पुणे महापालिकेच्या नाव समितीसमोर उपरोधिक प्रस्ताव; प्रशासन आणि कंपनीच्या कथित संबंधांवर गंभीर आरोप
पुणे, दि. १७ जुलै : पुणे महानगरपालिकेच्या घनकचरा व्यवस्थापन विभागाचे नाव बदलून ‘पुणे मनपा भूमिग्रीन घनकचरा व्यवस्थापन विभाग’ असे करावे, असा उपरोधिक प्रस्ताव महापालिकेच्या नाव समितीसमोर मांडण्यात आला आहे. या प्रस्तावातून घनकचरा व्यवस्थापन विभाग आणि भूमिग्रीन कंपनीमधील कथित जवळिकीवर तीव्र टीका करण्यात आली आहे.
नाव समितीसमोर सादर करण्यात आलेल्या प्रस्तावाचे सूचक रफिक अब्दुल रहीम शेख असून, सौ. दीपाली संतोष डोख यांनी त्याला अनुमोदन दिले आहे.
प्रस्तावात म्हटले आहे की, महापालिकेच्या घनकचरा व्यवस्थापन विभागातील अभियंते, वरिष्ठ अधिकारी, दक्षता विभाग आणि आयुक्त कार्यालय हे भूमिग्रीन कंपनीच्या प्रभावाखाली कार्यरत असल्याचे चित्र निर्माण झाले आहे. “भूमिग्रीनसाठी वाट्टेल ते” या भूमिकेतून प्रशासन काम करत असल्याचा आरोपही प्रस्तावात करण्यात आला आहे.
घनकचरा व्यवस्थापन विभाग आणि भूमिग्रीन कंपनी या एकाच नाण्याच्या दोन बाजू असल्याचा समज स्थानिक स्वराज्य संस्थांमध्ये निर्माण झाल्याचे प्रस्तावकर्त्यांनी म्हटले आहे. भूमिग्रीन कंपनीला मोठ्या किमतीच्या निविदा मिळवून देण्यासाठी प्रशासनातील काही घटक प्रयत्नशील असल्याचा गंभीर आरोपही करण्यात आला आहे.
घनकचऱ्याऐवजी महापालिका प्रशासनात ‘धनकचरा’ असा उल्लेख होण्याची वेळ आली असल्याची उपरोधिक टिप्पणी प्रस्तावात करण्यात आली आहे. भूमिग्रीन कंपनीचा उल्लेख होताच प्रशासनात उत्साह आणि जल्लोष निर्माण होत असल्याचे नमूद करत, कंपनी आणि घनकचरा विभागाचे कथित अतूट नाते भविष्यातील पुणेकरांच्या स्मरणात राहावे, यासाठी विभागाच्या नावातच भूमिग्रीनचा समावेश करावा, अशी मागणी करण्यात आली आहे.
हा प्रस्ताव उपरोधिक स्वरूपाचा असला तरी त्यातून घनकचरा प्रकल्पांच्या निविदा प्रक्रिया, ठेकेदारांची निवड आणि प्रशासनाच्या भूमिकेबाबत गंभीर प्रश्न उपस्थित करण्यात आले आहेत.
या आरोपांबाबत पुणे महापालिका प्रशासन अथवा भूमिग्रीन कंपनीची प्रतिक्रिया अद्याप समोर आलेली नाही. त्यांची भूमिका प्राप्त झाल्यानंतर ती प्रसिद्ध करण्यात येईल.
