संजय राऊत नाराज; कुमार सप्तर्षी पवारांना भेटले
रोहित टिळक यांनाही समज देण्यात आली
मुंबई-पंतप्रधान नरेंद्र मोदी यांच्या मंगळवारच्या पुणे दौऱ्यावरून चांगलेच राजकारण तापले आहे. या दौऱ्यात मोदी राष्ट्रवादी काँग्रेसचे अध्यक्ष शरद पवार यांच्यासोबत एकत्र येणार आहेत. यामुळे महाविकास आघाडीच्या नेत्यांमध्ये चलबिचल सुरू झाली आहे. काँग्रेस व शिवसेनेच्या ठाकरे गटाच्या नेत्यांनी या प्रकरणी पवारांना मोदींसोबत व्यासपीठ शेअर करण्यापूर्वी एकदा विचार करण्याचा सल्ला दिला आहे. शिवसेनेच्या ठाकरे गटाचे खासदार संजय राऊत यांनीही या प्रकरणी नाराजी व्यक्त केली आहे. जनतेच्या मनात संभ्रमावस्था निर्माण करणाऱ्या भूमिका महाविकास आघाडीच्या नेत्यांनी घेऊ नये, असे ते म्हणालेत. ज्येष्ठ सामाजिक कार्यकर्ते कुमार सप्तर्षी यांनीही या प्रकरणी पवारांची भेट गेऊन त्यांना मोदींसोबत व्यासपीठ शेअर करणे टाळण्याचा सल्ला दिला आहे. तुम्ही या कार्यक्रमाला उपस्थित राहिले तर देशात वेगळा संदेश जाईल, अशी बाब त्यांनी पवारांच्या निदर्शनास आणून दिली आहे.
पंतप्रधान नरेंद्र मोदी यांना उद्या पुण्यात लोकमान्य टिळक पुरस्कार प्रदान करण्यात येणार आहे. यावेळी शरद पवार त्यांच्यासोबत व्यासपीठावर असतील. राष्ट्रवादी काँग्रेसमधील बंडखोरीनंतर प्रथमच हे दोन मोठे नेते एका मंचावर असतील. काँग्रेस नेत्या वर्षा गायकवाड यांनी या प्रकरणी पवारांना या कार्यक्रमापासून स्वतःला दूर ठेवण्याची विनंती केली आहे.
पंतप्रधान नरेंद्र मोदी पुण्याला येत आहेत. शरद पवार त्या कार्यक्रमाला जाणार आहेत. पण महाविकास आघाडी म्हणून आमची त्यांना विनंती आहे की, त्यांनी जाण्यापूर्वी एकदा विचार करावा, असे वर्षा गायकवाड म्हणाल्या.
आपण महाविकास आघाडी म्हणून पंतप्रधान नरेंद्र मोदी आणि मणिपूर घटनेविरोधात सर्वसामान्यांमध्ये जातोय. त्यांचा निषेध करतोय. त्यामुळे त्यांच्यासोबत व्यासपीठावर एकत्र येणे कितपत योग्य आहे? त्यामुळे शरद पवार यांनी मोदींसोबत व्यासपीठावर एकत्र येण्यावर एकदा विचार करावा, असे काँग्रेसचे आवाहन आहे, असे त्या म्हणाल्या.
मणिपूरमध्ये महिला मदतीचा हात मागत होत्या. पण केंद्र सरकारने केवळ तमाशा पाहिला. देशाचे पंतप्रधान परदेशात फिरत होते. मणिपूरला जाण्यासाठी त्यांच्याकडे वेळ नव्हता. त्यांनी या प्रकरणी कोणतीही मदत केली नाही. त्याच्या निषेधार्थ आम्ही मशाल मार्च काढून सरकारचा निषेध नोंदवणार आहोत, असेही वर्षा गायकवाड यावेळी म्हणाल्या.
गायकवाड पुढे म्हणाल्या की, या प्रकरणी रोहित टिळक यांनाही समज देण्यात आली आहे. कारण या प्रकरणी सर्व हेवेदावे बाजूला सोडून विरोध करणे गरजेचे आहे.
