पुणे: महाराष्ट्राचे मुख्यमंत्री देवेंद्र फडणवीस यांच्या ५६व्या वाढदिवसानिमित्त पुणे शहरात भारतीय जनता पक्षाच्या वतीने आयोजित भव्य रक्तदान महायज्ञाला नागरिकांनी उत्स्फूर्त प्रतिसाद दिला. शहरातील २६ मंडलांमध्ये एकाच वेळी उभारण्यात आलेल्या ४८ रक्तदान केंद्रांवर तब्बल ५,२४८ रक्तपिशव्यांचे संकलन करण्यात आले. सामाजिक बांधिलकी जपत साजरा करण्यात आलेला हा उपक्रम पुणे शहरातील सर्वांत मोठ्या रक्तदान उपक्रमांपैकी एक ठरला.
भाजपचे महाराष्ट्र प्रदेशाध्यक्ष रवींद्र चव्हाण यांच्या नेतृत्वाखाली राज्यभर या रक्तदान महायज्ञाचे आयोजन करण्यात आले. राज्यातील विविध रुग्णालये आणि रक्तपेढ्यांमध्ये जाणवणारा रक्ताचा तुटवडा दूर करण्यासाठी संपूर्ण महाराष्ट्रातून एक लाख रक्तपिशव्या संकलित करण्याचा संकल्प पक्षाने केला आहे. या आवाहनाला प्रतिसाद देत पुणे शहर भाजपने विविध भागांत रक्तदान शिबिरे आयोजित केली.
पुणे शहर भाजपचे अध्यक्ष धीरज घाटे यांनी या उपक्रमाची माहिती देताना सांगितले की, मुख्यमंत्री देवेंद्र फडणवीस यांचा वाढदिवस केवळ उत्सवी स्वरूपात साजरा न करता समाजोपयोगी सेवाकार्यातून साजरा करण्याचा निर्णय घेण्यात आला. संकलित करण्यात आलेले रक्त शहरातील विविध रक्तपेढ्यांना देण्यात येणार असून, त्यामुळे गरजू रुग्णांना मोठा दिलासा मिळणार आहे.
शिबिरांमध्ये युवक, महिला, सामाजिक कार्यकर्ते, भाजपचे पदाधिकारी, कार्यकर्ते आणि सर्वसामान्य नागरिकांनी मोठ्या संख्येने सहभाग नोंदविला. प्रत्येक केंद्रावर रक्तदात्यांसाठी वैद्यकीय तपासणी, प्रशिक्षित आरोग्य कर्मचारी आणि आवश्यक सुविधांची व्यवस्था करण्यात आली होती.
