पुणे : पुणे शहर गुन्हे शाखेच्या अंमली पदार्थविरोधी पथक-१ ने मोठी कारवाई करत तब्बल ५ कोटी ७९ लाख रुपयांचे २ किलो ८९५ ग्रॅम मेफेड्रोन (एमडी) जप्त केले. या प्रकरणी सराईत आरोपी प्रशांत सुरेश सावंत (वय ३८) याला अटक करण्यात आली असून त्याच्याकडून अंमली पदार्थांसह इतर साहित्यही जप्त करण्यात आले आहे.
पोलिसांनी दिलेल्या माहितीनुसार, ‘ड्रग्ज फ्री पुणे’ अभियानांतर्गत अंमली पदार्थांची विक्री आणि तस्करी करणाऱ्यांविरोधात कठोर कारवाई करण्याचे आदेश पोलिस आयुक्त अमितेश कुमार यांनी दिले आहेत. त्यानुसार अंमली पदार्थविरोधी पथक-१ रात्री गस्त घालत असताना कात्रज चौक परिसरातील आयएसआयएससी पुलाखाली, सावंत कॉर्नरजवळ संशयित हालचाली करणाऱ्या व्यक्तीची तपासणी करण्यात आली.
तपासणीदरम्यान आरोपीकडून २ किलो ८९५ ग्रॅम मेफेड्रोन (एमडी) हा अंमली पदार्थ जप्त करण्यात आला. या मालाची अंदाजे किंमत ५ कोटी ७९ लाख रुपये असून इतर साहित्यांसह जप्ती करण्यात आली आहे.
या प्रकरणी भारती विद्यापीठ पोलीस ठाण्यात गुन्हा क्रमांक ३६८/२०२६ दाखल करण्यात आला असून एनडीपीएस कायद्याच्या कलम ८(क) व २१(क) अंतर्गत गुन्हा नोंदविण्यात आला आहे. पुढील तपास अंमली पदार्थविरोधी पथक-१ चे पोलीस उपनिरीक्षक योगेश कोतेकर करीत आहेत.
ही कारवाई पोलिस आयुक्त अमितेश कुमार, सहपोलीस आयुक्त संजय दराडे, अपर पोलिस आयुक्त (गुन्हे) तेजस्वी सातपुते, पोलिस उपायुक्त (गुन्हे) गौहर हसन यांच्या मार्गदर्शनाखाली अंमली पदार्थविरोधी पथक-१ ने यशस्वीरीत्या पार पाडली.
