरवर्षी मिळकत कर एप्रिल, मे या महिन्यांमध्ये भरल्यास त्यावर पाच ते दहा टक्के सवलत करदात्यांना मिळते. यंदा एप्रिलमध्ये लॉकडाऊन लागू आहे. त्यामुळे करदात्यांच्या आर्थिक परिस्थितीचा विचार करुन करावरील सवलतीची मुदत जून अखेरपर्यंत वाढविण्याचा निर्णय स्थायी समितीच्या बैठकीतही घेण्यात आला आहे.
पुणे महापालिका हद्दीत सुमारे दहा लाख मिळकतधारक आहेत. महापालिका भवन, महापालिकेची क्षेत्रीय कार्यालये येथे मिळकत कर भरण्यासाठी सोय आहे. काही सहकारी बँकांमध्येही महापालिकेचा मिळकत कर भरण्याची सेवा उपलब्ध आहे. तसेच ऑनलाइन सेवाही उपलब्ध आहे.
अनेक करदाते अशा सेवांमार्फत महापालिकेचा मिळकत कर भरतात. एप्रिल, मे महिन्यात मिळकत कर भरल्यास त्यावर पाच ते दहा टक्के सूट मिळते. त्यामुळे दरवर्षी एप्रिल आणि मे महिन्यात मिळकत कराचा भरणा मोठ्या प्रमाणात होतो. यंदा लॉकडाऊनमुळे कर भरणा प्रमाण अत्यल्प आहे. पालिकेत कर्मचारी कमी असल्यामुळे कराची चलने सगळ्या मिळकतधारकांना पाठविणेही शक्य झालेले नाही. काही करदात्यांनी ऑनलाईन पद्धतीने कर भरणा केला आहे.