🟥 जाधववाडी लघुपाटबंधारे तलाव कोणत्याही क्षणी भरण्याची शक्यता; इंद्रायणी नदीकाठच्या गावांना सतर्कतेचा इशारा

🟨 देहू–आळंदी ते तुळापूरपर्यंत नदीपात्रात न जाण्याचे आवाहन; वारकरी, नागरिक आणि शेतकऱ्यांनी खबरदारी घ्यावी

पुणे | प्रतिनिधी

पुणे जिल्ह्यात सुरू असलेल्या मुसळधार पावसामुळे जाधववाडी लघुपाटबंधारे तलाव (ल.पा.) कोणत्याही क्षणी शंभर टक्के भरून अनियंत्रित विसर्ग सुरू होण्याची शक्यता निर्माण झाली आहे. त्यामुळे पुणे पाटबंधारे विभागाने इंद्रायणी नदीकाठच्या गावांसाठी तातडीचा सतर्कतेचा इशारा जारी केला आहे.

पुणे पाटबंधारे विभागाचे कार्यकारी अभियंता दिगंबर डुबल यांनी दिलेल्या माहितीनुसार, धरणातील वाढता येवा लक्षात घेता सुधा नदी व इंद्रायणी नदी पात्रात कोणत्याही क्षणी अनियंत्रित विसर्ग सुरू होऊ शकतो.

त्यामुळे जांबवडे, सुदुंबरे, सुदवडी, देहू, आळंदी ते तुळापूर या परिसरातील सर्व नदीकाठच्या गावांतील नागरिकांनी नदीपात्राजवळ जाणे टाळावे. तसेच नदीपात्रात असलेले जनावरे, शेतीसाहित्य किंवा इतर वस्तू तातडीने सुरक्षितस्थळी हलवाव्यात, असे आवाहन करण्यात आले आहे.

विशेष म्हणजे, पायी दिंडी सोहळ्यानिमित्त देहू आणि आळंदी येथे दाखल झालेल्या वारकरी भाविकांनी कोणत्याही परिस्थितीत इंद्रायणी नदीपात्रात उतरू नये, असेही प्रशासनाने स्पष्ट केले आहे.

यासोबतच संबंधित ग्रामपंचायती, नगरपरिषद, महापालिका तसेच स्थानिक प्रशासनाला सतर्क राहण्याच्या सूचना देण्यात आल्या असून, परिस्थितीवर पुणे पाटबंधारे विभागाकडून सातत्याने लक्ष ठेवण्यात येत आहे.

पहिल्याच मुसळधार पावसात ‘मिसिंग लिंक’चे पितळ उघडे; स्लॅब कोसळून मुंबई–पुणे वाहतूक ठप्प

मावळच्या पाटण गावात घरावर कोसळली दरड:कुटुंब ढिगाऱ्याखाली अडकल्याची भीती