पुणे- महाराष्ट्र–कर्नाटक सीमेवरील कोगनोळी टोल नाका आणि कर्नाटकातील हत्तरकी टोल नाका परिसरात स्वाभिमानी शेतकरी संघटनेचे नेते व माजी खासदार राजू शेट्टी यांच्या नेतृत्वाखाली हजारो शेतकऱ्यांनी बेमुदत धरणे आंदोलन सुरू केले आहे. या आंदोलनामुळे पुणे–बंगळुरू राष्ट्रीय महामार्गावरील वाहतूक पूर्णपणे विस्कळीत झाली असून अनेक ठिकाणी वाहनांच्या लांबच लांब रांगा लागल्या आहेत.
आंदोलक शेतकऱ्यांनी महामार्गावरच ठिय्या देत आंदोलन अधिक तीव्र केले आहे. धरणे आंदोलन करणाऱ्या शेतकऱ्यांसाठी जेवणाची व्यवस्था देखील करण्यात आली असून, रस्त्यावरच पंगती बसवण्यात आल्याचे चित्र पाहायला मिळत आहे. त्यामुळे या आंदोलनाला आता मोठ्या छावणीचे स्वरूप प्राप्त झाले आहे.
दरम्यान, साखर आणि इथेनॉलच्या दरवाढीबाबत केंद्र सरकारचे प्रतिनिधी आणि शेतकरी नेते यांच्यात सोमवारी नवी दिल्लीत महत्त्वाची बैठक झाली होती. या बैठकीत साखरेचा किमान हमीभाव ५० रुपये प्रतिकिलो करणे, सी-हेव्ही इथेनॉलचा दर ७० रुपये प्रतिलिटर करणे आणि साखर हंगाम लवकर सुरू केल्याबद्दल शेतकऱ्यांना प्रतिटन ५०० रुपये अनुदान देणे, या प्रमुख मागण्या मांडण्यात आल्या होत्या.
मात्र, या बैठकीत कोणताही ठोस आणि सकारात्मक निर्णय न झाल्याने स्वाभिमानी शेतकरी संघटनेने आक्रमक भूमिका घेत महाराष्ट्र–कर्नाटक सीमेवर आरपारच्या लढाईची हाक दिली. त्यानंतर हजारो शेतकरी कोगनोळी आणि हत्तरकी टोल नाका परिसरात एकवटले आणि बेमुदत आंदोलन सुरू करण्यात आले.
आंदोलनाची माहिती मिळताच दोन्ही राज्यांच्या पोलिसांनी घटनास्थळी धाव घेतली. महामार्गावर वाहनांच्या रांगा वाढू लागल्याने पोलिसांनी वाहतूक रोखून ती अंतर्गत ग्रामीण आणि पर्यायी मार्गांवर वळवण्यास सुरुवात केली. सुरक्षेच्या कारणास्तव पुणे–बेंगळुरू महामार्ग बंद ठेवण्यात आला असून, प्रशासनाने प्रवाशांना गैरसोय टाळण्यासाठी पर्यायी मार्गांचा वापर करण्याचे आवाहन केले आहे.
जोपर्यंत केंद्र सरकारकडून मागण्यांबाबत लेखी निर्णय जाहीर होत नाही, तोपर्यंत महामार्ग एक इंचही मोकळा केला जाणार नाही, असा इशारा राजू शेट्टी यांनी दिला आहे. आंदोलक शेतकऱ्यांनी टोल नाक्यावरच मुक्काम ठोकण्याची तयारी केली असून, कागल आणि निपाणी तालुक्यातील गावांमधून पिठलं-भाकरीसह सामूहिक जेवणाची व्यवस्था केली जात आहे. त्यामुळे हे आंदोलन पुढील काही काळ आणखी तीव्र होण्याची शक्यता व्यक्त केली जात आहे.
