काही जागांवर ‘पेच’ आणि बंडखोरीचे आव्हान–४ जूनकडे सर्वांचे लक्ष
भारतीय जनता पक्षाने सर्वाधिक ११ जागांवर- शिवसेना ४ जागांवर-अजित पवार यांची राष्ट्रवादी काँग्रेस २ जागांवर- उद्धव ठाकरेंची शिवसेना (यूबीटी) ६ जागांवर, तर शरद पवारांची राष्ट्रवादी काँग्रेस ३ जागांवर
मुंबई- विधान परिषदेच्या १७ जागांसाठी उमेदवारी अर्ज भरण्याच्या शेवटच्या दिवशी सर्वच राजकीय पक्षांसह काही अपक्ष उमेदवारांनी आपला उमेदवारी अर्ज भरला आहे. महायुती आणि महाविकास आघाडी या दोन्ही प्रमुख आघाड्यांनी आपापले मोहरे मैदानात उतरवले असून, १७ मतदारसंघांतील लढतींचे चित्र आता स्पष्ट झाले आहे. अनेक ठिकाणी अपक्ष आणि बंडखोरांनी अर्ज भरल्याने चुरस वाढली असली, तरी मुख्य मुकाबला हा महायुती विरुद्ध मविआ असाच रंगणार आहे.
सत्ताधारी महायुतीमध्ये भारतीय जनता पक्षाने सर्वाधिक ११ जागांवर आपले उमेदवार रिंगणार उतरवले आहेत. उपमुख्यमंत्री एकनाथ शिंदे यांची शिवसेना ४ जागांवर, तर उपमुख्यमंत्री अजित पवार यांची राष्ट्रवादी काँग्रेस २ जागांवर निवडणूक लढवत आहे. विरोधी बाकांवरील महाविकास आघाडीत काँग्रेसने आक्रमक पवित्रा घेत ८ जागांवर आपले उमेदवार दिले आहेत. उद्धव ठाकरेंची शिवसेना (यूबीटी) ६ जागांवर, तर शरद पवारांची राष्ट्रवादी काँग्रेस ३ जागांवर लढत आहे.
अनेक मतदारसंघांत अपक्ष उमेदवारांनी अर्ज भरल्याने आणि स्थानिक नेत्यांनी नाराजी व्यक्त केल्याने दोन्ही आघाड्यांची डोकेदुखी वाढली आहे. महायुतीमध्ये रायगड, छत्रपती संभाजीनगर-जालना, यवतमाळ, पुणे, नाशिक, परभणी आणि नांदेड या ८ जागांवर नाराजांनी अर्ज दाखल करत बंडाचे निशाण फडकावले आहे. नाशिकसारख्या ठिकाणी मविआचा अधिकृत उमेदवार नसल्याने पेच निर्माण झाला आहे.
अनेक ठिकाणी अपक्ष उमेदवारांनी आणि नाराज नेत्यांनी अर्ज भरल्यामुळे अधिकृत उमेदवारांची डोकेदुखी वाढली आहे. ४ जून ही उमेदवारी अर्ज मागे घेण्याची शेवटची तारीख असल्याने, त्या दिवशी बंडखोरी शमवण्यात नेत्यांना किती यश येते, यावरच विजयाचे समीकरण अवलंबून असेल. खरी लढत पक्षीय चिन्हांवर असली, तरी स्थानिक पातळीवरील गणिते या निवडणुकीत महत्त्वाची ठरणार आहेत.
१७ मतदारसंघातील प्रमुख लढती, आमने-सामने कोण?
| क्र. | मतदारसंघ | महायुतीचे प्रमुख उमेदवार (पक्ष) | मविआचे उमेदवार (पक्ष) |
| १ | सोलापूर | राजेंद्र राऊत (भाजप) | आदित्य फत्तेपूरकर (काँग्रेस) |
| २ | अहिल्यानगर | प्राजक्त तनपुरे (भाजप) | करण ससाणे (काँग्रेस) |
| ३ | ठाणे | रविंद्र फाटक (शिवसेना) | अभिजीत पवार (राष्ट्रवादी – शपा) |
| ४ | जळगाव | नंदकिशोर महाजन (भाजप) | शरद तायडे (शिवसेना – ठाकरे) |
| ५ | सांगली-सातारा | धैर्यशील माने (भाजप) | बाळासाहेब पाटील / अभयसिंह जगताप (राष्ट्रवादी) |
| ६ | नांदेड | अमर राजूरकर (भाजप) | रामदास पाटील (काँग्रेस) |
| ७ | यवतमाळ | दुष्यंत चतुर्वेदी (शिवसेना) | साहेबराव कांबळे (काँग्रेस) |
| ८ | पुणे | विक्रम काकडे (राष्ट्रवादी – आपा) | श्रीकांत पाटील (राष्ट्रवादी – शपा) |
| ९ | भंडारा-गोंदिया | अविनाश ब्राह्मणकर (भाजप) | दिलीप बनसोड (काँग्रेस) |
| १० | रायगड-रत्नागिरी-सिंधुदुर्ग | अनिकेत तटकरे (राष्ट्रवादी – आपा) | अधिकृत उमेदवार (शिवसेना – ठाकरे) |
| ११ | नाशिक | नरेंद्र दराडे (शिवसेना) | मविआचा उमेदवार नाही (अपक्षाला पाठिंबा) |
| १२ | वर्धा-चंद्रपूर-गडचिरोली | अरुण लखानी (भाजप) | शैलेश अग्रवाल (काँग्रेस) |
| १३ | अमरावती | प्रवीण पोटे (भाजप) | हर्षदीप देशमुख (काँग्रेस) |
| १४ | धाराशिव-लातूर-बीड | बसवराज पाटील (भाजप) | महेश देशमुख (काँग्रेस) |
| १५ | परभणी-हिंगोली | सईद खान (शिवसेना) | डॉ. विवेक नावंदर (शिवसेना – ठाकरे) |
| १६ | छत्रपती संभाजीनगर-जालना | अधिकृत उमेदवार (भाजप/शिवसेना) | अधिकृत उमेदवार (शिवसेना – ठाकरे) |
| १७ | नागपूर (पोटनिवडणूक) | डॉ. राजीव पोतदार (भाजप) | अतुल लोंढे (काँग्रेस) |
