- नारायण पेठ आणि कोथरूडमध्ये धार्मिक-सांस्कृतिक कार्यक्रम; हजारो भाविकांची उपस्थिती
पुणे : ऋषीपंचमीच्या पवित्र मुहूर्तावर पुण्यात संतशिरोमणी श्री गजानन महाराजांच्या दर्शनासाठी भाविकांनी मोठी गर्दी केली. नारायण पेठेतील गुप्ते मंगल कार्यालय आणि कोथरूडमधील तिवारी गजानन महाराज मंदिर येथे विविध धार्मिक व सांस्कृतिक कार्यक्रमांचे आयोजन करण्यात आले होते. या सोहळ्यांना राजकीय, सामाजिक क्षेत्रातील मान्यवरांसह हजारो भाविकांनी उपस्थिती लावली.नारायण पेठेतील केसरी वाड्यासमोरील गुप्ते मंगल कार्यालयात श्री गजानन महाराज परिवार संघ, पुणे यांच्या वतीने ऋषीपंचमी उत्सव उत्साहात साजरा करण्यात आला. पुण्याचे माजी उपमहापौर दीपक मानकर यांनी या उत्सवाला उपस्थित राहून श्रींची आरती व दर्शन घेतले.यावेळी दीपक मानकर म्हणाले, “श्री गजानन महाराजांची भक्ती आणि त्यांचे विचार आपल्या जीवनाला श्रद्धा, संयम आणि सकारात्मकतेची प्रेरणा देतात. ऋषीपंचमीच्या या पवित्र दिनी श्रींच्या चरणी प्रार्थना करून सर्व भाविकांच्या आयुष्यात सुख, शांती, समाधान आणि समृद्धी नांदो, अशी मनोकामना आहे.”गुप्ते मंगल कार्यालयात सकाळी ८ ते दुपारी २ या वेळेत ‘श्री गजानन विजय’ ग्रंथाचे सामुदायिक अभिवाचन, अभिषेक आणि आरती पार पडली. संध्याकाळी शोभा टिळक यांच्या ‘प्रसाद भक्तीगीत मंडळा’चे भजन झाले. त्यानंतर गायिका चित्रा आपटे, समीर चितळे आणि मीनल देशपांडे यांच्या ‘भक्ती-संध्या’ या विशेष अभंग व भक्तीगीतांच्या कार्यक्रमाला भाविकांचा उत्स्फूर्त प्रतिसाद मिळाला. उत्सवाचे नियोजन माधुरी जोशी आणि मनिषा ब्राह्मणकार यांनी केले.दरम्यान, कोथरूड येथील रामबाग कॉलनीतील श्री गजानन महाराज सेवा ट्रस्ट संचलित तिवारी गजानन महाराज मंदिरात श्री गजानन महाराजांचा ११६ वा महानिर्वाण दिन आणि मंदिराचा २९ वा वर्धापन दिन संयुक्तपणे साजरा करण्यात आला. या सोहळ्याला नगरसेवक हर्षवर्धन मानकर यांनी उपस्थित राहून दुपारच्या महाआरतीचा मान स्वीकारला व श्रींचे दर्शन घेतले.यावेळी हर्षवर्धन मानकर म्हणाले, “संतांचे विचार आणि त्यांची शिकवण समाजाला सदैव सकारात्मक दिशा देणारी असते. श्री गजानन महाराजांच्या चरणी नतमस्तक होताना समाजात प्रेम, बंधुभाव आणि एकोप्याची भावना अधिक दृढ व्हावी, तसेच प्रत्येकाच्या जीवनात सुख, समाधान आणि उत्तम आरोग्य नांदावे, हीच मनोभावे प्रार्थना आहे.”तिवारी गजानन महाराज मंदिरातील कार्यक्रमाची सुरुवात सकाळी ७ वाजता महाअभिषेकाने झाली. त्यानंतर सुरेखा कुलकर्णी यांच्या हस्ते महाआरती, श्री योगदा पौरोहित्य मंडळाचे अथर्वशीर्ष पठण आणि किरण प्रभू यांचे अध्याय वाचन झाले. दुपारी भाविकांसाठी महाप्रसादाचे आयोजन करण्यात आले होते.संध्याकाळी स्वरूपानंद भजनी मंडळ आणि श्री गजानन भजनी मंडळाचे भजन झाले. त्यानंतर महाआरती तसेच योगिनी पित्रे यांचा ‘मोगरा फुलला’ हा भजन व भक्तीगीतांचा कार्यक्रम पार पडला.दोन्ही ठिकाणी दिवसभर धार्मिक विधी, भजन, अभंग आणि भक्तीगीतांनी वातावरण भक्तिमय झाले होते. मोठ्या संख्येने भाविकांनी शिस्तबद्ध पद्धतीने श्री गजानन महाराजांचे दर्शन घेत ऋषीपंचमीचा उत्सव भक्तिभावाने साजरा केला.
