अभिनेत्री भार्गवी चिरमुले यांच्या मातोश्रींची रक्कम वारजे माळवाडी पोलिसांनी मिळवून दिली
पुणे, दि. १८ जुलै : अभिनेत्री भार्गवी चिरमुले यांच्या मातोश्री स्वाती शिरीष चिरमुले यांची सायबर फसवणुकीत गेलेली ३५ हजार रुपयांची रक्कम वारजे माळवाडी पोलिस ठाण्याच्या सायबर पथकाने तांत्रिक तपासाद्वारे हस्तगत करून त्यांना परत केली.
पोलिसांनी दिलेल्या माहितीनुसार, कर्वेनगर परिसरात राहणाऱ्या ७० वर्षीय स्वाती चिरमुले यांना २३ ऑगस्ट २०२५ रोजी सायंकाळी एमएनजीएल गॅस कनेक्शनच्या बिलासंदर्भात व्हिडिओ कॉल आला होता. कॉल करणाऱ्या व्यक्तीच्या सूचनेनुसार त्यांनी मोबाईलवर प्रक्रिया केल्यानंतर त्यांच्या बँक खात्यातून ३५ हजार रुपये ऑनलाइन पद्धतीने काढण्यात आले.
फसवणूक झाल्याचे लक्षात आल्यानंतर त्यांनी सायबर विभागाकडे ऑनलाइन तक्रार केली. त्यानंतर वारजे माळवाडी पोलिस ठाण्याच्या सायबर पथकाने तांत्रिक विश्लेषण करून फसवणूक झालेली रक्कम ज्या बँक खात्यात जमा झाली होती, ते खाते गोठवले. न्यायालयीन प्रक्रिया पूर्ण करून ही संपूर्ण रक्कम स्वाती चिरमुले यांना शनिवारी परत करण्यात आली.
रक्कम परत मिळाल्यानंतर अभिनेत्री भार्गवी चिरमुले आणि त्यांच्या मातोश्रींनी वारजे माळवाडी पोलिसांचे आभार मानले. वारजे माळवाडी पोलीस ठाणेचे वरिष्ठ पोलीस निरीक्षक महेश बोळकोटगी व सायबर पथकाचे प्रभारी पोलीस उप निरीक्षक संजय नरळे पोलीस अंमलदार रविंद्र गाडे, शशिकांत गोहिणे पथकाने ही कारवाई केली.
