खडकवासला धरण शंभर टक्के भरले; विसर्ग,४,७०८ क्युसेकवर, धरणसमूहात ७८.४९ टक्के पाणीसाठा

पुणे, दि. २४ जुलै : खडकवासला धरण पूर्ण क्षमतेने (१०० टक्के) भरले असून, धरणातील पाणीपातळी झपाट्याने घटत असल्याने आज (२४ जुलै) सकाळी ८ वाजल्यापासून धरणाच्या सांडव्यावरून मुठा नदीपात्रात सोडण्यात येणारा पाण्याचा विसर्ग ९,४०५ क्युसेकवरून ४,७०८ क्युसेक इतका कमी करण्यात येणार असल्याची माहिती खडकवासला पाटबंधारे विभागाने दिली आहे.

आज सकाळी ६ वाजेपर्यंतच्या आकडेवारीनुसार, खडकवासला धरणातून आतापर्यंत १.८२ टीएमसी पाण्याचा विसर्ग करण्यात आला आहे. तसेच कालव्यासाठी १,०५४ क्युसेक आणि पुणे महापालिकेसाठी ६७७ क्युसेक पाणी सोडण्यात येत आहे.

खडकवासला धरण समूहातील चारही धरणांमध्ये मिळून २२.८८ टीएमसी (७८.४९ टक्के) पाणीसाठा उपलब्ध आहे. गेल्या वर्षी याच दिवशी हा साठा २३.६० टीएमसी (८०.९८ टक्के) होता. त्यामुळे यंदा धरणसमूहात ०.७२ टीएमसी पाणीसाठा कमी आहे.

आज सकाळी ६ वाजेपर्यंत चारही धरणांच्या पाणलोट क्षेत्रात झालेल्या पावसामुळे २,३१६ एमसीएफटी इतकी एकूण आवक नोंदविण्यात आली आहे.

धरणनिहाय पाणीसाठा पुढीलप्रमाणे आहे :

• खडकवासला – १.९७ टीएमसी (१००%)
• पानशेत – ८.७६ टीएमसी (८२.२९%)
• वरसगाव – ९.८६ टीएमसी (७६.८८%)
• टेमघर – २.२९ टीएमसी (६१.६८%)

पाटबंधारे विभागाने स्पष्ट केले आहे की, पावसाचे प्रमाण आणि धरणांमध्ये होणारी पाण्याची आवक लक्षात घेऊन विसर्गात पुन्हा वाढ किंवा घट केली जाऊ शकते.

प्रशासनाने नागरिकांना मुठा नदीपात्रात उतरू नये, नदीपात्रातील साहित्य व जनावरे तातडीने सुरक्षित ठिकाणी हलवावीत, तसेच सखल भागातील नागरिकांना सतर्क करून आवश्यक खबरदारी घ्यावी, असे आवाहन केले आहे.

खडकवासला धरणसाखळी पाणीसाठा — २४ जुलै २०२६, सकाळी ६ वाजता