पुणे : महा एनजीओ फेडरेशनच्या वतीने आत्मनिर्भर दिवाळी उपक्रमात क्लीन सायन्स अँड टेक्नॉलॉजी लिमिटेड यांच्या सीएसआर अंतर्गत ५ हजार भिक्षेकरी आणि समाजातील दुर्लक्षित घटकांना दिवाळी फराळाचे वाटप करण्यात आले. पुण्याचे पालकमंत्री चंद्रकांत पाटील यांच्या हस्ते फराळाचे वाटप झाले.
महा एनजीओ फेडरेशनचे संस्थापक शेखर मुंदडा यांच्या संकल्पनेतून उपक्रम पार पडला. शनिवारवाडा परिसरातून सुरु झालेल्या उपक्रमाचे डॉ. अभिजीत सोनवणे यांनी संयोजन केले. कृष्णकुमार बुब यांचे विशेष सहकार्य उपक्रमाला मिळाले. यावेळी महा एनजीओ फेडरेशनचे कार्यकारी संचालक अक्षय महाराज भोसले, संचालक समिती सदस्य मुकुंद शिंदे, गणेश बाकले, अमोल उंबरजे, प्रणिता जगताप, योगेश बजाज, महेश सोनी, अपूर्वा करवा व सोहम ट्रस्टच्या डॉ. मनीषा सोनवणे डॉ. पूनम राऊत व सहकारी उपस्थित होते.
चंद्रकांत पाटील म्हणाले, सकारात्मकरित्या विचार करत येत्या काळात महा एनजीओ फेडरेशन सोबत एकत्र येऊन भिक्षेकरी यांचे पुनर्वसन या विषयावर काम करू. समाजातील दुर्लक्षित घटकांकडे सर्वांनी आग्रहाने पहावे, या भावनेतून केलेला हा उपक्रम कौतुकास्पद आहे, असे सांगत त्यांनी उपक्रमाचे कौतुक केले.
शेखर मुंदडा म्हणाले, समाजातील दुर्लक्षित घटकांना देखील दिवाळीचा आनंद देण्यासाठी त्यांना दिवाळी फराळ देण्यात आला. भिक्षेक-यांनी त्यांच्या पायावर उभे रहावे यासाठी प्रयत्न करणार असल्याचे त्यांनी सांगितले.