🟥 पुणे–मुंबई द्रुतगती मार्गासह जुना महामार्ग वाहतुकीसाठी बंद

मुंबई-पुणे एक्स्प्रेस वेच्या हजारो कोटींच्या ‘मिसिंग लिंक’ प्रकल्पावर दरड कोसळून रस्ता बंद

🟨 लोणावळा धरण शंभर टक्के भरले; अनियंत्रित विसर्ग सुरू, मावळात घरावर दरड कोसळली; नागरिकांना प्रवास टाळण्याचे आवाहन

दरड कोसळणे व सतत सुरू असलेल्या मुसळधार पावसामुळे पुणे–मुंबई द्रुतगती मार्ग तसेच जुना मुंबई–पुणे महामार्ग या दोन्ही मार्गांवरील वाहतूक गंभीरपणे प्रभावित झाली आहे.पुणे–मुंबई तसेच मुंबई–पुणे या दोन्ही दिशेची वाहतूक पुढील आदेशापर्यंत पूर्णपणे बंद करण्यात आली आहे.नागरिकांनी पुढील सूचना मिळेपर्यंत पुणे–मुंबई किंवा मुंबई–पुणे असा प्रवास करू नये, असे आवाहन करण्यात येत आहे. अत्यावश्यक प्रवास असल्यास कृपया प्रशासनाकडून वेळोवेळी जारी करण्यात येणाऱ्या वाहतूकविषयक सूचना व अद्ययावत माहितीनुसारच प्रवास करावा.नागरिकांनी सहकार्य करावे, असे आवाहन शासनाने केले आहे …

पुणे | प्रतिनिधी

पुणे जिल्ह्यात सुरू असलेल्या मुसळधार पावसामुळे जनजीवन विस्कळीत झाले असून पुणे–मुंबई द्रुतगती मार्ग तसेच जुना मुंबई–पुणे महामार्ग या दोन्ही मार्गांवरील वाहतूक पुढील आदेशापर्यंत पूर्णपणे बंद करण्यात आली आहे. दरड कोसळण्याच्या घटना, धरणे शंभर टक्के भरून विसर्ग सुरू होणे आणि सखल भागात निर्माण झालेली धोकादायक परिस्थिती लक्षात घेऊन प्रशासनाने नागरिकांना अत्यावश्यक कारणाशिवाय प्रवास टाळण्याचे आवाहन केले आहे.

दरम्यान, लोणावळा धरण सोमवारी (६ जुलै) पहाटे शंभर टक्के भरले असून धरणाच्या अनियंत्रित सांडव्यातून इंद्रायणी नदीत विसर्ग सुरू करण्यात आला आहे. पावसाचा जोर कायम राहिल्यास विसर्गात आणखी वाढ होण्याची शक्यता व्यक्त करण्यात आली आहे. नदीपात्रात कोणीही उतरू नये तसेच नदीकाठावरील जनावरे आणि साहित्य तातडीने सुरक्षितस्थळी हलविण्याचे आवाहन टाटा पॉवर प्रशासनाने केले आहे.

याचबरोबर मळवंडी ठुले लघुपाटबंधारे तलावही १०० टक्के भरला असून द्वारविरहित (Ungated) तलावातून कोथुर्णे ओढा (पवना नदी) पात्रात अनियंत्रित विसर्ग सुरू झाला आहे. कोथुर्णे, ब्राह्मणोली, वारू, काले आणि ओढ्याकाठच्या गावांतील नागरिक व शेतकऱ्यांनी ओढ्यालगत जाणे टाळावे, असा इशारा जलसंपदा विभागाने दिला आहे.

दरम्यान, मावळ तालुक्यातील पाटण गावात पहाटे एका घरावर दरड कोसळल्याची घटना घडली. प्राथमिक माहितीनुसार घरातील संपूर्ण कुटुंब ढिगाऱ्याखाली अडकल्याची भीती व्यक्त करण्यात आली आहे. घटनेची माहिती मिळताच तहसीलदार आणि स्थानिक प्रशासन घटनास्थळी दाखल झाले असून बचावकार्य सुरू करण्यात आले आहे. एनडीआरएफच्या पुणे येथील पाचव्या बटालियनचे ३० सदस्यांचे पथक आवश्यक साहित्यांसह घटनास्थळी रवाना झाले आहे.

सध्याच्या परिस्थितीमुळे पुणे जिल्ह्यातील नागरिकांनी नदी, ओढे, धरण परिसर आणि दरडप्रवण भागांपासून दूर राहावे, तसेच प्रशासनाकडून वेळोवेळी जारी करण्यात येणाऱ्या सूचनांचे पालन करावे, असे आवाहन करण्यात आले आहे. कोणतीही आपत्कालीन परिस्थिती उद्भवल्यास नागरिकांनी जिल्हा आपत्ती व्यवस्थापन कक्ष, पुणे महानगरपालिका, पिंपरी-चिंचवड महानगरपालिका किंवा पीएमआरडीएच्या आपत्ती नियंत्रण कक्षाशी तातडीने संपर्क साधावा, असे प्रशासनाने स्पष्ट केले आहे.