कारच्या इंधन टाकीत विशेष कप्पा, ट्रकच्या बॉडी फ्रेममध्येही लपवला होता माल; तिघांना अटक
लखनऊ : केंद्रीय अमली पदार्थ नियंत्रण ब्युरोने (CBN) अंमली पदार्थ तस्करीविरोधात राबविलेल्या ‘ऑपरेशन ब्लॅक हॉक्स’ अंतर्गत आंतरराज्य हेरॉईन तस्कर टोळीचा पर्दाफाश केला आहे. मध्य प्रदेश आणि उत्तर प्रदेशातील ब्युरोच्या पथकांनी केलेल्या कारवाईत एकूण 18.64 किलो कच्चे हेरॉईन जप्त करण्यात आले असून, टोळीतील तीन संशयितांना अटक करण्यात आली आहे. जप्त केलेले अमली पदार्थ ईशान्येकडील राज्यातून आणण्यात आले होते आणि उत्तर प्रदेशात त्याचे वितरण केले जाणार होते.
ईशान्येकडील राज्यातून अमली पदार्थ उत्तर प्रदेशात आणले जाणार असल्याची अचूक माहिती केंद्रीय अमली पदार्थ नियंत्रण ब्युरोच्या मध्य प्रदेश कार्यालयाला मिळाली होती. त्यानुसार मध्य प्रदेश आणि उत्तर प्रदेशच्या संयुक्त पथकाने सुलतानपूर-लखनऊ महामार्गावर सापळा रचून 20 आणि 21 ऑगस्ट रोजी गस्त घातली.
वेगवेगळ्या टोलनाक्यांवर सातत्याने टेहळणी करत असताना 21 ऑगस्ट रोजी पथकाने आसाममध्ये नोंदणी असलेली एक ह्युंदाई क्रेटा कार अडवली. कार सुरुवातीला रिकामी आढळली आणि त्यातील प्रवासी आपण याबाबत अनभिज्ञ असल्याची बतावणी करत होते. मात्र, चौकशीदरम्यान केवळ 500 किलोमीटरच्या अंतरात चार वेळा इंधन भरल्याचे समोर आल्यानंतर अधिकाऱ्यांना संशय आला.
त्यानंतर कारच्या पेट्रोल टाकीची प्रत्यक्ष तपासणी केली असता पोकळ ध्वनी जाणवला. कार लखनऊ येथील ब्युरोच्या कार्यालयात नेण्यात आली. तेथे तांत्रिक मदतीने इंधन टाकी उघडल्यानंतर त्यामध्ये खास तयार केलेला गुप्त कप्पा आढळून आला. या कप्प्यात जलरोधक पाकिटांमध्ये मोठ्या प्रमाणात कच्चे हेरॉईन लपविण्यात आले होते. या कारवाईनंतर वाहनातील दोन्ही संशयितांना अटक करण्यात आली.
दरम्यान, आणखी एका गुप्तचर कारवाईत सिलीगुडीहून लखनऊच्या दिशेने येणाऱ्या एका अवजड ट्रकमधून अवैध मालाची वाहतूक होत असल्याची माहिती ब्युरोच्या उत्तर प्रदेश कार्यालयाला मिळाली. पथकाने अनेक टोलनाक्यांवर पाळत ठेवत संबंधित ट्रकचा मागोवा घेतला आणि अखेर बाराबंकीजवळ तो अडवला.
ट्रकची कसून झडती घेतल्यानंतर त्याच्या बॉडी फ्रेममध्ये खास बनविलेला गुप्त कप्पा आढळून आला. या कप्प्यात 2.16 किलो कच्चे हेरॉईन लपविण्यात आले होते. या कारवाईत आणखी एका संशयिताला अटक करण्यात आली.
दोन्ही कारवायांमध्ये मिळून एकूण 18.64 किलो कच्चे हेरॉईन जप्त करण्यात आले. यामध्ये कारमधून 16.48 किलो, तर अवजड व्यावसायिक वाहनातून 2.16 किलो कच्चे हेरॉईन जप्त करण्यात आल्याचे केंद्रीय अमली पदार्थ नियंत्रण ब्युरोने म्हटले आहे.
तिन्ही संशयितांवर अमली पदार्थ आणि मानसोपचारविषयक पदार्थ (एनडीपीएस) कायदा, 1985 मधील कठोर तरतुदींनुसार गुन्हा दाखल करण्यात आला आहे. तस्करीसाठी वापरण्यात आलेली आसाम नोंदणीकृत ह्युंदाई क्रेटा आणि अवजड व्यावसायिक ट्रक ही दोन्ही वाहनेही जप्त करण्यात आली आहेत.
ईशान्य भारतातील अमली पदार्थांच्या पुरवठादारांचा शोध घेण्यासह त्यांच्याशी संबंधित संपूर्ण वितरण जाळे उद्ध्वस्त करण्यासाठी व्यापक आर्थिक आणि लॉजिस्टिकल तपास सुरू असल्याचे केंद्रीय अमली पदार्थ नियंत्रण ब्युरोने स्पष्ट केले आहे.
तस्करीची भन्नाट शक्कल
कारच्या इंधन टाकीत बनावट पोकळी तयार करून त्यामध्ये हेरॉईनची पाकिटे लपविण्यात आली होती. दुसरीकडे ट्रकच्या बॉडी फ्रेममध्ये स्वतंत्र गुप्त कप्पा तयार करण्यात आला होता. मात्र, टोलनाक्यांवरील सातत्यपूर्ण पाळत आणि वाहनांची कसून तपासणी यामुळे तस्करीची ही पद्धत अखेर उघडकीस आली.
