सौदी अरेबियातील ताबुक येथे आपत्कालीन लँडिंग; नंतर समोर आले वैमानिकांमध्येच हाणामारी झाल्याचे
दुबई/तेल अवीव : दुबईहून तेल अवीवकडे जाणाऱ्या Flydubaiच्या FZ1073 या विमानातून उड्डाणादरम्यान प्रथम 7700 हा सामान्य आपत्कालीन कोड आणि त्यानंतर 7500 हा बेकायदेशीर हस्तक्षेप किंवा संभाव्य अपहरण दर्शवणारा कोड पाठवण्यात आल्याने मोठी खळबळ उडाली. या अलर्टनंतर इस्रायली हवाई दलाने लढाऊ विमाने रवाना केली.
यानंतर विमानाने आपला मार्ग बदलून सौदी अरेबियातील ताबुक विमानतळावर सुरक्षित लँडिंग केले. इस्रायली पंतप्रधान कार्यालयाने नंतर स्पष्ट केले की, ही घटना प्रत्यक्ष विमान अपहरणाची नव्हती आणि सर्व प्रवासी सुरक्षित आहेत.
वैमानिकांमध्ये शारीरिक झटापट
इस्रायली अधिकाऱ्यांच्या माहितीनुसार, विमानातील दोन वैमानिकांमध्ये उड्डाणादरम्यान शारीरिक हाणामारी झाली होती. याच घटनेदरम्यान आपत्कालीन संकेत प्रसारित झाले आणि परिस्थिती गंभीर असल्याचा संदेश जमिनीवरील नियंत्रण यंत्रणांना मिळाला. या वादामागील नेमके कारण अद्याप अधिकृतरीत्या स्पष्ट करण्यात आलेले नाही.
विमानात नेमके किती प्रवासी होते याबाबत सुरुवातीच्या वृत्तांमध्ये वेगवेगळे आकडे देण्यात आले. काही अहवालांत 180च्या आसपास प्रवासी, तर इतर वृत्तांत 174 प्रवासी असल्याचे नमूद करण्यात आले आहे.
नेतन्याहूंची तातडीची सुरक्षा चर्चा
अलर्ट मिळाल्यानंतर इस्रायलचे पंतप्रधान बेंजामिन नेतन्याहू आणि संरक्षण यंत्रणांमध्ये तातडीची सुरक्षा चर्चा झाली. विमान सुरक्षितपणे उतरल्याची खात्री झाल्यानंतर परिस्थिती नियंत्रणात असल्याचे सांगण्यात आले.
