800 कोटी रुपयांचा फ्रेश इश्यू; 2.73 कोटींपर्यंत इक्विटी शेअर्सची ऑफर फॉर सेल
मुंबई : आघाडीची कॉन्ट्रॅक्ट रिसर्च, डेव्हलपमेंट अँड मॅन्युफॅक्चरिंग ऑर्गनायझेशन (CRDMO) असलेल्या अराजेन लाइफ साइंसेज लिमिटेडने प्राथमिक समभाग विक्रीसाठी (IPO) आपला ड्राफ्ट रेड हेरिंग प्रॉस्पेक्टस (DRHP) भारतीय प्रतिभूती आणि विनिमय मंडळाकडे (SEBI) सादर केला आहे.
प्रस्तावित आयपीओमध्ये 800 कोटी रुपयांचा फ्रेश इश्यू तसेच विक्री समभागधारकांकडून प्रत्येकी 10 रुपये दर्शनी मूल्य असलेल्या 2 कोटी 73 लाख 29 हजार 192 पर्यंतच्या इक्विटी शेअर्सची ऑफर फॉर सेल (OFS) समाविष्ट आहे.
फ्रेश इश्यूमधून मिळणाऱ्या निधीचा वापर कंपनीच्या कर्जांची परतफेड किंवा आगाऊ परतफेड करण्यासाठी, हैदराबादमधील सुविधा केंद्रांसाठी नवीन उपकरणे आणि यंत्रसामग्री खरेदी करण्यासाठी तसेच कंपनीची महत्त्वपूर्ण उपकंपनी अराजेन बायोलॉजिक्स प्रायव्हेट लिमिटेडच्या बंगळुरू केंद्रातील नवीन उपकरणे आणि यंत्रसामग्रीसाठी करण्यात येणाऱ्या भांडवली खर्चासाठी केला जाणार आहे. उर्वरित निधीचा वापर सर्वसाधारण कॉर्पोरेट उद्देशांसाठी करण्याचा कंपनीचा प्रस्ताव आहे.
2000 मध्ये स्थापन झालेली अराजेन लाइफ साइंसेज ही पूर्णपणे एकात्मिक CRDMO कंपनी असून जागतिक जीवन विज्ञान क्षेत्रातील नाविन्यपूर्ण तसेच उदयोन्मुख कंपन्यांना सेवा पुरवते. औषध विकासाच्या संपूर्ण जीवनचक्रामध्ये कॉन्ट्रॅक्ट डिस्कव्हरी, प्री-क्लिनिकल रिसर्च तसेच लहान रेणू आणि बायोलॉजिक्ससाठी डेव्हलपमेंट व मॅन्युफॅक्चरिंग सेवा कंपनीकडून दिल्या जातात.
कंपनीच्या माहितीनुसार, 31 मार्च 2026 पर्यंत मूल्यांकन केलेल्या भारतीय समकक्ष कंपन्यांमध्ये औषध विकास मूल्यसाखळीत उपलब्ध करून दिलेल्या उपाययोजनांच्या संख्येच्या दृष्टीने अराजेन लाइफ साइंसेज सर्वात मोठी CRDMO ठरली आहे. कामकाजातून मिळणाऱ्या महसुलाच्या बाबतीतही कंपनी भारतातील तीन सर्वात मोठ्या CRDMO कंपन्यांपैकी एक असल्याचे नमूद करण्यात आले आहे.
आर्थिक वर्ष 2026 मध्ये कंपनीने अमेरिका, युरोप, जपान, भारत आणि इतर APAC बाजारपेठांमध्ये 591 ग्राहकांना सेवा दिली. 31 मार्च 2026 पर्यंत जगातील आघाडीच्या 20 बिग फार्मा ग्राहकांपैकी 16 ग्राहकांसोबत कंपनीने काम केले होते. कंपनीच्या ग्राहकांमध्ये मोठ्या औषधनिर्मिती कंपन्या, जैवतंत्रज्ञान कंपन्या तसेच प्राणी आरोग्य, कृषी रसायने आणि विशेष रसायने क्षेत्रातील कंपन्यांचा समावेश आहे.
अराजेनने 2002 मध्ये CRO व्यवसाय सुरू केला. त्यानंतर विज्ञान कर्मचाऱ्यांच्या संख्येच्या दृष्टीने भारतातील दुसऱ्या क्रमांकाचा मोठा CRO सोल्युशन्स प्लॅटफॉर्म म्हणून कंपनीने विस्तार केला. 2014 मध्ये अधिग्रहणाच्या माध्यमातून बायोलॉजिक्स सेवा क्षेत्रात प्रवेश केल्यानंतर कंपनीने ‘gene-to-GMP’ सोल्युशन्सपर्यंत क्षमता वाढवली.
31 मार्च 2026 रोजी कंपनीकडे 4,362 कर्मचारी होते. त्यापैकी 3,412 विज्ञान कर्मचारी, तर 479 कर्मचारी पीएचडीधारक होते. F&S अहवालानुसार, कंपनीतील पीएचडीधारक विज्ञान कर्मचाऱ्यांचे प्रमाण 14.04 टक्के होते.
आर्थिक वर्ष 2026 मध्ये कंपनीचा कामकाजातून मिळणारा महसूल 21,783.92 दशलक्ष रुपये, वर्षातील नफा 2,576.44 दशलक्ष रुपये, समायोजित EBITDA 5,937.65 दशलक्ष रुपये आणि समायोजित नफा 2,839.85 दशलक्ष रुपये होता. कंपनीचा ROCE 18.18 टक्के आणि ROE 11.96 टक्के राहिला.
पर्यावरण, सामाजिक आणि प्रशासन (ESG) क्षेत्रातील उपक्रमांवरही कंपनीने भर दिला असून आर्थिक वर्ष 2026 मध्ये कंपनीला Gold EcoVadis Sustainability Rating मिळाले. त्यामुळे जागतिक स्तरावरील अग्रणी 5 टक्के कंपन्यांमध्ये तिचा समावेश झाला. कंपनी 2023 मध्ये Science Based Targets initiative (SBTi) ची सिग्नेटरी, तर 2022 मध्ये Pharmaceutical Supply Chain Initiative (PSCI) ची सहयोगी सदस्य झाली.
प्रस्तावित आयपीओसाठी अॅक्सिस कॅपिटल लिमिटेड, सिटीग्रुप ग्लोबल मार्केट्स इंडिया प्रायव्हेट लिमिटेड, गोल्डमन सॅक्स (इंडिया) सिक्युरिटीज प्रायव्हेट लिमिटेड आणि जेएम फायनान्शियल लिमिटेड हे बुक रनिंग लीड मॅनेजर्स आहेत.
