वडगाव बुद्रुक, नऱ्हे, धायरीतील १३ पीजी आणि ७ भंगार दुकाने-गोडाऊन बंद करण्याचे आदेश
पुणे, दि. २० सप्टेंबर २०२६ : पुणे महापालिका आयुक्त नवलकिशोर राम यांच्या आदेशानुसार शहरातील पीजी, हॉस्टेल तसेच भंगार दुकाने आणि गोडाऊनची अग्निसुरक्षाविषयक तपासणी मोहीम सुरू करण्यात आली आहे. मुख्य अग्निशमन अधिकारी गणेश सोनुने, अग्निशमन अधिकारी प्रभाकर उम्राटकर आणि बांधकाम विभागाचे अभियंता विश्वजीत वाघमोडे यांच्या पथकाने सलग तिसऱ्या दिवशी विविध ठिकाणी तपासणी केली.
शहरातील बांधकाम आणि अग्निसुरक्षा उपाययोजनांची पाहणी करताना अनेक ठिकाणी मोठ्या प्रमाणावर भंगार साठवणूक करणारी दुकाने, गोडाऊन तसेच भंगारावर प्रक्रिया करणारे युनिट आढळून आले. या ठिकाणी आवश्यक अग्निशमन यंत्रणा, सुरक्षिततेची साधने, बांधकाम परवानग्या तसेच योग्य विद्युत पुरवठ्याची व्यवस्था नसल्याचे तपासणीत निदर्शनास आले.
या गोडाऊनमध्ये प्लास्टिक, कागद, पोती, स्टील, लोखंडाचा भंगार आणि इतर ज्वलनशील वस्तूंचा मोठ्या प्रमाणावर साठा आढळला. अनेक ठिकाणी पत्र्याची शेड उभारून ही आस्थापने थेट रहिवासी भागात सुरू असल्याचेही समोर आले.
आज वडगाव बुद्रुक, नऱ्हे आणि धायरी परिसरातील १३ पीजी आणि ७ भंगार दुकाने-गोडाऊन यांची तपासणी करण्यात आली. बीडीपी झोन, अरुंद रस्ते, अग्निशमन यंत्रणा, अधिकृत विद्युत पुरवठा, ड्रेनेज आणि कर आकारणीसंबंधी आवश्यक परवानग्या आढळून न आल्याने या आस्थापना बंद करण्याचे आदेश देण्यात आले आहेत.
अनेक आस्थापना भाडेतत्त्वावर चालवल्या जात असल्याने त्यावर योग्य नियंत्रण नसल्याचेही प्रशासनाच्या निदर्शनास आले आहे. अशा अनधिकृत आणि विनापरवाना आस्थापनांवर गुन्हे दाखल करून त्या तात्काळ सील करण्याचे आदेश महापालिका आयुक्तांनी दिले आहेत.
अग्निसुरक्षेचे नियम न पाळणाऱ्या तसेच विनापरवाना सुरू असलेल्या आस्थापनांवर यापुढेही कडक कारवाई करण्यात येणार असून, अग्निशमन दलाची तपासणी मोहीम सुरूच राहणार असल्याचे प्रशासनाने स्पष्ट केले आहे.
