चाकणमध्ये पाण्यात अडकलेल्या २० ते २५ जणांची सुटका; मळवली, पवना परिसरात दरड कोसळल्याने शोधकार्य सुरू
पुणे, दि. ६ जुलै २०२६ : पुणे महानगर प्रदेश आणि जिल्ह्यात सुरू असलेल्या मुसळधार पावसामुळे विविध भागांत पूरस्थिती निर्माण झाली असून, काही ठिकाणी दरड कोसळण्याच्या दुर्घटनाही घडल्या आहेत. या आपत्कालीन परिस्थितीचा सामना करण्यासाठी पुणे महानगर प्रदेश विकास प्राधिकरणाचा अग्निशमन विभाग आणि पुणे महानगर आपत्ती प्रतिसाद पथक अर्थात ‘पीडीआरएफ’ युद्धपातळीवर मदत आणि बचावकार्य करीत आहे.
चाकण एमआयडीसी परिसरातील चिंबळी फाटा येथील एका कंपनीमध्ये रविवारी सकाळी पाणी शिरल्याने सुमारे २० ते २५ जण अडकले होते. वाघोली अग्निशमन केंद्राच्या जवानांनी तातडीने घटनास्थळी पोहोचून सर्व अडकलेल्या नागरिकांची सुरक्षित सुटका केली.
मावळ तालुक्यातील मळवली रेल्वे स्थानकाजवळील पाटण-बोरज रस्त्यावर पहाटे दरड कोसळल्याची दुर्घटना घडली. पीएमआरडीएच्या अहवालानुसार, दुर्घटनास्थळी एका व्यक्तीला ढिगाऱ्याखालून बाहेर काढण्यात आले असून, उर्वरित नागरिकांचा शोध घेण्यासाठी बचावमोहीम सुरू करण्यात आली आहे. मळवली परिसरात २५ ते ३० नागरिक अडकल्याची माहिती पीएमआरडीएच्या नियंत्रण कक्षाला मिळाल्यानंतर आपत्ती व्यवस्थापन पथक घटनास्थळी रवाना झाले.
पवना धरण परिसरातील आपटी गावातही दरड कोसळल्याने २५ ते ३० नागरिक अडकल्याची माहिती प्राप्त झाली आहे. या ठिकाणी पीएमआरडीएचे बचाव पथक दाखल झाले असून, शोध आणि बचावकार्य सुरू आहे.
लोणावळा येथील वेदांत कॉलेज परिसरात पूरस्थिती निर्माण झाल्याने काही विद्यार्थी अडकल्याची माहिती जिल्हाधिकारी कार्यालयाकडून पीएमआरडीएला देण्यात आली. त्यानंतर मदत पथक तत्काळ घटनास्थळी रवाना करण्यात आले.
घोरावडी रेल्वे स्थानकाजवळ पाण्यामध्ये एक बस अडकल्याची आणि बसमध्ये प्रवासी असल्याची माहिती मिळाल्यानंतर अग्निशमन दलाने बचावकार्य सुरू केले. मारुंजी अग्निशमन केंद्राच्या हद्दीतील कासारसाई येथे घरांमध्ये पाणी शिरल्याने नागरिकांना मदत करण्यात आली. मंत्रा २४ वेस्ट सोसायटीच्या तळघरात तसेच जांभे येथील एका घराच्या पार्किंगमध्ये पाणी शिरल्यानंतर अग्निशमन दलाने आवश्यक मदत पुरवली.
आळंदीजवळील धानोरे गावात मुसळधार पावसामुळे रस्त्यावर झाड कोसळले होते. वाघोली अग्निशमन केंद्राच्या जवानांनी हे झाड बाजूला करून रस्ता वाहतुकीसाठी खुला केला.
दरम्यान, धायरी येथील लक्ष्मी पार्क सोसायटीतील एका सदनिकेच्या बेडरूममध्ये अडकलेल्या ११ आणि चार वर्षांच्या दोन मुलींची नांदेड सिटी अग्निशमन केंद्राच्या जवानांनी मध्यरात्री सुखरूप सुटका केली.
तत्पूर्वी, नांदेड सिटी येथील मंगल भैरव सोसायटीमधील एका सदनिकेत सिलेंडरच्या रेग्युलेटरमधून गॅसगळती होत असल्याची माहिती मिळाल्यानंतर अग्निशमन दलाने तातडीने घटनास्थळी पोहोचून गॅसगळती बंद केली. संबंधित सिलेंडर सुरक्षितरीत्या गॅस एजन्सीकडे सुपूर्द करण्यात आला.
पीएमआरडीए प्रशासन आणि आपत्ती व्यवस्थापन पथके पूर्णपणे सतर्क असून, पूरग्रस्त आणि दरडप्रवण भागातील नागरिकांनी सुरक्षित ठिकाणी राहावे, पाण्याच्या प्रवाहातून जाण्याचा प्रयत्न करू नये आणि प्रशासनाच्या सूचनांचे पालन करावे, असे आवाहन करण्यात आले आहे.
“आपली सुरक्षितता हीच आमची सर्वोच्च प्राथमिकता आहे. कृपया सतर्क राहा आणि सुरक्षित राहा,” असे पीएमआरडीए प्रशासनाने म्हटले आहे.
आपत्कालीन संपर्क क्रमांक
पीएमआरडीए आपत्कालीन मदत क्रमांक : ९५४५२८२९३०
नांदेड सिटी अग्निशमन केंद्र : ०२०-६७५२०००१ / ०२०-६७५२०००२
मारुंजी अग्निशमन केंद्र : ०२०-६७९९२१०० / ०२०-६७९९२१०१
वाघोली अग्निशमन केंद्र : ०२०-२९५१८१०१ / ०२०-२९५१९१०१
