पुणे शहर गुन्हे शाखेकडून चार अँटी-चेन स्नॅचिंग पथके तैनात,चेन स्नॅचिंग रोखण्यासाठी गुन्हे शाखेची कारवाई
पुणे | प्रतिनिधी
संत श्री जगद्गुरू तुकाराम महाराज आणि संत श्री ज्ञानेश्वर महाराज पालखी सोहळ्याच्या पार्श्वभूमीवर पुणे शहर पोलिसांनी सुरक्षेच्या दृष्टीने विशेष खबरदारी घेतली असून, चेन स्नॅचिंगसारखे प्रकार रोखण्यासाठी गुन्हे शाखेकडून विशेष पथके तैनात करण्यात आली आहेत.
पुणे शहरात आषाढी वारी पालखी सोहळा ९ जुलै ते १२ जुलै २०२६ या कालावधीत आगमन, मुक्काम आणि प्रस्थान अशा स्वरूपात पार पडत आहे. हा सोहळा ऐतिहासिक परंपरेचा असून पुणे शहरातील सर्वाधिक लोकप्रिय धार्मिक सोहळ्यांपैकी एक मानला जातो. राज्यभरातून तसेच देश-विदेशातून भाविक आणि पर्यटक हा सोहळा पाहण्यासाठी पुण्यात येतात.
पालखी सोहळ्याशी लाखो भाविकांच्या भावना जोडलेल्या असल्याने आगमन, मुक्काम आणि मार्गक्रमणाच्या वेळी कोणताही अनुचित प्रकार घडू नये, यासाठी शहर पोलिसांकडून योग्य तो बंदोबस्त ठेवण्यात आला आहे.
दरम्यान, चेन स्नॅचिंगचे प्रकार घडू नयेत यासाठी पुणे शहर गुन्हे शाखेकडून ४ अँटी-चेन स्नॅचिंग पथके तयार करण्यात आली आहेत. तसेच संशयित व्यक्तींना ताब्यात घेऊन चौकशी करण्यासाठी स्वतंत्र पथकही नियुक्त करण्यात आले आहे.
या पथकांनी ९ जुलै ते १२ जुलै या कालावधीत ६७ महिला आणि २२ पुरुष असे एकूण ८९ संशयित ताब्यात घेतले आहेत. सहाय्यक पोलीस निरीक्षक मोहिते आणि पोलीस पथक त्यांच्याकडे चौकशी करत असल्याची माहिती पोलिसांनी दिली आहे.
पालखी बंदोबस्त पूर्ण झाल्यानंतर संशयित व्यक्तींची तसेच निष्पन्न झालेल्या आरोपींची संख्या आणि नावे जाहीर करण्यात येतील, असे पुणे शहर पोलिसांच्या प्रसिद्धीपत्रकात नमूद करण्यात आले आहे.
