कपिलामृत डेअरीजवळ दुचाकीला कंटेनरची धडक; वडील आणि बहीण किरकोळ जखमी
पुणे : प्रतिनिधी
कात्रज-कोंढवा रस्त्यावर मंगळवारी दुपारी झालेल्या भीषण अपघातात एका शाळकरी मुलीचा मृत्यू झाला. कपिलामृत डेअरीजवळ दुचाकीला यूटर्न घेत असताना कंटेनरने धडक दिल्याने प्रतिभा नाईक ही मुलगी कंटेनरच्या चाकाखाली आली. या अपघातात तिची बहीण वैष्णवी नाईक आणि वडील किरकोळ जखमी झाले आहेत.
पोलिसांनी दिलेल्या माहितीनुसार, नाईक कुटुंबातील तिघे दुचाकीवरून कात्रज-कोंढवा रस्त्याने जात होते. दुपारी एकच्या सुमारास कपिलामृत डेअरीजवळ दुचाकीला यूटर्न घेत असताना कात्रजकडून कोंढव्याच्या दिशेने जाणाऱ्या कंटेनरने दुचाकीला धडक दिली.
धडकेनंतर दुचाकीवरील तिघेही रस्त्यावर पडले. यामध्ये प्रतिभा कंटेनरच्या पुढील चाकाखाली आल्याने गंभीर जखमी झाली. अपघातानंतर नागरिकांनी तातडीने मदत करत जखमींना भारती रुग्णालयात दाखल केले. मात्र, उपचारादरम्यान प्रतिभाचा मृत्यू झाला. तिची बहीण वैष्णवी आणि वडिलांना किरकोळ दुखापत झाली आहे.
घटनेची माहिती मिळताच भारती विद्यापीठ पोलिसांनी घटनास्थळी धाव घेतली. पोलिसांनी कंटेनर (HR 38 W 6977) तसेच चालकाला ताब्यात घेतले आहे. अपघातग्रस्त दुचाकीचा क्रमांक MH 12 ZM 3579 आहे.
या प्रकरणी चालकाविरोधात गुन्हा दाखल करण्याची प्रक्रिया सुरू असून अपघात नेमका कशामुळे झाला, याचा तपास भारती विद्यापीठ पोलीस करत आहेत.
कात्रज-कोंढवा रस्त्यावर मोठ्या वाहनांची मोठ्या प्रमाणावर वर्दळ असते. या अपघातामुळे या मार्गावरील वाहतूक सुरक्षा आणि यूटर्नच्या ठिकाणांवरील सुरक्षिततेचा प्रश्न पुन्हा एकदा ऐरणीवर आला आहे.
