🟥 आंतरजिल्हा दूध भेसळ रॅकेट उद्ध्वस्त; १३ जण गजाआड

🟨 पुणे LCB-FDA ची ५ जिल्ह्यांत धडक कारवाई; ३ कोटींचा मुद्देमाल जप्त, नामांकित डेअरी कंपन्यांच्या पुरवठ्यावर संशय

पुणे | प्रतिनिधी

पुणे ग्रामीण पोलिसांच्या स्थानिक गुन्हे शाखेने (LCB) आणि अन्न व औषध प्रशासनाने (FDA) संयुक्त कारवाई करत राज्यभर कार्यरत असलेल्या मोठ्या आंतरजिल्हा दूध भेसळ रॅकेटचा पर्दाफाश केला आहे. या कारवाईत १३ जणांना अटक करण्यात आली असून पाच जिल्ह्यांमध्ये छापे टाकून तब्बल ३ कोटी रुपयांचा मुद्देमाल जप्त करण्यात आला आहे. या रॅकेटचे मुख्य केंद्र पुणे जिल्ह्यातील मंचर असल्याचे तपासात निष्पन्न झाले आहे.

पुणे ग्रामीणचे पोलिस अधीक्षक संदीपसिंग गिल आणि अन्न व औषध प्रशासनाचे आयुक्त तुकाराम मुंढे यांच्या मार्गदर्शनाखाली ही मोहीम राबविण्यात आली. मंचर येथून दोन संशयितांना ताब्यात घेतल्यानंतर संपूर्ण रॅकेट उघडकीस आले. त्यानंतर पोलिसांनी अकलूज (सोलापूर), अहिल्यानगर, सिल्लोड (छत्रपती संभाजीनगर) आणि सांगली येथे एकाच वेळी धाडसत्र राबविले.

धक्कादायक भेसळीचा प्रकार

तपासात समोर आलेल्या माहितीनुसार, १,००० लिटर शुद्ध दुधात तब्बल ५०० लिटर बनावट दूध मिसळले जात होते. हे बनावट दूध तयार करण्यासाठी उग्र वास न येणारा शाम्पू, घातक रासायनिक पदार्थ, पाणी आणि दूध पावडर यांचा वापर केला जात होता. त्यानंतर हे भेसळयुक्त दूध विविध डेअरींकडे पाठविले जात असल्याचा आरोप आहे.

दोन वर्षांपासून ग्राहकांच्या आरोग्याशी खेळ?

या भेसळयुक्त दुधापासून तयार करण्यात आलेले पनीर, खवा आणि इतर दुग्धजन्य पदार्थ गेल्या दोन वर्षांपासून ग्राहकांपर्यंत पोहोचत असल्याची धक्कादायक माहिती तपासात समोर आली आहे. यामुळे हजारो ग्राहकांच्या आरोग्याचा प्रश्न ऐरणीवर आला आहे.

५० अधिकाऱ्यांची गुप्त मोहीम

या रॅकेटबाबत गुप्त माहिती मिळाल्यानंतर स्थानिक गुन्हे शाखेचे वरिष्ठ पोलिस निरीक्षक प्रमोद क्षीरसागर यांच्या नेतृत्वाखाली ३० पोलिस आणि FDA चे २० हून अधिक अधिकारी अशा सुमारे ५० जणांच्या विशेष पथकाने अत्यंत गोपनीय पद्धतीने ही कारवाई यशस्वी केली.

या प्रकरणी मंचर पोलिस ठाण्यात गुन्हा दाखल करण्यात आला असून, सर्व आरोपींना घोडेगाव न्यायालयात हजर करण्यात आले आहे.

दरम्यान, या रॅकेटमध्ये काही मोठे डेअरी चालक आणि व्यावसायिकांचा सहभाग असण्याची शक्यता पोलिसांनी व्यक्त केली असून, त्या दृष्टीने पुढील तपास सुरू आहे.