पुणे, ३१—लेखक आणि दिग्दर्शक यांच्यातील अतिशय दृढ नात्यामुळे चांगली कलाकृती रसिकांसमोर सादर होत असते. गेली ५० वर्षात मला या नात्यामुळे यश मिळत आहे असे जेष्ठ अभिनेत्री आशा काळे यांनी येथे सांगितले.
रसिकमोहिनी आणि एफ एफ टी जी ग्रुप निर्मित अमेरिकन अल्बम या नाटकाचा मुहूर्त करण्यात आला. त्यावेळी त्या बोलत होत्या. नाटकाचे लेखक राजन मोहाडीकर, दिग्दर्शक आणि नेपथ्यकार पुरुषोत्तम बेर्डे, निर्माते भाग्यश्री देसाई, झरीर इराणी, मोहनदास प्रभू , नाटकातील प्रमुख कलाकार रविंद्र मंकणी, आशुतोष नेर्लेकर, राजश्री आठवले, रुतुजा जोशी.. त्याप्रमाणे योगेश सोमण, केशव साठ्ये, ओंकार केळकर, सत्यजीत धांडेकर, अतुल ताम्हणकर, सुनील नाईक, नावडकर बंधू, जया जोग, नाटकाचे सूत्रधार सुनील महाजन, नृत्य दिग्दर्शक निकिता, मोघे आदी अनेक मान्यवर यावेळी उपस्थित होते.
मी भाग्यवान आहे कारण या नाटकाचा मुहूर्त माझ्या हस्ते होत आहे असे नमूद करुन काळे म्हणाल्या की, या नाटकाचा पहिला आणि ५०० व्या प्रयोगाला उपस्थित राहणार आहे. रंगभूमीशी माझे अनेक वर्षांचे नाते आहे. त्यामुळे रसिकांना आनंद देता आला आणि मला देखील आनंद मिळाला आहे.
लेखक मोहाडीकर यांनी नाटय लेखनाचा प्रवास उलगडला आणि नाट्य संहिता लेखनामागची भूमिका मांडली. निर्माती भाग्यश्री देसाई यांनी पुण्यात व्यावसायिक नाट्यनिर्मीती होणे गरजेची असल्याचे अधोरेखित केले. देसाई यांनी ‘रसिकमोहिनी’ संस्थेच्या आजवरच्या वाटचालीचा आढावा घेतला तसेच येत्या दोन महिन्यात हे नाटक रंगमंचावर येईल असे सांगितले. निर्माते इराणी आणि प्रभू यांनी मनोगत व्यक्त केले.
रुतुजा जोशी यांनी सूत्र संचालन केले.