३८ पोलीस अधिकारी-अंमलदारांच्या पथकाने परिसर पिंजून काढला; कर्वेनगरमधील बिजली तालीम चौकात मुलगी सुखरूप आढळली
पुणे : वारजे परिसरातून हरवलेल्या तीन वर्षांच्या चिमुकलीचा वारजे पोलिसांनी अवघ्या तासाभरात शोध घेऊन तिला सुखरूप आई-वडिलांच्या ताब्यात दिले. ही घटना सोमवारी (दि. ३ ऑगस्ट) घडली. पोलिसांच्या तत्परतेमुळे कोणताही अनुचित प्रकार घडण्यापूर्वीच मुलगी सुरक्षित मिळाल्याने तिच्या कुटुंबीयांनी पोलिसांचे आभार मानले.
वारजे पोलिसांनी दिलेल्या माहितीनुसार, तीन वर्षांची मुलगी सकाळी नऊच्या सुमारास वडारवस्ती परिसरात इतर मुलांसोबत खेळत होती. खेळता-खेळता ती परिसरातून निघून गेली. कुटुंबीयांनी तिचा शोध घेतला; मात्र ती सापडली नाही. त्यानंतर मुलीच्या आईने दुपारी एकच्या सुमारास वारजे पोलीस ठाण्यात माहिती दिली.
घटनेचे गांभीर्य लक्षात घेऊन पोलीस उपायुक्त सागर कवडे आणि सहायक पोलीस आयुक्त सुजाता तानवडे यांना माहिती देण्यात आली. वारजे पोलीस ठाण्याचे वरिष्ठ पोलीस निरीक्षक महेश बोळकोटगी यांच्या मार्गदर्शनाखाली अधिकारी आणि अंमलदारांची स्वतंत्र शोधपथके तयार करण्यात आली.
पोलिसांनी वडारवस्ती, कर्वेनगर आणि आजूबाजूचा परिसर पायी फिरून तपासला. परिसरातील सीसीटीव्ही फुटेजची पाहणी करण्यात आली. नागरिक, पोलीस मित्र आणि गुप्त बातमीदारांनाही मुलीची माहिती देण्यात आली. व्हॉट्सॲप ग्रुपच्या माध्यमातूनही मुलीचा फोटो आणि माहिती प्रसारित करण्यात आली.
मुलीचा माग काढत पोलीस दुपारी दोनच्या सुमारास कर्वेनगरमधील बिजली तालीम चौकात पोहोचले. तेथे मुलगी एका महिलेजवळ सुखरूप बसलेली आढळली. संबंधित महिलेने मुलगी एकटीच रस्ता ओलांडताना दिसल्याने तिला सुरक्षिततेसाठी स्वतःजवळ थांबवून ठेवल्याचे सांगितले. मुलगी लहान असल्यामुळे तिला स्वतःचे नाव आणि पत्ता सांगता येत नव्हता. पाऊस कमी झाल्यानंतर तिला पोलीस चौकीत घेऊन जाण्याचा विचार महिलेने केला होता.
पोलिसांनी खात्री केल्यानंतर मुलीला सुखरूप तिच्या आई-वडिलांच्या ताब्यात दिले. या प्रकरणात कोणताही अनुचित प्रकार घडलेला नसल्याचे पोलिसांनी स्पष्ट केले.
या शोधमोहिमेत वारजे पोलीस ठाण्यातील तीन पोलीस निरीक्षक, पाच पोलीस उपनिरीक्षक आणि ३० पोलीस अंमलदार सहभागी झाले होते.
