‘दिशा’ बैठकीत केंद्र पुरस्कृत योजनांचा आढावा; मेट्रो, आवास, भारतनेट, जलजीवन मिशनसह प्रलंबित कामांना कालबद्ध गती देण्याचे निर्देश
पुणे : केंद्र शासनाच्या विविध योजना आणि प्रकल्पांच्या अंमलबजावणीतील प्रलंबित कामांना स्पष्ट उद्दिष्ट व कालमर्यादा निश्चित करून तातडीने गती द्यावी, तसेच चांदणी चौक–घोटवडे फाटा–पिरंगुट–हिंजवडी मेट्रो मार्गाचा सविस्तर प्रकल्प अहवाल (DPR) तयार करावा, असे निर्देश केंद्रीय राज्यमंत्री मुरलीधर मोहोळ यांनी दिले.
जिल्हाधिकारी कार्यालयात मोहोळ यांच्या अध्यक्षतेखाली जिल्हा विकास समन्वय व संनियंत्रण समितीची (दिशा) बैठक झाली. या बैठकीत केंद्र शासनाच्या विविध योजना तसेच मागील बैठकीत देण्यात आलेल्या निर्देशांच्या अंमलबजावणीचा आढावा घेण्यात आला.
खासदार सुप्रिया सुळे दूरदृश्यप्रणालीद्वारे बैठकीत सहभागी झाल्या. पुणे जिल्हा परिषदेचे अध्यक्ष वीरधवल जगदाळे, पुण्याच्या महापौर मंजुषा नागपुरे, पिंपरी-चिंचवडचे महापौर रवि लांडगे, विधान परिषद सदस्य डॉ. नीलम गोऱ्हे, विविध आमदार, पुणे महापालिका आयुक्त नवल किशोर राम, जिल्हाधिकारी जितेंद्र डुडी, जिल्हा परिषद मुख्य कार्यकारी अधिकारी गजानन पाटील यांच्यासह विविध विभागांचे अधिकारी उपस्थित होते.
पुणे मेट्रोच्या रखडलेल्या प्रस्तावांना गती
पुणे मेट्रोच्या दुसऱ्या टप्प्यातील प्रस्तावांवर चर्चा करताना वनाज–चांदणी चौक उन्नत मार्गासाठी पुणे महापालिकेची आर्थिक सहमती, रामवाडी–वाघोली मार्गिकेस आवश्यक मान्यता तसेच लोहगाव विमानतळ मेट्रो जोडणीचा DPR निश्चित मुदतीत पूर्ण करण्याचे निर्देश मोहोळ यांनी दिले.
याचबरोबर चांदणी चौक–घोटवडे फाटा–पिरंगुट–हिंजवडी या प्रस्तावित मेट्रो मार्गाचा DPR तयार करण्याचे निर्देश देण्यात आले. खासदार सुप्रिया सुळे यांनीही हा मार्ग आवश्यक असल्याचे सांगत प्रस्तावाला अनुमोदन दिले. विमानतळाकडे जाणाऱ्या रस्त्याचे रुंदीकरणही लवकर पूर्ण करण्याच्या सूचना देण्यात आल्या.
प्रधानमंत्री आवास योजनेतील कामे कालबद्ध करा
प्रधानमंत्री आवास योजना शहरी 2.0 अंतर्गत पुणे महापालिकेकडे आलेल्या अर्जांपैकी 3,227 अर्ज पात्र ठरले आहेत. मामुर्डी, पुनावळे, वडमुखवाडी, ताथवडे आणि चोविसावाडी येथील सुमारे 6,800 घरांशी संबंधित भूसंपादन व हस्तांतरणाची प्रक्रिया कालबद्ध करण्याचे निर्देश देण्यात आले.
प्रधानमंत्री आवास योजना ग्रामीणच्या दुसऱ्या टप्प्यातील 38,465 घरांपैकी 9,258 घरे पूर्ण झाली असून 29,207 घरे प्रगतीपथावर आहेत. प्रत्येक तालुक्याला मासिक उद्दिष्ट देऊन कामाला गती देण्याचे मोहोळ यांनी सांगितले.
प्रत्येक ग्रामपंचायतीपर्यंत भारतनेट
भारतनेट अंतर्गत पुणे बिझनेस एरियात 1,490 कार्यरत जोडण्या आणि 1,366 ग्राहक जोडण्या कार्यान्वित आहेत. जिल्ह्यातील सुमारे 1,400 ग्रामपंचायतींना भारतनेटशी जोडण्यासाठी वर्षनिहाय आणि तालुकानिहाय आराखडा तयार करण्याच्या सूचना देण्यात आल्या.
‘स्वामित्व’च्या उर्वरित मिळकत पत्रिका तीन महिन्यांत
स्वामित्व योजनेंतर्गत 1,100 गावांची ड्रोन मोजणी पूर्ण झाली असून 829 गावांमध्ये 1 लाख 13 हजार 115 मिळकत पत्रिका तयार करण्यात आल्या आहेत. उर्वरित सनद आणि मिळकत पत्रिकांचे वितरण तीन महिन्यांत पूर्ण करण्याचे निर्देश देण्यात आले.
जलजीवन मिशनची कामे मार्च 2027 पर्यंत पूर्ण करा
जलजीवन मिशनअंतर्गत जिल्ह्यात 1,239 योजना हाती घेण्यात आल्या आहेत. अद्याप 39,255 नळजोडण्या शिल्लक असून उर्वरित नळजोडण्या आणि अपूर्ण पाणीपुरवठा योजना मार्च 2027 पर्यंत पूर्ण करण्याचे निर्देश मोहोळ यांनी दिले.
पुरंदर विमानतळाचे 70 टक्के भूसंपादन पूर्ण
जिल्हाधिकारी जितेंद्र डुडी यांनी महत्त्वाकांक्षी पुरंदर विमानतळासाठी आतापर्यंत सुमारे 70 टक्के भूसंपादन पूर्ण झाल्याची माहिती दिली. उर्वरित प्रक्रिया वेगाने पूर्ण करण्यात येईल, असे त्यांनी सांगितले.
बैठकीत इंद्रायणी व पवना नदी प्रदूषण नियंत्रण, भारतीय विमानतळ प्राधिकरण, राष्ट्रीय महामार्ग प्राधिकरणाचे प्रकल्प, सूक्ष्म कृषी सिंचन, पीएम सूर्यघर मोफत वीज योजना, स्मार्ट सिटी, प्रधानमंत्री स्वनिधी, भूजल सर्वेक्षण आणि जलशक्ती अभियान यासह विविध केंद्र पुरस्कृत योजनांचा आढावा घेण्यात आला.
