दिलीप वेडेपाटील आणि रोहिणी चिमटे यांचा स्थायी समितीसमोर ठराव; अंतिम निर्णय होईपर्यंत प्रस्तावित रस्ता हद्दीतील बांधकामांना स्थगितीचा मुद्दा
पुणे : कोथरूडच्या नवीन हद्दीतील शांतिवन चौक–एकलव्य कॉलेज ते राष्ट्रीय महामार्ग हा संपूर्ण रस्ता 36 मीटर रुंदीने विकसित करण्याचा प्रस्ताव दिलीप वेडेपाटील आणि रोहिणी चिमटे यांनी पुणे महापालिकेच्या स्थायी समितीसमोर ठेवला आहे. हा विषय स्थायी समितीच्या 1 ऑक्टोबरच्या बैठकीत विषय क्रमांक 1276 म्हणून विचारासाठी येणार आहे. या प्रस्तावात रस्त्याची अंतिम रुंदी निश्चित होईपर्यंत प्रस्तावित रस्ता हद्दीतील नवीन बांधकामे आणि पुनर्विकास प्रकल्पांना परवानगी देऊ नये अथवा आवश्यक ती स्थगिती द्यावी, असेही नमूद करण्यात आले आहे.
प्रस्तावात नमूद केल्यानुसार, पुणे महापालिकेच्या 1986 च्या विकास आराखड्यात जुन्या कोथरूड हद्दीतील भारतरत्न महर्षी कर्वे स्मारक ते शांतिवन चौक हा रस्ता 36 मीटर रुंदीने विकसित करण्यात आला आहे. मात्र, महापालिकेत समाविष्ट झालेल्या 23 गावांच्या विकास आराखड्यात कोथरूडच्या नवीन हद्दीत याच रस्त्याचा पुढील भाग केवळ 15 मीटर रुंदीचा दर्शवण्यात आला आहे. या विसंगतीचा भविष्यातील वाहतूक नियोजनावर परिणाम होऊ शकतो, असे प्रस्तावात म्हटले आहे.
कोथरूड परिसरातील वाढती लोकसंख्या, वाहनांची संख्या आणि पौड रस्त्यावरील वाहतूक कोंडी लक्षात घेऊन शांतिवन चौक–एकलव्य कॉलेज ते राष्ट्रीय महामार्ग हा संपूर्ण रस्ता 36 मीटर रुंदीने विकसित करण्याचा विचार या प्रस्तावात मांडण्यात आला आहे. हा रस्ता विकसित झाल्यास पौड रस्त्यावरील वाहतुकीचा ताण कमी होऊन चांदणी चौक आणि राष्ट्रीय महामार्गाकडे जाण्यासाठी पर्यायी मार्ग उपलब्ध होईल, असे प्रस्तावात नमूद आहे.
चांदणी चौक वाहतूक सुधारणा प्रकल्पासाठी महापालिकेने मोठ्या प्रमाणात निधी खर्च केला आहे. त्या पार्श्वभूमीवर चांदणी चौकाकडे जाणाऱ्या पर्यायी मार्गाचे नियोजन आवश्यक असून हा रस्ता केवळ 15 मीटर ठेवणे भविष्यातील शहर नियोजन आणि वाहतूक व्यवस्थेच्या दृष्टीने योग्य ठरणार नाही, असे प्रस्तावात म्हटले आहे. SC Karyapatrika 27 (01-10-26)_u…
सध्या या परिसरात नवीन बांधकामे आणि पुनर्विकासाची कामे सुरू असल्याने भविष्यातील रस्ता रुंदीकरणाची संधी गमावली जाऊ नये, यासाठी तातडीने निर्णय घेण्याची आवश्यकता असल्याचे प्रस्तावात नमूद करण्यात आले आहे.
प्रस्तावानुसार, शांतिवन चौक–एकलव्य कॉलेज ते राष्ट्रीय महामार्ग हा संपूर्ण रस्ता 36 मीटर रुंदीने विकसित करण्याबाबत शहर सुधारणा समितीमार्फत आवश्यक कार्यवाही करून मान्यता किंवा शिफारस द्यावी. तसेच 36 मीटर रुंदीनुसार विकास आराखड्यात आवश्यक कार्यवाही आणि भूसंपादन प्रक्रिया पूर्ण होईपर्यंत प्रस्तावित रस्त्याच्या हद्दीतील नवीन बांधकामे व पुनर्विकास प्रकल्पांना परवानगी देऊ नये अथवा आवश्यक ती स्थगिती द्यावी, असेही ठरावात म्हटले आहे.
