🟥 अवघ्या २४ तासांत धरणसाखळीत जवळपास २ TMC पाण्याची भर; म्हणजे पुणेकरांसाठी सुमारे ४० दिवसांचा पाणीसाठा

🟨 ११ जूनला अवघ्या ३ TMC साठ्याच्या आधारे दिवसाआड पाणीपुरवठ्याचा निर्णय; आता बदललेल्या परिस्थितीत फेरआढाव्याची अपेक्षा

पुणे | प्रतिनिधी

पुणे शहराला पाणीपुरवठा करणाऱ्या खडकवासला धरणसाखळीत अवघ्या २४ तासांत १.८४ TMC (जवळपास २ TMC) पाणीसाठ्याची भर पडली आहे. ५ जुलै रोजी सकाळी ६ वाजता धरणसाखळीत ५.०९ TMC (१७.४७ टक्के) पाणीसाठा होता. तो ६ जुलै रोजी सकाळी ६ वाजता ६.९३ TMC (२३.७८ टक्के) इतका झाला आहे.

विशेष म्हणजे, ११ जून रोजी पुणे महानगरपालिकेने धरणसाखळीत अवघा ३ TMC पाणीसाठा उपलब्ध असल्याचे सांगत १५ जूनपासून दिवसाआड पाणीपुरवठ्याचा निर्णय जाहीर केला होता. त्यानुसार गेल्या तीन आठवड्यांपासून पुणेकर दिवसाआड पाणीपुरवठा सहन करत आहेत.

दरम्यान, गेल्या २४ तासांत खडकवासला धरणसाखळीच्या पाणलोट क्षेत्रात झालेल्या मुसळधार पावसामुळे १,८७१ एमसीएफटी पाण्याची आवक झाली. परिणामी धरणांतील साठ्यात जवळपास २ TMC वाढ झाली आहे.

पुणे शहराच्या सरासरी पाणीवापराचा विचार करता, अवघ्या २४ तासांत वाढलेला हा साठा सुमारे ४० दिवसांचा पाणीपुरवठा करण्याइतका असल्याचे गणित आहे. त्यामुळे पावसाने वेग घेत असताना आणि धरणांमध्ये जलद गतीने पाणी जमा होत असताना, दिवसाआड पाणीपुरवठ्याच्या निर्णयाचा फेरआढावा घेण्याची चर्चा नागरिकांमध्ये सुरू झाली आहे.

खडकवासला, पानशेत, वरसगाव आणि टेमघर या चार धरणांची एकूण साठवण क्षमता सुमारे २८ TMC आहे. याच धरणांमधून पुणे शहर, उपनगरे तसेच औद्योगिक क्षेत्राला पाणीपुरवठा केला जातो. पुणे शहराला वर्षभरात सुमारे १८ TMC पाण्याची आवश्यकता भासते, तर सरासरी दरमहा सुमारे दीड TMC पाणी वापरले जाते. याशिवाय उन्हाळ्यात शेतीसाठी कालव्यांद्वारेही मोठ्या प्रमाणावर पाणी सोडावे लागते.

सध्या धरणसाखळीतील पाणीसाठा झपाट्याने वाढत असून, येत्या काही दिवसांत पावसाचा जोर कायम राहिल्यास परिस्थितीत आणखी सुधारणा होण्याची शक्यता आहे. त्यामुळे पुणेकरांवर लागू असलेल्या दिवसाआड पाणीपुरवठ्याबाबत महापालिका कोणता निर्णय घेणार, याकडे आता सर्वांचे लक्ष लागले आहे.