मुंबई | प्रतिनिधी
बृहन्मुंबई महानगरपालिका (BMC) क्षेत्रात शनिवार (४ जुलै) सकाळी ८.०० ते सायंकाळी ६.०० या दहा तासांच्या कालावधीत पूर्व उपनगरात सर्वाधिक पावसाची नोंद झाली. विक्रोळी पश्चिम येथील बिल्डिंग प्रपोजल कार्यालयात सर्वाधिक २४६.६ मिमी पाऊस नोंदविण्यात आला.
पूर्व उपनगरातील पवई महानगरपालिका शाळा (२४० मिमी), विक्रोळीतील टागोर नगर महानगरपालिका शाळा (२३१.८ मिमी), भांडुप कॉम्प्लेक्स (२२२.८ मिमी) आणि विक्रोळी अग्निशमन केंद्र (२२० मिमी) येथेही अतिमुसळधार पावसाची नोंद झाली.
पश्चिम उपनगरात चिंचोली अग्निशमन केंद्र (२२०.८ मिमी), पी/उत्तर विभाग कार्यालय (२१८.६ मिमी), अंधेरी अग्निशमन केंद्र (२०८.८ मिमी), जोगेश्वरी येथील हिंदुहृदयसम्राट बाळासाहेब ठाकरे महानगरपालिका शाळा (२०७.४ मिमी) आणि के-पश्चिम विभाग कार्यालय (२०६.२ मिमी) येथेही २०० मिमीपेक्षा अधिक पाऊस झाला.
मुंबई शहर भागात जी-दक्षिण विभाग कार्यालय (१२३.२ मिमी), एफ-उत्तर विभाग कार्यालय (१२०.४ मिमी), एफ-दक्षिण विभाग कार्यालय (११६.२ मिमी), मलबार हिल (११२.६ मिमी) आणि लोअर परळ येथील एन. एम. जोशी मार्ग महानगरपालिका शाळा (१११.२ मिमी) येथे लक्षणीय पर्जन्यवृष्टीची नोंद झाली.
सतत सुरू असलेल्या मुसळधार पावसामुळे मुंबईतील अनेक सखल भागांमध्ये पाणी साचले असून नागरिकांनी अत्यावश्यक कामाशिवाय घराबाहेर पडू नये, असे प्रशासनाने आवाहन केले आहे.
