जेडब्ल्यू मेरियटकडून तब्बल ९४७ तास, तर शेरटन ग्रँडकडून ३३७ तास उशिरा माहिती; पुणे पोलिसांच्या विशेष शाखेची कारवाई
पुणे : हॉटेलमध्ये वास्तव्यास आलेल्या परदेशी नागरिकांची माहिती निर्धारित वेळेत पोलिसांना न दिल्याप्रकरणी पुण्यातील जेडब्ल्यू मेरियट आणि शेरटन ग्रँड या दोन पंचतारांकित हॉटेलांच्या व्यवस्थापनावर गुन्हा दाखल करण्यात आला आहे. पुणे पोलिसांच्या विशेष शाखेने केलेल्या तपासणीत हा प्रकार उघडकीस आला.
पोलिस उपायुक्त प्रशांत अमृतकर यांनी शहरातील हॉटेल, लॉज, घरमालक तसेच इतर आस्थापनांना त्यांच्याकडे वास्तव्यास येणाऱ्या परदेशी नागरिकांसह भाडेकरूंची माहिती निर्धारित मुदतीत पोलिसांना देण्याचे आदेश दिले आहेत. या आदेशाचे पालन होत आहे की नाही, याची शहरभर तपासणी करण्यात येत असून नियमांचे उल्लंघन करणाऱ्यांवर कारवाई केली जात आहे.
याच मोहिमेअंतर्गत पंचतारांकित हॉटेलांच्या नोंदी तपासण्यात आल्या. सेनापती बापट रस्त्यावरील जेडब्ल्यू मेरियट हॉटेलमध्ये इटलीचे नागरिक ख्रिश्चन हुबेर ७ जून २०२६ रोजी वास्तव्यास आले होते. मात्र, त्यांच्या आगमनाची माहिती हॉटेल व्यवस्थापनाने १७ जुलै रोजी पोलिसांकडे नोंदवली. ही माहिती तब्बल ३९ दिवस ११ तास म्हणजेच ९४७ तास उशिरा देण्यात आल्याचे तपासात निष्पन्न झाले.
त्याचप्रमाणे शेरटन ग्रँड हॉटेलमध्ये चीनचे नागरिक क्यू लुओ १४ जून २०२६ रोजी वास्तव्यास आले होते. त्यांच्या आगमनाची माहिती हॉटेल व्यवस्थापनाने २८ जून रोजी रात्री सव्वानऊच्या सुमारास नोंदवली. ही माहिती १४ दिवस एक तास म्हणजेच ३३७ तास उशिरा देण्यात आल्याचे पोलिसांनी म्हटले आहे.
परदेशी नागरिकांच्या वास्तव्याची माहिती निर्धारित वेळेत पोलिसांना देणे सुरक्षेच्या दृष्टीने बंधनकारक आहे. दोन्ही हॉटेल व्यवस्थापनांकडून निष्काळजीपणे या नियमांचे उल्लंघन झाल्याचा आरोप असून संबंधित प्रकरणांचा पुढील तपास चतु:शृंगी आणि बंडगार्डन पोलिस ठाण्यांकडून पोलिस उपायुक्त प्रशांत अमृतकर यांच्या मार्गदर्शनाखाली सुरू आहे.
