होय… MH 12 च; पुण्याची ओळख कायम ठेवण्यासाठी गडकरींची सकारात्मक ग्वाही – मुरलीधर मोहोळ

• MH 12 कोड बदलू नये यासाठी केंद्रीय राज्यमंत्री मुरलीधर मोहोळ यांची नितीन गडकरींकडे मागणी

नवी दिल्ली : पुणे शहराची ओळख बनलेला ‘MH 12’ हा प्रादेशिक परिवहन कार्यालयाचा वाहन नोंदणी कोड कायम ठेवण्याचा मार्ग सुकर झाला आहे. केंद्रीय रस्ते परिवहन व महामार्ग मंत्री नितीन गडकरी यांनी MH 12 कोड कायम ठेवण्यासाठी आवश्यक सूचना दिल्या जातील,अशी सकारात्मक ग्वाही दिल्याची माहिती केंद्रीय राज्यमंत्री आणि पुण्याचे खासदार मुरलीधर मोहोळ यांनी दिली.

पुणे आरटीओमध्ये नवीन वाहनांच्या नोंदणीसाठी सध्या ‘MH 12 ZZ’ ही मालिका सुरू आहे. ही विद्यमान मालिका संपत आल्याने पुढील पर्यायी वाहन नोंदणी मालिका सुरू करण्याची प्रक्रिया प्रशासनाकडून करण्यात येत आहे. या पार्श्वभूमीवर पुण्याचा आरटीओ कोड MH 12 बदलला जाणार असल्याची चर्चा सुरू झाली होती. त्यामुळे पुणेकरांमध्येही याबाबत चिंता व्यक्त केली जात होती.पुणेकरांच्या भावना आणि शहराची ओळख लक्षात घेऊन केंद्रीय राज्यमंत्री मुरलीधर मोहोळ यांनी नवी दिल्ली येथे केंद्रीय रस्ते परिवहन व महामार्ग मंत्री नितीन गडकरी यांची भेट घेतली. पुण्याची ओळख बनलेला MH 12 हा कोड कोणत्याही परिस्थितीत बदलू नये, तसेच त्याच कोडअंतर्गत पुढील पर्यायी वाहन नोंदणी मालिका सुरू करण्यासाठी आवश्यक निर्णय घ्यावा, अशी आग्रहाची मागणी त्यांनी केली.या मागणीला नितीन गडकरी यांनी सकारात्मक प्रतिसाद दिला.

MH 12 हा कोड कायम ठेवण्यासाठी संबंधित विभागाला आवश्यक त्या सूचना दिल्या जातील, अशी ग्वाही त्यांनी दिल्याचे मोहोळ यांनी सांगितले.गडकरी यांच्या सकारात्मक भूमिकेमुळे पुण्याची ओळख जपणारा MH 12 हा वाहन नोंदणी कोड कायम राहण्याची शक्यता अधिक बळकट झाली आहे. पुढील पर्यायी नोंदणी मालिका कोणती असेल, याबाबत आता संबंधित विभागाच्या अधिकृत निर्णयाकडे पुणेकरांचे लक्ष लागले आहे.