पुणे महापालिकेची पहाटे कारवाई; नव्याने समाविष्ट गावांतील नागरिकांना अनधिकृत प्लॉटिंगपासून सावध राहण्याचे आवाहन
पुणे : पुणे महानगरपालिकेच्या अतिक्रमण व अनधिकृत बांधकाम निर्मूलन विभागाने मुंढवा परिसरात मोठी कारवाई करत तब्बल ३५ हजार चौरस फुटांचे आरसीसी अनधिकृत बांधकाम निष्कासित केले. बुधवारी (दि. १२ ऑगस्ट) सकाळी साडेसहा वाजल्यापासून ही कारवाई करण्यात आली.
महापालिका आयुक्तांच्या आदेशानुसार तसेच अतिरिक्त महापालिका आयुक्त (ज) पृथ्वीनीत कौर यांच्या मार्गदर्शनाखाली आणि अतिक्रमण तथा अनधिकृत बांधकाम निर्मूलन विभागाचे उपायुक्त सोमनाथ बनकर यांच्या नियंत्रणाखाली मुंढवा येथील सर्व्हे क्रमांक ८४/६ परिसरात ही कारवाई करण्यात आली.
या कारवाईत बांधकाम विकास विभागाचे कनिष्ठ अभियंता नितीन चांदणे, मालमत्ता व्यवस्थापन विभागाचे कनिष्ठ अभियंता निखिल गुलेचा यांच्यासह महापालिकेचे अधिकारी आणि कर्मचारी सहभागी झाले होते.
कारवाईदरम्यान मोठ्या प्रमाणावर यंत्रसामग्रीचा वापर करण्यात आला. ५ जेसीबी, ४ गॅस कटर, ४ ब्रेकर, कॉम्प्रेसर तसेच मोठ्या मनुष्यबळाच्या मदतीने अनधिकृत बांधकाम पाडण्यात आले. मुंढवा पोलिस ठाण्याच्या वरिष्ठ पोलिस निरीक्षकांच्या उपस्थितीत पोलिस बंदोबस्तही ठेवण्यात आला होता.
महापालिकेने विशेषतः नव्याने समाविष्ट झालेल्या गावांतील नागरिकांना सतर्कतेचे आवाहन केले आहे. महापालिकेचा विकास आराखडा (डीपी) मंजूर नसलेल्या किंवा बेकायदेशीर प्लॉटिंगमधील भूखंड खरेदी करून त्यावर अनधिकृत बांधकाम करू नये, असे प्रशासनाने स्पष्ट केले आहे. अशा अनधिकृत बांधकामांवर महापालिकेकडून कारवाई केली जाईल, असा इशाराही देण्यात आला आहे.
छायाचित्रातही महापालिकेच्या यंत्राद्वारे बहुमजली आरसीसी बांधकाम पाडण्याची कारवाई सुरू असल्याचे स्पष्ट दिसत आहे.
